1. Pingo wamiyo lagam i cokke?

 PINGO wacito i cokke? Tyen lok ma pire tek loyo aye me pako Jehovah. (Jab. 26:12; 111:1) Wacito i cokke bene wek wacuk cwiny luwotwa i kare man ma kwo tek-ki. (1 Tec. 5:11) Ka wailo cingwa dok wamiyo lagam, nongo watye ka timo jami aryo magi ducu.

2. Kare mene ma watye kwede me miyo lagam i cawa me cokke?

² I cabit ducu, wabedo ki kare me miyo lagam i cokke. Me labolle, i cokke me tum cabit, watwero miyo lagam i cawa me Kwano Wi Lubele. I cokke me dye cabit, watwero miyo lagam i cawa me Yenyo Lonyo me Cwiny, Kwano Baibul Kacel Macalo Kacokke, ki bute mukene ma kilwongo iye lwak me miyo lagam.

3. Ngo ma romo weko bedo tek botwa me miyo lagam, dok Jo Ibru 10:24, 25 twero konyowa nining?

³ Wan ducu wamito pako Jehovah kacel ki cuko cwiny luye luwotwa. Ento tye jami aryo ma twero weko bedo tek botwa me miyo lagam. Watwero bedo ki lworo me miyo lagam nyo waromo bedo ki miti me miyo lagam tyen mapol ento i cawa mukene omege pe gicimowa ka wailo cingwa. Ngo ma twero konyowa me lweny ki ariya magi? Gin ma lakwena Paulo ocoyo bot Lukricitayo ma Luibru twero konyowa me nongo lagamme. I kare ma en obedo ka nyamo ber pa cokke kacel, en owaco ni omyero waket tamwa i kom ‘cuko cwinywa kekenwa.’ (Kwan Jo Ibru 10:24, 25.) Pe wabibedo ki lworo tutwal me ilo cingwa ka wiwa opo ni watwero cuko cwiny jo mukene kadi bed wamiyo  lagam mo mayot ma nyuto niyewa. Dok ka pe kicimowa tyen mapol me miyo lagam, watwero bedo ki yomcwiny ni jo mukene me kacokke gunongo kare me miyo lagam.—1 Pet. 3:8.

4. Jami adek mene ma wabinyamogi i pwony man?

⁴ I pwony man, wabicako ki nyamo kit ma watwero cuko kwede cwiny luwotwa i kacokke matidi ka ma wel lumi lagam nok iye. I nge meno, wabinyamo kit me cuko cwiny jo mukene i kacokke madit ka ma nongo jo mapol giilo cinggi me miyo lagam. Me agikkine, wabinyamo kit ma watwero cuko cwiny jo mukene ki gin ma wawaco ka watye ka miyo lagam.

5. Watwero cuko cwiny jo mukene nining ka watye i kacokke matidi?

⁵ I kacokke nyo gurup matidi, jo ma myero lador cokke ocimgi me miyo lagam nongo ginok. I cawa mukene, twero mitte ni en okur kong pi kare mo ma peya ngat mo odyere me miyo lagam. Cokke ma kit meno twero waco kom dano—dok meno pe cuko cwiny. Ngo ma itwero timone? Bed agonya me ilo cingi tyen mapol. Ka itimo meno, ci itwero tugo cwiny jo mukene bene me ilo cinggi tyen mapol.

6-7. I yo ma nining ma watwero dwoko kwede piny lworo ma watye kwede me miyo lagam?

⁶ Ngo ma itwero timone ka iwinyo ni ilwor tutwal ma pe itwero miyo lagam? Jo mapol bene giwinyo kit meno. Ento, wek ibed ki kare me cuko cwiny omegini ki lumegini, pingo pe iyeny yo me dwoko piny lworo ma itye kwede? Itwero timo meno nining?

⁷ Iromo nongo ni tye me kony ka ikwano tam mogo ma nonge i Wi Lubele b ma okatti con. Me labolle, yubbe maber. (Car. 21:5) Ka iniang maber pwony ma kibikwano i cokke, ci man bidwoko piny lworo ma itye kwede me miyo lagam. Medo i kom meno, wek lagammi obed macek. (Car. 15:23; 17:27) Ibibedo ki par manok ka itye ka miyo lagam macek loyo ka imiyo mabor. Lagam macek, ma tye ki lok mogo manok keken, twero bedo yot pi omegini ki lumegini me niang loyo lagam mabor ma kwako tam mapatpat. Ka imiyo lagam macek kun itiyo ki nyig lok ma megi, ibinyuto ni iyubbe maber dok iniang pwony ma kitye ka nyamo-ni maber.

8. Jehovah neno tutewa ki cwinywa ducu nining?

⁸ Ket kong ni iketo tam magi i tic ento pud itye ki lworo matek ma gengi miyo lagam tyen makato acel nyo aryo. Bed ki gen ni Jehovah bipwoyo tuteni ki cwinyi ducu me timo gin ma itwero. (Luka 21:1-4) Jehovah pe keto gingi ni omyero watim gin makato kerowa woko. (Pil. 4:5) Mok gin mukene ma itwero timone, ket yub me timone, dok ileg pi cwiny ma opye mot. I acakkine, pi jo mukene i kinwa, yubwa mukwongo twero bedo me miyo lagam acel macek.

9. Ariya ango ma twero bedo tye i kacokke madit?

⁹ Ka kacokkewu tye ki lutit kwena mapol, itwero bedo ki ariya mukene. Oromo bedo ni omege ki lumege mapol gidyere me miyo lagam ma weko pol kare pe kicimmi me miyo lagam. Me labolle,  laminwa Daniella kare ducu maro miyo lagam i cawa me cokke. c En neno meno calo but worone, yo me cuko cwiny jo mukene, ki dong yo me jingo niyene i kom gin ma Baibul pwonyo. Ento i kare ma en okobo i kacokke madit, onongo ni pol kare pe kicime me miyo lagam—ma i kare mukene cokke tum ma pe omiyo kadi lagam acel. En owaco ni, “Cwinya otur adada. Awinyo calo atye ka keng mot mo. Ka gin ma kit meno otimme teretere, icako pennye ka ce lador cokke tye ka timone akaka.”

10. Watwero medo kare ma watye kwede me miyo lagam nining?

¹⁰ Tika dong nino mo iwinyo kit ma Daniella owinyo kwede? Ka tye kit meno, ci itwero tamo ni myero dong ijuk miyo lagam ci ibed mot ka winyo cokke awinya. Ento pe ijuk tuteni me miyo lagam. Gin ango ma itwero timone? Itwero nongo ni tye me kony ka iyubo lagam mapol pi cokke acel acel. Dong ka pe kicimmi me miyo lagam i acakki me cokke, pud ibibedo ki kare me miyo lagam ka cokke tye ka wot anyim. Ka itye ka yubo Wi Lubele ma kibinyamo i cokke, tam i kom kit ma paragraf acel acel kubbe kwede ki wi lok me pwony meno. Ka itimo meno, ci itwero bedo ki lagam mabeco me miyone i cawa mo keken. Medo i kom meno, itwero yubbe me miyo lagam i paragraf mogo ma nyamo pwony me Baibul ma tere tut dok titone tek. (1 Kor. 2:10) Pingo? Pien jo manok keken aye giromo dyere me miyo lagam i paragraf ma kit meno. Ento ket kong ni, i nge lubo tam magi ducu, pud inongo ni pe kicimmi me miyo lagam i nge cokke mapol. Iromo lok ki lador Wi Lubele ma peya cokke ocakke ci ititte pi lapeny ma imito gamone.

11. Gin ango ma Jo Pilipi 2:4 cuko cwinywa me timone?

¹¹ Kwan Jo Pilipi 2:4. Cwiny maleng oweko lakwena Paulo ocuko cwiny Lukricitayo me tamo pi gin ma konyo jo mukene bene. Watwero keto tirane meno i tic i cawa me cokke nining? Ka wiwa po ni jo mukene, calo wan bene, gimito miyo lagam.

12. Yo maber me cuko cwiny jo mukene i cawa me cokke obedo ki timo ngo? (Nen bene cal.)

 ¹² Tam kong iye kit man. Ka itye ka boko lok ki luremi, tika iloko tutwal ma pe imiyo kare ki luremi me lok? Ngene kene ni pe tye kit meno! Imito ni gin bene gunywak i lok man. I yo acel-lu, i cawa me cokke, wamito miyo kare ki jo mapol me miyo lagamgi. Ki lok ada, yo acel maber me cuko cwiny omegiwa ki lumegiwa aye me miyo botgi kare me tito pi niyegi. (1 Kor. 10:24) Kong dong wanenu kit ma watwero timo kwede meno.

13. Watwero miyo kare ki dano mapol me nywako i miyo lagam nining?

¹³ Me acel, watwero weko lagamwa bedo macek, wek wami kare pi jo mapol me miyo lagamgi. Luelda ki lutit kwena mukene ma gucwiny gitwero weko lanen maber i lok man. Kadi bed itye ka miyo lagam macek, gwokke ki lok i kom jami mapol lawang acel. Ka iloko i kom jami ducu ma tye i paragraf moni, ci jo mukene pe gibidong ki lagam me amiya. Me labolle, i paragraf man, kimiyo tam aryo mapatpat—wek lagammi obed macek dok igwokke ki lok i kom jami mapol. Ka in aye ibedo dano mukwongo ma kicimo me miyo lagam i kom paragraf man, pingo pe ilok i kom tam acel keken?

14. Gin ango ma twero konyowa me moko tyen adi ma myero wail cingwa? (Nen bene cal.)

¹⁴ Ti ki ryeko me moko tyen adi ma myero idyere me miyo lagam. Ka wailo cingwa tutwal, man twero keto lyeto i kom lador cokke me bedo ka cimowa kadi bed jo mukene peya gumiyo lagam. Man twero balo cwiny jo mukene ci weko pe giilo cinggi.—Latit. 3:7.

15. (a) Myero wadok iye nining ka pe kicimowa me miyo lagam? (b) I yo ma nining ma ludor cokke gitwero nyuto ni giparo pi dano ducu? (Nen bok ma wiye tye ni “ Ka Itye ka Doro Cokke.”)

¹⁵ Ka lutit kwena mapol guilo cinggi i cawa me cokke, ci pe wabibedo ki kare  me miyo lagam mapol kit ma wamito kwede. I cawa mukene, lador cokke pe oromo nongo kare me cimowa. Meno romo cwero cwinywa, ento pe omyero wamak lok meno i cwinywa.—Latit. 7:9.

16. Watwero cuko cwiny jo ma gimiyo lagam nining?

¹⁶ Ka pe itwero miyo lagam tyen mapol kit ma imito kwede, pingo pe iter iti ka winyo lagam pa jo mukene ci i nge cokke ipwogi pi lagamgi? Omegini ki lumegini gitwero nongo ni pwoc ma imiyo tye me cuko cwiny marom aroma ki ka onongo imiyo lagam. (Car. 10:21) Miyo pwoc obedo yo mukene ma watwero cuko kwede cwiny luwotwa.

17. (a) Lunywal gitwero konyo lutinogi me yubo lagam ma rwatte nining? (b) Ma lubbe ki vidio-ni, yo angwen mene ma watwero tic kwede me yubo lagamwa? (Nen bene lok ma i tere piny.)

¹⁷ I yo mukene ango ma watwero cuko kwede cwiny luwotwa i cawa me cokke? Ka in lanyodo, kony lutinoni me yubo lagam ma rwatte ki mwakagi. (Mat. 21:16) I kare mukene, kinyamo lok madongo, calo peko ma tye i nyom nyo tim carocaro, ento pud itwero nongo paragraf acel nyo aryo ma latin twero lok iye. Medo i kom meno, kony lutinoni me niang pingo pe kitwero cimogi kare ducu ka guilo cinggi. Tito jami magi twero konyogi pe me bedo ma cwinygi otur ka kiyero  jo mukene i cawa ma nongo gin guilo cinggi.—1 Tem. 6:18. d

18. Watwero gwokke ki ywayo tam pa dano i komwa nining ka watye ka miyo lagam? (Carolok 27:2)

¹⁸ Wan ducu watwero yubo lagam ma kelo deyo bot Jehovah dok cuko cwiny Lukricitayo luwotwa. (Car. 25:11) Kadi bed kicel kicel watwero tito gin mo mutimme i kwowa, myero wagwokke ki lok tutwal i komwa kekenwa. (Kwan Carolok 27:2; 2 Kor. 10:18) Me ka meno, watute me keto tamwa i kom Jehovah, Lokke, ki jone. (Yabo 4:11) Ngene kene ni, ka lapeny pi paragraf moni penyowa me lok i kom gin mutimme i kwowa, ci pore me timo meno. Labol pa lapeny ma kit meno nonge i paragraf ma lubo man.

19. (a) Adwogine bibedo nining ka wanyuto ni waparo pi jo ducu ma gitye i cokke? (Jo Roma 1:11, 12) (b) Gin ango ma itye ki pwoc iye madok i kom miyo lagam i cokke?

¹⁹ Kadi bed pe watye ki cik ma kiketo ni omyero walubi ka watye ka miyo lagam, wan ducu omyero watute me miyo lagam ma cuko cwiny luwotwa. Me cobo man, twero mitte ni wami lagam tyen mapol. Nyo twero mitte ni wabed ma wayeng ki kare ma wanongo me miyo lagam kun nongo cwinywa yom ni jo mukene bene gunongo kare me miyo lagam. Ka waketo pi miti pa jo mukene mukwongo i cawa me cokke, ci wan ducu “wabikonnye lawangacel.”—Kwan Jo Roma 1:11, 12.