1. Gin ango ma lutic pa Lubanga ducu gimito, dok pingo? (Nen cal ma i pok ngeye.)

YECU KRICITO ociko lulub kore ni ‘guciti gulok jo me rok ducu gudok jo ma lube.’ (Mat. 28:19) Lutic pa Lubanga ducu ma gin lugen gimito ni gipwony kit me ‘cobo tic’ ma kimiyogi me atima. (2 Tem. 4:5) Man tye ada pien tic man pire tek dok mitte pi oyot loyo tic mo keken i kwowa. Ento, twero bedo tek me tero cawa malac i tic man kit ma wamito kwede.

2. Ariya ango ma warwatte kwede i tutewa me cobo ticwa me pwony?

² Tye jami mukene ma pigi tek ma mito cawawa ki kerowa. Twero mitte ni wati pi cawa malac i dog ticwa wek wanong cente me gwoko jo gangwa. Romo bedo tek me cobo ticwa me gwoko lupacowa, nyo twero bedo ni komwa lit, cwinywa otur, nyo watye ka yelle ki peko ma bino pi tiyo. Watwero cobo ticwa ducu kakare nining kun nongo kitungcel watye ka lweny ki pekki magi?

3. Lok pa Yecu ma tye i Matayo 13:23 pwonyowa gin ango?

³ Ka kwo ma watye ka wok iye gengowa tero cawa malac i tic pa Jehovah, pe omyero cwinywa otur. Yecu onongo ngeyo ni pe wan ducu watwero nyako nyig marom i tic me Ker-ri. (Kwan Matayo 13:23.) Jehovah tye ki pwoc madit pi ticwa teke watiyo ki cwinywa ducu. (Ibru 6:10-12) Ki tungcel, waromo tamo ni pud watwero timo makato ma watye ka timone. I pwony man, wabineno kit ma watwero weko ticwa me pwony bedo mukwongo i kwowa, kit ma watwero bedo ki kwo ma pe mito jami mapol, ki dong kit me dongo dirowa me tito kwena ki pwony. Ento mukwongo, tyen lokke ngo me cobo ticwa kakare?

4. Tyen lokke ngo me cobo ticwa kakare?

 ⁴ Me ketone i yo macek, cobo ticwa kakare kwako tute ki kerowa ducu i tic me tito kwena ki pwony. Ento cobo ticwa kakare pe kwako wel cawa ma watiyo keken. Tyen lok mumiyo watito kwena bene pire tek bot Jehovah. Ka mar pi Jehovah ki dano luwotwa aye tugo cwinywa, ci wabitic matek ki cwinywa ducu. * (Mar. 12:30, 31; Kol. 3:23) Tic pi Lubanga ki cwinywa ducu tyen lokke ni watiyo pire ki kerowa ducu kit ma twere. Ka watye ki pwoc pi mot me tito kwena, ci wabitute me tito kwena bot jo mapol kit ma watwero.

5-6. Mi labol i kom kit ma dano ma cawane nok twero weko tic me pwony bedo gin ma pire tek loyo i kwone.

⁵ Tam kong i kom bulu mo ma maro goyo adungu. Cwinye bedo yom me goyo wer teke kare mo keken onen. Lacen en onongo tic me goyo adungu i ka galowang mo i tum cabit ducu. Ento cente ma kiculle kwede pe romo wilo jami ducu ma mitte me kwone. Pi meno, en dok onongo tic macalo lacat i dukan kun tiyo cakke i Ceng Baraja me o i Ceng Abic. Kadi bed ni en tero cawa malac i dukan ka cat, ento cwinye tye i goyo wer. Cwinye bene mito dongo dirone me wer ki doko lawer ma goyo pi cawa malac. Kadi bed kit meno, en pud yenyo cawa mo, kadi manok me goyo adungu.

⁶ I yo acel-lu, twero bedo ni pe itwero tero cawa malac i tito kwena kit ma imito. Ento, meno aye tic ma imaro. Itute me dongo dironi me gudo cwiny dano ki lok me kwena maber. Kit macalo itye ki tic mapol i wi, iromo bedo ka tamo kit ma itwero weko tic me pwony bedo gin ma pire tek loyo i kwoni.

7-8. Watwero lubo lanen pa Yecu nining i kom kit ma en otero kwede tic me tito kwena?

⁷ Yecu oweko labol maber adada i kom kit ma en otero kwede tic me pwony. En  oweko tito lok i kom Ker pa Lubanga obedo gin ma pire tek loyo i kwone. (Jon 4:34, 35) En owoto pi mairo miya mapol me tito kwena bot jo mapol kit ma etwero. Otiyo ki kare mo keken ma onen me lok bot dano i dye lwak ki dok i gangigi. Jami ducu ma Yecu otimo i kwone obedo me cwako tic me pwony.

⁸ Watwero lubo lanen pa Kricito ka wayenyo kare mo keken me lok ki dano i kom kwena maber-ri. Watye atera me jalo jami ma yomo cwinywa wek watit kwena. (Mar. 6:31-34; 1 Pet. 2:21) Jo mogo ma i kacokke gitwero tic macalo painia keken, painia marii nyo painia pi tutunu. Jo mukene bene gipwonyo leb mapat nyo gidak i kabedo ma can lutit kwena tye iye. Ento ki lok ada, pol pa tic man me tito kwena tye ka cobbe pi tute pa lutit kwena ma pe gitye painia. Kadi bed watero cawa malac nyo manok i tic me pwony, Jehovah pe penyowa me tic makato kerowa. En mito ni wan ducu wanong mit pa ticwa ka watito ‘lok me kwena maber pa Lubanga ma layomcwiny.’​—1 Tem. 1:11; Nwo. 30:11.

9. (a) I yo ango ma Paulo oketo tic me pwony obedo tic ma pire tek loyo i kwone kadi bed onongo mitte ni oti dog tic mukene? (b) Tic pa Lukwena 28:16, 30, 31 nyuto ngo i kom kit ma Paulo otero kwede ticce me tito kwena?

⁹ Lakwena Paulo oweko lanen maber me keto tic me pwony mukwongo i kwone. I kare ma en tye i Korint i wotte me aryo macalo lamiconari, centene otum woko dok onongo mitte ni oti tic me yubo kema. Ento Paulo pe otero tic me yubo kema calo tic ma pire tek loyo. En otiyo tic man me nongo cente ma twero konye i ticce me pwony wek etit kwena bot jo me Korint “nono, labongo gamo cul mo” ki botgi. (2 Kor. 11:7) Kadi bed ni onongo mitte ni Paulo obed ki dog tic man, en omedde ki keto ticce me pwony me bedo gin ma pire tek loyo, kun tito kwena i Cabat ducu. I kare ma en onongo cente ma mitte, Paulo dong oketo cwinye ducu i tito kwena. En “ogeto [nyo omiine] ka tito lok kun tito ki Lujudaya ni Kricito ma Lubanga oyero-ni aye Yecu.” (Tic 18:3-5; 2 Kor. 11:9) Lacen, i kare ma Paulo onongo tye mabuc i ote kene i Roma pi mwaki aryo, en otito kwena bot welene dok ocoyo waraga. (Kwan Tic pa Lukwena 28:16, 30, 31.) Paulo omoko tamme pe me weko gin mo genge ki cobo ticce me pwony. En ocoyo ni: “Wan ma dong giorowa i tic man . . . , cwinywa pe dok tye ka dok cen.” (2 Kor. 4:1) Calo Paulo, kadi bed mitte ni wabed ki dog tic mo, pud watwero weko tic me Ker-ri bedo mukwongo i kwowa.

10-11. Watwero cobo ticwa me pwony kakare kadi bed watye ki peko me yot kom nining?

¹⁰ Ka pe watwero tito kwena i ot ki ot kit ma cwinywa mito kwede pi peko me tiyo nyo two, pud watwero tito kwena i yo mukene. Lutit kwena me cencwari me acel gutito kwena ka mo keken ma dano nonge iye. Gutito kwena i cawa ki kabedo mo keken ma dano tye iye​—i ot ki ot, i dye lwak, ki bene ma pe guyubbe iye​—bot jo ma onongo ‘girwatte kwedgi jwijwi.’ (Tic 17:17; 20:20) Ka pe watwero wot pi cawa malac, ci watwero bedo i kabedo ma guro wi dano mapol kun waloko ki jo ma gikato. Nyo watwero miyo caden ma pe wayubbe iye, coyo waraga nyo bene miyo caden ki cim. Lutit kwena mapol ma gitye ki goro nyo two gitye ka nongo mit pa tito kwena i yo magi.

¹¹ Kadi bed itye ki peko me yotkom, pud itwero cobo ticci me pwony ducu kakare. Kong dok wanen labol pa Paulo. En owaco  ni: ‘Atwero jami ducu liweng pi Lubanga ma miya teko.’ (Pil. 4:13) Teko meno okonyo Paulo mada i kare mo ma kome odoko lit i wotte macalo lamiconari. En otito bot jo Galatia ni: “Pi lit koma omiyo atittiwu lok me kwena maber pi tyen mukwongo.” (Gal. 4:13) I yo acel-lu, pekoni me yotkom twero yabbi yo me tito kwena bot jo mukene calo ludaktari, nac, kacel ki jo mukene ma gitiyo i ot yat. Pol pa jo magi gibedo pe gang i cawa ma nongo watye ka tito kwena i ot ki ot.

12. Tyen lokke ngo me bedo ki ‘wang ma pe mito jami mapol?’

¹² Yecu owaco ni: “Tara me kom aye wang. Ka ce wangi bal mo pe iye [nyo pe mito jami mapol], ci komi kulu bibedo leng.” (Mat. 6:22) En onongo tye ka lok i kom ngo? Lok man nyuto ni omyero wabed ki kwo ma pe mito jami mapol, nyo waket cwinywa i kom gin acel, ma pe waweko gin mukene wiro tamwa. Yecu kikome owekiwa lanen maber ki keto cwinye i kom ticce me pwony dok opwonyo lulub kore me keto tamgi i kom tic pi Jehovah ki Kerre. Walubo lanen pa Yecu ka waweko tic me tito kwena bedo gin ma pire tek loyo i kwowa, ‘kun waketo cwinywa i kom kerre, ki nongo kit ma atir ma en tye kwede.’​—Mat. 6:33.

13. Gin ango ma twero konyowa me keto cwinywa i ticwa me pwony?

¹³ Yo acel me keto cwinywa i kom ticwa me pwony aye ki dwoko rwom me kwowa  piny wek wabed ki cawa muromo me konyo jo mukene me ngeyo ki maro Jehovah. * Me labolle, tika watwero dwoko piny cawa ma wacwalo i dog ticwa wek wamed cawawa i tic me pwony i dye cabit? Tika watwero dwoko piny cawa ma wacwalo i galowang?

14. Alokaloka ango ma omego mo gin ki dakone gutimo wek gumed cawagi i tic me pwony?

¹⁴ Nen kong gin ma laelda mo ma nyinge Elias gin ki dakone gutimo. En otito ni: “Onongo pe watwero cako tic macalo painia marii cutcut, ento onongo tye jami mogo ma watwero timone wek wamed cawawa i tito kwena. Pi meno, watimo alokaloka mogo matino tino i kwowa wek wamed cawawa. Me labolle, wadwoko piny wel cente ma watiyo kwede. Wadwoko bene cawa me galowangwa. Dok wapenyo ludito ticwa me loko cawa me ticwa wek wabed ki kare me tito kwena. Man oweko wanongo kare me tito kwena i wi otyeno, nywako i tito kwena i dye cabit kiryo kulu i dwe ducu, dok wel lutino kwanwa omedde. Man pud dong ominiwa yomcwiny ya!”

15-16. Ma lubbe ki 1 Temceo 4:13, 15, watwero medde ki dongo dirowa macalo lutit kwena nining? (Nen bene bok ma wiye tye ni “ Yub Mogo ma Bikonya me Cobo Ticca Ducu Kakare.”)

¹⁵ Yo mukene me cobo ticwa ducu kakare aye me dongo dirowa me tito kwena ki pwony. Tye dog tic mogo ma kimito ni jo ma tiyo iye gubed ka nongo pwonnye kare ki kare wek gudong ngec ki dirogi. Man bene tye ada pi lutit kwena  me Ker-ri. Omyero wamedde ki pwonyo kit me dongo dirowa i ticwa me pwony.​—Car. 1:5; kwan 1 Temceo 4:13, 15.

¹⁶ Dong, i yo ango ma watwero medde ki dongo dirowa i tic me pwony? Watimo man ki keto cwinywa me lubo tira ma wanongo i cokke me Kwowa ki Ticwa ma wabedo kwede cabit ducu. Cokke man miyo pwonnye ma pire tek ma konyowa me dongo dirowa i tic me pwony motmot. Me labolle, ka wonkom tye ka miyo tira bot lutino kwan ma gumiyo pwony i nino meno, watwero yenyo tam ma waromo keto i tic me dongo dirowa. Waromo tic ki tam ma en omiyo-ni i kare ma watye ka nywako kwena maber-ri ki ngat mo. Watwero penyo omego ma neno wi gurupwa me tito kwena pi kony, nyo watwero tic kacel kwede nyo latit kwena mukene mucwiny, painia, nyo laneno me adwol. Ka dirowa me tic ki Jami Ticwa ma Pigi Tego me Pwony woto ki dongo, wabinongo mit pa ticwa me tito kwena ki pwony.

17. Adwogi maber ango ma inongo ka icobo ticci ducu kakare?

¹⁷ Pud dong obedo mot madit ni Jehovah ye ni wabed ‘lutic kacel kwede!’ (1 Kor. 3:9) Ka waketo ‘jami ma pigi tek’ bedo mukwongo dok waketo cwinywa i kom ticwa me pwony, ci ‘wabitic bot Jehovah ki yomcwiny.’ (Pil. 1:10; Jab. 100:2) Macalo latic pa Lubanga, itwero bedo ki gen ni en bimini kero me cobo ticci me pwony kadi bed itye ki ariya nyo goro kom ma ilwenyo kwede. (2 Kor. 4:1, 7; 6:4) Kadi bed kwo ma itye iye weko itwero tito kwena pi cawa malac nyo manok, pud itwero bedo ki ‘tyen lok me wakke [nyo yomcwiny]’ ka itiyo ticci ki cwinyi ducu. (Gal. 6:4) Ka icobo ticci ducu kakare, ci ibinyuto marri pi Jehovah ki dano luwoti. “Ka itimo kumeno, in kikomi ibilarre ki jo ma winyi bene.”​—1 Tem. 4:16.