1. Lapeny ango ma watwero bedo kwede ka watamo i kom jami ducu ma Jehovah ocweyo?

KA WATAMO i kom polo ki lobo ma Jehovah ocweyo-ni, ci watwero winyo calo laco jabuli Daudi ma olego ni: “Ka aneno polo, ma in itiyo ki cingi, ki dwe ki lakalatwe ma iketogi i kabedogi liking; dano kono gin ango ma miyo itamo pire, dano adana ma mwa-ni gin ango ma miyo iparo pire?” (Jab. 8:3, 4) Calo Daudi, watwero tamo kit ma watino kwede ka kiporowa ki lakalatwe mapol ma Jehovah ocweyogi dok watwero bedo ki ur ni Jehovah pud paro piwa. Kit ma wabineno kwede, Jehovah oparo pi dano aryo mukwongo, Adam ki Kawa, dok oweko gudoko jo me ode bene.

2. Jehovah onongo tye ki yub ango pi lutinone ma i lobo kany?

² Adam ki Kawa gubedo lutino pa Jehovah mukwongo i lobo kany, dok Jehovah obedo Wongi ma lamar ma i polo. En omiyo luot man tic me atima. Lubanga owaccigi ni: “Wunywal, wunya, wupong lobo, wulo bene.” (Acak. 1:28) Onongo myero gunywal lutino dok gugwok lobo ma kiminigi macalo pacogi. Ka onongo gubedo luwiny kun gitiyo tic ma Jehovah ominigi, Adam ki Kawa kacel ki lutinogi onongo gibibedo jo me ot pa Lubanga pi naka.

3. Pingo watwero waco ni Jehovah omiyo bot Adam ki Kawa tic ma pire tek i ode?

³ Adam ki Kawa onongo gitye ki tic mamwonya adada i ot pa Jehovah. Kit ma kicoyo kwede i Jabuli 8:5 (NWT), Daudi oloko kit man i kom kit ma Jehovah ocweyo kwede dano: “Ikete piny manok i te lumalaika, ka dong iketo  lalukana me dit ki deyo i wiye.” Tye lok ada ni dano pe kimine teko, ryeko, kacel ki diro ma lumalaika gitye kwede. (Jab. 103:20) Kadi bed kit meno, dano tye “piny manok” keken i te lumalaika. Meno pud dong gin me ur ya! I kare ma Jehovah ocweyo lunyodowa mukwongo, en ominigi kwo mamit adada.

4. Ngo ma otimme i kom Adam ki Kawa pien pe gubedo luwiny bot Jehovah, dok ngo ma wabinyamo i pwony man?

 ⁴ Ki cwercwiny madit, pien Adam ki Kawa pe gubedo luwiny bot Jehovah, gurwenyo mot me bedo jo me ot pa Jehovah. Man okelo adwogi marac adada bot likwayogi kit ma wabineno kwede lacen i pwony man. Ento yub pa Jehovah peya olokke. En pud mito ni dano ma luwiny gubed lutinone pi naka. Mukwongo, kong wanyamu kit ma Jehovah omiyo kwede deyo botwa. I nge meno, wabinyamo gin ma watwero timo me nyuto ni wamito bedo jo me ot pa Lubanga. Lacen, wabinyamo mot ma jo me ot pa Jehovah gibibedo kwede pi naka i lobo kany.

5. Watwero miyo deyo nining bot Lubanga pi cweyowa i calle?

⁵ Jehovah ominiwa deyo ki cweyowa i calle. (Acak. 1:26, 27) Pien kicweyowa i cal pa Lubanga, watwero dongo ki nyuto kite mamwonya calo mar, kica, gen, kacel ki kit ma atir. (Jab. 86:15; 145:17) Ka wawoto ki dongo kit magi, wamiyo deyo bot Jehovah dok wanyuto pwocwa bote. (1 Pet. 1:14-16) Ka watimo jami i yo ma yomo cwiny Wonwa me polo, wabedo ki yomcwiny kacel ki yengo i kwowa. Dok pien watye ki kit macal ki pa Jehovah, watwero doko kit dano ma en mito i ode.

6. I yo ma nining ma Jehovah omiyo kwede deyo bot dano i kare ma tye ka cweyo lobo?

⁶ Jehovah oyubo paco mamwonya adada piwa. Ma peya en ocweyo laco mukwongo, en kong oyubo lobo-ni pi dano. (Yubu 38:4-6; Jer. 10:12) Pien en lakica dok cinge yot, Jehovah ocweyo jami mabeco mapol me yomo cwinywa. (Jab. 104:14, 15, 24) I kine mogo, en okwanyo kare me tam i kom jami ma en ocweyo ci oneno ni gitye ‘mabeco tutwal.’ (Acak. 1:10, 12, 31) En omiyo deyo ki dano ki ketogi macalo ‘luloc ma loyo’ cwecce ducu ma i lobo. (Jab. 8:6) Lubanga mito ni dano ma gipe ki roc gunong mit pa gwoko cwecce mamwonya ma i lobo kany pi naka. Tika ikwanyo kare me pwoyo Jehovah pi yubbe mamwonya meno?

7. Yocwa 24:15 nyuto nining ni dano tye agonya me yero gin ma gimito?

⁷ Jehovah ominiwa mot me bedo agonya me moko tamwa piwa kenwa. Watwero yero gin ma wabitimo ki kwowa. (Kwan Yocwa 24:15.) Lubangawa ma lamar-ri cwinye bedo yom ka wayero me tic pire. (Jab. 84:11; Car. 27:11) Watwero tic ki bedo agonyawa me moko tam mukene mabeco mapol. Kong wanenu labol maber ma Yecu owekiwa.

8. Mi labol ma nyuto kit ma Yecu otiyo kwede ki bedo agonyane me yero gin ma en mito timone.

⁸ Ka walubo lanen pa Yecu, wayero me keto miti pa jo mukene mukwongo me ka megwa. I nino mo ma Yecu ki lukwenane guol matek, gucito ka mo ma oling mot kun onongo gitye ki gen ni gibiyweyo wigi kunu. Ento meno pe otwere. Lwak dano mapol gulubo korgi dok onongo gitye ki miti matek me winyo pwony pa Yecu. Yecu cwinye pe ocwer i komgi. Me ka meno, kica omake i komgi. Dong, ngo  ma Yecu otimo? En ‘opwonyogi ki lok mapol.’ (Mar. 6:30-34) Ka walubo lanen pa Yecu ki jalo cawawa kacel ki kerowa me konyo jo mukene, wakelo deyo bot Wonwa me polo. (Mat. 5:14-16) Wanyuto bene ki Jehovah ni wamito bedo jo me ode.

9. Gin ango ma lunyodo myero wigi opo iye?

⁹ Jehovah omiyo bot dano kero me nywalo lutino. Dok omiyo ki lunyodo tic me pwonyo lutinogi me maro Jehovah ki tic pire. Ka itye lanywal, tika itye ki pwoc pi mot mamwonya man? Jehovah omiyo ki lumalaika mic mamwonya mapol, ento en pe ominigi kero me nywalo lutino. Pi meno, ka in lanyodo, bed ki pwoc madit pi mot me gwoko lutinoni. Wun lunyodo, kiminiwu tic ma pire tek adada me ‘pwonyo ki nyebo lutinowu ki kit mabeco ma Jehovah pwoyo.’ (Ep. 6:4; Nwo. 6:5-7; Jab. 127:3) Me konyo lunyodo, dul pa Jehovah miyo jami tic mapol ma jenge i kom Baibul, me labolle bukke, vidio, wer, kacel ki pwony ma tye i jw.org. Nen ka maleng ni, Wonwa me polo kacel ki Wode gimaro lutino. (Luka 18:15-17) Ka lunyodo gijenge i kom Jehovah dok gitute matek me gwoko lutinogi, ci cwiny Jehovah bedo yom adada. Dok lunyodo magi gikonyo lutinogi me bedo ki gen me doko jo me ot pa Jehovah pi naka!

10-11. Gin ango ma Jehovah oweko twere botwa macalo adwogi me ginkok?

¹⁰ Jehovah ominiwa Wode ma en maro loyo wek wadok jo me ode. Kit ma waneno kwede i  paragraf me 4, i kare ma Adam ki Kawa gutimo bal, onongo dong gin kacel ki lutinogi pe gitwero bedo i kin jo me ot pa Jehovah. (Rom. 5:12) Adam ki Kawa gukwero winyo Lubanga akaka, pi meno opore ni kikwanygi woko ki i kin jo me ot pa Jehovah. Ento lutinogi kono? Jehovah maro dano, pi meno en oketo yub pi lutinogi ma luwiny me doko jo me ode odoco. En otimo man kun tiyo ki gityer pa Wode acel keken Yecu Kricito. (Jon 3:16; Rom. 5:19) Jehovah onongo dong twero jolo dano 144,000 ma lugen macalo lutinone pi gityer pa Yecu.​—Rom. 8:15-17; Yabo 14:1.

¹¹ Medo i kom meno, dano milion mapol ata gitye ka timo miti pa Lubanga. Gitye ki gen me doko jo me ot pa Lubanga i nge loyo atematema me agikki i nge loc me mwaka 1,000 pa Kricito. (Jab. 25:14; Rom. 8:20, 21) Kit macalo gitye ki gen meno, i kare-ni gitwero lwongo Lacwecgi Jehovah ni “Wonwa.” (Mat. 6:9) Jo ma kibicerogi bene kibiminigi kare me pwonyo gin ma Jehovah mito ki botgi. Jo ma gibiyero me lubo tirane i agikkine gin bene gibidoko jo me ode matwal.

12. Lapeny mene ma wabinyamone kombeddi?

¹² Kit ma waneno kwede, Jehovah okwanyo kare me miyo deyo bot dano i yo mapatpat. En dong otyeko jolo jo ma kiwirogi macalo lutinone, dok en omiyo ki lwak “dano mapol ata” gen me doko lutinone i lobo manyen. (Yabo 7:9) Gin ango ma watwero timo me nyuto ki Jehovah ni wamito bedo jo me ode pi naka?

13. Ngo ma omyero watim wek wadok jo me ot pa Lubanga? (Marako 12:30)

¹³ Nyut marri pi Jehovah ki tic pire ki cwinyi ducu. (Kwan Marako 12:30.) Lubanga ominiwa mic mabeco mapol. Mic acel i kin magi ma pire tek adada obedo kerowa me woro en. Wanyuto  ki Jehovah ni wamare ki ‘gwoko cikke.’ (1 Jon 5:3) Yecu oloko me kaka Wonne kun cikowa ni omyero walok dano gudok lupwonnyene kun wabatijagi. (Mat. 28:19) En bene ocikowa ni omyero wamarre i kinwa kekenwa. (Jon 13:35) Jehovah biweko jo ma gilubo cikke gidoko jo me ode, ma ginonge i but lobo-ni ducu.​—Jab. 15:1, 2.

14. Watwero nyuto mar pi jo mukene nining? (Matayo 9:36-38; Jo Roma 12:10)

¹⁴ Nyut mar pi jo mukene. Mar aye obedo kit pa Jehovah ma pire tek loyo. (1 Jon 4:8) Jehovah onyuto mar piwa i kare ma onongo wan pud peya wangeye. (1 Jon 4:9, 10) Walubo lanene ka wanyuto mar pi jo mukene. (Ep. 5:1) Yo ma pud dong ber loyo ma watwero nyuto kwede mar bot jo mukene aye ki konyogi me ngeyo Jehovah ma kare pud tye. (Kwan Matayo 9:36-38.) Ka watimo kit meno, waminigi kare me doko jo me ot pa Lubanga. Ka ngat moni dong otyeko nongo batija, omyero wamedde ki nyute mar kacel ki woro. (1 Jon 4:20, 21) Man kwako gin ango? Gin acel aye ni, wagene dok pe wabedo ki gung cwiny mo i kome. Me labolle, ka pe waniang pingo en otimo gin moni ci pe omyero wacak tamo ni en tye ki cwiny marac. Me ka meno, wabimiyo deyo ki ominwa, kun wanene macalo ngat ma rwomme dit loyowa.​—Kwan Jo Roma 12:10; Pil. 2:3.

15. Omyero wanyut kica bot angagi?

¹⁵ Nyut kica bot dano ducu. Ka wamito bedo i kin jo ma gibilwongo Jehovah ni Wongi pi naka, ci omyero waket i tic i kwowa jami ma wakwano i Lok pa Lubanga. Me labolle, Yecu opwonyo ni omyero wanyut cwiny me kica bot dano ducu, kadi wa lumonewa. (Luka 6:32-36) I kare mogo, watwero nongo ni timo man tek adada. Ka tye kit meno, ci omyero wapwonnye me tam ki timo jami calo Yecu. Ka watute matek me bedo luwiny bot Jehovah ki lubo lanen pa Yecu, ci wanyuto ki Wonwa me polo ni wamito bedo i kin jo me ode pi naka.

16. Watwero gwoko nying maber pa luwor Jehovah nining?

¹⁶ Gwok nying maber ma jo pa Jehovah gitye kwede. I gang, pol kare awobi matidi lubo jami ma omine madit timo. Ka omine madit lubo tira me Baibul i kwone, ci en biweko lanen maber pi omine matidi-ni. Ka omine madit ocako timo jami maraco, ci omine matidi twero lubo lanene. Tye marom aroma i ot pa Jehovah bene. Ka Lakricitayo ma onongo tye lagen ocako lubo tam pa jo mungak, nyo ocako timo tim tarwang, nyo gin mo mukene marac, ci man twero kelo atematema bot jo mukene bene me lubo lanene me timo gin marac. Jo ma gitimo meno gibalo nying jo me ot pa Jehovah. (1 Tec. 4:3-8) Omyero wagwokke wek pe walub lanen maraco dok pe waye ni gin mo keken okwanywa woko ki bot Wonwa me polo ma lamar-ri.

17. Kodi tam ango ma omyero wakwer woko, dok pingo?

¹⁷ Ket genni i kom Jehovah ento pe jami me kom. Jehovah ocikke ni ebiminiwa cam, ginaruka, ki kabedo ka waketo pi Kerre mukwongo dok wakwo ma lubbe ki rwomme me kit ma atir. (Jab. 55:22; Mat. 6:33) Ka wageno cikke pa Jehovah meno, ci pe wabitamo ni jami me kom ma i lobo-ni bigwokowa dok biminiwa yomcwiny me ada. Wangeyo ni yo acel keken ma watwero nongo kwede wic ma opye mot aye ki timo miti pa Jehovah.  (Pil. 4:6, 7) Kadi bed watye ki cente ma waromo wilo jami mapol, omyero kong watam ka watye ki cawa nyo kero me tic ki jami magi ducu kun wagwokogi maber. Tika watwero cako dongo miti matek tutwal pi jamiwa? Wiwa myero pe owil ni Lubanga ominiwa tic me atima i ode. Pi meno, omyero pe wawek gin mo keken owir tamwa woko. Ki lok ada, pe wamito ni wabed calo awobi ma onongo maro jamine matek adada ma oweko okwero lubo kor Yecu. Pi meno, en okeng mot me tic pi Jehovah kacel ki mot me doko wode!​—Mar. 10:17-22.

18. Deyo kacel ki mot madit ango ma dano ma gin luwiny gibinongone pi naka?

¹⁸ Dano ma gin luwiny gibinongo deyo ma pud dong dit loyo ducu​—mot me maro ki woro Jehovah pi naka! Jo ma gitye ki mot me kwo i lobo gibibedo ki yomcwiny me gwoko lobo man ma Jehovah oyubo maber adada me bedo pacogi. Cokcok-ki, lobo man kacel ki jami ducu ma kwo iye kibirocogi ci gidoko manyen i te loc me Ker pa Lubanga. Yecu bijwayo pekki ducu ma obino i kare ma Adam ki Kawa gumoko tamgi me a woko ki i kin jo me ot pa Jehovah. Jehovah bicero dano milion mapol ata ci minigi kare me nongo kwo ma pe tum labongo two mo keken i lobo paradic. (Luka 23:42, 43) Ka dano ma gitiyo pi Jehovah dong gipe ki roc mo, ci gin ducu gibibedo ki “dit ki deyo” ma Daudi ocoyo pire-ni.​—Jab. 8:5.

19. Gin ango ma omyero wiwa pe owil iye?

¹⁹ Ka itye ki gen me bedo i kin lwak “dano mapol ata,” ci itye ki gen mamwonya adada. Lubanga mari; en mito ni ibed i kin jo me ode. Pi meno, tim jami ducu ma itwero me yomo cwinye. Nino ducu myero wi pe owil i kom cikke pa Lubanga. Ter calo gin ma pire tek adada mot ma itye kwede me woro Wonwa me polo, dok ibed ki pwoc pi gen ma itye kwede me pakke pi naka!