PWONY ME ANYAMA ME 19
Watwero Jingo Niyewa Nining i Kom Cikke pa Jehovah pi Lobo Manyen?
“Ka dong [Jehovah] owaco lok mo, ci pe bitiyone?” —WEL 23:19.
WER 142 Moko Matek i Genwa
GIN MA WABINYAMO a
1-2. Gin ango ma omyero wabed ka timone ka wawoto ki kuro lobo manyen?
WATERO cikke pa Jehovah me loko lobo man marac-ci doko lobo manyen me kit ma atir calo gin ma pire tek adada. (2 Pet. 3:13) Kadi bed pe wangeyo awene kikome ma lobo manyen meno bibino iye, jami ma waneno tye ka timme i lobo i kare-ni nyuto ni dong cok adada.—Mat. 24:32-34, 36; Tic 1:7.
2 Dong, kadi bed warii i ada nyo pe, wan ducu omyero watute matek me jingo niyewa i kom cikke meno. Pingo? Pien kadi wa niye matek twero doko goro. Ki lok ada, lakwena Paulo olwongo bedo labongo niye ni “bal ma maro tweyowa woko liking,” dok man nyuto ni yot adada me poto i bal man. (Ibru 12:1) Me gengo niyewa ki doko goro, mitte ni kare ducu watam matut i kom jami ma moko botwa ni lobo manyen tye ada dok cok bino.—Ibru 11:1.
3. Ngo ma wabinyamo i pwony man?
3 I pwony man, wabinyamo yo adek mapatpat ma watwero jingo kwede niyewa i kom cikke pa Jehovah pi lobo manyen: (1) lwodo lok i kom ginkok, (2) tamo matut i kom teko pa Jehovah, ki (3) timo jami ma nyikowa cok ki Jehovah. Wabinyamo bene kit ma kwena pa Jehovah bot Kabakuk jingo kwede niyewa i kare-ni. Mukwongo, kong wanyamu jami mogo ma wakato ki iye i kare-ni ma mito ni wabed ki niye matek i kom cikke pa Jehovah pi lobo manyen.
JAMI MA MITO NIYE MATEK
4. Tam me amoka ango ma mito niye matek?
4 Nino ducu, wamoko tam ma mito niye matek. Me labolle, wamoko tam i kom anga ma myero obed laremwa, galowang ma omyero wayer, kwan i rwom mene ma omyero wayer, anga ma omyero wanyom, tika omyero wanywal lutino nyo pe, ki dog tic ango ma omyero watii. Pire tek ni wapennye kekenwa ni: ‘Tika tam ma amoko nyuto ni aye ni lobo man tye pi tutunu dok macok cok-ki Lubanga bileyone woko ki lobo manyen? Nyo tam ma amoko rom ki tam pa jo ma pe giye ni gitwero kwo pi naka?’ (Mat. 6:19, 20; Luka 12:16-21) Wabimoko tam mabeco loyo ka wajingo niyewa ni lobo manyen dong onyiko cok adada.
5-6. Pingo wamito niye matek i kare me peko? Mi labol.
5 Wakato bene ki i pekki ma mito niye matek. Watwero kemme ki aunauna, two mo ma pe cang, nyo jami mogo ma twero turo cwinywa adada. I acakkine, watwero winyo calo watye ki kero me kanyo peko meno. Ento peko ma kit man twero rii pi kare malac, dok bimitte ni wabed ki niye matek me cirone kun wamedde ki tic pi Jehovah ki yomcwiny.—Rom. 12:12; 1 Pet. 1:6, 7.
6 Ka watye ka kato ki i peko, watwero tamo ni lobo manyen pa Jehovah tye ka galle ki bino. Tika man nongo nyuto ni niyewa goro? Pe tye kit meno. Tam kong i kom labol man. I kare me oro ma ceng lyet adada, watwero tamo ni kare me cwir tye ka galle ki bino. Ento ki lok ada, wangeyo ni wang ma obino. I yo acel-lu, ka cwinywa otur adada, watwero winyo calo lobo manyen pe bibino oyot. Ento ka niyewa tye matek, kadi bed cwinywa otur, wangeyo ni wang ma obino. (Jab. 94:3, 14, 15; Ibru 6:17-19) Ka genwa tye matek kit meno, ci watwero medde ki keto worowa pi Jehovah bedo mukwongo i kwowa.
7. Kodi tam ango ma omyero wagwokke kwede?
7 Mitte bene ni wabed ki niye matek wek wanywak i tic me tito kwena. Jo mapol ma watito kwena botgi giwinyo calo “kwena maber” madok i kom lobo manyen obedo mere lek keken. (Mat. 24:14; Ejek. 33:32) Omyero wagwokke adada wek pe wabed ki akalakala i kom gin ma Jehovah pwonyo calo gin. Me gengo meno ki timme, omyero wamedde ki jingo niyewa matek. Kong dong wanyamu yo adek mapatpat ma watwero timo kwede meno.
LWOD LOK I KOM GINKOK
8-9. Lwodo lok i kom ginkok twero jingo niyewa nining?
8 Yo acel ma watwero jingo kwede niyewa aye obedo ki lwodo lok i kom ginkok. Ginkok moko botwa ni cikke pa Lubanga bicobbe. Ka watamo matut i kom tyen lok ma oweko kimiyo ginkok, ki kit ma Jehovah ojalle kwede, wajingo niyewa ni cikke pa Lubanga pi kwo ma pe tum i lobo manyen wang ma ocobbe. Pingo wawaco kit meno?
9 Ngo ma Jehovah ojalo? Jehovah ocwalo latin Kayone ma en maro dok ngat macok kwede loyo ki i polo wek kinywale macalo dano ma pe ki roc. I kare ma Yecu tye i lobo, en ociro kwai pekki mapatpat. Lacen, en odeno can dok oto to malit adada. Jehovah pud dong oculo wel madit ya! Lubangawa ma lamar-ri onongo pe biye ni Wode oden can dok oto wek wabed mere ki kwo maber pi kare manok keken. (Jon 3:16; 1 Pet. 1:18, 19) Pien Jehovah omiyo Wode me amara me konyowa, En bineno ni otwere piwa me kwo pi naka i lobo manyen.
TAM MATUT I KOM TEKO PA JEHOVAH
10. Ma lubbe ki Jo Epeco 3:20, gin ango ma Jehovah twero timo?
10 Yo me aryo ma watwero jingo kwede niyewa aye ki tam matut i kom teko pa Jehovah. En tye ki teko me cobo jami ducu ma ocikke me timone. Jo mapol i kare-ni giwinyo calo kwo pi naka i lobo manyen pe twere piwa. Ento kare ki kare Jehovah cikke me timo jami ma dano pe twero timone. En twero cobo cikkene pien en obedo Lubanga Won Twer. (Yubu 42:2; Mar. 10:27) Pi meno, pe wabedo ki ur ka en ocikke me timo jami me aura!—Kwan Jo Epeco 3:20.
11. Mi labol ma nyuto cikke mogo me aura pa Jehovah. (Nen bok ma wiye tye ni “ Cikke me Aura ma Gucobbe.”)
11 Nen kong jami mogo ma Jehovah ocikke me timo pi jone i kare macon ma onongo nen calo pe twero cobbe. En owaco bot Abraim ki Cara ni onongo gibinywalo latin awobi i kare me tiyogi. (Acak. 17:15-17) En bene owaco ki Abraim ni kibimiyo ki likwaye lobo me Kanaan. Pi mwaki mapol ma onongo likwayo pa Abraim gitye i opii i lobo Ejipt, onongo twero nen calo cikke meno pe bicobbe kulu. Ento cikke man ocobbe. Lacen, Jehovah owaco ni Elicabet binywalo latin kadi bed onongo dong otii woko. En bene owaco ki Maliam, ma onongo peya ongeyo laco, ni binywalo Wode. Man onongo bicobo cikke ma Jehovah ociko mwaki alip mapol angec i poto me Eden!—Acak. 3:15.
12. Lok ma kicoyo i Yocwa 23:14 ki Icaya 55:10, 11 moko botwa gin ango i kom teko pa Jehovah?
12 Wajingo niyewa i kom teko pa Jehovah me kelo lobo manyen ki lwodo cikke mapatpat ma en ociko ki kit ma en ocobogi kwede. (Kwan Yocwa 23:14; Icaya 55:10, 11.) Niye matek weko wabedo ma wayubbe me konyo jo mukene me niang ni cikke me kwo i lobo manyen pe obedo mere lek mamwa. Ka odok i kom polo manyen ki lobo manyen, Jehovah kikome ocikke ni: “Lok magi lok ma genne dok me ada.”—Yabo 21:1, 5.
TIM JAMI MA NYIKI COK KI JEHOVAH
COKKE PA LUKRICITAYO
Jami magi gitwero jingo niyeni nining? (Nen paragraf 13)
13. Cokke pa Lukricitayo twero jingo niyewa nining? Tit kong.
13 Yo me adek ma watwero jingo kwede niyewa aye ki tero cawa ka timo jami ma nyikowa cok ki Jehovah. Me labolle, nen kong adwogi maber ma wanongo ki i cokke pa Lukricitayo. Laminwa Anna, ma obedo ki mot mapatpat me tic pi kare malac owaco ni: “Cokke konya weko niyena bedo matek. Kadi bed lami pwony tye ki diro manok nyo pe opwonyo gin mo manyen, pol kare awinyo gin mo ma konya me niang Baibul maber, dok meno jingo niyena.” b Niyewa twero bene jing ka wawinyo lagam ma omege ki lumege gimiyo i cokke.—Rom. 1:11, 12; 10:17.
TIC ME PWONY
Jami magi gitwero jingo niyeni nining? (Nen paragraf 14)
14. Tic me pwony jingo niyewa nining?
14 Wajingo bene niyewa ka wanywako i tic me pwony. (Ibru 10:23) Barbara, ma dong otiyo pi Jehovah pi mwaki 70 owaco ni: “Pol kare anongo ni tic me tito kwena jingo niyena matek. Ka awoto ki tito ki jo mukene lok i kom cikke mamwonya pa Jehovah, niyena bene dongo doko matek.”
KWAN PIRI KENI
Jami magi gitwero jingo niyeni nining? (Nen paragraf 15)
15. Kwan piwa kenwa jingo niyewa nining? (Nen bene cal.)
15 Nen kong gin mukene ma watwero timone me jingo niyewa: kwan piri keni. Laminwa Susan owaco ni goyo pulan con me kwan pire kene konye adada. En owaco ni: “I Ceng Cabit, akwano pwony me Wi Lubele ma kibinyamo i cabit ma lubo. I Ceng Baraja ki Ceng Aryo, ayubbe pi cokke me dye cabit. I nino mukene ma odong-ngi akwano dok atimo kwed i bukkewa.” Pien en lubo yubbe me kwan pire kene, Susan dongo niyene kare ki kare. Laminwa Irene, ma dong otiyo pi mwaki mapol i gang kalwa madit, owaco ni kwano lok pa lunebi me Baibul jingo niyene. En owaco ni: “Anongo tye me ur adada ni lok pa lunebi cobbe kore ki kore.” c
“BED IKUR; KARE MAN BIBINO ADA”
16. Pingo cuko cwiny ma Jehovah omiyo bot Kabakuk pire tek botwa i kare-ni? (Jo Ibru 10:36, 37)
16 Lutic pa Jehovah mapol dong gukuro neno agikki me lobo man pi kare malac. Jo mogo gitamo ni agikki me lobo man tye ka rii tutwal ki bino. Kadi bed kit meno, Jehovah niang kit ma luticce giwinyo kwede. Ki lok ada, en ocuko cwiny lanebi Kabakuk ni: “Ginanyuta man tye [ka] kuro kare ma Rwot ociko; en ginanyuta me ada, kare me cobone dong cok, tye ka wot oyotoyot mada. Kadi bed nen ni bino motmot, bed ikur; kare man bibino ada, pe bigalle.” (Kab. 2:3) Tika Lubanga onongo tye ka cuko cwiny Kabakuk keken? Nyo mono lokke meno twero konyowa i kare-ni bene? Jehovah otito ki lakwena Paulo ni oti ki nyig lok ma tye i buk pa Kabakuk man me cuko cwiny Lukricitayo ma gitye ka kuro lobo manyen. (Kwan Jo Ibru 10:36, 37.) Ada, watwero bedo ki gen matek ni kadi bed watamo ni cikke pa Jehovah me larowa tye ka rii ki cobbe, “bibino ada, pe bigalle”
17. Laminwa mo acel oketo i tic tira ma Jehovah omiyo bot Kabakuk nining?
17 Lutic pa Jehovah mapol guketo tira man ni, “bed ikur” i tic i kwogi—kadi wa pi mwaki mapol. Me labolle, nen kong labol pa laminwa Louise, ma ocako tic pi Jehovah i mwaka 1939. En owaco ni: “I kare meno, atamo ni Armagedon bibino ma nongo peya atyeko kwanna me cinia. Meno pe otimme. I mwaki magi ducu, anongo ni tye me kony tutwal me kwano lok i kom jo mogo me Baibul ma gukuro neno cobbe pa cikke pa Jehovah, man okonya bene me bedo ka kurone. Akwano lok i kom Nua, Abraim, Yucepu, kacel ki jo mukene ma gukuro pi kare malac ma peya gunongo bakacicgi ki bot Jehovah. Bedo ki niye kare ducu ni cikke magi bicobbe okonyo an ki jo mukene bene me moko ni lobo manyen tye cok adada.” Jo mapol ma dong gutiyo pi Jehovah pi kare malac bene giye lok meno!
18. Ngiyo cwec twero jingo niyewa i kom bino pa lobo manyen nining?
18 Ada, lobo manyen peya obino. Ento tam kong i kom jami mogo ma wanenogi ki wangwa—calo lakalatwe, yadi, leyi, kacel ki dano luwotwa. Pe tye ngat mo ma kalo akala ka ce jami magi tye ada, kadi bed ni i kare mo jami magi ducu onongo gipe. Jami magi gitye i kare-ni pien Jehovah aye ocweyogi. (Acak. 1:1, 26, 27) Lubangawa bene ocikke ni ebikelo lobo manyen. En bicobo cikke meno. I lobo manyen, dano gibinongo mit pa kwo ma pe tum kacel ki yotkom pi naka. Watwero bedo ki gen ni lobo manyen ma kiciko pire-ni bibino i cawane kikome ma Lubanga omoko.—Ic. 65:17; Yabo 21:3, 4.
19. Itwero jingo niyeni nining?
19 Ka iwoto ki kuro lobo manyen, tim jami ducu ma itwero me jingo niyeni. Dong pwocci pi mic me ginkok. Lwod lok i kom teko pa Jehovah. Tim jami ma nyikki cok ki Jehovah. Ka itimo meno, ibibedo i kin “jo ma pi niyegi, ki pi diyo cwinygi, gitye ka nongo gin ma yam Lubanga ociko pire.”—Ibru 6:11, 12; Rom. 5:5.
WER 139 Go ni Itye i Lobo Manyen
a Jo mapol i kare-ni pe giye i kom cikke me Baibul ma loko i kom lobo manyen. Gitamo ni obedo mere lek mamwa ma tere pe. Kadi bed kit meno, wan waye ni cikke pa Jehovah ducu bicobbe. Ento pud mitte ni watute matek me jingo niyewa i kom cikke magi. Watwero timo man nining? Pwony man bititiwa kit me timone.
b Nying mogo kiloko woko.
c Pwony mapatpat ma loko i kom lok pa lunebi me Baibul nonge i te “Lok pa Lunebi” i Buk ma Konyo Lucaden pa Jehovah me Kwedo Lok. Me labolle, nen pwony ma wiye tye ni ‘Gen Jehovah Lubanga Ma Gwoko “Cawa Ki Kare”’ i Wi Lubele me Mai 1, 2012.
