DIANA tye ki mwaka makato 80 dok okato ki i pekki mapol mwaki manok mukato angec. Cware ma onongo tye ki two Alzheimer dok bedo i gang ka ma kigwoko iye lutwo oto woko. Lutino awobine aryo bene guto woko, dok en onongo tye ka lweny ki two kanca ma mako cak. Ento ka omege ki lumege guneno Diana i cokke nyo i tic me pwony, nongo en tye ki yomcwiny.

John otiyo macalo laneno ma woto awota pi mwaki makato 43 kulu. En onongo maro tic meno adada dok onongo tamo ni pe etwero tiyo tic mo mapat. Kadi bed kit meno, onongo mitte ni en ojuk tic macalo laneno ma woto awota, wek ogwok watte mo ma kome lit. I kare-ni, ka omege ki lumege ma onongo gingeyo John gurwatte kwede i gure me nino acel ki me rijon, ginongo ni en pe olokke kulu. En pud tye ki yomcwiny madwong.

Twere nining pi Diana ki John me medde ki bedo ki yomcwiny? Ngat ma tye ka kato ki i peko twero bedo ki yomcwiny nining? Ngat moni twero bedo ki yomcwiny nining kadi bed mitte ni owek mot me ticce ma en maro tutwal? Baibul miniwa lagam pi lapeny magi. Baibul wacci: “Jo ma kitgi atir gibibedo ki yomcwiny i Jehovah.” (Jabuli 64:10) Watwero niang lok ada man maber ka waniang gin ma keliwa yomcwiny marii ki ma pe rii.

Jami mogo pol kare kelo yomcwiny ento yomcwiny meno pe rii. Me labolle, tam kong i kom jo munyomme mo ma gimarre i kingi. Nyo i kom ngat mo ma odoko lanyodo nyen nyo ma onongo mot manyen i tic pi Jehovah. Jami magi ducu gikelo yomcwiny pien gubedo mot ma a ki bot Jehovah. Jehovah aye ocako yub me nyom, dok en aye ominiwa kero me nywalo lutino, ki tic me atima i dulle.​—Acakki 2:18, 22; Jabuli 127:3; 1 Temceo 3:1.

Kadi bed kit meno, jami mogo ma kelo yomcwiny pol kare pe girii. Ngat ma inyomme kwede i kine mogo pe bedo lagen nyo bene to woko. (Ejekiel 24:18; Kocea 3:1) Lutino giromo kwero winyo lok pa lunyodogi ki pa Lubanga, ci kitwero ryemogi woko ki i kacokke. Me labolle, awobe pa Camuel onongo  pe giworo Jehovah i yo mupore, dok Daudi obedo ki pekki mapol pien otimo bal ki Batceba. (1 Camuel 8:1-3; 2 Camuel 12:11) Ka gin ma kit man otimme pol kare pe kelo yomcwiny ento cwercwiny ki arem madwong.

I yo acel-li, i kare mukene pe watwero medde ki tic pi Jehovah pi two nyo nongo mitte ni wagwok jo me pacowa, nyo pien alokaloka otimme i dul pa Jehovah. Jo mapol ma guweko motgi me tic pud giwacci giparo yomcwiny ma onongo gitye kwede i ticgi meno.

Dong nen ka maleng ni jami ma kelo yomcwiny magi pol kare pe girii. Ento tika tye yomcwiny mo ma bedo tye kadi bed ni kwo tek? Myero obed tye pien Camuel, Daudi kacel ki jo mukene, pe gurwenyo yomcwinygi i kare ma gukato ki i atematema.

Yecu onongo ngeyo gin ma yomcwiny kikome obedo. Ma peya en obino i lobo, Baibul wacciwa ni en ‘obedo ki yomcwiny madwong mada i nyim Jehovah.’ (Carolok 8:30) Ento, ma obino i lobo, en orwatte ki pekki mapol i kare mogo. Kadi bed kit meno, Yecu pud obedo ki yomcwiny i timo miti pa Wonne. (Jon 4:34) I agikki me kwone ma en tye ka canne ki arem kono? Wakwano ni: ‘Pi yomcwiny ma giketo i nyime en yam ociro yat.’ (Jo Ibru 12:2) Pi meno watwero nongo pwony mapol ki i kom jami aryo ma Yecu owaco madok i kom yomcwiny me ada.

I nino mo acel, lupwonnye pa Yecu gin 70 gudwogo cen ki i ka tito kwena. Gubedo ki yomcwiny pi jami ma gutimo, kadi wa ryemo cen maraco. Ento Yecu owaco botgi ni: “Cwinywu pe obed yom pi man ni, cen guwinyo cikwu; ento cwinywu obed yom, pien nyingwu gicoyo i wi polo.” (Luka 10:1-9, 17, 20) Ada, bedo ki cwak pa Jehovah pire tek dok keliwa yomcwiny makato mot me tic mo keken.

I nino mukene ma Yecu onongo tye ka pwonyo lwak, cwiny dako mo ma Lajudaya obedo yom adada, pi kit ma Yecu obedo ka pwony kwede ma oweko en owacci min Yecu nen calo cwinye yom adada i kom wode. Ento Yecu ogamme ni: ‘Pe tye kit meno, gitye ki yomcwiny, jo ma giwinyo lok pa Lubanga,  dok gigwoko!’ (Luka 11:27, 28) Bedo ki awaka i kom lutinowa twero keliwa yomcwiny. Ento gin ma keliwa yomcwiny marii aye ka watye lawiny bot Jehovah dok watye ki wat macok kwede.

Wabedo ki yomcwiny madit ka wawinyo ni Jehovah iye yom i komwa. Dok kadi bedo ni pekki pe yomo cwinywa, ento pe twero kwanyo yomcwinywa. Ki lok ada, ka wabedo lugen i kare me peko, ci yomcwinywa dok medde ameda. (Jo Roma 5:3-5) Jehovah bene miyo cwiny mere maleng bot jo ma giketo gengi i kome, dok yomcwiny obedo but nyig ma nyak pi cwiny maleng. (Jo Galatia 5:22) Man konyowa me niang pingo Jabuli 64:10 waco ni: ‘Jo ma kitgi atir gibibedo ki yomcwiny i Jehovah.’

Konyowa bene me niang pingo Diana gin ki John pud gimedde ki bedo ki yomcwiny kadi bed gukato ki i pekki mapol. Diana owacci: “Aringo alaro bot Jehovah , kit macalo latin ringo laro bot lanyodone.” En bene owaco ni: “Awinyo ni Jehovah ogoyo laane i koma kun mina kero me medde ki tito kwena nino ducu ma cwinya yom.” Gin ango ma okonyo John me medde ki bedo ki yomcwiny ki dok me lungo wiye i ticce me pwony i kare ma oweko mot me tic pi kare malac? En owacci: “Nicakke i mwaka 1998 ma kicima me pwony i Cukul pa Luelda ki Lukony Kor Tic, abedo ki kare me kwan pira kena maloyo kare mo keken.” En bene otito ni alokaloka magi pe obedo tek tutwal botgi pien en ki dakone onongo gitye atera me timo gin mo keken ma Jehovah ominigi me atima. En omedde ni: “Watimo alokaloka magi labongo koko ange mo.”

Jo mukene bene guniang ni gin ma kiwaco i Jabuli 64:10 tye ada. Me labolle, tam kong i kom luot mo ma gutiyo i Betel ma i lobo Amerika pi mwaki makato 30 kulu. Kicwalogi woko ka tic macalo painia keken. Gin guwaco ni: “Cwercwiny obedo gin ma timme ka irwenyo gin mo ma imaro,” ento dok guwaco ni: “Pe itwero weko cwinyi cwer pi naka.” Cutcut ma guo i wang ticgi, gucako tito kwena kacel ki kacokke. Luot man guwaco ni: “Walego pi gin ma onongo wamito kikome. Dok neno kit ma Jehovah ogamo kwede legawa ojingo cwinywa dok okeliwa yomcwiny. I nge kare manok, jo mukene ma i kacokkewa gucako tic macalo painia, dok wan bene wanongo lutino kwan aryo me Baibul ma onongo gitye ka dongo i yo me cwiny.”

Ngene kene ni pe yot me bedo ma cwinyi yom kare ducu. Tye kare mogo ma nongo cwinywa pe yom. Ento Jehovah cuko cwinywa ki lok ma tye i Jabuli 64:10. Kadi bed ni cwinywa otur, watwero bedo labongo akalakala mo ni ka wagwoko gennewa i kare me peko mo keken, ci wabibedo ki ‘yomcwiny i Jehovah.’ Watwero bene bedo ki gen pi kare ma cikke pa Jehovah me keto “polo manyen ki lobo manyen” bicobbe. I kare meno dano ducu bibedo labongo roc dok gibibedo ki “yomcwiny nakanaka” pi jami mabeco ma Jehovah bitimone.​—Icaya 65:17, 18.

Go kong kit ma kwo bibedo kwede. Wabibedo ki yotkom kun waco odiko ducu ki kero muromo. Jami maraco ma wakato ki iye i kare-ni pe dong bikeliwa arem mo i kare meno. Jehovah jingo cwinywa ni “pe dong gibipo pi jami macon, pe bene dano mo bitamo pigi.” Wabijolo jowa me amara ma guto dok wabibedo ki yomcwiny calo lunyodo pa anyaka me mwaka 12 ma Yecu ocero-ni. Baibul waco ni: ‘Gubedo ki yomcwiny matek.’ (Marako 5:42) I agikkine, jo ducu ma i lobo gibibedo jo ma kitgi atir dok gibibedo ki ‘yomcwiny i Jehovah’ pi naka.