1, 2. Pingo tye me ryeko me winyo tam pa Ngat ma Ocweyi ka imito yero gin ma ibitimo i kwoni? (Nen cal ma tye i pot karatac man.)

KA PUD itidi, ci ngene kene ni jo mapol gimini tam ma lubbe ki kwoni me anyim. Lupwonye, lumi tam i cukul, nyo jo mukene guromo wacci ni omyero imedde ki kwan i rwom ma lamal nyo inong tic ma bikonyi me nongo cente mabup. Ento Jehovah dok mini tam mapat. Ki lok ada, en mito ni ikwan matek i gang kwan wek inong yo me kwo. (Jo Kolocai 3:23) Ento en bene ngeyo ni ka pud itidi, omyero imok tam ma pigi tego ma bigudo kwoni i anyim. Pi meno, Jehovah mini cik ma igi lac ma bitelli dok bikonyi me kwo i yo ma yomo cwinye i kare man me agikki-ni.​—Matayo 24:14.

² Wi opo ni Jehovah ngeyo jami ducu. En ngeyo ngo ma bitimme i anyim, dok en ngeyo kit ma agikki me kare man dong cok kwede. (Icaya 46:10; Matayo 24:3, 36) Jehovah bene ngeyi maber adada. En ngeyo gin ma bikeli yomcwiny  ki gin ma bikeli cwercwiny. Tam pa dano twero nen calo ber, ento ka pe ojenge i kom Lok pa Lubanga, ci pe twero bedo me ryeko.​—Carolok 19:21.

3, 4. Lubo tam marac ogudo Adam gin ki Kawa kacel ki lutinogi nining?

³ Miyo tam maraco ocakke wacon. Catan aye ma okwongo miyo tam marac bot dano. En owaco ki Kawa ni en gin ki cware, Adam gibibedo ki yomcwiny ma loyo ka gumoko pigi kengi kit ma myero gukwo kwede. (Acakki 3:1-6) Ento Catan onongo tye ka paro pi mitine keken! En onongo mito ni Adam gin ki kawa, kacel ki likwayogi ducu guwiny en dok guwore, ma ka winyo ki woro Jehovah. Catan onongo pe otimo gin mo keken pi dano. Jehovah aye ma onongo ominigi jami ducu ma gitye kwede. En oribogi macalo laco ki dako i nyom, ominigi poto me Eden mamwonya adada ni gubed iye, dok ominigi kom ma roc pe iye ma twero kwo pi naka.

⁴ Ki cwercwiny, Adam ki Kawa gukwero winyo cik pa Lubanga. I kare ma gutimo meno, wat i kingi ki Ngat ma ominigi kwo oket woko. Adwogine obedo marac adada. Obedo calo ature ma kinguno woko ki i tyene. Adam gin ki Kawa gucako tii motmot ci guto woko. Lutinogi bene gudeno can, dok obino bene wa i komwa. (Jo Roma 5:12) Jo mapol i kare-ni bene gicayo cik pa Lubanga dok gitimo gin ma cwinygi mito. (Jo Epeco 2:1-3) Adwogine bedo nining? Baibul wacci ka dano gijemo i kom Jehovah, ci meno ‘pe nyuto ryeko.’​—Carolok 21:30.

5. Jehovah onongo tye ki gen ango i kom dano, dok tika gen meno onongo tye atir?

⁵ Jehovah onongo ngeyo ni tye jo mogo ma gibibedo ki miti me ngeye ki dok me tic pire, kadi wa jo matino mapol. (Jabuli 103:17, 18; 110:3) Jo matino magi pigi tek adada bot Jehovah! In tika itye i kingi? Ka tye kumeno, ci nongo itye ka nongo mit pa “jami mabeco” ma a ki bot Lubanga, dok man medo yomcwiny i kwoni. (Kwan Jabuli 103:17, 18; Carolok 10:22) Wabinyamo jami angwen ma weko ibedo ki yomcwiny. Gin aye, cam me cwiny, lurem mabeco, yub me cwiny, ki dong bedo agonya me ada.

6. Pingo myero ipar pi cobo mitini pi jami me cwiny, dok Jehovah miniwa gin ango me konyowa?

⁶ Lee pe ki miti pi cam me cwiny, pe gitye ki miti me ngeyo Lacwecgi. Ento wan watye ki miti man. (Matayo 4:4) Ka wawinyo lok pa Lubanga, ci konyowa me bedo ki niango, ryeko kacel ki yomcwiny. Yecu owacci: “Gitye ki gum [yomcwiny] jo ma gingeyo ni gin lucan i lok me cwiny.” (Matayo 5:3) Lubanga ominiwa Baibul dok tiyo ki lagwok ot ma lagen dok maryek” me miniwa jami akwano, awinya, ki me anena ma konyo me jingo niyewa. (Matayo 24:45) Walwongo jami magi ni cam me cwiny pien gidongo niyewa, ki bene weko watwa ki Jehovah bedo matek. Watye ka nongo mit pa cam me cwiny mapol mapatpat!​—Icaya 65:13, 14.

7. Cam me cwiny ma a ki bot Lubanga bikonyi nining?

⁷ Cam me cwiny mini ryeko ki kero me  moko tam matir, ma twero konyi i yo mapol. (Kwan Carolok 2:10-14.) Me labolle, ryeko ma kit man bikonyi me niang goba calo ni Lacwec pe, nyo ni cente nyo jami me kom bikeli yomcwiny. Bikonyi bene me gwokke ki miti maraco kacel ki tim maraco ma twero wani. Pi meno, tim jami ducu ma itwero wek inong ryeko dok imok tam matir. Ka itimo meno, ci ibinenone in kikomi ni Jehovah marri dok mito ni ibed maber.​—Jabuli 34:8; Icaya 48:17, 18.

8. Pingo mitte ni inyikke cok ki Lubanga i kare-ni, dok man bikonyi i anyim nining?

⁸ Ma cokcoki kibijwayo yub me lobo pa Catan-ni ki pete tere ducu. Jehovah keken aye ma bigwokowa kun miniwa jami ma mitte me kwowa, ma man twero bedo cam ma mitte pi nino meno. (Kabakuk 3:2, 12-19) Pi meno, man aye kare me nyikke cok bot Lubanga ki dok me jingo genni i kome. (2 Petero 2:9) Ka itimo meno ci kadi bed gin ango otimme i komi pud ibiwinyo calo Daudi, ma owaco ni “Kare ducu angeyo ni Rwot [Jehovah] tye kweda; pe gibidira woko cen, pien en tye yo tung cinga ma lacuc.”​—Jabuli 16:8.

9. (a) Kit ma wakwano kwede i Jon 6:44, gin ango ma Jehovah timo? (b) Gin ango ma dok pat ka warwatte ki Lucaden?

⁹ Ka irwatte pi tyen mukwongo ki ngat mo ma pe tye Lacaden, nongo itye ki ngec ma rom mene i kome? Twero bedo ni ingeyo nyinge, ki kit ma en nen kwede, ento nongo tye jami mukene mapol ma pe ingeyo. Man dok pat ka irwatte pi tyen mukwongo ki ngat mo ma tye i ada. Nongo ingeyo ni en maro Jehovah. Dok bene ingeyo ni Jehovah oneno gin mo maber i kome muweko olwonge me bedo i kin jo me ode ma giwore. (Kwan Jon 6:44.) Labongo paro pi ka ma en a ki iye, nyo kit ma en odongo kwede, nongo ingeyo jami mapol i kome, dok en bene nongo ngeyo jami mapol i komi!

10, 11. Gin ango ma jo pa Jehovah ducu ginywako, dok man gudi nining?

 ¹⁰ Ka irwatte ki Lacaden mo, cutcut nongo ingeyo ni wun ducu wutye ki jami mogo ma wunywako ma pigi tego. Nongo ingeyo ni kadi bed wuloko leb mapatpat, ento wun ducu wuloko ‘leb matir’ ma en aye ada. (Jepania 3:9) Man nyuto ni wun ducu wuye i kom Lubanga, wukwo ma lubbe ki cikke, dok wutye ki gen marom pi anyim. Jami magi konyowu me genne i kinwu ki dok me dongo lirem ma bedo pi naka.

¹¹ Dong ka iworo Jehovah, itwero wacone ni itye ki lurem mabeco loyo ducu. Itye ki lurem i wi lobo ducu, kadi bed pud peya irwatte kwedgi! Tika itwero tam i kom jo mukene ma gitye ki mot ma kit man mapat ki Lucaden pa Jehovah?

12. Yub me cwiny mabeco ango ma itwero ketone?

¹² Kwan Latitlok 11:9–12:1. Tika itye ki yub mo ma imito cobone? Twero bedo ni itye ki yub me kwano Baibul nino ducu nyo me miyo lagam ki pwony mucwiny i cokke. Gwok itye ka tutte me tic ki Baibul ki diro i tic me pwony. Iwinyo nining ka ineno, dok jo mukene giwacci ni itye ka dongo? Cwinyi bedo yom adada, dok ki lok ada, myero ibed ki yomcwiny! Pingo? Pien itye ka timo gin ma Jehovah mito ni itim, kit ma Yecu bene otimo kwede.​—Jabuli 40:8; Carolok 27:11.

13. Pingo tic pi Lubanga ber loyo keto cwinywa i cobo miti me lobo?

¹³ Ka iketo cwinyi i ticci pi Jehovah, nongo itye ka tiyo tic ma bikeli yomcwiny dok ma weko ibedo ki tyen lok me kwo. Paulo ominiwa tam ni: ‘Wucung matek ma pe wuyenge, kun wumedde bene ki tic pa Rwot nino ducu, kun wuniang ni, i Rwotwa yellewa-ni pe me nono.’ (1 Jo Korint 15:58) Ento ka dano giketo cwinygi me cobo yub calo me nongo cente mabup nyo nongo yweka i lobo man, ci pe gibedo ki yomcwiny me ada. Kadi bed ni gitye ki jami ducu, nongo pud giwinyo ni gin mo orem i kwogi. (Luka 9:25) Wanongo pwony man ki i gin mutimme i kom Kabaka Solomon.​—Jo Roma 15:4.

14. Ngo ma itwero pwonyone ki i gin ma Solomon otimo-ni?

¹⁴ Solomon, ma obedo i kin jo mulony ki dok ma guywek loyo i lobo, otimo gin mo. En oloko kekene ni: “Amito kong atem yomo cwinya wek aniang kit ma yomcwiny tye kwede.” (Latitlok 2:1-10) Pi meno, Solomon ogero odi mamwonya adada, opito potti mabeco dok oyubo ka namo mamwonya, kun timo gin mo keken ma cwinye mito. Tika en onongo yomcwiny ki yengo i kwo? I kare ma Solomon oneno jami ducu ma dong en otimogi, en owacci: “Anongo ni man gin ma konnye pe.” En omedde ni: “Pe tye kit magoba mo ma dano twero nongo.” (Latitlok 2:11) Tika itwero nongo pwony ki i gin ma Solomon otimo?

15. Pingo imito niye, dok niye bikonyi nining kit ma wapwonyo kwede ki i Jabuli 32:8?

¹⁵ Jo mukene ginongo pwony i nge timo bal ki dong ki i adwogi marac ma bino i ngeye. Jehovah pe mito ni meno otimme i komi. En mito ni iwiny dok ilub cikke. Man mito niye, dok pe ibikoko ange pi tam ma imoko pi niyeni. Wi Jehovah  bene pe biwil i kom ‘mar ma inyuto pi nyinge.’ (Jo Ibru 6:10) Pi meno, tute me dongo niye matek. Ka itimo meno, ci ibimoko tam matir dok ibinenone in kikomi ni Woru me polo mito ni ibed maber.​—Kwan Jabuli 32:8.

16. Pingo omyero water motwa me bedo agonya calo gin ma pire tek, dok wati kwede i yo maber?

¹⁶ Paulo ocoyo ni: ‘Ka ma cwiny pa Jehovah tye iye, kunnu bedo agonya bene tye iye.’ (2 Jo Korint 3:17) Jehovah maro bedo agonya, dok en ocweyi ki miti me bedo agonya. Ento en mito ni iti ki mot meno i yo me ryeko dok ma twero gwokki. Twero bedo ni lulwakki mogo gineno jami ma tugo miti me buto, gitimo tim tarwang, gimaro tuko ma keto kwo ka mading, nyo bene gitiyo ki yadi kacel ki kongo i yo marac. I acakkine man twero nen calo jami me yomcwiny, ento pol kare kelo adwogi marac adada, calo two, bedo opii pa jami meno, nyo bene wa to. (Jo Galatia 6:7, 8) Jo matino ma gitimo jami magi giromo tamo ni gitye agonya, ento ki lok ada, nongo gipe agonya.​—Tito 3:3.

17, 18. (a) Pingo lubo cik pa Lubanga weko wanongo bedo agonya me ada? (b) I yo ango ma Adam gin ki Kawa onongo gitye agonya loyo dano ma i kare-ni?

¹⁷ Ki tungcel, wanongo adwogi maber ka watye luwiny bot Jehovah. Man ber pi yot komwa dok weko wanongo bedo agonyo me ada. (Jabuli 19:7-11) Dok ka itiyo ki bedo agonyani i yo maber, kun iyero me lubo cik pa Lubanga ma pe ki roc, ci inyuto bot Jehovah kacel ki lunyodoni ni itye dano muteggi. Lunyodoni gibigenni dok giweko ibedo agonya me timo jami mapol. Jehovah bene ocikke ni, cokcok-ki ebimiyo luticce ducu ma lugen ginongo bedo agonyo ma roc mo pe iye, ma Baibul lwongo ni ‘bedo agonya ma deyo tye iye ma kimiyo ki litino pa Lubanga.’​—Jo Roma 8:21.

¹⁸ Man obedo bedo agonya ma Adam gin ki Kawa onongo gitye kwede i acakki. Ki i poto me Eden, onongo tye gin acel keken ma Jehovah owacci pe gutim. Onongo tye yat mo acel ma myero pe gucam nyige. (Acakki 2:9, 17) Itamo ni Lubanga onongo tye lagingi tutwal i kare ma ominigi cik meno? Pe wacel! Tam kong i kom lwak cik mapol ma dano gucomo i kare-ni kun bene gidiyo jo mukene me lubone. Ento Jehovah onongo omiyo Adam cik acel keken.

19. Gin ango ma Jehovah gin ki Yecu gitye ka pwonyowa kwede me konyowa wek wabed agonya?

¹⁹ Jehovah nyuto ryeko i yo ma en terowa kwede. Ma ka miniwa cik mapol, en diyo cwinye kun pwonyowa me lubo cik me mar. En pwonyowa me kwo ma lubbe ki cikke ma igi lac ki dok me kwero gin marac. (Jo Roma 12:9) I Pwonye me Wi Got, Yecu okonyowa me niang  pingo dano gitimo jami maraco. (Matayo 5:27, 28) Dok i lobo manyen, macalo Kabaka me Ker pa Lubanga, Yecu bimedde ki pwonyowa wek wanen jami maraco ki mabeco kit ma en nenogi kwede. (Jo Ibru 1:9) Yecu bene bikwanyo roc woko ki i komwa ki tamwa. Tam kong kit ma kwo bibedo kwede i kare ma nongo pe dong kibibitowa me timo jami maraco dok pe wabideno can pi roc. Ci dong, wabinongo mit pa ‘bedo agonya ma deyo tye iye’ ma Jehovah ocikke pire.

20. (a) Jehovah tiyo ki bedo agonyane nining? (b) Watwero lubo lanenne nining?

²⁰ I lobo manyen, pud wabinongo bedo agonya ma wang cone tye. I yo ma nining? I kare ducu, marwa pi Jehovah ki pi luwotwa aye bitugo cwinywa. Ka mar aye dorowa i yo ducu, ci nongo watye ka lubo lanen pa Jehovah. Kadi bed ni Jehovah tye agonya i yo ducu, en weko mar aye dorre me timo jami ducu, kadi wa kit ma en terowa kwede. (1 Jon 4:7, 8) Pi meno, niange ka kiwaco ni, yo acel keken ma watwero nongo bedo agonya me ada aye, ka walubo lanen pa Lubanga.

21. (a) Daudi onongo winyo nining i kom Jehovah? (b) Ngo ma wabinyamo i pwony ma lubo man?

²¹ Tika itye ki pwoc pi jami mabeco ducu ma Jehovah omini? En omini cam me cwiny, lurem mabeco, yub mabeco, gen me bedo agonya labongo roc, kacel ki mic mamwonya mapol ata. (Jabuli 103:5) Gwok in bene iwinyo calo Daudi ma olego ni: “Ibinyuta yo ma tera i kwo; bedoni kweda miyo abedo ki yomcwiny madwong mada, i tung cingi lacuc tye iye gin ma yomo cwiny dano nakanaka.” (Jabuli 16:11) I pwony ma lubo, wabinyamo lok ada mogo mamwonya ma nonge i Jabuli 16. Man bikonyi me neno kit ma itwero bedo ki kwo ma pud dong ber loyo!