1. Kit ma kitito kwede i Jo Epeco 6:10-13, i yo mene ma Jehovah nyuto kwede marre piwa? Tit kong.

YO ACEL ma Jehovah nyuto kwede marre piwa macalo luticce aye ki konyowa me lweny i kom lumonewa. Lumonewa maraco loyo aye Catan ki jogine. Jehovah ocikowa i kom lumonewa magi, dok omiyowa jami ma mitte me lweny i komgi. (Kwan Jo Epeco 6:10-13.) Ka wajolo kony pa Jehovah dok wajenge i kome i yo ducu, ci watwero loyo lwenywa i kom Catan. Wan bene watwero bedo ki tekcwiny ma lakwena Paulo obedo kwede. En ocoyo ni: “Ka Lubanga tye tung botwa, ci anga ma lakworwa?”​—Rom. 8:31.

2. Gin ango ma wabinyamo i pwony man?

² Macalo Lukricitayo me ada, wan pe waketo cwinywa ducu i kom Catan ki jogine. Waketo cwinywa i kom pwonyo lok i kom Jehovah ki tic pire. (Jab. 25:5) Kadi bed kit meno, pud mitte ni wange yo mogo ma Catan tiyo kwede. Pingo? Wek en pe olowa ki ryekone. (2 Kor. 2:11) I pwony man wabinyamo yo acel ma Catan ki jogine gimaro tic kwede tutwal me bwolo dano. Wabinyamo bene kit ma watwero loyo lweny i kom Catan ki jogine.

3-4. (a) Tim tyet obedo gin ango? (b) Ye i kom tim tyet mono onya lakwene?

³ Yo acel ma Catan ki jogine gimaro tic kwede tutwal me bwolo dano aye tim tyet. Lutyet giwaco ni gitwero  ngeyo nyo timo jami ma dano adana pe twero ngeyo nyo timone. Me labolle, mogo giwacci gitwero ngeyo gin ma tye i anyim kun gityeto ki lakalatwe nyo jami mukene. Lutyet mukene gitimme calo gitye ka lok ki jo muto. Jo mukene gitiyo tic calo ajwaka nyo gitimo tango, dok giceno dano. *

⁴ Ye i kom tim tyet mono onya lakwene? Kwed mo ma kitimo i lobe 18 ma tye Kupiny me Amerika ki i nam me Caribbean onongo ni dano acel i kom adek ma kipenyogi giye i kom timo tango, tim jokjok, tim tal, tic ki lwit, dok giye ni twere me kubbe ki jogi. Kitimo bene kwed mukene i lobe 18 i Afrika. Kinongo ni, wel makato nucu pa dano ma kipenyogi giye i kom tim jokjok. Ngene kene ni, labongo paro pi ka ma wakwo iye, wan ducu omyero wagwokke ki i kom tim jokjok. Man mitte pien Catan tye ka temme ki tekke ducu me ‘bwolo dano ma i wi lobo ducu.’​—Yabo 12:9.

5. Jehovah winyo nining i kom tim tyet?

⁵ Jehovah aye “Lubanga me ada.” (Jab. 31:5) Pi meno en winyo nining i kom tim tyet? Cwinye dag adada! Jehovah owaco bot jo Icrael ni: “Pe ginong ngat mo i kinwu ma owango wode nyo nyare me gityer, nyo dano mo ma odoko latyet, nyo latyet ki ajaa, langi i dyel, latal, lakot piny, lakor tipo, min jok nyo lapeny dog tipo pa lato. Ka dano mo timo gin ma kit meno ci en bedo me kwer bot [Jehovah].” (Nwo. 18:10-12) Lukricitayo pe gitye i te Cik ma Jehovah omiyo ki Luicrael. Kadi bed kit meno, wangeyo ni kit ma en winyo kwede i kom tim tyet pe olokke.​—Mal. 3:6.

6. (a) Catan tiyo ki tim tyet me kelo peko i kom dano nining? (b) Lok ada ango madok i kom jo muto ma tye i Latitlok 9:5?

⁶ Jehovah cikowa i kom tim tyet pien en ngeyo ni Catan tiyo kwede me kelo peko i kom dano. Catan tiyo ki tim tyet me nyayo lok goba​—goba ni jo muto pud gitye kwo ka mo. (Kwan Latitlok 9:5.) Catan tiyo ki tim tyet me kelo lworo i kom dano ki wiro tamgi woko ki i kom Jehovah. Mitine tye ni jo ma timo tim tyet gibiketo gengi i kom cwiny maraco me ka geno Jehovah.

7. Gin ango ma Jehovah wacciwa?

⁷ Kit ma waneno kwede con, Jehovah wacciwa gin ma omyero wange wek Catan ki jogine pe gubwolwa. Kong dong wanenu jami mogo ma watwero timone me konyowa i lwenywa i kom Catan ki jogine.

8. (a) Yo ma pire tek loyo mene ma wakwero kwede cwiny maraco? (b) I yo ma nining ma Jabuli 146:4 yaro ka maleng goba pa Catan i kom jo muto?

⁸ Kwan dok ilwod Lok pa Lubanga. Man aye yo ma pire tek loyo ma wakwero kwede goba ma jogi ginyayo. Lok pa Lubanga tye calo pala lucwan mabit ma twero yaro goba pa Catan ka maleng. (Ep. 6:17) Me labolle, Lok pa Lubanga yaro ka maleng goba man ni jo muto twero kubbe ki jo makwo. (Kwan Jabuli 146:4) Poyo  bene wiwa ni Jehovah keken aye twero ngeyo gin ma bitimme i anyim. (Ic. 45:21; 46:10) Ka wakwano dok walwodo Lok pa Lubanga kare ki kare, wabibedo atera me kwero ki dago goba ma cwiny maraco gimito ni waye.

9. Tim mene ma kubbe ki tim jokjok ma omyero wagwokke ki iye?

⁹ Kwer tim mo keken ma kubbe ki tim tyet. Macalo Lukricitayo me ada, pe wanywako i tim jokjok mo keken. Me labolle, pe wacito bot ajwaka nyo watemme me kubbe ki jo muto i yo mo keken. Kit ma wanyamo kwede i pwony mukato-ni, wagwokke ki kwer me yik ma jenge i kom lok ni jo muto pud gitye kwo ka mo. Dok pe watyeto ki lakalatwe nyo jami mukene wek waniang gin ma bitimme i anyim. (Ic. 8:19) Wangeyo ni tim magi ducu rac adada dok gitwero ketowa i te twero pa Catan ki jogine.

10-11. (a) Gin ango ma jo mogo i cencwari me acel gutimo i nge pwonyo ada? (b) Ma lubbe ki 1 Jo Korint 10:21, pingo omyero walub lanen pa Lukricitayo me cencwari me acel, dok waromo timo man nining?

¹⁰ Wang gin mo keken ma kubbe ki tim me jokjok. Jo mogo ma onongo gibedo i boma me Epeco i cencwari me acel gubedo ka timo tim tyet. I kare ma gupwonyo ada, gutimo gin mo ma timone pe yot. “Jo ma yam lujogi gukelo buk tyetgi guguro kacel guwangogi woko i nyim lwak ducu.” (Tic 19:19) Jo magi guketo tek me kwero cwiny maraco woko. Buk tyetgi onongo welgi tek adada. Ento me ka miyone bot jo mukene nyo catogi, gin guwango woko. Guketo cwinygi i kom yomo cwiny Jehovah ento pe i kom wel cente ma gitwero nongo ki i bukke magi.

¹¹ Watwero lubo lanen pa Lukricitayo magi me cencwari me acel nining? Bedo ber ka wawango gin mo keken ma watye  kwede ma kubbe ki tim jokjok. I kine tye iye yat nyo jami mogo ma dano ruko me gwokogi ki i kom cwiny maraco.​—Kwan 1 Jo Korint 10:21.

12. Lapeny ango ma omyero wapenye kwede i kom jami ma wagalo ki wangwa?

¹² Ngii gin ma igalo ki wangi. Pennye kekeni ni: ‘Tika akwano bukke, magajin nyo pwony mogo i Intanet ma kubbe ki jogi? Wer ma awinyo, filim ki yub me telebijon ma aneno, nyo tuko me vidio ma atuko kono? Tika gin mo keken ma agalo ki wanga kubbe ki tim jokjok? Tika nyuto jami calo anati, cen ma kiwacci kati ki i lyel ci cwiyo remo pa dano, nyo jami mukene ma kit meno? Tika nyuto timo tango, ceno dano nyo lamo lam calo jami me galowang ma pe raco?’ Ngene kene ni, pe dong galowang ducu ma tye ki ododo nyo jami ma pe twero timme i kwo kubbe ki tim jokjok. Ka itye ka ngiyo jami ma igalo ki wangi, mok tammi me yero jami ma bikonyi me bedo bor ki gin mo keken ma Jehovah dagi. Wamito ni watute matek me ‘bedo ma cwinywa leng’ i nyim Lubangawa.​—Tic 24:16. *

13. Ngo ma omyero wagwokke ki timone?

¹³ Pe ibed ka rweyo pi jogi nyo boko lok i komgi. Ma lubbe ki lok man, wamito ni walub lanen pa Yecu. (1 Pet. 2:21) Ma peya Yecu obino i lobo, en kong okwo i polo, dok onongo ngeyo jami mapol adada i kom Catan ki jogine. Ento en pe obedo ka boko lok i kom jami ma cwiny maraco gutimo. Yecu onongo mito bedo  lacaden pa Jehovah, ento pe ngat ma rweyo pi Catan. Waromo lubo lanen pa Yecu ka pe wabedo ka boko lok i kom jogi. Me ka meno, wanyuto i lokwa ni ‘cwinywa opong ki lok mabeco adada’ ma en aye lok ada.​—Jab. 45:1.

14-15. (a) Pingo pe omyero wabed ki lworo mukato kare woko i kom cwiny maraco? (b) Ngo ma nyuto ni Jehovah gwoko jone i kare-ni?

¹⁴ Pe ibed ki lworo mukato kare woko i kom jogi. I lobo ma wakwo iye i kare-ni, jami maraco twero timme i komwa. Awano ma timme atura, two, nyo kadi wa to twero poto i komwa i cawa mo keken. Ento pe omyero watam ni cwiny maraco aye gitye i nge tim meno. Baibul tito ni ‘kare kacel ki jami ma timme atura’ twero poto i kom ngat mo keken. (Latit. 9:11) Jehovah dong onyuto ni etek eloyo jogi. Me labolle, Lubanga pe oye ni Catan onek Yubu. (Yubu 2:6) I kare pa Moses, Jehovah onyuto ni etek eloyo lutyet me Ejipt. (Nia 8:18; 9:11) Lacen i polo, Jehovah omiyo bot Yecu twero i kom Catan ki jogine, pi meno Yecu obologi woko ki i polo wa piny i lobo. Dok cokcok-ki, kibibologi i bur ma tere pe gik, ka ma pe gibitwero wano iye ngat mo keken.​—Yabo 12:9; 20:2, 3.

¹⁵ Waneno lanyut mapol ma nyuto ni Jehovah tye ka gwoko jone i kare-ni. Tam kong: Watye ka tito kwena ki pwonyo dano i twok lobo-ni ducu. (Mat. 28:19, 20) Macalo adwogine, watye ka yaro ka maleng tic pa Larac-ci. Ki lok ada, ka onongo Catan twero, kono en ojuko ticwa wa con, ento pe twero. Dong pe omyero wabed ki lworo mukato kare woko i kom cwiny maraco. Wangeyo ni “wang Rwot [Jehovah] neno lobo ducu, me nyuto tekke bot jo ma gibedo ki lengic i kome.” (2 Tekwaro 16:9) Ka watye lugen bot Jehovah, jogi pe gibitwero kelo awano mo i komwa ma bedo matwal.

16-17. Mi labol ma nyuto tekcwiny ma mitte me kwero cwiny maraco.

¹⁶ Tekcwiny mitte me cung matek i kom jogi, tutwalle ka luremwa nyo wadiwa giketo  lyeto i komwa pien gitamo ni gin marac bitimme i komwa ka pe wanywako kwedgi i kwer mogo. Ento Jehovah goyo laane i kom jo ma ginyuto tekcwiny ma kit meno. Tam kong i kom labol pa laminwa ma nyinge Erica, ma bedo i lobo Ghana. Erica onongo tye ki mwaka 21 i kare ma oye kwano Baibul. Kit macalo wonne tye ajwaka ma timo tango, onongo kimito ni en onywak i kwer jokjok ma kwako camo ringo ma gityero bot jogi pa wonne. I kare ma Erica okwero, jo ganggi guneno meno calo yet i kom jogigi. Jo ganggi gubedo ki lworo ni jogi magi bikelo apoya ki two mapatpat i komgi.

¹⁷ Jo gang pa Erica gutemo diye me lubo kwer man, ento en pe omedo ki ye, kadi bed kiryeme woko ki gang. Lucaden pa Jehovah mogo gujole me bedo botgi. I yo meno, Jehovah ogoyo laane i kom Erica ki mine lupaco manyen​—luye luwote ma gudoko calo omege ki lumegine. (Mar. 10:29, 30) Kadi bed jo ganggi gukwere dok guwango jamine woko, ento Erica pud omedde ki bedo lagen bot Jehovah, onongo batija, dok tye ka tic macalo painia marii. En pe lworo jogi. Dok madok i kom jo ganggi, Erica owacci, “Abedo ka lega nino ducu ni jo gangwa gunong yomcwiny me ngeyo Jehovah ki bedo agonya ma bino pi tic pi Lubangawa ma lamar-ri.”

18. Mot ango ma wanongo ka waketo genwa i kom Jehovah?

¹⁸ Pe wan ducu wabikato ki i atematema madit kit meno. Ento, wan ducu omyero wakwer cwiny maraco dok waket genwa i kom Jehovah. Ka watimo meno, wabinongo mot mapol, dok wabigwokke wek Catan pe obwolwa. Medo i kom meno, pe wabiweko lworo jogi gengowa ki tic pi Jehovah. Ma dong pire tek loyo ducu, wabijingo watwa ki Jehovah bedo matek. Lapwonnye Yakobo ocoyo ni, “Wumine me bedo i te loc pa Lubanga. Wulweny matek ki Catan, ci en biringowu woko. Wunyik cok bot Lubanga, ci en bene binyiko cok botwu.”​—Yak. 4:7, 8.