PWONY ME ANYAMA ME 31
WER 12 Jehovah Lubanga Won Twer
Gin ma Jehovah Otimo me Larowa ki i Bal ki To
“Lubanga con omaro lobo kumeno, omiyo iye Wode acel keken.”—JON 3:16.
GIN MA WABIPWONYO
Wabineno kit ma Jehovah oweko twerre kwede botwa me lweny ki bal. Wabineno bene kit ma en onyutiwa kica kun weko twerre botwa me kwo pi naka ma nongo dong pe watye ki roc.
1-2. (a) Bal obedo gin ango, dok i yo ma nining ma watwero bedo agonya ki i bal? (Nen bene “Lok ma Kitito Tere.”) (b) Gin ango ma wabinyamo i pwony man ki dong i pwony mukene ma i Wi Lubele man? (Nen bene “Ngec bot Lukwan Magajin Man” i magajin man.)
TIKA imito niang kit ma Jehovah mari kwede? Itwero nongo lagam pi lapeny meno ki pwonyo gin ma en otimo me lari ki i bal kacel ki to. Bal a obedo lamone marac adada, ma pe itwero loyone piri keni. Wan ducu wabedo lubalo. Watimo bal nino ducu. Dok roc ma watye kwede weko wato. (Rom. 5:12) Kadi bed kit meno, watye ki kwena maber. Jehovah ocikke ni ebilarowa ki i bal ki to!
2 Pi cokcok mwaki 6,000 kulu, Lubanga Jehovah dong obedo ka konyo dano me lweny ki bal. Pingo? Pien en marowa. Jehovah omaro dano nicakke ma ocweyogi. Kit macalo en marowa matek, en otimo jami mapol me konyowa ka watimo bal. Lubanga ngeyo ni bal terowa i to, dok en pe mito ni wato. En mito ni wakwo pi naka. (Rom. 6:23) Meno aye gin ma en mito piri. I pwony man, wabinyamo lapeny adek: (1) Gen ango ma Jehovah omiyo bot dano ma lubalo? (2) Gin ango ma dano ma lubalo i kare me Baibul gutimo me yomo cwiny Jehovah? (3) Gin ango ma Yecu otimo me laro dano ki i bal ki dong to?
GEN ANGO MA JEHOVAH OMIYO BOT DANO MA LUBALO?
3. I yo ma nining ma lunywalwa mukwongo gudoko kwede lubalo?
3 I kare ma Jehovah ocweyo laco ki dako mukwongo, en onongo mito ni gubed ki yomcwiny. En oribogi i nyom, oketogi i kabedo mamwonya wek gukwo iye, dok ominigi tic ma pire tek. Onongo myero gunywal ci gupong lobo ki likwayogi, wek lobo ducu odok paradic calo poto me Eden. En ominigi cik acel keken mayot adada. Dok en ocikogi ni ka guyero me kwero lubo cikke akaka, ci gibito woko. Wangeyo gin ma otimme. Lamalaika mo marac, ma onongo pe maro Lubanga, kadi wa dano, obito Adam ki Kawa me turo cik pa Lubanga. Adam ki Kawa gutimo gin ma Catan, lamalaika marac meno, onongo mito. Pe gugeno Wongi ma onongo marogi tutwal-li. Me ka bedo luwiny bote, guyero me timo bal. Gin ma Jehovah otito con ocobbe. Pien gukwero bedo luwiny, Adam ki Kawa gudeno can pi kare me kwogi ducu. Gutii ci lacen guto woko.—Acak. 1:28, 29; 2:8, 9, 16-18; 3:1-6, 17-19, 24; 5:5.
4. Pingo Jehovah dag bal? (Jo Roma 8:20, 21)
4 Jehovah oweko kicoyo lok meno i Baibul wek waniang gin mo ma pire tek adada. Konyowa me niang gin mumiyo en dag bal tutwal. Bal balo watwa ki Jehovah, dok weko wato. (Ic. 59:2) Catan dag Jehovah kacel ki dano. Meno aye tyen lok mumiyo en obito Adam ki Kawa me timo bal, dok pud tye ka medde ki bito dano wa i kare-ni. Dong i kare ma Adam ki Kawa gubalo, Catan nen calo otamo ni etyeko balo yub pa Lubanga pi dano woko. Ento en pe oniang kulu ni Jehovah obedo Lubanga ma lamar adada. Lubanga pe oloko yubbe pi likwayo pa Adam ki Kawa. En maro dano, pi meno, cutcut en omiyo gen bot dano ducu. (Kwan Jo Roma 8:20, 21.) Jehovah ongeyo ni jo mogo gibiyero me mare kacel ki bedo lugen bote. Jehovah oweko otwere pi jo ma kit meno me nyikke cok kwede wek kilargi ki i bal ki to. Gin ango ma onongo Jehovah bitimo wek jami magi ducu otwere?
5. Gen ango ma Jehovah omiyo ki dano cutcut i kare ma Adam ki Kawa gutimo bal? (Acakki 3:15)
5 Kwan Acakki 3:15. Cutcut i nge Adam ki Kawa timo bal, Jehovah ocikke ni ebijwero Catan dok man omiyo bot dano ducu gen. Lubanga owaco ni ‘lakwaro’ mo bibino ma bilaro dano. Lakwaro man aye onongo bijwero Catan ci cobo pekki ducu ma Catan okelo nicakke ki i poto me Eden. (1 Jon 3:8) Ento lakwaro meno onongo bene bideno can. Catan onongo bitongo opunye, kun kelo tone. Meno onongo bicwero cwiny Jehovah matek adada. Ento Jehovah onongo tye atera me kanyo arem meno ki me ye ni ‘lakwaro’ man oden can me laro wan dano ki i bal kacel ki to.
GIN MA DANO MA LUBALO I KARE ME BAIBUL GUTIMO ME YOMO CWINY JEHOVAH
6. Gin ango ma Abel, Nua ki dong jo mukene ma lugen gutimo me nyikke cok bot Jehovah?
6 Motmot, Jehovah onyuto ka maleng kit ma dano ma lubalo gitwero nyikke kwede cok bote. Abel, ma obedo latin me aryone pa Adam ki Kawa, aye obedo dano mukwongo ma onyuto niye i kom Jehovah i nge jemo ma otimme i poto me Eden. Pien Abel onongo maro Jehovah dok mito yomo Cwinye ki dong nyikke cok Bote, en omiyo gityer bot Jehovah. Abel onongo obedo lakwat, pi meno en okwanyo lutino romine mogo ci omiyogi macalo gityer bot Jehovah. Jehovah odok iye nining? En “ojolo Abel ki motte.” (Acak. 4:4) Jehovah bene ojolo gityer pa jo mukene ma onongo gimare dok gigene—calo Nua. (Acak. 8:20, 21) I kare ma Jehovah ojolo gityer magi, en onyuto ni dano ma lubalo gitwero yomo cwinye kacel ki nyikke cok bote. b
7. Pwony ango ma wanongo ki i kit ma Abraim obedo atera kwede me tyero wode?
7 Abraim onongo tye ki niye matek i kom Jehovah. Jehovah olege ni otim gin mo matek adada, en owacce ni otyer wode me amara Icaka macalo gityer. Lok man nen calo omiyo Abraim obedo ki par matek. Kadi bed kit meno, en obedo lawiny bot Jehovah. I kare ma Abraim dong cok neko wode, Lubanga ojukke woko. Ento, lanene meno pwonyowa gin ma pire tek ma Jehovah onongo bitimo i anyim. Jehovah onongo bimiyo Wode me amara macalo gityer. Jehovah maro dano matek adada.—Acak. 22:1-18.
8. Leyi ma onongo kityerogi ma lubbe ki Cik ma kimiyo bot Luicrael onongo gicung pi gin ango? (Lulevi 4:27-29; 17:11)
8 Mwaki mapol lacen, i kare ma Jehovah omiyo Cik bot rok me Icrael, en otittigi ni omyero gumi lee macalo gityer wek kitim kica pi balgi. (Kwan Lulevi 4:27-29; 17:11.) Gityer ma kit meno onongo gicung pi gityer madit ma kibimiyo i anyim, ma onongo bilaro dano ducu ki i bal. Lubanga oweko lunebine gucoyo lok i kom lakwaro ma kiciko pire-ni. Gutito ni Wod pa Lubanga ma en maro adada, bideno can dok kibineke woko. Onongo kibineke calo romo ma kimiyo me gityer. (Ic. 53:1-12) Dong Jehovah onongo bimiyo Wode me amara macalo gityer me laro dano ki i bal ki to. Man pud dong obedo gin mamwonya ya ma Jehovah otimo, dok en otimo man piri bene!
GIN ANGO MA YECU OTIMO ME LARO DANO?
9. Gin ango ma Jon Labatija owaco i kom Yecu? (Jo Ibru 9:22; 10:1-4, 12)
9 I mwaka 29 K.M., Jon Labatija oneno Yecu me Najaret ci owaco ni: “Nen Latin romo pa Lubanga ma kwanyo bal me lobo!” (Jon 1:29) Lok meno onyuto ni Yecu aye onongo obedo lakwaro ma Lubanga ociko pire-ni. Yecu onongo bimiyo kwone macalo gityer. Onongo dong lakwaro ma Jehovah ociko pire-ni oo me laro dano ki i bal.—Kwan Jo Ibru 9:22; 10:1-4, 12.
10. Yecu onyuto nining ni en ‘ebino ka lwongo’ lubalo?
10 Yecu oketo cwinye tutwalle i konyo jo ma onongo giwinyo marac pien gin lubalo. En olwongogi me doko lulub kore. En onongo ngeyo ni tyen lok mumiyo dano deno can obedo pi bal. Pi meno, en oyelle me konyo co ki mon ma onongo gideno can pi bal ma gutimo. En otiyo ki lapor me tito ni: “Jo ma komgi yot pe gimito daktar, ento kono jo ma komgi lit aye.” En omedde ni: “Pe abino ka lwongo jo ma kitgi atir, ento lubalo.” (Mat. 9:12, 13) Dok meno aye gin ma Yecu otimo. I kare ma dako mo odyako tyen Yecu ki pig wange ci ojwayo ki yer wiye, Yecu oloko ki dako-ni ki mwolo dok otimme kica pi balle. (Luka 7:37-50) En bene opwonyo dako ma Lacamaria-ni ki lok ada ma pigi tego, kadi bed onongo ngeyo ni dako-ni tye ka bedo ki laco ma pe cware. (Jon 4:7, 17-19, 25, 26) Dano gito macalo adwogi me bal. Ento Lubanga omiyo ki Yecu kadi wa teko me cero co, mon, ki lutino ma guto.—Mat. 11:5.
11. Pingo lubalo onongo gibedo agonya i nget Yecu?
11 Dong pe tye me ur ni kadi wa jo ma onongo gubedo lubalo adada onongo gibedo agonya i nget Yecu. En oniang kit ma giwinyo kwede dok onyutigi kica. Onongo pe gilworo lok ki Yecu. (Luka 15:1, 2) Yecu opwoyo jo ma kit meno pi nyuto niye i kome dok oterogi maber. (Luka 19:1-10) Yecu onongo obedo lakica, calo Wonne kikome. (Jon 14:9) Ki i lokke kacel ki ticce, en onyuto ni Jehovah lakica, maro lubalo dok mito konyogi. Yecu okonyo lubalo me bedo ki miti me loko yo me kwogi wek gilub kore.—Luka 5:27, 28.
12. Gin ango ma Yecu otito ki lupwonnyene madok i kom tone?
12 Yecu onongo ngeyo ni ebimiyo kwone macalo gityer. Tyen mapol en obedo ka waco ki lulub kore ni kibidobe dok kibineke i kom yat. (Mat. 17:22; 20:18, 19) En onongo ngeyo ni gityer mere bikwanyo bal me lobo, kit ma Jon Labatija owaco kwede dok lunebi bene onongo gutito woko con. Yecu bene owaco ni i nge tone, ‘ebipeyo dano ducu bote.’ (Jon 12:32) Dano ma lubalo onongo gitwero yomo cwiny Jehovah ka guye Yecu macalo Rwotgi kun gilubo lanene macok. Ka gutimo meno, ci ‘kibigonyogi woko ki i opii me bal.’ (Rom. 6:14, 18, 22; Jon 8:32) Pi meno, Yecu obedo ki tekcwiny dok obedo atera me to to malit wek elarwa.—Jon 10:17, 18.
13. Yecu oto nining, dok tone pwonyowa gin ango ma i kom Jehovah? (Nen bene cal.)
13 Larem Yecu macok aye otimo tim roro i kome. I nge meno, lumonene gumake, guyete dok gukok i kome pi bal ma pe otimo. Gungolo to i wi Yecu ci gubedo ka une malit. Lumony gutere ka ma kibineke iye ci gugure i kom yat. Yecu ociro arem ki can malit magi ducu. Ento, Jehovah owinyo arem malit makato i cwinye i kare ma oneno Wode obedo ka canne matek ki arem. Jehovah onongo tye ki teko kacel ki twero me juko can ma Wode okato ki iye, ento en pe otimo meno. Jehovah maro Wode matek, dong pingo en oye ni Wode oden can dok oto? Pien en marowa. Yecu owaco ni: “Pien Lubanga con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum.”—Jon 3:16.
Jehovah owinyo arem cwiny malit i kare ma oye ni kinek Wode (Nen paragraf 13)
14. Gityer pa Yecu pwonyi gin ango?
14 Gityer pa Yecu aye obedo lanyut madit loyo ma moko ni Jehovah maro likwayo pa Adam ki Kawa. Man nyuto ni Jehovah mari matek adada. En omiyo gin maber loyo ma etye kwede dok okanyo arem cwiny malit wek elar in ki i bal ki dong to. (1 Jon 4:9, 10) Ada, en mito ni ngat acel acel i kinwa omedde ki tic pire kadi bed wan lubalo, dok mito jwayo bal woko ducu i anyim!
15. Gin ango ma myero watim wek wanong adwogi maber ki i ginkok pa Yecu?
15 Mic pa Lubanga, ma en aye ginkok pa Wode acel keken, oweko kitwero timo kica pi balwa. Ento wek Lubanga otimiwa kica, omyero watim gin mo. Meno gin ango? Jon Labatija ki Yecu Kricito kikome gumiyo lagamme, ni: “Wunguti, pien ker me polo dong onyiko cok.” (Mat. 3:1, 2; 4:17) Dong omyero wangut i kom balwa ka wamito nyikke cok ki Jehovah dok wamito ni kitim kica pi balwa. Ento tyen lokke ngo me ngut i kom bal, dok man twero konyowa nining me yomo cwiny Jehovah kadi bed wan lubalo? Pwony me anyama ma lubo man bigamo lapeny magi.
WER 18 Watye ki Pwoc pi Ginkok
a LOK MA KITITO TERE: I Baibul, nyig lok man ni “bal” twero gonnye i yo aryo mapatpat. Ka watimo jami ma Jehovah waco ni rac, nyo pe watimo gin ma en neno ni tye atir, ci nongo watimo bal. Ento “bal” bene obedo goro nyo roc ma dano ducu gulako ki bot Adam. Dok pi bal ma walako-ni, oweko wato.
