1. Ma lubbe ki Jo Ibru 12:1, ngo ma mitte ni watim wek wacob ngwec me kwo ma wacako?

 BAIBUL oporo kwowa macalo Lukricitayo ki pyem ngwec. Lungwec ma gityeko ngwec man maber gibinongo mot me kwo ma pe tum. (2 Tem. 4:7, 8) Myero watute matek me medde ki ngwec, tutwalle kit macalo dong watwero neno dog tol-li. Lakwena Paulo, ma ocobo ngwecce me kwo maber, otitiwa gin ma bikonyowa me cobo ngwecwa. En otitiwa ni omyero “wabolu gin mogo mapek-gu woko ducu, . . . wek waringu dong ngwec pyem ma tye i nyimwa, kun waciro.”—Kwan Jo Ibru 12:1.

2. Tyen lokke ngo me ‘bolo gin mogo mapek-gu woko ducu’?

² I kare ma Paulo ocoyo ni omyero ‘wabolu gin mogo mapek-gu woko ducu,’ tika onongo en tye ka waco ni pe tye yec mo keken ma Lakricitayo myero oting? Pe. Me ka meno, en onongo tye ka waco ni myero wabol yec mo keken ma pe mitte. Kodi yec meno twero gengowa ki ngwec maber dok weko waol woko. Me medde ki ngwec, omyero waniang oyotoyot ka watye ka tingo kodi yec meno ci wabol woko cutcut. Ento ki tungcel, pe wamito bolo jami ma myero wating. Ka watimo man, ci pe kibiye ni wamedde ki ngwec. (2 Tem. 2:5) Yec mene ma myero wating?

3. (a) Ma lubbe ki Jo Galatia 6:5, gin ango ma omyero wating? (b) Ngo ma wabinyamo i pwony man, dok pingo?

³ Kwan Jo Galatia 6:5. Paulo otitiwa gin mo ma omyero  wating. En ocoyo ni, “Dano acel acel tye ki yecce ma myero oting.” Ki kany, Paulo onongo tye ka lok i kom tic ma wan ducu ki acel acel watye kwede i nyim Lubanga, dok man obedo gin ma ngat mukene pe twero timone piwa. I pwony man, wabinyamo gin ma ‘yecwa’ meno kwako ki kit ma watwero tingone kwede. Medo i kom meno, wabibedo ki kare me ngeyo yec mogo ma konygi pe ma twero bedo ni watye ka tingone kacel ki kit me bologi woko. Tingo yecwa ki dong bolo yec ma konygi pe woko, bikonyowa me cobo ngwecwa me kwo.

4. Pingo cobo kwongewa me tic pi Jehovah matwal pe obedo yec mapek? (Nen bene cal.)

⁴ Kwongewa me tic pi Jehovah matwal. I kare ma wadyere bot Jehovah, wakwonge me wore ki me timo mitine. Omyero wagwok kwongewa meno. Cobo kwongewa bot Jehovah obedo tic matek, ento pe obedo yec mapek. Tye kit meno pien ni Jehovah ocweyowa me tiyo mitine. (Yabo 4:11) En ocweyowa ki miti me ngeyo kacel ki wore, dok ocweyowa i calle. Macalo adwogine,  watwero nyikke cok kwede kun wanongo yomcwiny i tiyo mitine. (Jab. 40:8) Medo i kom meno, ka watiyo miti pa Lubanga dok walubo kor Wode, ‘wabilimo yweyo i cwinywa.’—Mat. 11:28-30.   

5. Ngo ma twero konyi me cobo kwongeni? (1 Jon 5:3)

⁵ Itwero tingo yec man nining? Tye jami aryo ma twero konyi. Mukwongo, medde ki jingo marri pi Jehovah. Itwero timo meno ki bedo ka tam matut pi jami mabeco ducu ma en dong otyeko timo piri kacel ki jami mabeco ma en bitimone i kare me anyim. Ka marri pi Jehovah woto ki dongo, bibedo yot boti me bedo lawiny bote. (Kwan 1 Jon 5:3.) Me aryo, lub lanen pa Yecu. En obedo ki kare me tiyo miti pa Lubanga kore ki kore pien en olego bot Jehovah pi kony dok oketo cwinye i kom mot ma tye i nyimme. (Ibru 5:7; 12:2) Calo Yecu, leg bot Jehovah pi teko dok imok ni gen me bedo ki kwo ma pe tum tye ada. Ka marri pi Lubanga woto ki dongo dok ilubo lanen pa Wode, ci ibitwero cobo kwongeni me tic pi Jehovah.

6. Pingo omyero wacob tic ma tye i wiwa i paciwa? (Nen bene cal.)

⁶ Tic ma tye i wiwa i paciwa. I ngwecwa me kwo, omyero wamar Jehovah ki Yecu makato wadiwa. (Mat. 10:37) Ento man pe tyen lokke ni omyero wakwer cobo tic ma tye i wiwa i paciwa, calo iwacci tic magi gigengowa ki yomo cwiny Lubanga ki Kricito. Me ka meno, me yomo cwiny Lubanga ki Kricito, mitte ni wacob tic ma watye kwede i paciwa. (1 Tem. 5:4, 8) Ka watimo meno, wabedo ki yomcwiny. Man ngene kene pien Jehovah ngeyo ni jo me odi gibedo ki yomcwiny ka laco ki dako ginyuto mar ki woro i kingi, ka lunyodo maro dok gipwonyo lutinogi, dok ka lutino gibedo luwiny bot lunyodogi.—Ep. 5:33; 6:1, 4.

7. Itwero cobo tic ma itye kwede i paco nining?

⁷ Itwero tingo yec man nining? Kadi bed in laco, dako, nyo latin, mitte ni igen tam me ryeko ma Baibul miyo. Pe itim mere gin ma iwinyo ni tye atir, nyo gin ma dano me kabedowu gitimo, nyo gin ma luryeko giwaco. (Car. 24:3, 4) Ti ki bukkewa ma jenge i Baibul me moko tam. Gitye ki tam i kom kit me keto cik ma igi lac me Baibul i tic. Me labolle, brocuwa me Jo me Otti Twero Bedo ki Yomcwiny ki buk me Bed ki Kwo Maber Nakanaka! pwony me 49 ki 50 miniwa cik ma igi lac ma twero konyo jo munyomme, lunyodo, ki lutino me mwaka apar ki wiye. b Mok tammi me keto i tic gin ma Baibul pwonyo, kadi bed jo mukene ma i paconi pe gitimo. Ka itimo meno, jo me paconi gibinongo adwogi maber, dok ibinongo mot ki bot Jehovah.—1 Pet. 3:1, 2.

8. Tam ma wamoko twero gudowa nining?

⁸ Adwogi ma bino pi tam ma wamoko. Jehovah oweko watye agonya me moko tamwa, dok en mito ni wabed ma cwinywa yom pien ni wamoko tam mabeco. Ento ka wamoko tam maraco, en pe gengo adwogi maraco ma bino i komwa pi tam meno. (Gal. 6:7, 8) Pi tyen lok meno, myero waye adwogi marac mo keken ma bino pien ni wamoko tam maraco nyo waloko nyo watimo gin marac. Ma lubbe ki gin ma watimo, cwinywa twero bedo ka pidowa. Ento, ka wangeyo ni adwogi me balwa bicung i wiwa, man twero tugo cwinywa me tuco balwa ki yubo ka ma mito ayuba, kun wagwokke pe me nwoyo bal meno.  Timo jami magi twero konyowa me medde ki ngwecwa me kwo.

9. Ngo ma itwero timone ka ce imoko tam marac? (Nen bene cal.)

⁹ Itwero tingo yec man nining? Ka ce imoko tam marac, gin ango ma itwero timone? Ye ni pe itwero loko gin mutimme angec. Pe ibal cawani ki keroni ka tute me gengo ngeyi nyo me kok i kom jo mukene pi balli. Me ka meno, ye balli dok iti matek kit ma itwero kwede i kare-ni. Ka cwinyi tye ka pidi pi bal ma itimo, ki mwolo, lokke bot Jehovah i lega, ye balli, dok ipenye ni otimmi kica. (Jab. 25:11; 51:3, 4) Kwa kica ki bot jo ma itimo bal i komgi, dok ka mitte, yeny kony ki bot luelda. (Yak. 5:14, 15) Nong pwony ki i bal ma itimo, dok itute matek pe me nwoyone. Ka itimo kit meno, ci itwero bedo ki gen ni Jehovah bitimmi kica dok bimini kony ma imito.—Jab. 103:8-13.

10. Pingo bedo ki gen ma pe itwero cobone obedo yec mapek? (Jo Galatia 6:4)

¹⁰ Bedo ki gen ma pe itwero cobone. Waromo bedo ka tingo yec mapek ka wabedo ka pore ki jo mukene. (Kwan Jo Galatia 6:4.) Ka kare ducu wabedo ka poro ticwa ki pa jo mukene, watwero doko lunyeko kun wacako pyem kwedgi. (Gal. 5:26) Ka wabedo ka temme me timo gin ma jo mukene gitye ka timo kun pe watwero, ci man twero kelo adwogi marac i komwa. Dok tam bene i kom lok man: Baibul wacciwa ni, “Gen ma pe gicobo miyo two i cwiny dano.” (Car. 13:12) Dong bibedo me turcwiny adada me bedo ka kuro gin ma wangeyo ni pe wabinongone matwal! Ka watimo gin ma kit meno, waromo ol adada ma weko wakwe woko i ngwecwa me kwo.—Car. 24:10.

11. Gin ango ma twero konyi me gwokke ki bedo ki gen ma pe itwero cobone?

¹¹ Itwero bolo yec meno nining? Pe iket gingi i komi me cobo gin makato ma Jehovah mito ki boti. En pe mito ni imine gin ma ipe kwede. (2 Kor. 8:12) Bed ki gen ni Jehovah pe poro ticci ki tic pa jo mukene. (Mat. 25:20-23) En pwoyo ticci ma itimo ki cwinyi ducu, bedo lagenni, kacel ki diyo cwinyi. Bed mwol dok iye ni mwakani, yotkomi, kacel ki jami mukene i kwoni twero gengi ki cobo jami mogo ma imito i kare-ni. Calo Barjilai, bed atera me kwero mot me tic mogo ka ce mwakani nyo yotkomi biweko bedo tek me cobo tic meno maber. (2 Cam. 19:35, 36) Calo Moses, ye kony dok ipok tic bot jo mukene ka opore. (Nia 18:21, 22) Mwolo ma kit meno bigwoki ki i bedo ki gen ma pe itwero cobone dok ma weko iol woko i ngwecci me kwo.

12. Tika omyero wakok i komwa kekenwa pi tam maraco ma jo mukene gumoko? Tit kong.

¹² Kok i komi kekeni pi tam maraco ma jo mukene gumoko. Pe watwero moko tam pi jo mukene; dok kare ducu pe watwero gengo adwogi maraco ma bino i komgi pi tam maraco ma gumoko. Me labolle, latin twero moko tamme me juko tic pi Jehovah woko. Tam meno twero kelo cwercwiny madwong ma pe wacce bot lunywalle. Ento, lunywal ma gikok i komgi kekengi pi tam marac ma latingi omoko gitingo yec mapek adada. Meno pe obedo yec ma Jehovah mito ni guting.—Rom. 14:12.

13. Lanyodo twero dok iye nining ka latinne omoko tam marac?

¹³ Itwero bolo yec meno nining? Ye ni Jehovah omiyo bot wan ducu mot me bedo agonya. En weko ngat acel acel moko tamme pire kene. Meno kwako tam ma wamoko me tic  pire. Jehovah ngeyo ni macalo lanyodo, itye ki roc; en mito ni itim gin maber loyo ma itwero. Tam ma latinni moko cung i wiye, ento pe i wi in lanyodo. (Car. 20:11) Kadi bedo kit meno, pud itwero bedo ka paro jami mogo ma pe itimogi maber macalo lanyodo. Ka tye kit meno, wek Jehovah onge kit ma iwinyo kwede dok ilege pi kicane. En ngeyo ni pe itwero dok cen ka loko jami mutimme i kare mukato. Ento ki tungcel, en pe mito ni igeng latinni ki kayo gin ma ocoyo. Wi pe owil ni, ka latinni okwanyo yo me dwogo cen bot Jehovah, ci Jehovah bijolle ki cwinye ducu.—Luka 15:18-20.

14. Pingo poto cwiny mukato kare obedo yec ma omyero wabol woko?

¹⁴ Ka cwinywa pidowa mukato kare woko. Ka watimo bal, pore ni omyero cwinywa opidwa. Ento, Jehovah pe mito ni wabed ki poto cwiny mukato kare woko. Man obedo yec ma omyero wabol woko. Watwero ngeyo nining ni cwinywa pidowa mukato kare woko? Ka watuco balwa, wangut, dok watye ka timo jami ducu ma watwero wek pe wanwo balwa, ci watwero bedo ki gen ni Jehovah otyeko timiwa kica woko. (Tic 3:19) I nge timo jami magi ducu, Jehovah pe mito ni wamedde ki bedo ki poto cwiny. En ngeyo kit ma bedo ma cwinywa poto teretere twero kelo kwede adwogi marac i komwa. (Jab. 31:10) Ka wamedde ki bedo ki cwercwiny mukato kare woko, watwero ilo cingwa woko i ngwecwa me kwo.—2 Kor. 2:7.

15. Ngo ma twero konyi ka cwinyi pidi mukato kare woko? (1 Jon 3:19, 20) (Nen bene cal.)

¹⁵ Itwero bolo yec meno nining? Ka cwinyi pidi mukato kare woko, wi myero opo ni Lubanga ‘weko balwa.’ (Jab. 130:4) Ka en tye ka timo kica ki jo ma gungut ki cwinygi ducu, en cikke ni: “Pe dok abibedo ka po i kom gin marac ma gubedo ka timone.” (Jer. 31:34) Man te lokke ni Jehovah pe dok bitamo pi bal ma en otyeko timmi kica pire. Pi meno, pe itam ni pekki ma itye ka kato ki iye macalo  adwogi me bal ma itimo nyuto ni Jehovah pe otimmi kica. Dok pe iwek cwinyi ocwer i komi kekeni pien ni irwenyo mot me tic mogo ma onongo itye kwede i kacokke. Jehovah pe bedo ka tamo pi balli, dong in bene omyero pe ibed ka tamo pigi.—Kwan 1 Jon 3:19, 20.

16. Macalo lungwec, gin ango ma omyero waniang iye?

¹⁶ Ka wamedde ki ngecwa me kwo, myero ‘waring i yo ma weko wanongo mot me pwoc.’ (1 Kor. 9:24) Watwero timo meno ka waniang yec mene ma omyero wating ki mene ma omyero wabol woko. I pwony man, wanyamo labol mogo me yec ma omyero wating ki ma myero wabol woko. Ento yec mukene bene gitye ma watwero lok i komgi. Yecu owaco ni ‘woro cam, mero kongo, ki lok me kwo man ma miyo wabedo ki tam mapol’ giromo nurowa woko. (Luka 21:34) Wang Baibul man ki mukene twero konyi me niang alokaloka mene ma omyero itim wek imedde ki ngwecci me kwo.

17. Pingo waromo bedo ki gen ni wabicobo ngwecwa me kwo?

¹⁷ Waromo bedo ki gen ni wabicobo ngecwa me kwo pien Jehovah bimiyo botwa teko ma mitte. (Ic. 40:29-31) Pi meno, pe ikwe komi woko! Lub lanen pa lakwena Paulo, ma ongweco matek adada wek enong mot ma giketo i nyimme. (Pil. 3:13, 14) Pe tye ngat mo ma twero ngweco ngwec man piri, ento ki kony pa Jehovah, itwero cobone. Jehovah twero konyi me tingo yec ma myero iting ki me bolo yec ma konygi pe. (Jab. 68:19) Ka Jehovah tye tung boti, ibibedo ki kero me cobo ngwecci kun iciro dok inongo mot!