1. Tit kong gin ma onongo tye ka timme i kare ma Yecu otimo tangone mukwongo.

 GO KONG gin man ma otimme i agikki me mwaka 29 K.M., i kare ma Yecu pud ocako ticce me pwony acaka. Yecu kacel ki minne, Maliam, ki lupwonnyene mogo kilwongogi i nyom mo ma obedo tye i Kana, caro mo ma tye tung kumalo me Najaret, gang pa Yecugi. Maliam obedo larem jo me odi pa lunyom magi dok bene obedo ka konyogi ki gwoko wele. Ento i kare me kwero nyom meno, gin mo otimme ma onongo twero weko lewic mako jo me odi magi kacel ki lunyom manyen-ni—kongo vino otum woko. b Nen calo wele obino mapol makato ma onongo gulwongo. Oyotoyot, Maliam olokke bot wode ci owacce ni: “Vinogi dong pe.” (Jon 2:1-3) Gin ango ma Yecu otimo? En otimo tango—oloko pii odoko kongo “vino mamit.”—Jon 2:9, 10.

2-3. (a) Kodi tango ango ma Yecu otimogi? (b) Adwogi maber ango ma watwero nongo ki i nyamo tango ma Yecu otimo?

² Yecu omedde ki timo tango mapol adada i kare me ticce me pwony. c En otiyo ki tekone me timo tango me konyo dano alip ki alip. Me labolle, tam i kom tangone aryo; pito co 5,000 ki lacen co 4,000. Tango aryo magi keken onongo nen calo kwako pito dano makato 27,000 ka kimedo  bene wel mon ki lutino ma onongo gitye. (Mat. 14:15-21; 15:32-38) I kare aryo magi ducu, Yecu bene ocango lutwo mapol. (Mat. 14:14; 15:30, 31) Go kong ur ma lwak gubedo kwede i kare ma Yecu ocangogi dok opitogi i yo me tango!

³ I kare-ni, watwero nongo pwony mapol ki i tango ma Yecu otimogi. I pwony man, wabineno jami ma tango magi gitwero pwonyowa ma romo jingo niyewa. I nge meno, wabineno kit ma watwero lubo kwede lanen me mwolo kacel ki kica ma Yecu onyuto i kare ma onongo en timo tango.

4. Tango ma Yecu otimogi giminiwa pwony i kom anga?

⁴ Tango ma Yecu otimogi giminiwa pwony i kome ki i kom Wonne bene. Man ngene kene pien teko me timo tango magi ducu oa ki bot Jehovah. Tic pa Lukwena 10:38 tittiwa ni: ‘Lubanga owiro Yecu ki cwiny maleng kacel ki teko, kit macalo en yam wirre kwede kun tiyo gin maber dok cango jo ducu ma Catan yelogi; pien onongo Lubanga tye kwede.’ Wi bene myero opo ni, Yecu olubo lanen pa Wonne kore ki kore i jami ducu ma en owaco dok otimo, ma meno bene kwako tango ma en otimogi. (Jon 14:9) Nen kong pwony adek ma watwero nongo ki i tango ma Yecu otimogi.

5. Ngo ma otugo cwiny Yecu me timo tango? (Matayo 20:30-34)

⁵ Me acel, Yecu kacel ki Wonne gimarowa adada. I kare ma Yecu onongo tye i lobo, en onyuto tut pa marre pi dano ki tic ki tekone me timo tango me konyo jo ma onongo gitye ka deno can. I nino mo acel, lutowang aryo gudange i kore ni okonygi. (Kwan Matayo 20:30-34.) Watwero neno ki kany ni “kica omako Yecu i komgi” ci en ocangogi. Kodi kica meno ma obedo lanyut me mar bene otugo cwiny Yecu me pito jo ma kec nekogi ki me cango ladobo mo. (Mat. 15:32; Mar. 1:41) Watwero bedo ki gen matek ni Jehovah, Lubanga me “kica madwong,” kacel ki Wode gimarowa matek dok giwinyo malit ka watye ka deno can. (Luka 1:78; 1 Pet. 5:7) Pud dong gitye ki miti matek ya me kwanyo pekki ducu ma nuro dano i kare-ni!

6. Lubanga omiyo bot Yecu teko me timo ngo?

⁶ Me aryo, Lubanga omiyo bot Yecu teko me cobo pekki pa dano ducu. Yecu otiyo ki tangone me nyuto ni etye ki teko me loyo ariya ma wan kikomwa pe watwero loyone piwa kenwa. Me labolle, en tye ki teko me gonyowa ki i bal ma walako kacel ki adwogine, calo two ki to. (Mat. 9:1-6; Rom. 5:12, 18, 19) Tango ma en otimo onyuto ka maleng ni en twero cango “kit two ducu” kadiwa cero jo muto. (Mat. 4:23; Jon 11:43, 44) Medo i kom meno, en tye ki teko me juko yamo lapiro magwar ki me gonyo dano ki i twec pa cen maraco. (Mar. 4:37-39; Luka 8:2) Pud dong kweyo cwinywa ya me ngeyo ni Jehovah omiyo ki Wode teko ma kit meno!

7-8. (a) Tango ma Yecu otimogi weko wabedo ki tekcwiny ango? (b) Tango mene ma itye ka kuro nenone i lobo manyen?

⁷ Me adek, watwero bedo ki gen matek ni mot ducu ma kiciko pire i te Ker pa Lubanga bicobbe ada. Tango ma Yecu otimogi i kare ma onongo en tye i lobo, gipwonyowa gin ma en bitimo i wi lobo-ni ducu i kare ma en biloyo lobo macalo Kabaka me Ker pa Lubanga. Nen kong mot mogo ma wabinongo cokcok-ki i te loc  pa Kricito. Wabibedo ma komwa yot i yo ducu, pien en bikwanyo two kacel ki goro ducu ma dano tye ka canne kwede. (Ic. 33:24; 35:5, 6; Yabo 21:3, 4) Wabibedo ki cam muromo dok pe wabikato ki i pekki ma bino macalo adwogi me can ma poto atura. (Ic. 25:6; Mar. 4:41) Wabibedo ki yomcwiny madit adada me jolo jowa me amara ma gitye i “lyel.” (Jon 5:28, 29) Tango mene ma in itye ka kuro ki miti madwong me nenone i lobo manyen?

⁸ I kare ma Yecu obedo ka timo tango, en onongo nyuto mwolo kacel ki kica madwong adada—dok magi gubedo kit ma wan bene omyero walubgi. Kong dong wanenu tangone aryo, kun wacako ki tango mo ma en otimo i nyom mo i Kana.

9. Pingo Yecu otimo tango i nyom mo ma obedo tye i Kana? (Jon 2:6-10)

⁹ Kwan Jon 2:6-10. I kare ma kongo vino otum woko i nyom ma Yecu obedo iye-ni, tika onongo mitte ni en otim gin mo? Pe. Onongo pe tye lok pa lanebi mo keken ma otito ni Meciya bitimo tango me yubo kongo vino. Ento go kong kit ma itwero winyo kwede ka jami amata otum woko i kwer me nyommi. Kica nen calo omako Yecu i kom lupaco-ni, tutwalle lunyom manyen man, dok onongo pe mito ni lewic omakgi. Dong kit ma kitito kwede i acakki me pwony man, en otimo tango. En oloko pii ma romo lita 390 (galan 103) odoko kongo vino mamit adada.  Twero bedo ni en oloko kongo vino madwong kit meno wek mogo odong i nge nyom dok kitii kwede nyo wek lunyom manyen man gucati ci centene okonygi. Lunyom manyen man nen calo cwinygi obedo yom adada!

10. Lok mogo ma pigi tego ango ma wanongo ki i gin mutimme ma kicoyo pire i Jon cura 2? (Nen bene cal.)

¹⁰ Nen kong lok mogo ma pigi tego ma wanongo ki i gin mutimme ma kicoyo pire i Jon cura 2. Tika ineno ni Yecu pe oonyo pii i dak pii (agulu madit) en kikome? Me kaka ywayo tam pa dano i kome, en owaco ki lutic ni guony pii i dak magi. (Tyeng me 6, 7) Dok i nge loko pii doko kongo vino, Yecu pe otwomo kongo vino man ci otero bot ladit me nyom en kikome. Me ka meno, en owaco ki lutic ni gutim man. (Tyeng me 8) Yecu pe otingo kikopo me kongo vino-ni malo i nyim wele ci owakke ni, ‘Kong wubil kongo vino ma pud ayubo ayuba-ni!’

11. Pwony ango ma watwero nongo ki i tango ma Yecu otimogi?

¹¹ Pwony ango ma watwero nongo ki i tango pa Yecu me loko pii doko kongo vino? Wanongo pwony madok i kom mwolo. Yecu pe owakke i nge timo tango man; ki lok ada, Yecu pe owakke ki gin mo keken ma en ocobo. Me ka meno, ki mwolo madit, en omiyo deyo ki pak ducu bot Wonne. (Jon 5:19, 30; 8:28) Ka walubo lanen pa Yecu kun wabedo ki cwiny me mwolo, ci pe wabiwakke pi jami ma wacobo. Kadi bed wacob tic ango pi Jehovah, pe omyero wawakke kekenwa, ento omyero wadwok pak ducu bot Lubanga ma watye ki mot me tic pire-ni. (Jer. 9:23, 24) Omyero wamine deyo ducu ma en opore pire. Man ngene kene pien pe tye gin mo maber ma watwero cobone labongo kony pa Jehovah.—1 Kor. 1:26-31.

12. I yo mukene ango ma watwero lubo kwede lanen me mwolo pa Yecu? Mi lapor.

¹² Nen kong yo mukene ma watwero lubo kwede lanen me mwolo pa Yecu. Go kong ni gin ma kit man otimme: Laelda mo otero kare malac me konyo lakony kor tic ma pud tidi me yubo pwonye mukwongo pi lwak. Macalo adwogine, omego matidi-ni omiyo pwony mamit adada ma oyomo cwiny dano me kacokke. I nge cokke, ngat mo obino bot laelda-ni ci owacci: ‘Omego matidi-ni tin omiyo pwony mamit adada, pe kumeno?’ Tika pore ki laelda-ni me waco ni: ‘Ada gire, ento atute matek me konye’? Nyo mono en bigamo ki mwolo ni: ‘Ada, omiyo pwony mamit. Dok atye ki awaka madit i kome’? Ka wabedo jo mamwol, ci pe wabipakke kekenwa pi jami mabeco ma watimo pi jo mukene. Cwinywa yom me ngeyo ni Jehovah neno dok pwoyo jami ma watimo. (Por ki Matayo 6:2-4; Ibru 13:16) Labongo akalakala mo, wayomo cwiny Jehovah ka walubo lanen pa Yecu me nyuto mwolo.—1 Pet. 5:6.

13. Gin ango ma Yecu oneno i kare ma oo cok ki boma me Nain, dok en otimo iye gin ango? (Luka 7:11-15)

¹³ Kwan Luka 7:11-15. Go kong gin man mutimme i mwaka 31 K.M. Yecu onongo ocito i Nain, ma obedo boma mo i Galilaya macok ki Cunem, ka ma lanebi Elia onongo ocero iye wod pa dako mo mwaki 900 angec. (2 Luker 4:32-37) I kare ma Yecu oo cok ki dog cel me gang man, en oneno lwak dano mapol ma gikato woko ki i boma kun gitye ka lebo dano muto. Gin ma onongo tye ka timme man  lit adada pien dato mo orwenyo wode acel keken. Ento dato ma onongo tye ka kumu-ni pe tye kene; lwak dano mapol ata ma gua ki i boma man gitye ka wot kacel kwede. Yecu ojuko jo ma gitye ka lebo lato-ni ci otimo gin mo me aura adada pi mego ma tye ka kumu-ni—Yecu ocero wode! Man aye cer mukwongo i kin nicer adek ma Yecu otimogi ma kicoyo pigi i Jiri.

14. Lok mogo ma pigi tego ango ma wanongo ki i gin mutimme ma kicoyo pire i Luka cura 7? (Nen bene cal.)

¹⁴ Nen kong lok mogo ma pigi tego ma tye i gin mutimme ma kitito pire i Luka cura 7. Tika ineno ni Yecu ‘oneno’ mego ma tye ka kumu-ni ci i nge meno “kica omake i kome”? (Tyeng me 13) Twero bedo ni Yecu oneno ka dato-ni tye ka koko kun woto ki i nyim jo ma gulebo lyel pa wode-ni, dok meno oweko kica omako Yecu i kome. Kica pe omako Yecu ci otum ento en onyuto kica meno pi dato-ni. En oloko ki dato-ni ki dwan ma nyuto kica ci owaco ni: “Wek koko obedi.” I nge meno, en otimo gin mo me konyo dato man. En ocero wod pa dato-ni dok “omiye bot minne.”—Tyeng me 14, 15.

15. Pwony ango ma wanongo ki i tango pa Yecu?

¹⁵ Pwony ango ma watwero nongone ki i tango pa Yecu me cero wod pa dato-ni? Wapwonyo ni omyero wanyut kica bot jo ma gitye ka kumu. Ngene kene ni wan pe watwero cero jo muto kit ma Yecu otimo kwede. Ento, calo Yecu, wan bene watwero nyuto cwiny me kica pi jo ma gitye ka kumu ka wabedo ma wangwa bit. Watwero kwanyo kare me nyutigi kica ki timo gin ma watwero me kweyo cwinygi ki konyogi. d (Car. 17:17; 2 Kor. 1:3, 4; 1 Pet. 3:8) Kadiwa jami matinotino ento ma nyuto kica twero kweyo cwinygi matek adada.

16. Kit ma kiporo kwede i cal-li, pwony ango ma inongo ki i gin mutimme i kom mego mo ma nyare oto?

¹⁶ Nen kong gin man ma otimme. Mwaki  mogo angec i cawa ma gitye ka wero wer i cokke, laminwa mo oneno mego mo ma obedo cok kwede tye ka koko. Onongo gitye ka wero wer ma loko i kom gen me nicer, dok mego man onongo pud orwenyo nyare macok cok-ki i to. Kit macalo laminwa-ni onongo ngeyo gin mutimme-ni, en ocito cok ki mego-ni cutcut, okwako ngut mego-ni ci owero wer man kacel kwede. Mego-ni lacen owaco ni: “Awinyo ni atye ki mar madwong adada pi omege ki lumege.” En obedo ki pwoc ni ecito i cokke meno. En owaco ni, “Man aye ka ma wanongo iye kony, i Ot me Ker.” Watwero bedo ki gen ni Jehovah neno kadi wa jami matinotino ma watimo me nyuto kica bot jo ma gitye ka kumu, dok gitye ki “arem madwong i cwinygi.”—Jab. 34:18.

17. Pwony ango ma wanongo ki i tango pa Yecu?

¹⁷ Ka wakwano lok ma kicoyo i Baibul i kom tango pa Yecu, man twero cuko cwinywa adada. Gipwonyowa ni Jehovah ki Yecu gimarowa adada, ni Yecu tye ki teko me cobo pekki pa dano ducu, dok ni watwero bedo ki gen ni mot ducu ma kiciko pire i te loc me Ker-ri bicobbe kore ki kore. Ka watye ka kwano pwony magi, waromo lwodo lok i kom yo mapatpat ma waromo lubo kwede kit pa Yecu. Gwok nyo iromo keto yub me kwan piri keni nyo macalo jo me ot kun wutimo kwed i kom tango mukene ma Yecu otimo. Nen pwony ma itwero nongo ki i kwan ma kit man dok inywak pwony ma inongo ki jo mukene. Ibibedo ki kare me boko lok ma cuko cwinywu adada ka itimo kit meno!—Rom. 1:11, 12.

18. Gin ango ma wabinyamo i pwony ma lubo man?

¹⁸ Cokcok i agikki me ticce me pwony i lobo kany, Yecu ocero lareme mo. Man aye nicer me agikki i kin nicer adek ma Yecu otimogi ma kicoyo pire i Baibul. Nicer man onongo pat—pien en ocero lareme ma onongo dong orii i lyel pi nino angwen. Pwony ango ma watwero nongone ki i tango meno? Dok watwero jingo niyewa i kom gen me nicer nining? Pwony ma lubo man bigamo lapeny magi.