KA JO mukene gunyuto cwiny me kica botwa, ci wawinyo maber adada. Kweyo cwinywa adada me ngeyo ni jo mukene giparo piwa. Ka cwinywa bedo yom ka jo mukene ginyutiwa cwiny me kica, ci wan kono, watwero bedo lukica nining?

Ngat ma lakica paro pi jo mukene dok nyuto i lokke ki ticce. En pe nyuto woro keken. Ento nyuto bene cwiny me kica bot jo mukene pien marogi dok paro pi kit ma giwinyo kwede. Ma pire tek dong loyo, kica obedo nyig manyak pi cwiny maleng. (Jo Galatia 5:22, 23) Jehovah mito ni wabed lukica, pi meno, kong dong wanen kit ma Jehovah gin ki Wode gunyutu kwede cwiny me kica, ki kit ma wan bene watwero lubo kwede lanengi.

Jehovah lakica bot dano ducu, kadi wa bot “jo ma pe pwoye ki bot jo maraco.” (Luka 6:35) Me labolle, Jehovah “miyo cengnge tuc bot jo maraco ki jo mabeco bene, dok miyo kot cwer bot dano ma kitgi atir, ki bot jo ma pe kitgi atir bene.” (Matayo 5:45) Kadi wa jo ma pe giye ni Jehovah aye Lacwec, bene gitwero nongo adwogi maber ki i kica pa Jehovah dok gibedo ki yomcwiny olo to i kwogi.

Labol me kica ma pud dong ber loyo onen i gin ma Jehovah otimo pi Adam ki Kawa. I kare ma gin gubalo, “gukwoyo pot olam guruko i pyergi.” Ento Jehovah onongo ngeyo ni ka gua ki i poto me Eden, gibimito bongo maber ma twero gwokogi, pien onongo dong kiceno lobo woko dok onongo opong ki “okuto ki ocok.” Pi meno, Jehovah “oyubo laa [mabor] me aruka” pigi.​—Acakki 3:7, 17, 18, 21.

Kadi bed Jehovah lakica bot jo “maraco ki jo mabeco,” en lakica tutwalle bot luticce ma lugen. Me labolle, i kare pa lanebi Jekaria, lamalaika mo onongo tye ki par mapol pien ni Luicrael gujuko gero ot pa Jehovah ma i Jerucalem. Jehovah owinyo lok pa lamalaika-ni, dok odok iye kun ‘wacce lok mabeco dok ki kica.’ (Jekaria 1:12, 13) Jehovah bene otero lanebi Elia kit meno. I kare mo cwiny Elia otur adada dok onongo winyo calo etye kene, muweko en openyo Jehovah ni okwany kwone woko. Jehovah onyuto bene ni eparo pi Elia dok ocwalo lamalaika mo wek ojing cwinye. En ocuko cwiny lanebi meno ni en pe tye kene. Kica pa Jehovah ojingo cwiny Elia me medde ki ticce. (1 Luker 19:1-18) Ento ki i kin lutic pa Jehovah ducu, anga ma olubo lanen me kica pa Jehovah i yo maber loyo?

I kare ma Yecu tye i lobo, dano onongo gineno kit ma en lakica kwede. En onongo pe ger, dok pe odiyo jo mukene me timo gin ma en mito. En onongo paro pi jo mukene dok owaccigi ni: “Wubin bota, jo ducu muol ki ma yec onurowu, ci abimiyo wuywe.” (Matayo  11:28-30) Pi cwiny me kica ma en onongo tye kwede, dano onongo gilubo kore ka ma en cito iye ducu. Dok pien en onongo paro pigi, Yecu ominigi cam, ocangogi, dok “opwonyogi ki lok mapol” madok i kom Wonne.​—Marako 6:34; Matayo 14:14; 15:32-38.

Yecu onongo niang kit ma jo mukene giwinyo kwede, onongo bene paro pigi dok terogi ki kica. Ki lok ada, en okonyo jo ducu ma gubino bote kadi bed ni onongo en tye ki tic mukene me atima. (Luka 9:10, 11) Tam kong i kom dako ma onongo tye ki two agobi-ni. En onongo mito cang, pi meno, en ogudu dog bongo pa Yecu. Ento ma lubbe ki Cik pa Moses, en onongo myero pe otim gin meno pien kome keni. (Lulevi 15:25-28) Yecu odok iye nining? Yecu pe oloko bote ki gero. En onongo twero neno kit ma dako-ni lwor kwede, dok kica omakke i kom dako-ni adada pien ni onongo dong otwo pi mwaki 12 kulu. En owacce ni: “Nyara, niyeni ocangi; wot ki kuc, twoni dong otyeko cang matwal.” (Marako 5:25-34) Yecu onongo lakica adada!

I labol ma wanenogi-ni, wapwonyo ni ka wan lukica, ci wabikonyo jo mukene. Yecu onyuto kit ma man pire tek kwede i lapor ma en omiyo i kom Lacamaria ma kite ber. Luyak guyako laco mo ma Lajudaya, gugoye, dok guweke macok to i teng gudu. Lacamaria mo ma onongo tye ka kato ki i yo meno ononge ci kica omake adada i kome, kadi bed Lucamaria ki Lujudaya onongo pe gimarre i kingi. Cwiny me kica oweko en okonyo laco ma kiwano-ni. En odunyo ci otweyo wang rette, ka otere i ot gwoko welo. Lacamaria-ni oculo lagwok ot welo wek ogwok Lajudaya-ni dok oculo bene pi jami mukene ma bimitte.​—Luka 10:29-37.

Cwiny me kica bitugo cwinywa me tamo pi jo mukene ki dok me cuko cwinygi pe i ticwa keken ento i lokwa bene. Baibul waco ni: “Par mapol gengo dano me bedo ki yomcwiny, lok maber me kica aye romo kweyo cwinye.” (Carolok 12:25) Ka ber kit ki kica aye tugo cwinywa me lok i yo ma cuko cwiny jo mukene, ci waweko gibedo ki yomcwiny. * (Nen lok ma tye i tere piny.) Lok ki kica binyutone ni waparo pigi dok weko bedo yot botgi me kanyo pekki ma gitye ka kato ki iye.​—Carolok 16:24.

Wan ducu watye ki kero me nyuto cwiny me kica pien Lubanga ocweyo dano ducu i kit calle kikome. (Acakki 1:27) Me labolle, i kare ma kimiyo Paulo i cing ladit mo ma nyinge Julio ni otere i Roma, en ‘otero Paulo ki cwiny me kica, dok oyene me wot ka limo lureme’ ma i Cidon wek gugwoke. (Tic pa Lukwena 27:3) I kare ma meli pa Paulogi otur woko i dye nam, jo me Molta gunyutigi cwiny me “kica ma pe nen atata” dok gumoko itgi mac wek guo me lyeto komgi. (Tic pa Lukwena 28:1, 2) Jo magi gutimo gin maber adada. Kadi bed kumeno, wek ngat moni oyom cwiny Jehovah myero obed lakica kare ducu, ento pe kicel kicel keken.

Jehovah mito ni cwiny me kica obed kitwa, ki yo me kwowa kare ducu. (Jo Kolocai 3:12) Ento pe yot me bedo lukica kare ducu. Pingo pe yot? Twero bedo ni pe wanyuto cwiny me kica pien wan lulewic, walwor nyo luworo. Nyo gwok wanongo ni tek me nyuto cwiny me kica bot jo ma terowa marac. Ento ka walego pi cwiny maleng dok watemme me lubo lanen pa Jehovah, ci en bikonyowa me bedo lukica.​—1 Jo Korint 2:12.

Watwero ngeyo ka kwene ma myero wayub nining wek wabed jo ma lukica? Penye kekeni ni: ‘Tika aketo cwinya me winyo lok pa jo mukene kun atemme me niang kit ma  giwinyo kwede? Tika atwero neno ka jo mukene gimito kony? Awene ma agiko nyuto cwiny me kica bot ngat mo ma pe watta nyo larema macok?’ Ci dong ket yub ma imito cobone, me labolle, ngeyo jo mukene maber, tutwalle jo me kacokke. Ka itimo meno, ci itwero niang pekki ma gitye ka wok ki iye ki kony ma gimito. I ngeye, tutte me tero jo mukene i yo me kica kit ma in bene imito ni kiteri kwede. (Matayo 7:12) Me agikkine, peny Jehovah pi kony, ci en bigoyo laane i kom yelleni me bedo ngat ma lakica.​—Luka 11:13.

I kare ma lakwena Paulo otito jami ma oweko en etye latit kwena mucwiny, acel i kingi onongo obedo kica. (2 Jo Korint 6:3-6) Dano onongo gimaro Paulo pien en onongo loko dok timo jami i yo me kica, man oweko onongo giwinyo ni en paro pigi. (Tic pa Lukwena 28:30, 31) I yo acel-li, ka wan bene lukica, ci jo mukene gitwero bedo ki miti me ngeyo lok ada. Ka wan lukica bot dano ducu, kadi wa jo ma giterowa marac, ci twero gudo cwinygi, dok gitwero loko kitgi. (Jo Roma 12:20) Nyo gwok i nge kare mo, gibibedo bene ki miti me pwonyo lok ada me Baibul.

I Paradic dano ducu gibibedo lukica bot luwotgi. Gibitero jo ma kicerogi ki cwiny me kica, dok jo mogo i kingi nongo pud peya guneno cwiny meno con. Man bicuko cwinygi bene me bedo lukica bot jo mukene. Ki lok ada, ngat mo keken ma pe lakica dok ma pe mito konyo jo mukene pe bibedo i Ker pa Lubanga. Jo ma lukica dok gimaro dano aye gibibedo pi naka i Paradic. (Jabuli 37:9-11) Lobo bibedo kabedo maber dok ma opye mot ki kuc! Ento kadi bed kare meno peya oo, pud watwero nongo adwogi maber ma bino pi bedo lukica i kare-ni. Man twere nining?

Baibul waco ni: ‘Dano ma lakica nongo adwogi maber.’ (Carolok 11:17) Dano gimaro bedo kacel ki ngat ma lakica, dok pol kare gitere bene i yo me kica. Yecu owaco ni: “Kit gin ma wupimo kwede jami, en aye bene gibipimo kwede jami botwu.” (Luka 6:38) Pi meno, yot ki ngat ma lakica me nongo ki dong bedo ki lurem mabeco.

Lakwena Paulo owaco bot jo me kacokke ma i Epeco ni: “Wubed jo ma lukica ki cwiny maber; dano acel acel omyero otim ber bot lawote. Wutim kica i kinwu kekenwu ki luwotwu i kom balwu.” (Jo Epeco 4:32) Ka jo ducu ma i kacokke ginyuto cwiny me kica kun giparo pi luwotgi, ci kacokke jing dok jone ginote kacel. Omyero pe wabed lugingi tutwal i kom utmegiwa, pe walok lok anii i komgi, dok pe wawac gin mo marac i komgi kadi wa i yo me ngala. Ma ka meno, gin ma wawaco myero obed me konyo ki cuko cwiny jo mukene. (Carolok 12:18) Macalo adwogine, jo me kacokke gibiworo Jehovah ki yomcwiny.

Kit ma wapwonyo kwede, kica obedo kit ma waromo nyutune i jami ducu ma wawaco nyo watimo. Dok ka wan lukica, ci nongo watye ka lubo lanen me mar ki yot cing pa Lubanga, Jehovah. (Jo Epeco 5:1) Man jingo kacokkewa dok cuko cwiny jo mukene me tic pire bene. Pi meno, myero watim jami ducu ma watwero wek jo mukene gunen ni Lucaden pa Jehovah gitye lukica!