1. Tam ango ma jo mapol gitye kwede i kom tic?

POL pa dano ma i kabedowu gineno tic nining? I lobe mapol, dano gitiyo matek dok pi cawa malac mukato kare woko. Dano ma gitiyo matek mukato kare woko pe ginongo cawa me yweyo, me bedo ki jo me gangigi nyo me cobo mitigi pi jami me cwiny. (Latit. 2:23) Ki tungcel, jo mukene pe gimito tic dok gigengo ngegi ki tyen lok ma konye pe.​—Car. 26:13, 14.

2-3. Jehovah ki Yecu guwekiwa lanen ango i kom tic?

² Dano mapol i lobo-ni gitiyo matek ma okato kare woko nyo gitiyo manok. Ento tam kong i kom kit ma Jehovah gin ki Yecu gineno kwede tic. Labongo akalakala mo, wangeyo ni Jehovah maro tic. Yecu oweko man ongene i kare ma owaco ni: “Wora tye ka tic nio koni, an bene atye ka tic.” (Jon 5:17) Tam bene i kom tic ducu ma Lubanga otimo i kare ma ocweyo lumalaika, lakalatwe ki jami mukene ma i dan polo. Waneno bene jami mapol ma Lubanga ocweyo i lobo kany. Laco jabuli ocoyo lok ada man ni: “Ai Rwot [Jehovah], in dong itiyo lwak jami mapol! Itiyogi ducu ki ryeko, omiyo lobo opong ki ginaketani.”​—Jab. 104:24.

³ Yecu olubo lanen pa Wonne. En okonyo Lubanga i kare ma Lubanga “oketo polo.” En onongo tye kacel ki Jehovah macalo “ladiro tic.” (Car. 8:27-31) Lacen i kare ma Yecu tye i lobo, en ocobo tic madongo. Tic meno obedo calo cam bote, dok ticce onyuto ni Lubanga aye oore.​—Jon 4:34; 5:36; 14:10.

4. Gin ango ma wapwonyo ki bot Jehovah ki Yecu madok i kom yweyo?

 ⁴ Tika lanen me tic matek ma Jehovah ki Yecu guwekiwa nyuto ni yweyo pire pe tek? Pe tye kit meno. Baibul wacciwa ni i nge kare ma Jehovah ocweyo polo ki lobo, en “oywe mot i nino me abiro, oomo iye kero kome.” (Nia 31:17) Jehovah pe ol, pi meno pe mitte ni en myero oywe. Dong, ginacoya meno tyen lokke ni Jehovah ojuko ticce me cwec dok okwanyo kare me nongo yomcwiny ki i cwecce. Dok kadi bed Yecu otiyo matek i kare ma en tye i lobo, en pud okwanyo kare me yweyo ki cam kacel ki lureme.​—Mat. 14:13; Luka 7:34.

5. Gin ango ma pol pa dano gitute kwede?

⁵ Baibul cuko cwiny jo pa Lubanga me bedo jo ma maro tic. Luticce omyero gubed jo ma tiyo matek ento pe luwac kom. (Car. 15:19) Twero bedo ni itye ki dog tic ma konyi me nongo cente me pito jo gangi. Dok lulub kor Yecu ducu gitye ki tic me tito kwena maber-ri. Medo i kom meno, mitte bene ni inong kare muromo me yweyo. Tika cawa mukene inongo tek me nongo kare muromo pi dog ticci, ticci me pwony ki yweyo? Watwero ngeyo nining kare ma omyero wami me tic ki kare ma omyero wami me yweyo?

6. I yo ma nining ma Marako 6:30-34 nyuto ni Yecu onongo tye ki neno mupore i kom tic ki yweyo?

⁶ Pire tek adada ni wabed ki neno mupore i kom tic. Lubanga oweko Kabaka Solomon ocoyo ni: “Tim acel acel tye ki karene . . . kit lok mo keken tye ki karene i lobo man.” En oloko i kom jami calo pito kodi, gero odi, koko, nyero, myel, ki jami mukene. (Latit. 3:1-8) Ada, jami aryo ma pigi tek i kwowa obedo tic ki yweyo. Yecu onongo tye ki neno mupore i kom tic ki yweyo. I nino mo acel, lukwena pa Yecu gudwogo cen ki i tito kwena. Tic man onongo omako wigi matek ma oweko “pe gubedo ki kare mo me cam.” Yecu owaco botgi ni: “Wubin kenwu ka ma dano pe iye, wuywe manok.” (Kwan Marako 6:30-34.) Kadi bed ni onongo pe twere pi Yecu ki lukwenane me nongo yweyo ma gimito kare ducu, Yecu oniang ni gin ducu gimito yweyo.

7. Pwonyo lok i kom Cabat twero konyowa nining?

⁷ I kare mukene, wan ducu wamito yweyo nyo alokaloka mo i kwowa. Watwero neno man ki i yub mo ma Lubanga oketo pi jone i kare macon​—yub me Cabat ma onongo bedo cabit ducu. Kadi bed pe watye i te Cik pa Moses, pud watwero nongo adwogi maber ki i pwonyo lok i kom Cabat. Gin ma wabipwonyo-ni twero konyowa me niang ka watye ki neno mupore i kom tic ki yweyo.

8. Ma lubbe ki Nia 31:12-15, nino me Cabat onongo obedo me timo gin ango?

⁸ Lok pa Lubanga tito ni i nge “nino” abicel ma Lubanga obedo ka cwec, Lubanga ogiko cweyo jami i lobo. (Acak. 2:2) Kadi bed kit meno, Jehovah maro tic matek, dok i yo mapatpat en pud “tye ka tic nio koni.” (Jon 5:17) Yub me bedo ki Cabat cabit ki cabit lubo lanen me yweyo pa Jehovah ma kicoyo i buk me Acakki. Lubanga owaco ni Cabat onongo tye macalo lanyut i kin en ki Luicrael. Man onongo obedo nino me “yweyo mot, nino maleng bot Rwot [Jehovah].” (Kwan Nia 31:12-15.) Kigeng i kom tic onongo kwako  dano ducu kadiwa lutino, opii, nyo lee ma kigwokogi gang. (Nia 20:10) Man onongo weko dano gibedo ki kare me keto cwinygi i woro Lubanga.

9. Tam ma pe opore ango ma onongo dano tye kwede i kom Cabat i kare pa Yecu?

⁹ Yub me Cabat onongo ber pi jo pa Lubanga; ento i kare pa Yecu lupwonye dini onongo giketo gingi iye matek. Gin onongo giwaco ni cik pe ye ni ngat mo orit wit bel i nino me Cabat nyo bene ocang latwo. (Mar. 2:23-27; 3:2-5) Tam ma kit man onongo pe rwatte ki tam pa Lubanga, dok Yecu oweko man ongene ka maleng bot jo ma winye.

10. Gin ango ma wapwonyo ki i Matayo 12:9-12 i kom kit ma Yecu onongo neno kwede Cabat?

¹⁰ Yecu ki lulub kore ma Lujudaya guywe i nino me Cabat pien onongo gilubo Cik pa Moses. * Ento Yecu onyuto i lokke ki ticce ni omyero pe kiket gingi i kom cik me Cabat dok ni kitwero timo jami mabeco me konyo jo mukene i nino meno. En otito atyer ka maleng ni: ‘Cik ye ni myero gitim gin maber i Ceng Cabat.’ (Kwan Matayo 12:9-12.) En pe oneno timo jami mabeco ki konyo jo mukene calo obedo turo cik me Cabat. Jami ma Yecu otimo nyuto ni en onongo ngeyo tyen lok ma oweko Lubanga owaco ki jone ni guywe i nino Cabat. Pien jo pa Lubanga guywe ki i ticgi me nino ducu, onongo gitwero keto cwinygi i kom woro Lubanga. Yecu odongo i paco ma nen calo onongo gitiyo ki  nino me Cabat pi woro Lubanga. Man nen ka maleng ka wakwano lok i kom Yecu i kare ma tye i ganggi i Najaret ni: ‘Yecu odonyo i kacokke i Ceng Cabat, kit macalo kite onongo tye. Oa malo ka kwan.’​—Luka 4:15-19.

11. Anga ma oweko ki Yecu lanen maber madok i kom tic matek?

¹¹ Yucepu opwonyo Yecu ki tic me payo bao kacel ki kit ma Lubanga neno kwede tic. (Mat. 13:55, 56) Dok nen calo Yecu onongo neno Yucepu ka tiyo matek nino ducu me gwoko jo me pacone. Lacen Yecu otito ki lupwonnyene ni: “Latic myero gimiye mucarane.” (Luka 10:7) Ada, Yecu onongo latic matek.

12. Ginacoya mene ma nyuto kit ma Baibul loko kwede i kom tic matek?

¹² I yo acel-li, lakwena Paulo bene onongo tiyo matek. Ticce ma pire tek loyo onongo obedo tito kwena ki miyo caden i kom Yecu. Ento kadi bed kit meno, Paulo otiyo matek me nongo cente me pite. Utmege ma i Tecalonika onongo gingeyo ni en ‘ocanne i tic dyeceng ki dyewor wek pe eket peko’ i kom ngat mo. (2 Tec. 3:8; Tic 20:34, 35) Paulo nen calo onongo tye ka lok i kom ticce macalo layub kema. I kare ma en tye i Korint, Paulo obedo kacel ki Akwila ki Pricikila “pien onongo gin ducu gitiyo kit tic acel, en aye tic me yubo kema.” I kare ma Paulo owaco ni etiyo “dyeceng ki dyewor” en onongo pe tye ka waco ni etiyo labongo nongo yweyo mo. En onongo kwanyo kare me yweyo ki i ticce me yubo kema, calo i nino me Cabat. Nino meno onongo mine kare me miyo caden bot Lujudaya, pien gin bene onongo pe gitiyo i nino me Cabat.​—Tic 13:14-16, 42-44; 16:13; 18:1-4.

13. Gin ango ma wapwonyo ki i lanen pa Paulo?

¹³ Lakwena Paulo oweko ki wan lanen maber me aluba. Me labolle, en obedo ki tic ma konye me nongo cente; ento pud en oketo tek me nywako kare ki kare ‘i tito lok me kwena maber ma a ki bot Lubanga.’ (Rom. 15:16; 2 Kor. 11:23) En ocuko cwiny jo mukene bene me timo kit meno. Macalo adwogine, Akwila ki Pricikila ‘gutiyo kacel kwede i Kricito Yecu.’ (Rom. 12:11; 16:3) Paulo olego jo ma i Korint ni ‘gumedde bene ki tic pa Rwot nino ducu.’ (1 Kor. 15:58; 2 Kor. 9:8) Jehovah bene oweko lakwena Paulo ocoyo ni: “Ngat ma dag tic myero wutwon ki cam.”​—2 Tec. 3:10.

14. Lok pa Yecu ma kicoyo i Jon 14:12 tyen lokke ngo?

¹⁴ Tic ma pire tek loyo ducu i kare man me agikki-ni obedo tic me tito kwena ki loko dano. Ki lok ada, Yecu otito ni lupwonnyene gibitiyo tic madito makato ma en otiyo! (Kwan Jon 14:12.) Meno pe te lokke ni wabitimo tango kit ma Yecu otimo kwede. Me ka meno, lulub kor Kricito onongo gibitito kwena dok gipwonyo dano i wang tic malac loyo mege, bot dano mapol, ki pi kare malac loye.

15. Lapeny mene ma omyero wapennye kwedgi, dok pingo?

¹⁵ Ka itye ki dog tic ma itiyo, pennye ki lapeny magi: ‘Tika kingeya i dog ticca macalo latic matek? Tika atyeko ticca i wang cawa ma kimina dok atiyo ki kerona ducu kit ma atwero?’ Ka itwero gamo lapeny magi ni eyo, ci ladit ticci biketo genne i komi. Dok jo me ka ticci gitwero bedo ki miti me winyo lok me kwena maber. Ka odok i kom tic me tito kwena ki pwony, pennye ki lapeny magi: ‘Tika kingeya calo latic matek i tic me tito kwena?  Tika ayubbe maber pi cito i lim me acel? Mono adok cen ka limo jo ma gitye ki miti labongo galle? Tika anywako i but tic me pwony mapatpat?’ Ka igamo ni eyo, ci ibinongo yomcwiny i ticci.

16. Apokapoka ango ma tye i kit ma Yecu ki lupwonnyene onongo gineno kwede yweyo ki kit ma dano mapol neno kwede yweyo i kare-ni?

¹⁶ Yecu onongo ngeyo ni i kine mukene en kacel ki lupwonnyene onongo gimito yweyo. Kadi bed kit meno, jo mapol i kare meno ki i kare-ni kitwero porogi ki laco ma lalonyo ma i lapor pa Yecu. Laco-ni owaco kekene ni: “Ywe, cam, mati bed ki yomcwiny.” (Luka 12:19; 2 Tem. 3:4) En otamo ni gin ma pire tek loyo i kwo obedo yweyo ki nongo yomcwiny. Ka iporo laco man ki Yecu kacel ki lukwenane, gin onongo pe giketo cwinygi tutwal i kom nongo yomcwiny mukato kare woko.

17. Watiyo ki yweyo ma wanongo ki i dog ticwa nining?

¹⁷ I kare-ni, walubo lanen pa Yecu ka watiyo ki cawawa ma nongo wape i dog tic pe me yweyo keken ento bene me tito kwena ki wot i cokke pa Lukricitayo. Ki lok ada, waneno tic me pwony kacel ki wot i cokke calo jami ma pigi tek ma weko watute ki tekwa ducu me timogi. (Ibru 10:24, 25) Kadi bed watye ka yweyo ki i dog ticwa, pud wamedde ki yubwa me cwiny kare ducu ki ka mo keken ma watye iye, dok wayenyo yo me lok ki jo ma warwatte kwedgi.​—2 Tem. 4:2.

18. Gin ango ma Kabakawa, Yecu Kricito mito ni watim?

¹⁸ Watye ki pwoc madit ni Kabakawa, Yecu Kricito pe diyowa me timo gin ma kerowa pe twero dok konyowa me bedo ki neno mupore i kom tic ki yweyo. (Ibru 4:15) En mito ni wanong yweyo ma wamito. En bene mito ni wati matek wek wanong jami ma mitte pi kwowa dok wanywak bene i tic me pwony. I pwony ma lubo man, wabinyamo gin ma Yecu otimo me gonyowa ki i opii.