1. Gin ango ma Jehovah mito pi dano ducu?

 JEHOVAH omiyo ki dano ducu twero me moko tamgi pigi kengi. Wamoko tam nino ducu. Tam ma pud dong pire tek loyo ma ngat mo keken twero moko aye me dyere bot Jehovah ki me wore kacel ki omegiwa ki lumegiwa. Jehovah mito ni dano ducu gutim meno. Pingo? Pien en maro dano dok mito gin maber loyo pigi. En mito ni gubed lureme dok gunong kwo ma pe tum.—Nwo. 30:​19, 20; Gal. 6:​7, 8.

2. Jehovah winyo nining i kom jo ma gutimo bal madongo? (1 Jon 2:1)

² Kadi bed kit meno, Jehovah pe diyo ngat mo keken me tic pire. En weko ngat acel acel yero gin ma ebitimo. Gin ango ma omyero luelda gutim ka Lakricitayo ma onongo batija oyero me timo bal madit? Ka en pe ongut i kom balle, ci omyero kikwanye woko ki i kacokke. (1 Kor. 5:13) Ento, kadi bed kikwanyo ngat moni woko ki i kacokke, nongo pud Jehovah mito ni ngat meno ongut i kom balle ci oyub watte Kwede. Ki lok ada, tyen lok acel ma pire tek ma oweko Jehovah omiyo ginkok aye me jwayo bal pa jo ma gungut i kom balgi. (Kwan 1 Jon 2:1.) Lubangawa ma lamar-ri lego jo ma gutimo bal madongo me ngut i kom balgi.—Jek. 1:3; Rom. 2:4; Yak. 4:8.

3. Gin ango ma wabinyamo i pwony man?

 ³ Jehovah otitiwa kit ma en winyo kwede i kom bal kacel ki jo ma gitimo bal madongo. Dok en mito ni wan bene wabed ki tamme. Pwony man binyamo kit ma watwero timo kwede meno. I pwony man bene, wabinyamo gin ma lakwena Paulo owaco ni jo me kacokke ma i Korint gutim i kare ma omego mo otimo bal madit. I nge meno, wabinyamo tira ma Paulo ominigi i kare ma laco meno otyeko ngut i kom balle. Me agikki, wabineno kit ma Jehovah winyo kwede i kom jo ma gutimo bal madongo.

GIN ANGO MUTIMME I KARE MA OMEGO MO MA I KORINT OTIMO BAL MADIT?

4. Gin ango mutimme i cencwari me acel i kacokke ma i Korint? (1 Jo Korint 5:​1, 2)

⁴ Kwan 1 Jo Korint 5:​1, 2. I kare ma lakwena Paulo tye i wotte me adek macalo lamiconari, en owinyo pi gin mo marac adada ma onongo tye ka timme i kacokke ma i Korint. Omego mo ma i kacokke meno onongo tye ka bedo ki ci-wonne macalo dakone. Meno onongo obedo tim me kipyeda ma “pe nen wa i kin jo ma pe ngeyo Lubanga”! Ento jo me kacokke gutamo ni pe rac ka omego man omedde ki bedo i kacokke. Twero bedo ni jo mogo ma i kacokke gutamo ni gitye ka nyuto cwiny me kica calo Jehovah, ma nyuto kica bot jo ma gitye ki roc. Ento Jehovah pe cwako tim maraco i kin jone. Pi tim malik man, twero bedo ni jo ma pe luye onongo gitye ka lok marac i kom jo pa Jehovah. Ka omego-ni omedde ki bedo i kacokke, ci Lukricitayo mukene onongo gitwero cako lubo lanenne marac-ci. Dong, gin ango ma Paulo owaco ni kacokke myero gutim?

5. Tira ango ma Paulo omiyo ki kacokke, dok meno tyen lokke ngo? (1 Jo Korint 5:13) (Nen bene cal.)

⁵ Kwan 1 Jo Korint 5:13. Jehovah oweko Paulo ocoyo waraga bot kacokke man kun tito ni omyero kikwany laco man woko ki i kacokke. Dong, jo ma i kacokke onongo myero guter laco-ni nining? Paulo owaccigi ni ‘pe guribbe’ kwede. Meno tyen lokke ngo? Paulo otito ni, me lubo cik man omyero ‘pe gunywak cam kacel ki kodi dano-nu.’ (1 Kor. 5:11) Ka itye ka cam ki ngat moni, itero kare kwede dok wuboko lok. Macalo adwogine, wutwero cako cwalo kare malac kwede. Dong nen ka maleng ni, Paulo onongo tye ka tito ni jo me  kacokke myero gugwokke ki tero kare nyo namo ki laco meno. Man onongo bigwoko kacokke ki i kom timme marac-ci. (1 Kor. 5:​5-7) Medo i kom meno, man twero konyo laco-ni me niang kit ma ecwero kwede cwiny Jehovah dok meno twero weko lewic make kun tugo cwinye me ngut i kom balle.

6. Kacokke ma i Korint odok i tira ma nonge i waraga pa Paulo nining dok gin ango ma laco-ni otimo?

⁶ I nge cwalo waragane bot Lukricitayo ma i Korint, Paulo ocako paro kit ma kacokke bijolo kwede tira man. Lacen, Tito okelo ki Paulo kwena ma oyomo cwinye adada. Kacokke onongo olubo tira ma nonge i waraga pa Paulo ci gukwanyo labalo-ni woko ki i kacokke. (2 Kor. 7:​6, 7) Medo i kom meno, ma pe orii i nge nongo waraga pa Paulo mukwongo, laco-ni ongut woko i kom balle! En oloko kwone ki tamme dok ocako lubo rwom me kit ma atir pa Jehovah. (2 Kor. 7:​8- 11) Dong, ngo ma Paulo owaco ki kacokke me timone?

KIT MA JO ME KACOKKE GUTERO KWEDE LABALO-NI

7. Gin ango ma laco-ni otimo i kare ma kikwanye woko ki i kacokke? (2 Jo Korint 2:​5-8)

⁷ Kwan 2 Jo Korint 2:​5-8. Paulo owaco ni “dano macalo meno, can ma jo mapol i kinwu guketo i kome twero romme.” Man tyen lokke ni, i kare ma kikwanyo labalo-ni ki i kacokke, en oniang ni mitte ni engut i kom balle. Dong pien en onongo otyeko ngut woko, onongo dong pe mitte ni kimedde ki mine pwod.—Ibru 12:11.

8. Gin ango mukene ma Paulo owaco ni jo me kacokke gutim?

⁸ I nge meno, Paulo omiyo tira bot kacokke ni: “Myero dong wutimme kica, dok wukwe cwinye” dok ni, “wunyut bote mar ma wutye kwede i kome.” Nen ni, Paulo onongo pe mito ni luelda guye ni laco-ni odwog cen i kacokke keken. Ento, Paulo onongo mito ni jo me kacokke bene gunyut ki laco-ni i lokgi, ki i kit ma gitere kwede, ni gutimme kica dok gimare. Macalo adwogine, omego-ni onongo bineno ni cwiny jo me kacokke yom ni edwogo cen.

9. Pingo twero bedo ni jo mukene gubedo ki gung cwiny me jolo omego ma kidwoko cen i kacokke-ni?

⁹ Twero bedo ni, jo mogo me kacokke cwinygi pe obedo yom tutwal i kare ma kidwoko laco-ni cen i kacokke. Pingo wawaco kit meno? Twero bedo ni jo mogo onongo cwinygi tye ka cwer pien laco-ni okelo lewic i wi kacokkegi. Dok oromo bedo ni jo mukene gubedo ki kec cwiny pien tim pa laco-ni okelo peko i komgi. Jo ma i kacokke onongo gutute matek me lubo cik pa Jehovah. Dong twero bedo ni jo mukene guwinyo calo pe opore ni ngat ma otimo bal madit-ti kidwoke cen i kacokke. (Por ki Luka 15:​28-30.) Ento, pingo onongo pire tek pi jo me kacokke me nyuto mar bot omego ma ongut-ti?

10-11. Gin ango ma onongo twero timme ka luelda gukwero timo kica ki laco ma ongut-ti?

¹⁰ Laco-ni onongo biwinyo nining ka luelda pe guye ni odwog cen i kacokke i kare ma otyeko ngut i kom balle? Dok mono en biwinyo nining ka ce i nge dwogone omege ki lumege pe gunyutte mar? Man onongo bimiyo ‘cwercwiny madit mukato kare nurre woko.’ En onongo twero winyo calo pe dong ebibedo ma epore me tic pi Jehovah kulu. En onongo bene twero juko tutene me dwogo cen bot Jehovah.

¹¹ Gin ango mukene ma onongo twero timme ka omege ki lumege gukwero timo kica ki laco ma ongut-ti? Onongo utmege magi gibibalo watgi ki Jehovah woko. Pingo? Pien nongo pe gitye ka lubo lanen pa Jehovah, ma timo kica ki lubalo. Me ka meno, nongo gitye ka lubo lanen pa Catan, ma cwinye col dok pe nyuto kica. Nongo guweko Catan otiyo kwedgi me juko laco meno ki tic pi Jehovah.—2 Kor. 2:​10, 11; Ep. 4:27.

12. I yo ma nining ma jo me kacokke me Korint onongo gitwero lubo kwede lanen pa Jehovah?

¹² Dong, jo me kacokke me Korint onongo gitwero lubo lanen pa Jehovah ento pe pa Catan nining? Ki timo kica ki lubalo ma gungut, kit ma Jehovah timo kwede. Nen kong gin ma luco Baibul mogo gucoyo i kom Jehovah. Daudi owaco ni: “In iber dok iweko bal pa dano.” (Jab. 86:5) Lanebi Mika openyo ni: “Anga ma  dok Lubanga calo in, ma gonyo bal, ma weko bal?” (Mika 7:18) Dok Icaya owaco ni: “Latim marac myero obwot timme marac, ki dano ma pe kite atir bene owek tamme ma pe ber-ri; olokke odwog cen bot Rwot [Jehovah], wek Rwot otimme kica, myero odwog cen bot Lubangawa, pien en biweko balle woko ducu.”—Ic. 55:7.

13. Pingo onongo pe opore me galle agala ki dwoko laco-ni i kacokke? (Nen bok ma wiye tye ni “ Awene ma Kidwoko Kwede Laco ma i Korint Cen i Kacokke?”)

¹³ Me lubo lanen pa Jehovah, onongo mitte ni jo me kacokke gutim kica ki laco-ni dok gunyutte ni gimare. Paulo owaco ni ka gutimo kica ki laco-ni, nongo gitye ka nyuto ni ‘gitye luwiny i jami ducu.’ (2 Kor. 2:9) Kadi bed onongo kikwanyo laco-ni woko ki i kacokke pi dwe manok keken, ento en onongo dong otyeko ngut i kom balle. Pi meno, onongo pe mitte ni luelda gugalle ki dwoke cen i kacokke.

KIT MA WATWERO LUBO KWEDE KICA KI NGOLO KOP ATIR PA JEHOVAH

14-15. Pwony ango ma wanongo ki i gin mutimme i kacokke me Korint? (2 Petero 3:9) (Nen bene cal.)

¹⁴ Lok madok i kom kit ma kitero kwede laco ma otimo bal madit i kacokke me Korint macon kicoyo i Baibul “me pwonyowa.” (Rom. 15:4) Ki i lok man, wapwonyo ni Jehovah pe ye ni jo ma  gutimo bal madongo dok gukwero ngut gumedde ki bedo i kacokke. Jo mogo gitamo ni kit macalo Jehovah lakica, en biye ni ngat ma okwero ngut omedde ki bedo i kacokke, ento meno aye pe kit ma Jehovah nyuto kwede kica. Kadi bed Jehovah lakica, en pe jolo kit pa dano ducu. En pe dwoko rwomme me kit ma atir piny. (Juda 4) Ki lok ada, ka onongo ni Jehovah oye ni lubalo ma pe gungut gumedde ki bedo i kacokke, nongo en pe tye ka nyuto kica pien man bibalo kacokke kulu.—Car. 13:20; 1 Kor. 15:33.

¹⁵ Kadi bed kit meno, wapwonyo ni Jehovah pe mito ni ngat mo orweny woko matwal. En mito laro dano ka teke twere. En nyuto kica bot jo ma guloko tamgi kacel ki kitgi dok gimito yubo watgi kwede. (Ejek. 33:11; kwan 2 Petero 3:9.) Pi meno, i kare ma laco ma i Korint-ti ongut i kom balle dok oloko kite, Jehovah otiyo ki Paulo me tito ki kacokke man ni omyero kitim kica ki laco-ni dok kijole i kacokke odoco.

16. In iwinyo nining i nge nyamo gin mutimme i kacokke me Korint?

¹⁶ Gin mutimme i kacokke me Korint-ti nyutiwa ni Jehovah lamar adada, kite atir, dok ngolo kop atir. (Jab. 33:5) Man mono pe tugo cwinyi me pako Jehovah? Ada, pien wan ducu watye lubalo dok wamito kicane. Watye bene ki pwoc madit bot Jehovah ni omiyo ginkok ma weko twere me timo kica pi balwa. Pud dong kweyo cwinywa ya me ngeyo ni, Jehovah maro jone dok mito gin maber loyo pigi!

17. Gin ango ma wabinyamo i pwony aryo ma lubo man?

¹⁷ Ka ngat mo otimo bal madit i kare-ni, i yo ma nining ma luelda gitwero lubo kwede lanen me mar pa Jehovah kun gikonyo labalo-ni me ngut i kom balle? Jo me kacokke myero gudok iye nining ka luelda gukwanyo ngat moni ki i kacokke nyo gudwoke cen? Wabinyamo lapeny magi i pwony aryo ma lubo man.