Kwonge obedo “cikke ma pire tek adada me timo nyo pe timo gin moni kun pol kare kilwongo iye nying Lubanga macalo caden.” Ngat moni twero lokone aloka nyo coyone piny.

Jo mukene gitamo ni pe opore me kwongo kwong pien Yecu owaco ni: “Pe myero wukwong kwong mo kadi ki acel . . . Ento wuwek lokwu obed ni ‘Iyo’ nyo ‘Pe’; gin mukene makato lok man nongo oa ki bot Larac.” (Mat. 5:33-37) Ki lok ada, Yecu onongo ngeyo ni Cik pa Moses mito ni Luicrael gukwong kwong i kare mogo dok ni lutic pa Lubanga mogo ma lugen gukwongo kwong. (Acak. 14:22, 23; Nia 22:10, 11) En bene onongo ngeyo ni Jehovah kikome bene okwongo kwong. (Ibru 6:13-17) Pi meno, Yecu onongo pe tye ka waco ni pe omyero wakwong kwong mo kulu. Me ka meno, en onongo tye ka ciko dano ni pe gukwong kwong pi jami ma konygi pe nyo i yo ma pe opore. Omyero kare ducu wacob cikkewa pien meno aye gin ma Jehovah mito ki botwa.

Dong, ngo ma omyero itim ka kipenyi ni ikwong kwong? Mukwongo, nen ni itwero cobo kwong meno. Ka ikalo akala ka ce itwero cobo kwonge meno, ci bedo ber ka pe ikwonge kulu. Lok pa Lubanga cikowa ni: “Onongo bedo ber ka in pe ikwongo kwong mo, kato ma ikwongo kun pe icobo gin ma ikwongo.” (Latit. 5:5) I nge meno, nen cik ma igi lac me Baibul ma kubbe ki kwong meno, ci imok tam ma lubbe ki cwiny ma ngoli kop ma kipwonyo maber. Cik ma igi lac macalo mene?

Kwonge mogo rwatte ki miti pa Lubanga. Me labolle, Lucaden pa Jehovah gikwongo kwong ka gitye ka tweyo agit. I nyim Lubanga ki lucaden mukene, nyako ger ki laco gikwonge ni gibimarre, gibigwokke dok gibiwore i kingi teke gin aryo-ni ‘pud gikwo.’ (Lunyom mukene giromo waco nyig lok mapat ki meno i kare me nyomgi, ento gire pud gikwonge i nyim Lubanga.) I nge meno, gidoko laco ki dako dok omyero gubed kit meno pi kare me kwogi ducu. (Acak. 2:24; 1 Kor. 7:39) Kwonge ma kikwongo i cawa me tweyo agit ber, opore, dok rwatte ki miti pa Lubanga.

Kwonge mogo pe rwatte ki miti pa Lubanga. Me labolle, Lakricitayo me ada pe twero kwongo kwong me lweny pi lobo moni nyo me kwero niyene i kom Lubanga. Timo meno turo cik pa Lubanga. Lukricitayo pe myero gubed ‘jo me lobo,’ pi meno pe watwero  luto wiwa i anyobanyobagi ki lwenygi.—Jon 15:19; Ic. 2:4; Yak. 1:27.

Lukricitayo myero gumok tam ma lubbe ki cwiny ma ngoligi kop ka ce gibikwongo kwong mukene. I kare mukene, mitte ni watam matut i kom tira ma Yecu omiyo ni “wudwok jami pa Cecar bot Cecar, ki jami pa Lubanga wudwok bot Lubanga” ma peya wamoko tamwa me kwongo kwong mo.—Luka 20:25.

Ket kong ni, Lakricitayo mo opongo fom me doko anywali me lobo moni nyo me nongo passport ci kiwacce ni myero okwong kwong me bedo lagen bot lobo meno. Ka i lobo meno kodi kwong man kwako cikke me timo gin ma turo cik pa Lubanga, ci cwiny ma ngolle kop pe biye ni en okwong kwong meno. Ento gamente twero ye ni en olok nyig lok mogo ma i kwonge meno wek obed ma rwatte ki cwiny ma ngolle kop.

Kwongo kwong ma kiloko nyig lok mogo iye twero bedo ma rwatte ki cik ma iye lac ma tye i Jo Roma 13:1, ma waco ni: “Dano acel acel myero owiny luloc ma giloye.” Pi meno, Lakricitayo twero moko tamme ni pe tye gin mo marac ki kwongo kwong me timo gin ma Lubanga mito ni Lukricitayo gutim.

Pire tek bene ni ilub cwiny ma ngoli kop ka kipenyi ni iti ki gin mo nyo itim gin mo i kare ma itye ka kwongo kwong. Luroma macon ki rok mukene ma cok kwedgi onongo gikwonge kun gitiyo ki pala lucwangi, dok meno onongo nyuto ni gitye ka lwongo twero pa lubanga me lweny me moko genne pa ngat ma tye ka kwonge-ni. Lugrik onongo giilo cinggi malo i kare me kwongo kwong. Meno onongo nyuto ni giniang ni tye lubanga mo ma neno jami ducu dok dano myero gudok iye bote pi ticgi.

Ngene kene ni, latic pa Jehovah pe twero kwonge kun tiyo ki lanyut nyo alama me lobogi ma kubbe ki woro me goba. Ento ngo ma myero itim ka kimini Baibul i kot ci kiwaco ni ikwonge me loko lok ada? Ka tye kit meno, iromo moko tammi me timone, pien Ginacoya bene loko i kom jo ma lugen ma gukwonge kun gumako gin mo. (Acak. 24:2, 3, 9; 47:29-31) Wi myero opo ni ka ikwongo kwong ma kit meno, ci nongo itye ka kwonge i nyim Lubanga ni ibiwaco lok ada. Myero ibed atera me gamo lapeny mo keken ma kipenyi kwede i yo me ada.

Kit macalo watwa ki Jehovah pire tek tutwal botwa, omyero walegi dok watam matut i kom kwong mo keken ma kimito ki botwa, wek wanen ni pe balo cwiny ma ngoliwa kop nyo turo cik ma igi lac me Baibul. Ka imoko tammi me kwongo kwong, ci omyero inen ni icobo kwong meno.—1 Pet. 2:12.