1-2. Ngo ma wabinyamo i pwony man?

GO KONG ni itye ka kuro laremi mo me keli gin mo ma imito adada. Ibiwinyo nining ka en pe obino i cawa ma onongo wumoko? Tika cwinyi bitur? Carolok 13:12 wacciwa lok ada man ni: “Gen ma pe gicobo miyo two i cwiny dano.” Ento ka iniang ni tye tyen lok mo maber ma omiyo laremi-ni pe obino i cawa ma onongo itamo ni en bio iye kono? Ka tye kit meno, ci nen calo ibibedo atera me diyo cwinyi kun ikure.

² I pwony man, wabineno cik mogo ma igi lac me Baibul ma twero konyowa me dongo ‘cwiny me kuro Lubanga.’ (Mika 7:7) I nge meno, wabinyamo kabedo aryo ma mitte iye ni wadi cwinywa kun wakuro Jehovah me timo gin mo. Me agikkine, wabineno mot mapatpat ma tye ka kuro jo ma gitye atera me kuro Jehovah.

3. Carolok 13:11 pwonyowa gin ango?

³ Labol acel ma nyuto pingo omyero wadi cwinywa kicoyo i Carolok 13:11. Waco ni: ‘Lonyo ma ginongo oyotoyot rwenyo woko, ngat ma nongo lonyo manoknok lonyone bimedde.’ Gin ango ma wapwonyo ki i tyeng man? Dano maryek timo jamine motmot kun diyo cwinye dok nongo adwogi maber loyo.

4. Cik ma iye lac ma tye i Carolok 4:18 pwonyowa gin ango?

⁴ Carolok 4:18 tittiwa ni “yo pa jo ma kitgi atir [tye] calo dero me rupiny, ma ryeny nio wang ma piny dong  leng.” Lok man tito kit ma Jehovah konyo kwede jone me niang yubbe motmot. Ento tyeng man bene romo konyowa me niang kit ma Lakricitayo timo kwede alokaloka i kwone dok nyiko cok bot Jehovah. Dongo i yo me cwiny pe kitwero ruyone aruya. Tero kare. Ka waketo cwinywa i kwan piwa kenwa dok waketo i tic tira ma wanongo ki i Lok pa Lubanga kacel ki dulle, ci motmot wabidongo kit pa Kricito. Wabingeyo Lubanga bene maber. Nen kong kit ma Yecu omiyo kwede lapor i kom lok meno.

5. Labol ango ma Yecu omiyo me nyuto ni tero kare pi dano me timo alokaloka?

⁵ Yecu otiyo ki lapor me tito kit ma kwena me Ker ma watito-ni tye calo nyig kodi matidi ma dongo motmot i cwiny jo ma gimaro gin ma atir. En owaco ni: “Kodi cako twi, dongo, kun en [laco kodi] pe ngeyo kit ma timme kwede. Ngom kene aye miyo kodi nyako nyige; mukwongo kong twi, lacen ngok, ka nyig bel corre.” (Mar. 4:27, 28) Yecu onongo tye ka lok i kom ngo? En onongo tye ka tito ni kit macalo ginapita dongo motmot, ngat ma ojolo kwena me Ker-ri bene twero tero kare mo me timo alokaloka i kwone. Me labolle, ka lutino kwanwa me Baibul gunyiko cok bot Jehovah, wacako neno alokaloka mabeco mapol ma gitye ka timone. (Ep. 4:22-24) Ento wiwa myero opo ni, Jehovah aye weko kodi matidi meno dongo.​—1 Kor. 3:7.

6-7. Gin ango ma wapwonyo ki i kit ma Jehovah ocweyo kwede lobo?

⁶ I jami ducu ma en timo, Jehovah tero kare ma mitte me cobo ticce maber. En timo meno wek ekel deyo i nyinge ki me konyo jo mukene. Me labolle, nen kong kit ma Jehovah oyubo kwede lobo kore ki kore pi dano.

⁷ Ka Baibul tye ka tito kit ma Jehovah ocweyo kwede lobo, loko i kom kit ma en omoko kwede “borre ki lacce,” oguro “tedi te gutine” dok ocibo “got me  twokke.” (Yubu 38:5, 6) En bene okwanyo kare me ngiyo ticce maber. (Acak. 1:10, 12) Tika itwero goyo kit ma lumalaika guwinyo kwede i kare ma gubedo ka neno jami manyen ducu ma Jehovah ocweyo? Nen calo cwinygi obedo yom adada! Pi meno, gucako ‘dange ki yomcwiny.’ (Yubu 38:7) Gin ango ma wapwonyo? Otero mwaki alip mapol pi Jehovah me cweyo lobo, lacer, ki jami makwo ducu, ento i kare ma Jehovah oneno jami ducu ma en ocweyogi ki diro, en owaco ni gitye ‘mabeco tutwal.’​—Acak. 1:31.

8. Gin ango ma wabinyamo kombeddi?

⁸ Kit ma waneno kwede ki i labol magi, watwero nongo cik ma igi lac mapol i Lok pa Lubanga ma nyuto kit ma pire tek kwede me diyo cwinywa. Kombeddi dong wabinyamo kabedo aryo ma mitte ni wadi iye cwinywa kun wakuro Jehovah.

9. I kare mene ma twero mitte ni wadi cwinywa kun wakuro Jehovah?

⁹ Twero mitte ni wakur Jehovah wek ogam legawa. Ka walego pi teko me kanyo peko mo nyo pi kony me juko timo gin mo ma pe yomo cwiny Jehovah, watwero winyo calo Jehovah tye ka galle ki gamo legawa. Pingo Jehovah pe gamo legawa ducu cutcut?

10. Pingo mitte ni wadi cwinywa ka wakuro Jehovah me gamo legawa?

¹⁰ Jehovah winyo legawa maber adada. (Jab. 65:2) En neno legawa ma a ki i cwinywa calo lanyut me niyewa i kome. (Ibru 11:6) Ka walego bot Jehovah pi kony me timo gin ma yomo cwinye, en mito neno ni watye atera me tic matek me timo mitine. (1 Jon 3:22) Pi meno, ka walego bot Jehovah pi kony me juko timo gin ma en pe mito, twero mitte ni wadi cwinywa dok watim gin ducu ma watwero me timo alokaloka meno. Yecu okonyowa me niang ni pe kitwero gamo legawa mogo cutcut. En owaco ni: “Wulegi, ci gibimiyo botwu; wuyeny, ci wubinongo; wudwong doggola ci gibiyabo botwu. Pien dano ma lego gimiye, ki ngat ma yenyo bene nongo, ki ngat ma dwongo doggola bene gibiyabo doggola bote.” (Mat. 7:7, 8) Ka walubo tira man dok ‘wamedde matek i lega’ watwero bedo ki gen ni Wonwa me polo winyowa dok bigamo legawa.​—Kol. 4:2.

11. Jo Ibru 4:16 konyowa nining ka nen calo kitye ka galle ki gamo legawa?

¹¹ Kadi bed twero nen calo lagam me legawa tye ka galle, Jehovah ocikke me gamo legawa “i kare ma mitte.” (Kwan Jo Ibru 4:16.) Meno aye tyen lok mumiyo omyero pe wakok i kom Jehovah ka en pe ogamo legawa oyotoyot kit ma wamito kwede. Me labolle, dano dong gulego pi mwaki mapol ni Ker pa Lubanga obin dok okel agikki me lobo man. Yecu bene owaco ni omyero waleg pi Ker meno. (Mat. 6:10) Ento twero bedo me mingo ka warwenyo niye i kom Lubanga pien ni agikki pe obino i kare ma wan watamo ni myero obin iye! (Kab. 2:3; Mat. 24:44) Nyuto ryeko ka wamedde ki kuro Jehovah kun walego bote ki niye ni en bigamo legawa. Agikki bibino i kare ma opore kikome, pien Jehovah dong otyeko yero ‘nino ki cawa’ ma bibino iye. Dok meno bibedo nino maber loyo pi jo ducu.​—Mat. 24:36; 2 Pet. 3:15.

12. Awene ma twero bedo tek adada piwa me diyo cwinywa?

¹² Twero mitte ni wadi cwinywa dok wamedde  ki kanyo ka kitye ka terowa marac. Dano ma i lobo-ni pol kare gitero jo mukene marac pien ni gubedo co nyo mon, nyo pien rangi del komgi, kakagi, lobogi, nyo tekwarogi pat. Jo mukene kiterogi marac pien ni gitye lugoro nyo gitye ki two wic. Jo pa Jehovah mapol bene kitye ka terogi marac pi niyegi ma jenge i kom Baibul. Ka kiterowa marac, wiwa myero opo i kom lok pa Yecu. En owaco ni: “Ngat ma biciro nio wa i agikki bilarre.” (Mat. 24:13) Ento ket kong ni iniang ni ngat mo me kacokke otimo bal madit kono? Ka dong kityeko tito lok man bot luelda, tika ibiweko lok meno i cinggi kun idiyo cwinyi dok ikuro ni gibicobone i yo pa Jehovah? Gin ango ma twero mitte ni luelda gutim ka ngat mo otimo bal madit?

13. Gin ango ma Jehovah mito ni luelda gutim ka ngat mo otimo bal madit?

¹³ Ka luelda guniang ni ngat mo otimo bal madit i kacokke, gilego dok gipenyo Jehovah pi “ryeko ma oa ki malo” wek ginen gin ma otimme kit ma en neno kwede. (Yak. 3:17) Mitigi tye me konyo labal-li ‘ki i yone mugom wek gidwoke cen’ ka twerre. (Yak. 5:19, 20) Luelda bene gitye ki miti me timo gin ducu ma twere me gwoko kacokke ki me kweyo cwiny jo ma gitimo bal i komgi. (2 Kor. 1:3, 4) Ka luelda guniang ni ngat mo otimo bal madit, omyero kong gunge gin mutimme kikome, ma man twero tero kare. I nge meno, gilego dok gimiyo tira ma i Ginacoya ki diro kacel ki ‘pwod maberber.’ (Jer. 30:11) Kadi bed ni luelda pe gigalle, gin bene pe girune me moko tam. Ka luelda gulubo tira ma Jehovah ominigi, jo ducu me kacokke ginongo adwogi maber loyo. Ento, kadi bed luelda gutimo jami i yo ma atir, ngat ma kitimo bal i kome-ni pud twero bedo ki cwercwiny. Ka man aye gin ma otimme i komi, ngo ma itwero timo me kweyo arem cwiny ma itye kwede?

14. Labol mene me Baibul ma twero kweyo cwinyi ka Lakricitayo lawoti ocwero cwinyi?

¹⁴ Tika dong ngat mo ocwero cwinyi matek, ma meno twero bedo omego nyo lamego mo? Itwero nongo labol mabeco adada i Lok pa Lubanga ma pwonyowa kit ma watwero kuro kwede Jehovah me  yubo jami. Me labolle, kadi bed omegi Yucepu gutere marac, en pe oye ni bal ma omegine gutimo-ni owek ebed ngat ma cwinye kec. Me ka meno, en oketo cwinye i ticce pi Jehovah, dok Jehovah ogoyo laane i kome pi diyo cwinye kacel ki ciro can. (Acak. 39:21) I agikkine, Yucepu obedo ki kare me timo kica ki jo ma gucwero cwinye dok oneno kit ma Jehovah ogoyo kwede laane i kome. (Acak. 45:5) Calo Yucepu, wan bene wanongo kwe cwiny ka wanyikke cok ki Jehovah dok wakuro ni en ocob peko-ni i kare ma opore.​—Jab. 7:17; 73:28.

15. Gin ango ma okonyo laminwa mo me kanyo tim maraco ma kitimo i kome kun bedo ki kuc?

¹⁵ Ngene kene ni, pe jami maraco ducu ma kitimo i komwa rac calo ma kitimo i kom Yucepu, ento wan ducu cwinywa cwer ka kiterowa i yo marac. Ka watye ki peko ki ngat mo, kadi wa ngat ma pe woro Jehovah, wabinongo adwogi maber ka waketo cik ma igi lac me Baibul i tic. (Pil. 2:3, 4) Nen kong gin mo mutimme. Laminwa mo cwinye ocwer adada i kare ma oniang ni latic lawote mo obedo ka loko lok maraco dok ma pe tye ada i kome. Me ka rune me dok iye, laminwa okwanyo kare me lwodo lanen pa Yecu. I kare ma kiyete, en pe oyeto jo mukene. (1 Pet. 2:21, 23) I nge lwodo lok meno, laminwa-ni omoko tamme pe me timo gin mo keken. Lacen, en oniang ni latic lawote-ni onongo kara kome lit adada dok onongo tye ki par matek. Laminwa-ni omoko tamme ni nen calo latic lawote-ni onongo pe tye ki cwiny marac i kare ma oloko lok meno. Dong laminwa-ni cwinye yom ni ekanyo tim marac meno, dok en onongo kuc i kwone.

16. Gin ango ma twero cuko cwinyi ka itye ka kanyo tim marac ma kitimo i komi? (1 Petero 3:12)

¹⁶ Ka itye ka deno can pi tim marac ma kitimo i komi nyo pi tyen lok mukene, wi opo ni Jehovah nyikke cok ki “jo ma gitye ki arem madwong i cwinygi.” (Jab. 34:18) En marri pien idiyo cwinyi dok itero pekoni bote. (Jab. 55:22) En aye Langolkop me lobo ducu. En neno jami ducu ma timme. (Kwan 1 Petero 3:12.)  Pi meno, ka itye ki pekki madongo ma pe itwero cobone keni, wi opo ni pire tek adada me kuro Jehovah wek en otim gin mo iye.

17. Gin ango ma Jehovah ocikke me timone kit ma kinyuto kwede i Icaya 30:18?

¹⁷ Ma pe orii, Wonwa me polo bigoyo laane i komwa kun tiyo ki Kerre me polo. Icaya 30:18 waco ni: “[Jehovah] tye ka kuro me nyuto berre botwu; meno omiyo en oyubbe pi timowu kica. Pien Rwot aye Lubanga ma ngolo kop atir, jo ducu ma gibedo kun gikure gitye ki gum [yomcwiny].” Jo ma gidiyo cwinygi kun gikuro Jehovah gibinongo mot mapol i kare-ni ki i lobo manyen ma bino.

18. Mot ango ma watye ka kurone?

¹⁸ Ka jo pa Lubanga gudonyo i lobo manyen, pe dong bimitte ni gukany pekki ma gitye ka kato ki iye i kare-ni. Tero dano marac bibedo pe, arem bene dong bibedo pe. (Yabo 21:4) Pe bimitte ni wakur jami ma wamito pien jami ma mitte bibedo tye ma romo jo ducu. (Jab. 72:16; Ic. 54:13) Meno pud dong bibedo mot madit ya!

19. Gin ango ma Jehovah tye ka yubowa pire motmot?

¹⁹ Jehovah tye ka yubowa kombeddi me kwo i te locce ki konyowa me loyo kitwa maraco kun wadongo kit mogo ma yomo cwinye. Pe iwek cwinyi otur ci igik tic pi Jehovah woko. Kwo maber loyo tye i anyim! Ka wawoto ki kuro kare mamwonya meno, wabedu ki yomcwiny kun wadiyo cwinywa wakuro Jehovah me timo jami ma en ocikke ni ebitimogi!