1-2. Kit ma gin mutimme i kom Angelito nyuto kwede, gin ango ma ngat acel acel myero otim?

TIKA itye ka dongo i paco ma lunywali gubedo Lucaden pa Jehovah? Ka tye kit meno ci wi myero opo ni pe itwero lako wat macok ma gin tye kwede ki Jehovah alaka. Kadi bed lunywalwa gitiyo pi Lubanga nyo pe, wan ducu ki acel acel myero wadong watwa ki Jehovah.

² Tam kong gin ma otimme i kom omego mo ma nyinge Angelito. En odongo i gang ma jone ducu gubedo Lucaden pa Jehovah. Ento, i kare ma en tidi en onongo pe tye ki wat macok ki Lubanga. Angelito owaco ni: “Onongo atye ka tic pi Jehovah mere pien ni amito timo gin ma jo ma i gangwa gitye ka timone.” Kadi bed kit meno, Angelito omoko tamme me bedo ka kwano Lok pa Lubanga ki lwodone, dok bene ocako lega bot Lubanga kare ki kare. Gin ango ma en opwonyo? Angelito owaco ni, “Apwonyo ni yo acel keken me bedo cok ki Wora Jehovah, aye me ngeye an kikoma.” Gin mutimme i kom Angelito weko wabedo ki lapeny mogo ma pigi tego calo: Apokapoka ango ma tye i kin ngeyo Jehovah wiye wiye ki ngeyo Jehovah maber? Dok ngo ma omyero watim me ngeyo Jehovah maber?

3. Apokapoka ango ma tye i kin ngeyo lok i kom Jehovah ki ngeyo Jehovah maber?

 ³ Watwero waco ni ngat moni ngeyo lok i kom Jehovah ka ce en ngeyo nying Lubanga nyo jami mogo ma Lubanga owaco nyo otimo. Ento ngeyo Jehovah maber pe kwako meno keken. Myero wakwany kare me pwonyo lok i kom Jehovah ki kite. Meno bikonyowa me niang gin ma tugo cwinye me timo jami ducu. Dok bikonyowa me niang ka en cwako tamwa ki jami ma watimo. Ka dong waniang gin ma Jehovah mito ni watim, ci omyero walubi.

4. Nyamo labol mogo me Baibul bikonyowa nining?

⁴ Jo mukene gitwero ngalowa pien ni wamito tic pi Jehovah, gitwero bene kwerowa makato ka wacako cito i cokke. Ento, ka wageno Jehovah, en pe biwekowa matwal. Nongo watye ka cibo te guti pi lirem macok ki Lubanga ma birii pi kwowa ducu. Tika twere ki wan me ngeyo Jehovah maber kit meno? Ada, twere! Labol ma co ma gitye ki roc calo Moses ki Kabaka Daudi guwekiwa nyuto ni twere. Ka wawoto ki nyamo lok i kom jami ma gutimo, wabigamo lapeny aryo magi: Gin gucako ngeyo Jehovah nining? Dok pwony ango ma watwero nongo ki i labolgi?

5. Moses oyero me timo gin ango?

⁵ Moses oyero me tic pi Lubanga. I kare ma Moses tye i kine ka mwaka 40, en oyero me bedo ki jo pa Lubanga, Luicrael, me ka ye ni “gilwonge ni en e wod pa nya pa Parao.” (Ibru 11:24) Moses ojalo rwom madit. I kare ma en olokke ka cwako jo Icrael, ma gitye opii i Ejipt, en ongeyo ni akemo bimako Parao matek. Parao onongo obedo kabaka ma rwomme dit, dok jo Ejipt gitere calo lubanga. Man pud dong onyuto niye matek ya! Moses ogeno Jehovah. Gen ma kit man obedo te guti me wat i kin Moses ki Jehovah ma orii pi kwo pa Moses kulu.​—Car. 3:5.

6. Gin ango ma wapwonyo ki i lanen pa Moses?

⁶ Pwony ango ma wanongo? Calo Moses, wan ducu watye ki tam ma myero wamoki: Tika wabiyero me tic pi Lubanga kun waribbe ki jone? Twero mitte ni wajal jami mogo wek wati pi Lubanga dok man twero weko dano ma pe gingeyo Jehovah gikwerowa. Ento ka wageno Wonwa me polo, ci watwero bedo labongo akalakala mo ni en bikonyowa!

7-8. Gin ango ma Moses omedde ki pwonyone?

⁷ Moses omedde ki pwonyo kit pa Jehovah ki timo Mitine. Me labolle, i kare ma Jehovah omiyo tic ki Moses ni okwany jo Icrael woko ki i opii, Moses onongo pe ki gen i kome kekene dok owaco bot Jehovah teretere ni en pe epore pi tic meno. Lagam pa Lubanga onyuto ni en tye ki cwiny me kica, dok en omiyo kony ki Moses. (Nia 4:10-16) Macalo adwogine, Moses obedo ki kero me tero kwena mapol me ngolo kop bot Parao. I nge meno, Moses oneno teko pa Jehovah i kare ma en olaro jo Icrael ento oneko Parao kacel ki lumonye i Nam Makwar.​—Nia 14:26-31; Jab. 136:15.

⁸ I kare ma Moses dong okwanyo jo Icrael woko ki Ejipt, gin gubedo ka nguru kare ki kare. Kadi bed kit meno, Moses oneno diyo cwiny pa Jehovah i kit ma otero kwede jone ma En ogonyogi ki i opii. (Jab. 78:40-43) Moses bene oneno  mwolo pa Jehovah i kare ma En oloko tamme pien ni Moses olege me timo kit meno.​—Nia 32:9-14.

9. Ma lubbe ki Jo Ibru 11:27, wat i kin Moses ki Jehovah onongo cok lakwene?

⁹ I nge a ki i Ejipt, wat i kin Moses ki Jehovah odoko cok adada ma obedo calo en neno kom Wonne me polo. (Kwan Jo Ibru 11:27.) Baibul onyuto kit ma wat meno onongo cok kwede i kare ma owaco ni: “Kit meno Rwot [Jehovah] yam loko ki Moses wang ki wang, macalo dano loko ki lareme.”​—Nia 33:11.

10. Wek wange Jehovah maber, omyero watim gin ango?

¹⁰ Pwony ango ma wanongo? Wek wange Jehovah maber, pe myero wapwony kite keken, ento myero watim mitine bene. Miti pa Jehovah i kare-ni tye me “laro jo ducu, dok mito ni jo ducu gunge lok me ada.” (1 Tem. 2:3, 4) Yo acel ma watimo kwede miti pa Lubanga aye ki pwonyo jo mukene lok i kom Jehovah.

11. Ka wawoto ki pwonyo jo mukene lok i kom Jehovah, meno konyowa nining me ngeyo en maber?

¹¹ Pol kare ka watye ka pwonyo jo mukene lok i kom Jehovah, wan bene wadongo ngecwa i kome. Me labolle, waneno kica pa Jehovah pi dano ka en konyowa me nongo jo ma gitye ki cwiny matir. (Jon 6:44; Tic 13:48) Waneno teko pa Lok pa Lubanga ka jo ma wakwano kwedgi gijuko tim maraco dok gicako dongo kit pa dano manyen. (Kol. 3:9, 10) Dok waneno diyo cwiny pa Jehovah ka en miyo ki dano ma i wang ticwa kare me pwonyo lok i kome wek kilargi.​—Rom. 10:13-15.

12. Kit ma kinyuto kwede i Nia 33:13, gin ango ma Moses olego pire, dok pingo?

¹² Moses otero watte ki Jehovah calo gin ma pire tek. Kadi wa i nge kare ma Jehovah otiyo ki Moses me timo tango madongo, Moses pud olego Lubanga ki mwolo ni okonye me ngeyo Jehovah maber. (Kwan Nia 33:13.) Moses onongo tye mwaka 80 ki wiye i kare ma en olego kit meno, ento en oniang ni onongo pud etye ki jami mapol ma myero epwony i kom Wonne ma i polo.

13. Yo acel mene ma watwero nyuto kwede ni watero watwa ki Jehovah calo gin ma pire tek?

¹³ Pwony ango ma wanongo? Kadi bed watiyo pi Jehovah pi kare malac nyo manok, pe omyero water watwa ki Jehovah tukutuku. Yo acel ma watwero nyuto kwede ni watero watwa ki Jehovah calo gin ma pire tek aye ki lok kwede i lega.

14. Pingo lega pire tek tutwal me konyowa ngeyo Lubanga?

¹⁴ Ka wamito ni wabed lurem macok ki ngat mo, ci omyero wabed ka lok kwede kare ki kare. Pi meno, dong wat macok ki Lubanga ki lega kare ki kare kun pe ibedo ki lworo me titte tam ma i cwinyi. (Ep. 6:18) Laminwa mo ma nyinge Krista ma bedo i lobo Turkey owaco ni: “Mar ma atye kwede pi Jehovah ki genna i kome medde kare ducu ka atito tamma bote i lega ci aneno kit ma en konya kwede. Neno kit ma Jehovah gamo kwede legana okonya me neno Jehovah calo Wora ki Larema.”

15. Jehovah oloko nining i kom Kabaka Daudi?

¹⁵ Kinywalo Kabaka Daudi i rok ma gudyere bot Jehovah. Ento meno aye pe tyen lok mumiyo Daudi otiyo pi Jehovah. En odongo watte pire kene ki Jehovah dok Jehovah bene omarre matek. Jehovah kikome oloko i kom Daudi  ni “laco ma yomo cwinya.” (Tic 13:22) Daudi ocako bedo ki wat macok ki Jehovah nining?

16. Gin ango ma Daudi opwonyo i kom Jehovah ki i ngiyo ginacweya?

¹⁶ Daudi opwonyo lok i kom Jehovah ki ngiyo cwec. I kare ma Daudi onongo pud awobi matidi, en otero kare malac i dye tim, kun gwoko romi pa wonne. Twero bedo ni meno aye kare ma en ocako lwodo lok i kom jami ma Jehovah ocweyo. Me labolle, ka Daudi oneno polo i dyewor, en onongo pe neno yogo lakalatwe keken, en onongo twero niang kit pa Ngat ma ocweyogi. Man oweko en ocoyo ni: “Polo ki jami ducu ma tye iye ginyuto deyo pa Lubanga; dan polo bene nyuto tic me cinge.” (Jab. 19:1, 2) I kare ma Daudi otamo i kom kit ma kicweyo kwede dano i yo mamwonya, en oneno ryeko pa Jehovah i tic. (Jab. 139:14) I kare ma Daudi olwodo lok i kom jami ma Jehovah ocweyo, en owinyo calo etidi adada ka kipore ki Jehovah.​—Jab. 139:6.

17. Gin ango ma wapwonyo ka wakwanyo kare me lwodo lok i kom cwec?

¹⁷ Pwony ango ma wanongo? Bed ki miti i kom cwec. Pe ibed mere abeda i lobo man maleng ma Jehovah ocweyo-ni, kwany kare me ngiyo cwecce! I kwoni me nino ducu, lwod lok i kom cwec ma orumi​—jami ma twi, lee, ki dano—​wek inen gin ma gitwero pwonyi i kom Jehovah. Ci nino ducu ibipwonyo jami mapol madok i kom Woru me amara. (Rom. 1:20) Dok ibineno ni nino ducu marri pire bidongo medde ameda.

18. Kit ma kitito kwede i Jabuli 18, gin ango ma Daudi oniang?

¹⁸ Daudi oniang ni Jehovah obedo ka konye. Me labolle, i kare ma Daudi ogwoko romi pa wonne wek labwor ki nguu pe omakgi, en oniang ni Jehovah aye ma obedo ka konye me neko nguu magi. I kare ma en oloyo twon oteka lweny Goliac, Daudi oniang maber ni Jehovah aye ma okonye. (1 Cam. 17:37) Dok i kare ma en obwot ki i cing Kabaka Caulo ma lanyeko-ni, Daudi oye ni Jehovah aye olarre. (Jab. 18, lok me kawiye) Ka Daudi onongo obedo ngat ma lawakke, onongo kono otamo ni etimo jami magi ki tekone kene. Ento Daudi onongo obedo ngat ma mwol, pi meno en oniang ni Jehovah aye obedo ka konye.​—Jab. 138:6.

19. Gin ango ma wapwonyo ki i labol pa Daudi?

¹⁹ Pwony ango ma wanongo? Pe omyero wapeny pi kony pa Jehovah keken ci otum. Omyero bene watute me niang awene ki kit ma en konyowa kwede. Ka wabedo jo mamwol, ci wabiniang ni pe watwero timo jami ducu piwa kenwa dok Jehovah konyowa me timo jami ma pe watwero. Dok kare ducu ka waneno kony pa Jehovah i kwowa, watwa kwede dongo bedo matek. Isaac, omego mo ma bedo i lobo Fiji ma dong otiyo pi Jehovah pi mwaki mapol, onongo ni man lok ada. En owaco ni: “Ka aneno kwona mukato angec, anongo ni Jehovah okonya adada cakke ki i kare ma acako kwano Baibul me o wa i kare-ni. Macalo adwogine, amoko ni Jehovah tye ada.”

20. Gin ango ma wapwonyo ki i wat maber ma Daudi obedo kwede ki Lubanga?

²⁰ Daudi oporo kit pa Jehovah. Jehovah ocweyowa ki kero me poro kite. (Acak. 1:26) Ka wamedde ki pwonyo lok i kom kit pa Jehovah, ci kerowa me poro kite bene dongo. Daudi ongeyo Wonne  me polo maber adada, pi meno en onongo twero lubo lanene ki kit ma en tero kwede jo mukene. Nen kong labol acel. Daudi otimo bal i kom Jehovah i kare ma en otimo abor ki Batceba ci oyubo ni kinek cware woko. (2 Cam. 11:1-4, 15) Ento Jehovah oyero me timo kica ki Daudi, laco ma bene otimo kica ki jo mukene. Pien Daudi onongo tye ki wat maber ki Jehovah, en obedo i kin Kabaka me Icrael ma kimaro loyo dok Jehovah otiyo kwede macalo labol bot Kabaka mukene-ni.​—1 Luker 15:11; 2 Luker 14:1-3.

21. Ma lubbe ki Jo Epeco 4:24 ki 5:1, adwogi ango ma wanongo ka ‘walubo kit pa Lubanga’?

²¹ Pwony ango ma wanongo? Omyero ‘walub kit pa Lubanga.’ Ka watimo kit meno, bikeliwa adwogi maber dok bikonyowa me ngeyo Lubanga. Ka walubo kit pa Lubanga, ci wanyuto ni wan lutinone.​—Kwan Jo Epeco 4:24; 5:1.

22-23. Ngo ma bitimme ka waketo i tic jami ma wapwonyo i kom Jehovah?

²² Kit ma waneno kwede, Jehovah nyutte botwa kun tiyo ki cwecce ki dong Lokke, Baibul. Buk meno ma kite dok pat-ti, tye ki labol pa lutic pa Lubanga ma lugen ma watwero lubone, calo Moses ki Daudi. Jehovah dong otyeko timo me ka mege. Dong odong i wiwa me pwonyo jami mapol kit ma watwero madok i kom Lubanga.

²³ Pe wabigiko pwonyo lok i kom Jehovah. (Latit. 3:11) Gin ma pire tek pe obedo ni watye ki ngec madwong, ento gin ma watimo ki ngec meno. Ka watute me keto i tic jami ma wapwonyo kun walubo lanen pa Wonwa ma lamar-ri, en bimedde ki nyiko cok botwa. (Yak. 4:8) I Baibul, Lubanga cuko cwinywa ni pe ebiweko jo ma giyenye.