Tika itwero gamo lapeny magi ma lubbe ki Wi Lubele me mwaka 2019?

Cikke pa Lubanga ni: “Pe tye jami lweny mo ma giteto pi lweny i komi ma bicobo ticce” tyen lokke ngo? (Ic. 54:17)

Watwero bedo ki gen ni Lubanga bigwokowa ki i “alur yweyo dog dano ma gin pe lukica.” (Ic. 25:4, 5) Lumonewa pe gibicobo mitigi me kelo awano marii pi naka i komwa.​—w19.01, pot 6-7.

Kit ma Lubanga otero kwede jo Kanaan ki Luicrael ma guturo cikke nyuto kite me ngolo kop atir nining?

Lubanga ongolo kop i kom jo ma onongo ginywako i tim buto me lewic nyo ma giuno mon ki lutino. En ogoyo laane i kom jo ma gubedo luwiny bote dok onongo gitero jo mukene maber.​—w19.02, pot 22-23.

Gin ango ma omyero watim ka ngat ma pe laye olego?

Omyero waling mot kun wanyuto woro ento pe omyero wawac ni “amen” nyo wamak cing ki jo ma gitye. Watwero bene lega ki i cwinywa.​—w19.03, pot 31.

Tim me nywaro lutino rac lakwene?

Nywaro latin obedo bal i kom latin man, kacokke, luloc, ki dong Lubanga. Ka cik me lobo moni waco ni omyero kidot ngat ma koko me nywaro latin tye i kome, ci luelda gilubo cik meno.​—w19.05, pot 9-10.

Itwero loko tam ma i cwinyi nining?

Gin ma omyero itim aye: Tit ki Jehovah kit ma iwinyo kwede i lega. Lwod lok ki miti me ngine kekeni. Yer luremi ki ryeko.​—w19.06, pot 11.

Gin ango ma watwero timo kombeddi me yubbe pi aunauna?

Omyero wajing watwa ki Jehovah. Bed ki gen ni en marowa dok pe biwekowa matwal. Kwan Baibul nino ducu dok ileg kare ki kare. Bed ki gen ni mot me Ker-ri bicobbe. Mak i wi tyeng mogo ma imaro kacel ki wer me pako Jehovah.​—w19.07, pot 2-4.

Gin ango ma omyero watim me konyo wadiwa wek Lubanga olargi?

Pire tek ni wanyut botgi cwiny me kica, wawek kitwa maber aye omi caden, dok wadi cwinywa kun waloko ki diro.​—w19.08, pot 15-17.

Watwero limo yweyo ma Yecu ociko pire i Matayo 11:28 nining?

Watye ki luneno ma gin lumar, lurem mabeco, ki tic maber loyo.​—w19.09, pot 23.

Lubanga twero miniwa miti ki teko me tic nining? (Pil. 2:13)

Ka wawoto ki kwano Lok pa Lubanga ki lwodone, Lubanga twero miniwa kero, miti ki teko me cobo ticce. Cwiny mere maleng twero dongo diro ma watye kwede con.​—w19.10, pot 21.

Yo me ryeko ango ma omyero ikwany ma peya imoko tam ma pire tek?

Yo me ryeko abic magi aye: Tim kwed matut. Leg pi ryeko. Tem niang tyen lok mumiyo imoko tam meno. Bed ki yub moni kikome ma imito ni icobbi. Bed ki neno matir.​—w19.11, pot 27-29.

Tika tam man ni dano tye ki tipo ma pe to-ni oa ki i lok ma Catan owaco bot Kawa i poto me Eden?

Nen calo pe kit meno. Catan pe owaco ki Kawa ni ka en ocamo nyig yat ma Lubanga ogengo-ni, kome bito ento tipone bimedde ki kwo ka mo. Pwony mo keken ma kubbe ki dini goba kityeko woko i Pii Aluka. Tam man ni dano tye ki tipo ma pe to nen calo ocakke ma peya Lubanga oketo dano ma onongo gitye ka gero ot mabor me Babel.​—w19.12, pot 15.