1. Gin ango ma kipwonyi madok i kom Lacwecwa?

KA IDONGO i cing lunyodo ma gitye Lucaden pa Jehovah, ci nen calo ipwonyo lok i kom Jehovah nicakke i kare ma pud itidi adada. Kipwonyi ni en aye Lacwec, kite mwonya adada, dok mito loko lobo man wek odok paradic.​—Acak. 1:1; Tic 17:24-27.

2. Jo mogo gineno jo ma giye i kom Lacwec nining?

² Ento jo mapol pe giye ni Lubanga tye, dok pe giye ni en ocweyo jami ducu. Me ka meno, gin giwaco ni kwo ocakke ki i kom gin mo ma dul kome nok ci odoko gin mo ma dul kome pol dok niang kite tek. I kin jo ma giye pwony meno, tye iye jo ma gukwano i rwom ma lamal adada. Giromo waco ni cayan dong otyeko moko ni lok me Baibul pe tye kakare dok ni jo ma giye i kom Lacwec gubedo jo ma pe gukwano, gigoro, dok gin luming.

3. Pingo pire tek ni wajing niyewa piwa kenwa obed matek?

³ Tika gin ma jo ma gukwano i rwom ma lamal giwaco biweko wabedo ki akalakala ka ce Jehovah obedo Lacwecwa ma lamar? Man jenge tutwal i kom tyen lok ma omiyo waye ni Jehovah obedo Lacwec. Tika waye pien meno aye gin ma kiwacciwa ni omyero waye nyo pien wakwanyo kare me ngiyo piwa kenwa jami ma moko ni Jehovah obedo Lacwec? (1 Kor. 3:12-15) Kadi dong wabedo Lucaden pi mwaki mapol nyo manok, wan ducu omyero wamedde ki dongo niyewa. Ka wamedde ki timo meno, ci pe wabiye “tam me ryeko nyo me bwola mo ma tere pe” pa jo ma gipwonyo olungtuke me gin ma tye i Lok pa Lubanga. (Kol. 2:8; Ibru 11:6) Me konyowa, pwony man binyamo (1) tyen lok ma omiyo jo mapol pe giye i kom Lacwec, (2) kit ma itwero dongo kwede niyeni i kom Jehovah Lacwecci, ki  dongo (3) kit ma itwero gwoko kwede niye meno bedo matek.

4. Ma lubbe ki Jo Ibru 11:1 niye me ada jenge i kom ngo?

⁴ Jo mogo gitamo ni bedo ki niye tyen lokke ni iye i kom gin moni labongo lanyut mo me mokone. Ento Baibul tittiwa ni meno pe obedo niye me ada. (Kwan Jo Ibru 11:1.) Tye ni, niye i kom jami ma pe watwero nenogi calo, Jehovah, Yecu, ki Ker pa Lubanga kubbe macok adada ki lanyut ma moko ni gitye ada. (Ibru 11:3) Lacayan mo ma odoko Lacaden pa Jehovah owaco ni: “Lucaden pa Jehovah gitye ki jami ma moko niyegi ma cayan omoko ni tye ada. Pe gikwero lok ada me cayan.”

5. Pingo jo mapol gitamo ni kwo ocakke pire kene labongo Lacwec?

⁵ Waromo pennye ni, ‘Pingo jo mapol pe giye ni Lubanga ocweyo jami makwo ducu kun watye ki jami mapol adada ma moko ni Lubanga obedo Lacwec?’ Jo mogo peya gukwanyo kare me ngiyo jami ma moko pigi kengi. Robert, ma i kare-ni tye Lacaden pa Jehovah owaco ni: “Kit macalo pe kipwonyowa lok mo keken i kom cwec i cukul, an atamo ni meno pe tye lok ada. I kare ma atye mwaka 22 aye aloko ki Lucaden pa Jehovah ci apwonyo ni Baibul miniwa tyen lok maber adada me ye ni Lubanga ocweyo jami ducu.” *​—Nen bok ma wiye tyen ni “ Kwena ma Pire Tek Bot Lunyodo.”

6. Pingo jo mogo gikwero woko ni Lacwec pe?

⁶ Jo mukene pe giye i kom Lacwec pien  giwaco ni giye i kom gin ma gineno ki wanggi keken. Ento lok ada tye ni, giye i kom jami ma pe gineno bene, me labolle yamo, pien gitye ki lanyut ma moko ni yamo tye ada. Kodi niye ma kitito pire i Baibul-li kwako ‘jami ma pe kineno komgi ento gitye ada.’ (Ibru 11:1) Mito kare ki kero me ngiyo piwa kenwa lanyut magi, dok pol pa dano komgi wac me timo meno. Ngat ma pe okwanyo kare me ngiyo lanyut magi pire kene twero moko ni Lubanga pe.

7. Tika dano ducu ma gukwano i rwom ma lamal gikwero woko ni Lubanga aye ma ocweyo jami ducu? Tit kong.

⁷ I nge ngiyo lanyut ma tye, lucayan mogo gumoko ni Lubanga aye ma ocweyo jami ducu. * Calo Robert ma kiloko i  kome con-ni, lucayan mogo gitamo ni Lacwec pe pien ma naka yang peya kipwonyo lok i kom cwec i univaciti. Kadi bed kit meno, lucayan mapol dong gupwonyo lok i kom Jehovah dok gimare. Kit ma lucayan magi gutimo kwede, wan ducu omyero watute matek me dongo niyewa piwa kenwa i kom Lubanga, kadi bed wakwano i rwom ma lamal nyo pe. Pe tye ngat mo ma twero timo meno piwa.

8-9. (a) Lapeny mene ma wabinyamo kombeddi? (b) Pwonyo lok i kom cwec bikelli adwogi maber ango?

⁸ Itwero dongo niyeni i kom Lacwec nining? Kong wanenu yo aryo ma watwero timo kwede meno.

⁹ Kwany kare me ngiyo cwec. Itwero dongo niyeni i kom Lacwec ki ngiyo lee, ginapita, kacel ki lakalatwe. (Jab. 19:1; Ic. 40:26) Ka imedde ki pwonyo lok i kom jami magi, ci ibimoko ni Jehovah aye obedo Lacwec. Bukkewa pol kare bedo ki pwony ma tito matut lok i kom cwec. Pe ilwor kwano pwony magi kadi bed inongo ni niang lok mogo iye tek. Nong pwony madwong ki iye kit ma itwero kwede. Dok wi pe owil me neno vidio mamwonya ma giloko i kom cwec ma kinyuto i gurewa me rijon ci lacen kicwalo woko i kabedowa me Intanet me jw.org, i mwaki mogo macok cok-ki.

10. Mi labol ma nyuto kit ma jami ma kicweyogi gimoko ni Lacwec tye. (Jo Roma 1:20)

¹⁰ Ka itye ka ngiyo cwec, ket cwinyi tutwalle i kom gin ma cwec meno pwonyi i kom Lacwec. (Kwan Jo Roma 1:20.) Me labolle, ceng miyowa lyeto ki dero ma mitte adada me gwoko kwo i lobo-ni, ento dero ceng mogo twero kelo awano i kom jami makwo. Mitte adada ni kigwokwa ki i kom dero ceng maraco magi. Dok bene Lacwec oketo yub me gwokowa! I yo ma nining? Tye yamo mo ma orumo wi lobo ma bedo calo keikei ma ye dero mabeco me donyo i lobo ento gengo dero maraco woko. Ka dero maraco ma a ki i kom ceng omedde, yamo ma gwoko lobo-ni bene medde. Tika meno pe weko iye ni ngat mo ma ocweyo jami magi tye, dok ni en obedo ngat ma lamar dok maryek adada?

11. Itwero nongo ngec i kom cwec ma romo dongo niyeni ki kwene? (Nen bok ma wiye tye ni “ Ngec ma Twero Dongo Niyeni i Kom Lacwec.”)

¹¹ Itwero nongo ngec madwong ma twero dongo niyeni i kom cwec ka itiyo ki Buk ma Konyo Lucaden pa Jehovah me Kwedo Lok kun bene itimo kwed i jw.org. Iromo cako ki kwano pwony nyo neno vidio ma nonge i bute me “Kiyubo Mono Ayuba?” Pwony kacel ki vidio magi kiyubogi macek cek dok gimiyo ngec me aura i kom lee kacel ki cwec mukene. Gimiyo bene labol i kom kit ma lucayan gitye ka tute kwede me poro cwec magi.

12. Ka itye ka kwano Baibul, jami mene ma omyero iket cwinyi iye?

¹² Kwan Baibul. Lacayan ma kiloko i kome i paragraf me angwen-ni pe ocako ye i kom Lacwec cutcut. Ento i nge kare mo, en odongo niye. En owaco ni: “Niyena pe odongo pi gin ma akwano i cayan keken. Ento odongo pi gin ma akwano ki i Baibul bene.” Twero bedo ni in dong itye ki ngec ma atir madok i kom pwony me Baibul. Kadi bed kit meno, wek idong niye i kom Lacwec, omyero imedde ki kwano Lok pa Lubanga. (Yoc. 1:8; Jab. 119:97) Me labolle, nen kong kit ma Baibul tito kwede kore ki kore jami mutimme mwaki mapol angec. Tam bene i kom  lok pa lunebi ma gucobbe kakare ki kit ma luco Baibul lokgi ducu rwatte. Timo meno bijingo niyeni ni Lacwec ma lamar tye, ni en aye ma ocweyowa dok oweko kicoyo Baibul. *​—2 Tem. 3:14; 2 Pet. 1:21.

13. Mi labol acel me ryeko ma nonge i Lok pa Lubanga.

¹³ Ka itye ka kwano Lok pa Lubanga, ket cwinyi i kom kit ma tira ma iye tye me kony kwede. Me labolle, Baibul ociko wacon ni maro cente kelo “lwak can mapol ata.” (1 Tem. 6:9, 10; Car. 28:20; Mat. 6:24) Tika lok meno pud tye ada wa i kare-ni? Buk mo acel ma loko i kom kit pa dano i kare-ni owaco ni: “Pol kare jo ma gimaro cente cwinygi pe bedo yom dok gilwenyo ki two par. Kadi wa jo ma gimito medo rwom me kwogi manok keken, cwinygi pe bedo yom dok gibedo ki peko me yotkom mapol.” Tira ma Baibul omiyo, madok i kom dongo mar pi cente pud dong tye me kony ya! Tika itwero tamo i kom cik mogo ma igi lac me Baibul ma tye me kony? Ka wamedde ki dongo pwoc pi tira me Baibul, ci man biweko wajenge i kom ryeko ma Lacwecwa ma lamar-ri miyo. (Yak. 1:5) Macalo adwogine, wabinongo yomcwiny i kwowa.​—Ic. 48:17, 18.

14. Kwano Baibul i yo matut bikonyi me niang gin ango madok i kom Jehovah?

¹⁴ Kwan Baibul ki yub me ngeyo Jehovah maber. (Jon 17:3) Ka iwoto ki kwano Ginacoya, ibipwonyo lok i kom kit pa Jehovah. Kite magi bene inenogi ka ngiyo cwec. Pwonyo lok i kom kit pa Jehovah konyowa me moko ni Jehovah tye ada. (Nia 34:6, 7; Jab. 145:8, 9) Ka imedde ki ngeyo Jehovah maber, ci niyeni i kome bene bidongo, marri pire bimedde, dok watti kwede bijing doko matek.

15. Adwogi maber ango ma ibinongo ka inywako niyeni ki jo mukene?

¹⁵ Nywak niyeni i kom Lubanga ki jo mukene. Ka iwoto ki timo meno, niyeni bene bijing. Ento ket kong ni ngat mo ma itye ka tito kwena bote openyi lok i kom tye pa Lubanga ci in pe ingeyo kit me dok iye. Tute me nongo lagam ma jenge i kom Baibul i bukkewa, ci inywak ki dano meno. (1 Pet. 3:15) Itwero penyo Lacaden lawoti mo ma tye ki ngec wek okonyi. Kadi bed ngat ma pe ye i kom Lubanga-ni oye lagammi me Baibul nyo pe, pud ibinongo adwogi maber ki i timo kwed. Niyeni bidongo bedo matek. Macalo adwogine, pe ibiye lok pa jo ma ginen calo giryek nyo gukwano i rwom ma lamal ma giwaco ni Lacwec pe.

16. Gin ango ma twero timme ka pe wamedde ki dongo kacel ki gwoko niyewa wek obed matek?

¹⁶ Kadi bed dong watiyo pi Jehovah pi mwaki mapol, mitte ni wamedde ki dongo kacel ki gwoko niyewa i kom Jehovah. Pingo? Pien ka pe wagwokke, niyewa twero doko goro. Wi opo ni, niye jenge i kom lanyut ma moko ni jami ma pe kineno komgi gitye ada. Gin ma pe watwero neno komme, wiwa twero wil woko iye oyotoyot. Pi meno, Paulo olwongo bedo labongo niye ni “bal ma maro tweyowa woko liking.” (Ibru 12:1) Dong, watwero gwokke ki i owic meno nining?​—2 Tec. 1:3.

17. Kony ango ma wamito wek wamedde ki gwoko niyewa?

¹⁷ Mukwongo, leg Jehovah pi cwiny mere maleng, dok ibed ka timo meno teretere. Pingo? Pien niye tye i kin kit ma  cwiny maleng aye twero konyowa me dongone. (Gal. 5:22, 23) Pe watwero dongo ki gwoko niyewa i kom Lacwecwa labongo kony pa cwiny maleng. Ka wamedde ki lego Jehovah pi cwiny mere maleng, ci en bimiyone botwa. (Luka 11:13) Waromo bene lega ni: “Med niyewa!”​—Luka 17:5.

18. Ma lubbe ki Jabuli 1:2, 3, mot ango ma watye kwede i kare-ni?

¹⁸ Medo i kom meno, bed ka kwano Lok pa Lubanga piri keni kare ki kare. (Kwan Jabuli 1:2, 3.) I kare ma kicoyo jabuli meno, Luicrael manok keken aye onongo gitye ki kopi me Cik pa Lubanga. Ento, kabaka ki lulamdog onongo gitye ki kopi ma meggi, dok onongo i nge mwaka abiro ducu kiketo yub pi “co wa ki mon ki litino,” kacel ki lubedo ma i Icrael me winyo ka kikwano Cik pa Lubanga. (Nwo. 31:10-12) I kare pa Yecu, buk adola ma tye ki Ginacoya onongo nonge bot jo manok keken kacel ki i ot cokke pa Lujudaya. Ka kiporo ki karewa-ni, pol pa dano gitwero nongo Baibul olu nyo bute mo. Meno pud dong obedo mot madit adada botwa. Watwero nyuto nining ni watye ki pwoc pi mot meno?

19. Gin ango ma omyero watim me gwoko niyewa wek obed matek?

¹⁹ Watwero nyuto pwocwa me bedo ki Lok pa Lubanga ki kwanone nino ducu. Omyero waket cawa me kwano Baibul i yo matut, kun pe wakwano mere ka wanongo cawa. Ka walubo yub me kwanwa ci wabigwoko niyewa bedo matek.

20. Gin ango ma omyero wamok tamwa me timone?

²⁰ Pe calo “luryeko ki lunge-piny” me lobo man, wan watye ki niye matek ma jenge i kom Lok pa Lubanga. (Mat. 11:25, 26) Macalo adwogi me kwano Baibul, wangeyo pingo kwo i lobo-ni tye ka balle medde ameda ki gin ma Jehovah bitimo me cobone. Dong wamoku tamwa me medde ki jingo niyewa ki konyo jo mapol kit ma watwero me dongo niye i kom Lacwecwa. (1 Tem. 2:3, 4) Dok wamedde wunu ki kuro kare ma jo ducu ma gikwo i lobo-ni gibiwaco lok ma nonge i Niyabo 4:11 ni: “Rwotwa ki Lubangawa, in imyero me nongo deyo . . . pien in aye ma yam iketo jami ducu.”