1-2. Pingo Yecu obedo ki par madwong?

I NINO me agikki me kwone macalo dano, Yecu obedo ki par. I nino meno en onongo bikato ki i aunauna ma onongo bio wa i to i cing jo maraco. Ento pe tone keken aye ma oweko Yecu obedo ki par. En onongo maro Wonne matek dok mito yomo cwinye. Yecu oniang ni ka egwoko gennene i kare me atematema matek ma tye i nyime, ci man onongo bikonyo me lonyo nying Jehovah. Yecu bene onongo maro dano, dok en ongeyo ni genwa me nongo kwo ma pe tum twere keken ka en obedo lagen wa i tone.

² Kadi bed ni Yecu onongo tye ka kato ki i kwo matek, en obedo ki kuc. En otito ki lupwonnyene ni, “Awekkiwu kuc.” (Jon 14:27) Yecu onongo tye ki “kuc pa Lubanga,” ma obedo cwiny ma opye mot pi wat macok ki Jehovah. Kuc meno okonyo Yecu pe me bedo ki par mapol.​—Pil. 4:6, 7.

3. Gin ango ma wabinyamo i pwony man?

³ Pe tye ngat mo i kinwa ma bikato ki i atematema ma rom ki pa Yecu, ento wan ducu ma walubo kor Yecu wabikemme ki atematema. (Mat. 16:24, 25; Jon 15:20) Calo Yecu, wan ducu wabibedo ki par i kare mogo. Gin ango ma watwero timone wek par pe obwowa ma miyo warwenyo kucwa woko? Kong dong wanenu jami adek ma Yecu otimo i kare me ticce i lobo ki dok kit ma watwero lubo lanene ka watye ka lweny ki atematema.

4. Ma lubbe ki 1 Jo Tecalonika 5:17, labol mene ma nyuto ni Yecu olego teretere i ninone me agikki i lobo?

⁴ Kwan 1 Jo Tecalonika 5:17. Yecu obedo ka lega teretere i nino me agikki me kwone i lobo. I kare ma en onyuto ki lupwonnyene kit me kwero Nipo me tone, en olego pi mugati ki vino. (1 Kor. 11:23-25) Ma peya gua ki i kabedo ma gukwero iye kwer me Kato, en olego ki lupwonnyene. (Jon 17:1-26) I kare ma en kacel ki lupwonnyene guo i Wi Got Jeituni i dye wor meno, en olego teretere. (Mat. 26:36-39, 42, 44) Dok lok me agikki ma en oloko ma peya oto obedo lega. (Luka 23:46) Yecu olego bot Jehovah i kom jami ducu ma otimme i kome i ninone me agikki.

5. Pingo lworo omako lukwena pa Yecu?

⁵ Tyen lok acel mumiyo Yecu okanyo atematema aye ni en ojenge i kom Wonne i lega. Lupwonnyene kitungcel pe gulego i dyewor meno. Macalo adwogine, lworo omakogi i cawa ma gurwatte ki atematema. (Mat. 26:40, 41, 43, 45, 56) Ka watye ka kato ki i peko, wabicung matek keken ka walubo lanen pa Yecu me ‘lego Lubanga ma pe wakeng.’ Gin ango ma watwero lega pire?

6. Niye bikonyowa me bedo ki kuc nining?

⁶ Watwero lega bot Jehovah wek ‘omed niyewa.’ (Luka 17:5; Jon 14:1) Wamito niye pien Catan bitemo jo ducu ma gilubo kor Yecu. (Luka 22:31) Niye bikonyowa nining me bedo ki kuc kadi bed mitte ni walweny ki pekki mapatpat teretere? Ka dong watimo jami ducu ma  watwero me lweny ki peko moni, bedo ki niye i kom Jehovah bikonyowa me jalo jami i cinge. Pien wageno ni en twero cobo peko i yo maber loyowa, man weko wabedo ki kuc i cwinywa ki wic ma opye mot.​—1 Pet. 5:6, 7.

7. Gin ango ma ipwonyo ki i lok pa Robert?

⁷ Lega konyowa me bedo ki kuc i cwinywa kadi bed watye ka kato ki i peko. Nen kong labol pa Robert, laelda ma lagen ma tye mwaka 80 ki wiye. En owaco ni: “Tam ma kimiyo i Jo Pilipi 4:6, 7 okonya me lweny ki pekki mapol i kwona. Akato ki i peko me can lim. Dok pi kare mo kikwanya woko ki i tic macalo laelda.” Gin ango ma okonyo Robert me bedo ki kuc i cwinye? En owaco ni, “Ka acako bedo ki par, alego cutcut. Angeyo ni ka alego matek, awinyo bene kuc madwong.”

8. Kit ma kinyuto kwede i Jon 8:29, tyen lok ango mukene ma omiyo Yecu obedo ki wic ma opye mot?

⁸ Kwan Jon 8:29. Kadi wa i kare ma kitye ka une, Yecu obedo ma wiye opye mot pien oniang ni etye ka yomo cwiny Wonne. En obedo lawiny kadi bed ni onongo tek bote me timone. En onongo maro Wonne dok oweko tic pi Jehovah obedo gin ma pire tek loyo i kwone. Ma peya en obino i lobo kany, Yecu onongo tye “ladiro tic” pa Lubanga. (Car. 8:30) Dok i kare ma en tye i lobo, en opwonyo jo mukene lok i kom Wonne ki mit kom.  (Mat. 6:9; Jon 5:17) Timo meno okelle yomcwiny madwong.​—Jon 4:34-36.

9. Pingo wabedo ma wiwa opye mot ka watero cawa malac i tito kwena?

⁹ Watwero lubo lanen pa Yecu ka wawinyo lok pa Jehovah dok “wamedde bene ki tic pa Rwot nino ducu.” (1 Kor. 15:58) Ka “waketo cwinywa” i tic me tito kwena, ci wabineno pekkiwa i yo mupore. (Tic 18:5, NW.) Me labolle, jo ma warwatte kwedgi i ticwa me pwony pol kare gitye ki pekki mapol loyowa. Ento, ka gupwonnye me maro Jehovah ki dok keto i tic tirane, kwogi yubbe dok gibedo ki yomcwiny. Kare ducu ma waneno gin ma kit man timme, wabedo ki tekcwiny ni Jehovah bigwokowa. Tekcwiny ma kit man weko wabedo ki wic ma opye mot. Laminwa mo ma dong oyelle ki tam ni konye pe kacel ki turcwiny pi kwone ducu owaco ni lok man tye ada. En owacci, “Ka atye i tic me pwony, anongo ni atwero juko par dok abedo ki yomcwiny. Atamo ni tye kit man pien ka atye ka tito kwena, awinyo ni atye cok adada ki Jehovah.”

10. Gin ango ma ipwonyo ki i lok pa Brenda?

¹⁰ Tam kong i kom laminwa mo ma nyinge Brenda. En kacel ki nyare gitye ki two mo malit ma neko ler kom dano. Brenda dong pe twero wot ento tiyo ki lela pa lungolo dok kerone nok. En cito ka tito kwena i ot ki ot kicel kicel, ento pol kare miyo caden ki coyo waraga. En owaco ni: “I kare ma aniang ni twona-ni pe bicang i kare-ni, awinyo ni atye agonya me keto cwinya i ticca me pwony. Ticca me pwony konya me kwanyo tamma woko ki i par ma atye kwede. Weko aketo cwinya i konyo jo ma i wang tic me kacokkewa. Man kare ducu poyo wiya i kom gen ma atye kwede pi anyim.”

11-13. (a) Lukwena pa Yecu ki jo mukene gunyuto nining ni gitye lurem Yecu? (b) Lureme magi guweko en owinyo nining?

¹¹ Kare ducu ma Yecu tye ka tito kwena, lukwenane ma lugen gubedo lurem macok kwede. Gubedo kodi lurem ma carolok me Baibul oloko i komgi kit man ni: “Tye dano ma moko mere i kom lareme liking ma loyo ominne kikome.” (Car. 18:24) Yecu onongo maro lureme magi ducu. I kare me ticce me pwony, omegine me ic acel pe guketo niye i kome. (Jon 7:3-5) I kare mo, kadi wa wadine gutamo ni en odoko lapoya. (Mar. 3:21) Man aye oweko ma peya Yecu oto, en onongo twero waco ki lupwonnyene ma lugen ni: “Wun aye jo ma yam wubedo ka ngeta jwijwi i kare ducu ma yam gibedo ka tema.”​—Luka 22:28.

¹² Lukwena pa Yecu kare mogo guturo cwinye, ento en pe oketo cwinye i kom gorogi dok en oneno ni gitye ki niye i kome. (Mat. 26:40; Mar. 10:13, 14; Jon 6:66-69) I dyewor me agikki ma peya kineke, Yecu otito bot co ma lugen magi ni: “Alwongowu [ni] lurema, pien gin ducu ma yam awinyo ki bot Wora dong atyeko nyuttiwu.” (Jon 15:15) Labongo akalakala mo, lurem Yecu gucuko cwinye adada. Kony ma gumine i ticce me pwony omiyo Yecu obedo ma cwinye yom.​—Luka 10:17, 21.

¹³ Medo i kom lukwenane, Yecu onongo tye ki lureme mukene, co ki mon, ma gukonye i tito kwena ki dok i yo mukene. Mogo gujole i gangigi ka cam.  (Luka 10:38-42; Jon 12:1, 2) Mukene guwoto kacel kwede dok gunywako jamigi kwede. (Luka 8:3) Yecu onongo tye ki lurem mabeco pien en bene obedo larem maber. En otimo jami mabeco pi lureme dok pe oketo gingi i komgi tutwal. Yecu onongo pe ki roc, ento en obedo ki pwoc pi kony ma oa ki bot lureme ma gitye ki roc. Dok waromo bedo labongo akalakala mo keken ni gin bene gukonye me bedo ma wiye opye mot.

14-15. Watwero mako lurem mabeco nining, dok gitwero konyowa nining?

¹⁴ Lurem mabeco bikonyowa me bedo lugen bot Jehovah. Dok yo maber loyo me nongo lurem mabeco aye me bedo larem maber. (Mat. 7:12) Me labolle, Baibul cuko cwinywa me tic ki kerowa kacel ki cawawa me konyo jo mukene, tutwalle “jo ma tye ki can.” (Ep. 4:28, Baibol.) Tika itwero tam i kom ngat ma i kacokkewu ma itwero mine kony? Tika itwero cito i cuk ka wil pi latit kwena ma pe twero a ki gang pi two nyo pien oteggi? Itwero tero cam pi jo me ot mo ma gitye ki peko me can lim? Ka ingeyo kit me tic ki jw.org^® ki JW Library^® app, tika itwero konyo jo mukene me kacokkewu me nongo lonyo me cwiny ma tye iye? Ka waketo cwinywa i konyo jo mukene, ci wabibedo ki yomcwiny.​—Tic 20:35.

¹⁵ Lurem ma wamako gibikonyowa ka watye ki peko dok man weko wabedo ma wiwa opye mot. Kit macalo Eliu owinyo kwede koko pa Yubu i kare ma tye ka tito pekone, luremwa bene gikonyowa kun  gidiyo cwinygi giwinyo lokwa ka watye ki peko. (Yubu 32:4) Pe omyero watam ni luremwa gumok tam piwa, ento wanyuto ryeko ka wawinyo tamgi ma jenge i kom Baibul. (Car. 15:22) Kit macalo Kabaka Daudi ojolo kony pa lureme ki mwolo, omyero wan bene pe wawek lewic omakwa me jolo kony ki bot luremwa ka watye ki peko. (2 Cam. 17:27-29) Ada, lurem ma kit magi gubedo mic mua ki bot Jehovah.​—Yak. 1:17.

16. Ma lubbe ki Jo Pilipi 4:6, 7, yo acel mene keken ma watwero bedo ki kuc? Tit kong.

¹⁶ Kwan Jo Pilipi 4:6, 7. Pingo Jehovah owacciwa ni watwero nongo kuc ma en miyo “i Kricito Yecu”? Pien watwero bedo ki kuc ma rii i tamwa ki cwinywa keken ka waniang tic ma Yecu tye kwede dok waketo niye i kome. Me labolle, pi ginkok pa Yecu, Lubanga twero weko balwa ducu. (1 Jon 2:12) Lwodo lok meno pud dong kweyo cwinywa ya! Macalo Kabaka me Ker pa Lubanga, Yecu bikwanyo can mo keken ma Catan ki lobone gukelo i komwa. (Ic. 65:17; 1 Jon 3:8; Yabo 21:3, 4) Man pud dong miniwa twon gen madit ya! Dok kadi bed Yecu ominiwa tic matek me atiya, en tye kwedwa, kun miniwa kony i kare man me agikki me lobo-ni. (Mat. 28:19, 20) Man pud dong miyowa tekcwiny ya! Kwecwiny, gen, ki tekcwiny​—magi aye jami ma pigi tego ma mitte wek wabed ki kuc.

17. (a) Lakricitayo twero bedo ma wiye opye mot nining? (b) Kit ma kiciko kwede i Jon 16:33, gin ango ma wabibedo ki kero me timone?

¹⁷ Dong ngo ma itwero timo wek ibed ma wi opye mot ka itye ka lweny ki atematema madongo? Itwero bedo ki wic ma opye mot ka ilubo lanen pa Yecu. Me acel, leg Lubanga, dok pe iol ki lega. Me aryo, bed lawiny bot Jehovah dok itit kwena ki mit kom kadi bed timone tek. Ki me adek, yeny kony ki bot luremi ka itye ka kato ki i peko. Ka itimo kit meno ci kuc pa Lubanga bigwoko tammi ki cwinyi. Dok calo Yecu, in bene ibiloyo atematema mo keken.​—Kwan Jon 16:33.