Wacuku Cwinywa Kekenwa, Makatone Kombeddi
‘Myero watamu kit macalo watwero cuku cwinywa kekenwa, makatone kit ma wuneno nino maca dong tye ka nyiko cok-ki.’—JO IBRU 10:24, 25.
WER: 121, 119
1. Pingo lakwena Paulo owaco bot Lukricitayo ma Luibru ni gucuk cwiny luwotgi “makatone” i kare meno?
I CENCWARI me acel, lakwena Paulo omiyo tam man bot Lukricitayo ma Luibru: “Myero watamu kit macalo watwero tugo kwede cwinywa kekenwa i mar ki i tiyo tic mabeco, kun pe waweko cokke kacel, kit macalo jo mogo dong guloko odoko kitgi-ni, ento myero wacuku cwinywa kekenwa, makatone kit macalo wuneno nino maca dong tye ka nyiko cok-ki.” (Jo Ibru 10:24, 25) Omege magi nen calo gubedo ka tamo pingo Paulo owaccigi ni myero gucuk cwiny luwotgi tutwalle i kare meno. I nge mwaki ma pe kato abic, guniang tyen lok acel. I kare meno guneno ni nino pa Jehovah me ngolo kop i kom Jerucalem dong cok. Guniang ni myero guring woko ki i Jerucalem kit ma Yecu owaccigi con. (Luka 21:20-22; Tic pa Lukwena 2:19, 20) Nino pa Jehovah meno obino i mwaka 70, i kare ma jo Roma gujwero Jerucalem woko.
2. Pingo myero watam matut i kom kit me cuko cwiny omegiwa i kare-ni?
2 Wan bene watye ka kwo i kare ma kit meno. Nino pa Jehovah ‘madit, dok onyo koyo i kom dano’ dong tye cok. (Joel 2:11) Lok pa lanebi Jepania bene gudowa i kare-ni. En owaco ni: “Nino madit pa Rwot [Jehovah] tye cok, tye cok dok tye ka bino oyotoyot.” (Jepania 1:14) Pi tyen lok meno, “myero watamu kit macalo watwero tugo kwede cwinywa kekenwa i mar ki i tiyo tic mabeco.” (Jo Ibru 10:24) Omyero wanyutu miti i kom utmegiwa wek wacuk cwinygi i kare ma nongo mitte.
ANGAGI MA GIMITO CUKO CWINY?
3. Lakwena Paulo oloko ningo i kom cuko cwiny? (Nen cal ma tye i pot karatac 21.)
3 “Par mapol gengo dano me bedo ki yomcwiny, lok maber me kica aye romo kweyo cwinye.” (Carolok 12:25) Wan ducu wamito cuko cwiny i kare mogo. Paulo otito ka maleng ni kadi wa jo ma gitye ki tic me cuko cwiny luwotgi bene gimito cuko cwiny. En ocoyo bot utmege ma i Roma ni: “Atye ka paro me nenowu mada, wek apok botwu mot mogo me cwiny me jingowu wek wubed matek. Gin ma aloko en aye ni wun kacel ki an wabikonnye lawangacel; en aye ni niyena bikonyowu, ki niyewu bene bikonya.” (Jo Roma 1:11, 12) Man nyuto ni lakwena Paulo onongo bene mito cuko cwiny i kare mogo.—Kwan Jo Roma 15:30-32.
4, 5. Angagi ma watwero cuko cwinygi i kare-ni, dok pingo?
4 I kare-ni, watwero cuko cwiny jo ma gitiyo pi Jehovah pi kare malac, ma i kine tye iye painia ma lugen. Polgi nongo gujalo jami ma gimaro i kwogi wek guti calo painia. Man bene aye gin ma lumiconari, Lubetel, luneno me adwol kacel ki mongi, ki jo ma gitiyo i opic me gonyo leb gutimo. Gin ducu gujalle wek giti pi Jehovah pi cawa malac. Pi meno, omyero wacuku cwinygi. Tye jo mapol bene ma yam gutiyo pi kare malac ento dong pe gitwero. Gin bene gibedo ki yomcwiny ka kicuko cwinygi.
5 Angagi mukene ma gimito cuko cwiny? Watwero cuko cwiny omege ki lumege ma guyero me bedo ma wigi nono pien gimito lubo cik pa Jehovah me nyomme “i kin jo pa Rwot keken.” (1 Jo Korint 7:39) Ka co giwaco bot mongi ni gimarogi dok cwinygi yom pi gin ma gitimo, ci man cuko cwiny mongi adada. (Carolok 31:28, 31) Lukricitayo ma gitye ka ciro aunauna nyo two bene gimito cuko cwiny. (2 Jo Tecalonika 1:3-5) Jehovah ki Yecu gicuko cwiny jo ma lugen magi ducu.—Kwan 2 Jo Tecalonika 2:16, 17.
LUELDA GITWERO CUKO CWINYWA
6. Gin ango ma wapwonyo ki i Icaya 32:1, 2 ma lubbe ki tic ma luelda gitimo?
6 Kwan Icaya 32:1, 2. Watye ka kwo i kare matek dok cwinywa twero cwer nyo tur i cawa mo keken. Yecu Kricito tiyo ki omegine kacel ki “rwodine” ma gin aye luelda ma gitye i kin romi mukene, me cuko cwinywa. Luelda magi pe ‘gitye ki twero’ i kom niyewa ento ‘gitiyo kwedwa kacel’ wek wabed ki yomcwiny. Gimito konyowa wek wabed lugen dok ki yomcwiny.—2 Jo Korint 1:24.
7, 8. Luelda gitwero cuko cwiny jo mukene i lokgi ki ticgi nining?
7 Luelda gitwero lubo lanen pa lakwena Paulo, ma onongo i kare ducu yelle me cuko cwiny utmegine. En ocoyo bot Lukricitayo ma i Tecalonika ma onongo gitye ka ciro aunauna ni: “Waparowu mada, omiyo nene pe wamito miyo botwu lok me kwena maber keken ma oa ki bot Lubanga, ento kadi wan kikomwa dong watyeko mine woko botwu, pien wamarowu dok piwu tek botwa twatwal.”—1 Jo Tecalonika 2:8.
8 Luelda gitwero cuko cwiny dano adada ki lokgi. Ento meno mono romo? Paulo owaco bot luelda me Epeco ni: “Myero wakony lugoro kun wapo lok pa Rwotwa Yecu ma yam owaco ni, ‘Miyo mot kelo gum [yomcwiny] makato gamo agama.’” (Tic pa Lukwena 20:35) Paulo onongo tye atera ‘me miyo jami ducu ma en tye kwede, kadi wa tek kome ducu’ pi utmegine. En onyuto i ticce ni etye atera me timo gin mo keken pigi. (2 Jo Korint 12:15) I yo acel-lu, luelda myero gucuk dok gukwe cwiny jo mukene pe ki lokgi keken ento wa ki ticgi bene. Man nyuto ni giparo piwa adada.—1 Jo Korint 14:3.
9. Luelda gitwero miyo tira i yo ma cuko cwiny nining?
9 Me jingo cwiny utmegigi, luelda kare mogo myero gumi tira. Luelda gitwero nongo pwony ki i Baibul i kom kit me miyo tira i yo ma cuko cwiny. Yecu oweko lanen maber adada i kom kit me miyo tira i kare ma en ocwalo waraga bot kacokke ma i Asia Minor i nge cerre. En omiyo tira magwar bot kacokke ma i Epeco, Pergamo, ki Tuatira. Ento ma peya omiyo tira meno, en kong opwoyogi pi gin mabeco ma gitye ka timone. (Niyabo 2:1-5, 12, 13, 18, 19) Yecu owaco bot jo me kacokke me Laodikia ni: “Agoyo jo ma an amarogi, apwonyogi dok atirogi; pi meno ket tek ingut woko.” (Niyabo 3:19) Lueldawa bene gitute me lubo lanen pa Kricito ka gitye ka miyo tira.
PE LUELDA KEKEN AYE MYERO GUCUK CWINY DANO
Lunyodo, tika wutye ka pwonyo lutinowu me cuko cwiny jo mukene? (Nen paragraf 10)
10. Wan ducu watwero jingo cwiny luwotwa nining?
10 Pe luelda keken aye myero gucuk cwiny jo mukene. Paulo ocuko cwiny Lukricitayo ducu ni ‘gulok lok mabeco keken ma dongo tam pa dano i yo ma mitte, wek jo ma winyo lokgi gunong kony ki iye.’ (Jo Epeco 4:29) Wan ducu myero wange gin ma luwotwa mito wek wakonygi. Paulo ocoyo waraga bot Lukricitayo ma Luibru ni: ‘Wuting bad mukwe malo, wurye cong magoro, wuyub yo ma tyenwu lubo ocung atir, wek ngat ma tyene ongol pe dok tyene oputte woko liweng ki i wang mwot, ento myero ocang woko acanga.’ (Jo Ibru 12:12, 13) Wan weng watwero cuko ki jingo cwiny luwotwa ki lok ma waloko kadi bed wan pud lutino matino.
11. Gin ango ma okonyo Marthe i kare ma cwinye otur?
11 Lamego mo ma nyinge Marthe onongo cwinye otur pi kare malac. * (Nen lok ma tye i tere piny.) En ocoyo ni: “I nino mo ma alego pi cuko cwiny, arwatte ki lamego mo muteggi ma onyuto ni emara dok eparo pira adada, meno aye gin ma onongo amito kikome i kare meno. En bene otitta gin mo ma otimme i kome ma onongo cok rom ki atematema ma atye ka wok ki iye, dok man oweko awinyo ni pe atye kena.” Lamego meno nen calo pe bene ongeyo kit ma lokke okonyo kwede Marthe!
12, 13. Watwero keto i tic tam ma tye i Jo Pilipi 2:1-4 nining?
12 Paulo ocoyo bot Lukricitayo ma i Pilipi ni: “Ka wunongo tekcwiny mo pi bedo i Kricito, nyo mar mo ma miyo wudiyo cwinywu, nyo ka gimiyowu ribbe mo i cwiny maleng, nyo cwiny mo me kica weko wutimo ber bot jo mukene, dong wumi yomcwinya ocobbe maber kit man: wubed ki tam acel ki mar acel, kun wuribbe kacel i cwinywu, tamwu bene myero obed acel. Pe wutim gin mo pi laro dito nyo pi wakke awaka keken, ento wubed ki mwolo, kun dano acel acel woro lawote macalo ngat madit loye. Pe itam pi gin ma konyi keken, ento tam pi gin ma konyo jo mukene bene.”—Jo Pilipi 2:1-4.
13 Wan weng myero wayeny yo ma watwero cuko kwede cwiny utmegiwa. Wek wacuk cwiny omegiwa ki lumegiwa, myero wadi cwinygi ki mar, wanyut cwiny me kica botgi, wapar pigi ki dong watim ber botgi.
YO MOGO ME CUKO CWINY
14. Yo mene mukene ma watwero cuko kwede cwiny luwotwa?
14 Bedo me yomcwiny adada ka wawinyo ni jo ma wakonyogi i kare ma okato angec pud gitye ka gwoko gennegi maber. Lakwena Jon ocoyo ni: “Pe tye gin mo ma dok miya abedo ki yomcwiny madit makato 3 Jon 4) Cwiny painia mapol bedo yom ka guwinyo ni ngat mo ma gikonyo me ngeyo ada con pud tye ka tic pi Jehovah ki gen, gwok bene tye ka tic calo painia. Pi meno ka lupainia cwinygi otur, watwero poyo wigi i kom kit ma gukonyo kwede jo mukene.
me winyo ni litinona gitye ka lubo lok ada.” (15. Gin ango ma watwero timone me cuko cwiny jo ma gitye ka tic pi Jehovah ki gen?
15 Luneno me adwol mapol guwacci gin kacel ki mongi ginongo cuko cwiny ka kiminigi waraga me pwoc ki i kacokke ma gilimo. Man bene mitte pi luelda, lumiconari, ki dong lubetel ma gitiyo bot Jehovah ki gen. Ka wapwoyogi, ci watwero cuko cwinygi i yo ma pe watwero ngeyone.
KIT MA WAN DUCU WATWERO CUKO KWEDE CWINY LUWOTWA
16. Jami matino tino ango ma watwero timone me cuko cwiny ngat moni?
16 Gin ango ma itwero timone ka inongo tek tutwal me tito bot jo mukene kit ma iwinyo kwede i komgi? Ki lok ada, pe tek tutwal me cuko cwiny jo mukene. Cak ki bwunyo ki dano meno. Ka inen en pe obwunyo kwedi, ci twero bedo ni en tye ki peko mo dok mito ngat mo me lok kwede. Itwero cuko cwinye ka itero iti iwinyo lokke.—Yakobo 1:19.
17. Gin ango ma ocuko cwiny omego mo matidi?
17 Omego mo matidi ma nyinge Henri cwinye obedo ka cwer i kare ma wadine mapol gujuko tic pi Jehovah woko. Ngat acel i kingi obedo wonne, ma yam obedo Jabuli 46, Jepania 3:17, ki Marako 10:29, 30.
laelda. Laneno me adwol oneno ni Henri cwinye tye ka cwer ci en otero Henri ka mato coffee. En otero ite me winyo ka Henri tito kit me en winyo kwede. I nge lokgi, Henri oniang ni etwero konyo jo ma ganggi me dwogo cen i ada ka emedde ki bedo lagen. En bene onongo cuko cwiny i kare ma okwanoWan ducu watwero jingo ki cuko cwiny luwotwa (Nen paragraf 18)
18. (a) Kabaka Solomon ocoyo ningo i kom cuko cwiny? (b) Lakwena Paulo ominiwa tam ango?
18 Pwony ango ma wanongo ki i lanen pa Marthe gin ki Henri? Wan ducu watwero cuko cwiny omego nyo lamego mo ma mito cuko cwiny. Kabaka Solomon ocoyo ni: ‘Lok ma kiloko i kare ma mitte kikome, ber mada! Wang ma nen ma opong ki bunyo miyo yomcwiny bot dano, dong winyo lok maber miyo ibedo maber.’ (Carolok 15:23, 30) Tika ingeyo ngat mo ma cwinye otur nyo ma cwinye tye ka cwer? Pingo pe ikwany kare ikwan bote Wi Lubele nyo pwony mo ki i kabedowa me intanet? Paulo bene opwonyo ni wero wer me Ker twero weko wawinyo maber. En ocoyo ni: ‘Wumedde ki pwonnye, kun wucuko cwinywu kekenwu ki wero jabuli, wer me pako Lubanga ki wer me woro, wuwer bot Jehovah ki pwoc i cwinywu.’—Jo Kolocai 3:16; Tic pa Lukwena 16:25.
19. Pingo cuko cwiny bimitte makato i anyim, dok ngo ma myero watim?
19 Ka wawoto ki dirre cok ki nino pa Jehovah, pire bibedo tek ma loyo me cuko cwiny luwotwa. (Jo Ibru 10:25) Wabibedo ki yomcwiny ka walubo tam pa Paulo man ni: “Wucuk cwinywu kekenwu, dok wukonnye bene kekenwu wek wudong i cwinywu, ngat acel acel okony lawote me dongo, kit macalo wutye ka timone-ni.”—1 Jo Tecalonika 5:11.
^ para. 11 Nying mogo kiloko woko.