1. Latin awobi mo acel onyuto gen ma en tye kwede i kom nicer nining?

 LATIN awobi mo ma nyinge Matthew tye ki two mo malit ma oweko en dong okato ki i ayango mapol. I kare ma onongo en tye ki mwaka abiro, en kacel ki jo me ganggi gubedo ka neno yub me JW Broadcasting^® ma katti dwe ki dwe. I agikki me purogram meno, guneno vidio me wer ma loko i kom jolo jowa me amara ma guto i kare me nicer. b I nge neno purogram man, Matthew ocito bot lunywalle, omako cinggi, ci owacci: “Ineno Mama ki Baba, kadi bed ato, pud abicer woko i kare me nicer. Wutwero kura; bitimme ada.” Go kong yomcwiny ma lunywalle gubedo kwede me niang ni latingi tye ki niye matek i kom nicer.

2-3. Pingo ber piwa me tam matut i kom cikke me Baibul madok i kom nicer?

² Kare ki kare, bedo ber piwa me kwanyo kare me tam matut i kom cikke me Baibul madok i kom nicer ma bitimme i kare me anyim. (Jon 5:28, 29) Pingo? Pien pe wangeyo awene ma waromo kemme kwede ki two mo malit ma keto kwowa ka mading nyo awene ma wabirwenyo ngat mo ma wamaro i to. (Latit. 9:11; Yak. 4:13, 14) Genwa me nicer twero konyowa me ciro pekki macalo meno. (1 Tec. 4:13) Ginacoya cuko cwinywa ni Wonwa me polo ngeyowa maber dok marowa matek adada. (Luka 12:7) Mitte ni Lubanga Jehovah ongewa maber adada wek ocerwa ki kitwa kacel ki tamwa ducu. Jehovah marowa matek tutwal dok oweko twere piwa me kwo pi naka! Dong kadi bed wato, en bicerowa woko.

³ I pwony man, wabicako ki nyamo tyen lok mumiyo watwero geno cikke me nicer. I nge meno, wabinyamo lok me  Baibul ma jingo niyewa, ma kitiyo kwede macalo wi lok me pwony man: “Omeru bicer.” (Jon 11:23) Me agikkine, wabipwonyo kit me jingo genwa i kom nicer.

4. Me geno cikke moni, gin ango ma omyero waye? Mi labol.

⁴ Wek wagen cikke moni, myero waye ni ngat ma ocikke-ni tye ki miti kacel ki teko nyo kero me cobo cikkene. Me labolle: Go kong ni yamo lapiru magwar obalo ot-ti marac adada. Laremi mo obino ci ocikke boti ni, ‘Abikonyi me yubo ot-ti odoco.’ En genne, dok iye ni en tye ki miti me konyi. Ka en obedo lagedo ma ladiro dok tye ki jami tic ducu ma mitte, ci nongo ingeyo ni en tye ki teko me konyi. Pi meno ibigeno cikkene. Dong cikke pa Lubanga madok i kom nicer kono? Tika ada en tye ki miti kacel ki teko me cobone?

5-6. Pingo watwero bedo ki gen ni Jehovah tye ki miti me cero jo muto?

⁵ Tika Jehovah tye ki miti me cero jo muto? Labongo akalakala mo keken, en tye ki miti. En oweko luco Baibul mapol gucoyo pi cikkene me nicer ma bitimme i anyim. (Ic. 26:19; Koc. 13:14; Yabo 20:11-13) Dok ka Jehovah ocikke me timo gin mo, en bicobone bene. (Yoc. 23:14) Ki lok ada, Jehovah tye ki miti me cero jo ma guto. Pingo watwero waco kit meno?

⁶ Tam kong i kom lok ma Yubu owaco. En onongo tye ki gen ni kadi bed eto, Jehovah bibedo ki miti me nene doki. (Yubu 14:14, 15) Jehovah bene winyo kit meno i kom luticce ducu ma guto. En tye ki miti madwong me dwokogi cen i kwo, ma nongo komgi yot dok cwinygi yom. Jehovah winyo nining i kom dano bilion mapol ata ma guto labongo nongo kare me pwonyo lok ada madok i kome? Lubangawa ma lamar-ri mito cerogi bene. (Tic 24:15) En mito ni gunong kare me doko lureme wek gunong kwo ma pe tum i lobo. (Jon 3:16) Dong nen ka maleng ni, Jehovah tye ki miti me cero jo ma guto.

7-8. Pingo watwero bedo ki gen ni Jehovah tye ki teko me cero jo muto?

⁷ Tika Jehovah bene tye ki teko me cero jo muto? Labongo akalakala mo! En aye “Won Twer Ducu.” (Yabo 1:8) Pi meno, en tye ki teko muromo me loyo lamone mo keken, kadi wa to. (1 Kor. 15:26) Wanongo teko kacel ki cuko cwiny ka waniang meno. Nen kong gin mutimme i kom Laminwa Emma Arnold. En kacel ki lupacone gukato ki i atematema mapol i kare me Lweny me Aryo me Wi Lobo. I kare ma jo ma nyare marogi guto i kam me aunauna pa Nazi, Emma okweyo cwiny nyare kun waco ni: “Ka jo muto pe gibikwo doki, ci nongo tyen lokke ni lamonewa to tek loyo Lubanga. Ento meno pe obedo lok ada.” Ki lok ada, pe tye gin mo matek loyo Jehovah! Lubanga won twero ducu ma ocweyo kwo tye bene ki teko me dwoko cen kwo pa jo muto.

⁸ Tyen lok mukene mumiyo wangeyo ni Lubanga tye ki teko me cero jo muto aye pien wiye po i kom jami mapol ata. En lwongo lacer ducu ki nyinggi. (Ic. 40:26) Medo i kom meno, wiye po i kom jo ma guto. (Yubu 14:13; Luka 20:37, 38) Wiye po i kom jami ducu madok i kom jo ma en bicerogi, kadi wa kit ma ginen kwede, kitgi, jami ma gukato ki iye i kwogi, kacel ki gin ma wigi po iye.

9. Ki tung boti, ngo ma weko iye i kom cikke pa Jehovah pi nicer ma bitimme i anyim?

⁹ Dong nen ka maleng ni, watwero geno cikke pa Jehovah pi nicer ma bitimme i  anyim pien wangeyo ni en tye ki miti kacel ki teko me cobone. Nen kong dok tyen lok mukene ma miyo wageno cikke pa Lubanga me nicer: Jehovah dong otyeko cero jo mogo. I kare me Baibul, en omiyo teko bot co mogo, ma i kine onongo tye iye Yecu, me cero jo muto. Kong dong wanenu lok i kom nicer acel mo ma Yecu otimo, ma kicoyo pire i Jon cura 11.

10. Ngo mutimme i kare ma Yecu onongo tye ka tito kwena loka Jordan, dok ngo ma en otimo? (Jon 11:1-3)

¹⁰ Kwan Jon 11:1-3. Go kong gin mutimme i Betania i agikki me mwaka 32 K.M. Yecu onongo tye ki lureme macok i caro man—Lajaro ki lumegine aryo, Maliam ki Marita. (Luka 10:38-42) Ento Lajaro kome odoko lit, dok lumegine onongo gitye ki par. Gucwalo kwena bot Yecu, ma onongo tye loka Jordan, ma borre romo wot me nino aryo nia ki i Betania. (Jon 10:40) Ki twon cwercwiny madit, Lajaro oto woko i kin kare ma lakwena-ni oo kwede bot Yecu. Kadi bed Yecu oniang ni lareme pud oto atoa, en omedde ki bedo ka ma tye iye pi nino aryo mukene, ka dong ocito i Betania. Pi meno, i kare ma Yecu oo, Lajaro onongo dong ori i lyel pi nino angwen. Yecu onongo bitimo gin mo ma bikelo adwogi maber bot lureme kacel ki deyo bot Lubanga.—Jon 11:4, 6, 11, 17.

11. Pwony ango madok i kom bedo larem maber ma watwero nongo ki i gin mutimme man?

¹¹ Wanongo pwony madok i kom bedo larem maber ki i gin mutimme man. Tam kong: I kare ma Maliam ki Marita gucwalo kwena bot Yecu, gin pe gupenye ni obin i Betania. Guwacce mere ni lareme kome lit. (Jon 11:3) I kare ma Lajaro oto, Yecu onongo twero cere kadi wa ki ka mabor. Ento, Yecu oyero me cito wa i Betania wek ebed kacel ki lureme Maliam ki Marita. Tika itye ki laremi mo ma twero konyi labongo in penye? Ka tye kit meno ci ingeyo ni itwero jenge i kome “i kare me can.” (Car. 17:17, NWT) Calo Yecu, wan bene omyero wabed larem ma kit meno bot jo mukene! Kong dong wadoku cen i gin mutimme-ni wek wanen gin mutimme i ngeye.

12. Yecu omiyo cikke mene bot Marita, dok pingo cikke meno pe obedo calo bwoyo ngor? (Jon 11:23-26)

¹² Kwan Jon 11:23-26. Marita oniang ni Yecu dong cok ki Betania. Cutcut, en orune me rwatte kwede ci owacce ni: “Rwot, kono nene itye kany, kono omera pe oto.” (Jon 11:21) Tye ada gire ni, Yecu onongo twero cango Lajaro. Ento Yecu onongo tye ki tam me timo gin mo me aura adada. En ocikke ni: “Omeru bicer.” En bene omiyo ki Marita tyen lok mukene me geno cikkene kun wacce ni: “An nicer ki kwo.” Ada, Lubanga omiyo ki Yecu teko me cero jo muto. Con kong, en ocero latin anyaka mo cutcut i nge tone dok ocero awobi mo, ma pe orii i nge to pa awobi-ni. (Luka 7:11-15; 8:49-55) Ento tika en romo  cero dano ma orii i lyel pi nino angwen dok kome dong ocako balle woko?

13. Kit ma kicoyo kwede i Jon 11:32-35, Yecu odok iye nining i kare ma oneno Maliam kacel ki jo mukene gitye ka kok matek? (Nen bene cal.)

¹³ Kwan Jon 11:32-35. Go kong gin mutimme i ngeye. Maliam, lamin Lajaro mukene-ni ocito ka rwatte ki Yecu. En onwoyo gin ma laminne onongo owaco con ni: “Rwot, kono nene itye kany, kono omera pe oto.” Maliam kacel ki jo ma gitye kwede gubedo ka kumo matek. I kare ma Yecu oneno dok owinyo ka gitye ka kok adada, cwinye ocwer matek. Kica omake adada i kom lureme, ma oweko en okok ki pig wange. En niang kit ma lit kwede ka warwenyo danowa me amara i to. Labongo akalakala mo, en tye ki miti me kwanyo peko ma okelo pig wang meno woko!

14. Kit ma Yecu odok kwede iye i kare ma oneno koko pa Maliam pwonyowa gin ango i kom Jehovah?

¹⁴ Kit ma Yecu odok kwede iye i kare ma oneno koko pa Maliam pwonyowa ni Jehovah obedo Lubanga ma kicane dwong adada. Pingo watwero wacone kit meno? Kit ma waneno kwede i pwony mukato-ni, Yecu olubo tam kacel ki kit ma Wonne winyo kwede kore ki kore. (Jon 12:45) Yecu okok ki pig wange pien kica omake i kom lureme ma gubedo ka kumo. Pi meno, wangeyo ni Jehovah bene kica make i komwa ka oneno watye ka koko ki cwercwiny. (Jab. 56:8) Meno mono pe weko ibedo ki miti me nyikke cok ki Lubangawa ma lakica-ni?

15. Kit ma kitito kwede i Jon 11:41-44, ngo mutimme i kabedo ma onongo kikano iye kom Lajaro? (Nen bene cal.)

¹⁵ Kwan Jon 11:41-44. Yecu oo ka ma kikano iye kom Lajaro ci openyo ni kikwany got ma oumo dog boro lyel woko. Marita okwero woko, kun waco ni nen calo kom lato-ni dong ngwe. Yecu odok iye ni: “Nakanen pe awacci ni, ka iye, ci ibineno deyo pa Lubanga?” (Jon 11:39, 40) I nge meno, Yecu otingo wange malo ci olego ki dwan malongo. En onongo  mito miyo ki Jehovah deyo ducu pi gin ma bitimme i ngeye. Ka dong, Yecu odange ki dwan malongo ni: “Lajaro, katti woko!” Ci Lajaro okatti woko ki i lyel! Yecu otimo gin mo ma dano onongo gitamo ni pe twere.—Nen jami me akwana pi Jon 11:17 ma tye i nwtsty-E.

16. Lok ma nonge i Jon cura 11 jingo niyewa i kom nicer nining?

¹⁶ Lok ma nonge i Jon cura 11 jingo niyewa i kom nicer. I yo ma nining? Wi opo i kom cikke pa Yecu bot Marita, ni: “Omeru bicer.” (Jon 11:23) Calo Wonne, Yecu bene tye ki miti kacel ki teko me cobo cikke meno. Pig wange onyuto ni en tye ki miti madwong me cero jo muto ki me jwayo cwercwiny ma to kelo bot dano. Dok i kare ma Lajaro okato woko ki i boro got, Yecu dok onyuto ni etye ki teko me cero jo muto. Tam bene i kom lapo wic ma Yecu omiyo bot Marita, ni: ‘Nakanen pe awacci ni, ka iye, ci ibineno deyo pa Lubanga?’ (Jon 11:40) Watye ki tyen lok maber me geno cikke pa Lubanga ni en bicero jo muto. Ento, ngo ma watwero timo me jingo genwa meno?

17. Gin ango ma myero obed i wiwa ka watye ka kwano lok i kom nicer ma kitito pigi i Baibul?

¹⁷ Kwan dok ilwod lok i kom nicer ma otimme i kare mukato. Baibul tito pi nicer pa dano aboro ma kicerogi me kwo i wi lobo. c Pingo pe ikwany kare me kwedo lok i kom nicer magi ki acel acel? Ka itye ka timo meno, wi opo ni jo ma kicerogi-ni gubedo dano ma gukwo ada—co, mon, ki lutino. Yeny pwony ma itwero nongone. Tam i kom kit ma labol acel acel nyuto kwede miti kacel ki teko ma Lubanga tye kwede me dwoko jo muto cen i kwo. Dok omyero ikwany kare me tam matut i kom cer pa Yecu, ma en aye obedo nicer ma pire tek loyo mutimme. Wi opo ni dano miya mapol ma guneno Yecu i nge  cere gumoko ni en ocer dok meno miyowa tyen lok mucwiny me bedo ki niye i kom nicer ma bitimme i anyim.—1 Kor. 15:3-6, 20-22.

18. I yo ma nining ma itwero tic kwede ki werwa ma loko i kom gen me nicer? (Nen bene lok ma i tere piny.)

¹⁸ Winy, lwod, dok iwer “wer me cwiny” ma loko i kom gen me nicer. d (Ep. 5:19) Wer magi weko nicer bedo ada botwa dok gijingo niyewa i kom gen ma pire tek man. Bed ka winyo wer magi, pwony werogi maber, dok wunyam tyen lok ma i wer magi i cawa me worowu pi jo me ot. Mak lok ma i wer magi dok itam iye matut wek ojing niyeni dok ogud cwinyi. Dong ka itye ka kato ki i peko ma keto kwoni ka mading nyo irwenyo danoni me amara i to, cwiny pa Jehovah bikonyi me po i kom wer magi wek inong kwe cwiny ki teko.

19. Gin ango ma watwero goyo i wiwa madok i kom nicer? (Nen bok ma wiye tye ni “ Gin Ango ma Ibipenyogi?”)

¹⁹ Ti ki keroni me goyo jami i wi. Jehovah omiyowa kero me goyo i wiwa kit ma wabikwo kwede i lobo manyen. Laminwa mo acel otito ni: “Atero kare malac adada me goyo i wiya ni atye ka kwo i lobo manyen ma oweko atwero ngweyo kadi wa ngwec ature ma tye ka turo i Paradic.” Go ni itye ka rwatte ki co ki mon ma lugen ma gukwo i kare me Baibul. Anga ma itye ki miti me rwatte kwede? Lapeny mene ma ibipenye kwede? Go kong bene cawa ma ibirwatte kwede ki joni me amara ma kicerogi. Tam kong i kom lok mukwongo ma ibiwaco botgi, kit ma ibikwako kwede korgi, ki kit ma ibikok kwede pi yomcwiny.

20. Gin ango ma omyero wamoku tamwa me timone?

²⁰ Pud dong watye ki pwoc madit ya pi cikke pa Jehovah me nicer! Watwero bedo ki gen ni cikke man bicobbe ada pien Jehovah tye ki miti kacel ki teko me cobone. Dong omyero wamoku tamwa me medde ki jingo niyewa i kom gen man ma pire tek-ki. Ka watimo kit meno, ci wabinyikke cok ki Lubanga ma ocikke bot wan ducu ki acel acel ni, ‘Joni me amara gibicer!’