1-2. (a) Jubili obedo gin ango? (Nen bok ma wiye tye ni “ Jubili Macon-ni Onongo Obedo Ngo?”) (b) Kit ma kitito kwede i Luka 4:16-18, ngo ma Yecu oloko iye?

I LOBE mukene, kiyubo kwer madongo me kwero mwaka me 50 me loc pa kabaka ma laco nyo ma dako. Mwaka me 50 meno kilwongo ni jubili pa laloc meno. Kwer ma kubbe ki jubili meno romo tero nino acel, nyo cabit acel nyo makato, ento lacen gik woko dok i nge kare mo wi dano wil woko i kom yomcwiny ma kwer man okelo.

² Tin wabinyamo lok i kom jubili maber kato magi, ber kato kadi wa jubili ma onongo Luicrael gikwero i nge mwaki 50, kun kwere tero mwaka acel kulu. Jubili me kare macon meno onongo kelo bedo agonya bot jo Icrael. Pingo omyero wabed ki miti me pwonyo lok i kom Jubili meno? Pien mwaka me Jubili pa jo Icrael poyo wiwa i kom yub mo mamwonya ma Jehovah oyubo piwa. Yub meno bikeliwa bedo agonya ma birii matwal dok watwero nongo adwogi maber ki iye wa i kare-ni. Yecu bene oloko i kom bedo agonya mamwonya man.​—Kwan Luka 4:16-18.

3. Ma lubbe ki Lulevi 25:8-12, adwogi maber ango ma jo Icrael gunongo ki i kwero Jubili?

³ Watwero niang maber tyen lok pa Yecu i kom bedo agonya ka wacako ki nyamo Jubili ma Lubanga oyubo pi jone i kare macon. Jehovah waco bot jo Icrael ni: ‘Wubikwero mwaka me pyerabic obed maleng, kun wutito i lobowu ducu ni kuc tye pi jo ducu ma bedo iye. En aye bibedo kare me Jubili mewu, ma nongo ngat acel acel i kinwu dok gire i dul lobone, dok ngat acel acel i kinwu bidok i doggolagi.’  (Kwan Lulevi 25:8-12.) I pwony mukato-ni, wanyamo kit ma Luicrael onongo ginongo kwede adwogi maber ki i kwero Cabat ma bedo cabit ki cabit-ti. Ento, adwogi maber ango ma Luicrael gunongo ki i kwero Jubili? Macalo labol, go kong ni Laicrael mo odonyo i banya madit ci ocato ngomme wek ecul banya meno. I mwaka me Jubili, ngom meno myero kidwok bote. Pi man, laco-ni onongo “dok gire i dul lobone,” wek ginaleya pa lutinone pe orweny matwal. Nyo go kong ni laco mukene odonyo i banya madit adada mumiyo mitte ni ocatte nyo ocat latinne macalo opii wek ocul banya meno. I mwaka me Jubili, opii meno onongo “bidok i doggolagi.” Pi meno, pe tye ngat mo ma onongo bedo opii naka labongo gen mo! Yub man pud dong nyuto ni Jehovah paro pi jone ya!

4-5. Pingo pire tek ni wabed ki miti i kom kwer me Jubili pa Luicrael?

⁴ Adwogi maber ango mukene ma gunongo ki i kwero Jubili? Jehovah otito ni: “Lacan mo pe dong bibedo i kinwu, pien Rwot [Jehovah] bimiyowu gum i lobo ma Rwot Lubangawu bimiyowu wucam me aleyawu matwal.” (Nwo. 15:4) Man pud dong pat adada ki gin ma tye ka timme i lobo i kare-ni, ka ma lulonyo gilony gimedde ameda dok lucan gimedde ki bedo lucan!

⁵ Macalo Lukricitayo, wan pe watye i te Cik pa Moses. Man nyuto ni pe walubo cik me Jubili macon me gonyo opii, weko banya, ki dwoko cen ngom aleya. (Rom. 7:4; 10:4; Ep. 2:15) Kadi bed kit meno, pire tek ni wabed ki miti i kom kwer me Jubili. Pingo? Pien poyo wiwa i kom gin ma Jehovah otimo me gonyowa ki i bal.

6. Ngo ma omyero kigony dano ki iye?

⁶ Wan ducu omyero kigonywa pien watye opii i yo marac adada​—opii me bal. Pien watye opii, watii, watwo, dok wato. Wan ducu waneno meno ka wangiyo wangwa i kiyo nyo ka wacito i ot yat pien komwa lit. Cwinywa bene tur ka watimo bal. Lakwena Paulo oye ni onongo etye  ‘opii i te cik me bal ma bedo i dul kome ducu.’ En omedde ni: “An ma koma kec kuman-ni, anga ma bilara ki i kom man ma to woko-ni?”​—Rom. 7:23, 24.

7. Gin ango ma lanebi Icaya otito i kom bedo agonya?

⁷ Ki yomcwiny madit, Lubanga oyubo yo me larowa, nyo gonyowa ki i opii me bal. Yecu aye oweko kitwero gonyowa. Mwaki makato 700 ma Yecu peya obino i lobo, lanebi Icaya otito ni i kare me anyim, dano bibedo agonya i yo maber makato. Bedo agonya meno onongo bikelo mot mapol makato ma Luicrael onongo gilimo i mwaka me Jubili. En ocoyo ni: ‘Rwot Jehovah dong ocwalo cwiny mere i koma, pien dong owira woko ki moo, wek ater lok me kwena maber bot jo ma giunogi. Oora bene me cango jo ma cwercwiny onurogi, ki me tito bot jo ma tye i opii ni gibigonyogi woko.’ (Ic. 61:1) Lok pa lanebi meno onongo bicobbe i kom anga?

8. Lok pa lanebi Icaya i kom bedo agonya ocobbe i kom anga?

⁸ Lok ma pire tek pa lanebi meno i kom bedo agonya ocako cobbe i kare ma Yecu ocako ticce me pwony. I kare ma Yecu ocito i kacokke ma i Najaret ka ma en odongo iye, en okwano lok pa lanebi Icaya meno kikome bot Lujudaya ma gucokke kunnu. Yecu owaco ni lok man ocobbe i kome: “Cwiny pa Rwot [Jehovah] tye i koma, pien dong owira woko ki moo wek atit lok me kwena maber bot lucan. Oora me tito bot jo ma tye i opii ni gibigonyogi, ki bot jo ma wanggi oto ni gibiyabo wanggi, ki me gonyo jo ma giunogi wek gucit ki kuc, dok pi tito pi mwaka ma Rwot binyuto iye berre bot dano.” (Luka 4:16-19) Yecu ocobo lok pa lanebi meno nining?

9. Jo mapol i kare pa Yecu onongo gitye ki gen me bedo agonya ki i kom ngo?

⁹ I kare pa Yecu, dano gucako nongo bedo agonya ma lanebi Icaya otito pire con dok ma Yecu okwano-ni. Yecu omoko lok man i kare ma en otito ni: ‘Tin ginacoya man ocobbe kakare kun wuwinyo ki itwu.’ (Luka 4:21) Dano mapol ma guwinyo lok pa Yecu nen calo onongo gitye ka mito alokaloka me wibye, wek kigonygi ki i te loc pa Roma. Twero bedo ni onongo gitye ki tam pa co aryo-ni ma guwaco ni: “Yam wageno ni en aye ngat ma bikoko Icrael.” (Luka 24:13, 21) Ento wangeyo maber ni Yecu pe ocuko cwiny lulub kore me jemo i kom loc aconya pa Luroma. Me ka  meno, en ocikogi ni omyero gudwok “jami pa Cecar bot Cecar.” (Mat. 22:21) Dong i yo ma nining ma Yecu ogonyo kwede dano i kare meno?

10. Yecu oweko dano gubedo agonya ki i kom ngo?

¹⁰ Wod pa Lubanga obino me konyo dano wek gubed agonya i yo aryo. Mukwongo, Yecu okonyo dano me bedo agonya ki i pwony goba pa lutela dinigi. Lujudaya mapol i kare meno onongo kidiyogi me lubo cik me tekwaro ki pwony goba. (Mat. 5:31-37; 15:1-11) Jo ma onongo giwacci gitye ka konyo dano me woro Lubanga gin kikomgi onongo pe giworo Lubanga, pi meno onongo gitye calo lutowang. Pien gukwero Meciya ki lok ada ma en opwonyo, pe gumedo ki ngeyo Lubanga​—gumedde ki bedo lutowang—​dok Lubanga pe otimo kica pi balgi. (Jon 9:1, 14-16, 35-41) Kit macalo Yecu opwonyo lok ada dok oweko lanen maber, en onyuto ki jo mamwol kit me bedo agonya ki i pwony goba.​—Mar. 1:22; 2:23–3:5.

11. Gin me aryone ma Yecu ogonyo dano ki iye obedo ngo?

¹¹ Yo me aryone ma Yecu ogonyo kwede dano aye ki i opii me bal alaka. Pi ginkok pa Yecu, Lubanga onongo twero weko bal pa dano ma gitye ki niye i kom ginkok dok ginyuto niye man i ticgi. (Ibru 10:12-18) Yecu owaco ni: “Ka Wod ogonyowu gibigonyowu atika.” (Jon 8:36) Bedo agonya meno ber loyo bedo agonya ma onongo Luicrael gilimo i mwaka me Jubili! Me labolle, laco ma kigonyo i mwaka me Jubili onongo pud twero doko opii, dok lacen en bito woko. Ento bedo agonya ma Yecu miyo birii matwal.

12. Angagi ma gukwongo nongo bedo agonya ma Yecu otito pire-ni?

¹² I nino me Pentekote mwaka 33 K.M., Jehovah owiro lukwena kacel ki co ki mon mukene ma lugen. En olokogi gudoko lutinone wek i kare me anyim kicergi me cito i polo ka loc kacel ki Yecu. (Rom. 8:2, 15-17) Gin aye gubedo jo mukwongo me nongo bedo agonya ma Yecu otito pire i kacokke pa Lujudaya i Najaret. Co ki mon magi onongo dong pe gitye opii me pwony goba pa lupwonye dini pa Lujudaya ki kwergi ma pe rwatte ki Lok pa Lubanga. Lubanga bene nenogi calo dong kigonyogi woko ki i opii me bal ma kelo to. Jubili pa Lukricitayo ocakke ki wiro lulub kor Kricito i mwaka 33 K.M. dok bigik i agikki me Loc me Mwaka Alip Acel pa Yecu. Jami mabeco ango ma bitimme  cakke i kare-ni nio wa i agikki me Loc me Mwaka Alip Acel?

13-14. Medo i kom Lukricitayo ma kiwirogi, angagi ma gitwero nongo bedo agonya ma Yecu otito pire-ni?

¹³ I kare-ni, dano milion mapol ma cwinygi atir gitye i kin “romi mukene.” (Jon 10:16) Lubanga pe oyerogi me loc kacel ki Yecu i polo. Me ka meno, Baibul waco ni gitye ki gen me kwo pi naka i wi lobo. Tika meno obedo genni?

¹⁴ Kadi wa i kare-ni itye ka nongo adwogi mogo maber ma jo ma kiwirogi ginongo. Pi niyeni i kom ginkok pa Yecu, itwero lego Jehovah wek otimmi kica pi balli. Pi meno itwero nongo cwak pa Lubanga dok ibedo ma cwinyi pe pidi pi balli. (Ep. 1:7; Yabo 7:14, 15) Tam kong bene i kom mot ma itye kwede pien ni kigonyi ki i opii me pwony goba. Yecu owaco ni: “Wubingeyo lok me ada, lok me ada bigonyowu.” (Jon 8:32) Cwinywa yom adada me bedo agonya i yo man!

15. Bedo agonya ki mot ango ma watye ki gen me nongone i anyim?

¹⁵ Iromo bedo ki gen me nongo bedo agonya maber makato ducu i anyim. Cokcok-ki, Yecu bijwero te dini goba kacel ki gamente pa dano ma lucamucana-ni woko. Lubanga bigwoko “lwak dano  mapol ata” ma gitiyo pire, dok en bimiyogi mot mapol i paradic i lobo kany. (Yabo 7:9, 14) Jo mapol ata kibicerogi i kare meno. Jo ma guyero me tic pi Jehovah pe dong gibibedo ki peko me two, tiyo ki to.​—Tic 24:15.

16. Bedo agonya mamwonya ango ma dano tye ki gen me nongone i kare me anyim?

¹⁶ I kare me Loc me Mwaka Alip Acel, Yecu kacel ki luloc luwote gibikonyo dano me bedo ma komgi yot dok ma gitye ki wat maber ki Lubanga. Kare man me gonyo dano bibedo calo mwaka me Jubili i lobo Icrael. Man tyen lokke ni jo ducu ma gitiyo pi Jehovah i lobo kany ki gen gibibedo labongo roc ki bal mo keken.

17. Ngo ma Icaya 65:21-23 tito ni bitimme i kom jo pa Lubanga? (Nen cal ma i pok ngeye.)

¹⁷ Lanebi Icaya otito kit ma kwo i lobo bibedo kwede i kare meno i Icaya 65:21-23. (Kwan.) Meno pe bibedo kwo me wackom ma wabedo mot labongo timo gin mo. Me ka meno, Baibul nyuto ni jo pa Lubanga i kare meno gibibedo ki tic ma konye tye dok ma yomo cwinygi. I agikki me Loc me Mwaka Alip Acel, wangeyo labongo akalakala mo ni “gibigonyo ginaketa woko ki i opii me bedo gin ma top, wek gunong kuc ki deyo ma gimiyo ki litino pa Lubanga.”​—Rom. 8:21.

18. Pingo watwero bedo ki gen ni anyim mamwonya tye ka kurowa?

¹⁸ Kit macalo Jehovah oyubo ni Luicrael gubed ki kare me tic ki kare me yweyo, en bene bitimo kit meno pi jone i kare me Loc me Mwaka Alip Acel pa Yecu. Labongo akalakala mo, wabibedo ki kare me woro Lubanga. Woro Lubanga pire tek wek wabed ki yomcwiny i kare-ni, dok wabimedde ki woro Lubanga wa i lobo manyen. Ada, jo ducu ma lugen gibibedo ki yomcwiny i kare me Loc me Mwaka Alip Acel pa Kricito pien wan ducu wabibedo ka tiyo tic ma keliwa yomcwiny kun wamedde ki woro Lubanga.