TIKA in inenne kekeni calo ngat ma miyo pwoc? Meno obedo lapeny ma ngat acel acel i kinwa myero otam iye. Baibul otito ni i karewa-ni, jo mapol “pe gibimiyo pwoc.” (2 Tem. 3:2) Twero bedo ni irwatte ki jo ma gitamo ni jo mukene aye myero gutim jami pigi nyo guminigi jami. Nen calo giwinyo ni pe mitte ni gimi pwoc pi jami ma kiminigi. Labongo akalakala mo in iye ni bedo ki dano ma kit meno pe mit.

Ka iporogi ki lutic pa Jehovah, Baibul wacciwa ni: “Wubed jo ma miyo pwoc kare ducu.” Omyero ‘wami pwoc pi jami ducu.’ (Kol. 3:15; 1 Tec. 5:18) Ki lok ada, dongo cwiny me pwoc ber piwa. Man tye ada pi tyen lok mapol.

Tyen lok acel ma pire tek mumiyo omyero wadong cwiny me pwoc aye ni konyowa me bedo ki neno matir i komwa kekenwa. Ngat ma miyo pwoc nongo winyo maber i kome kekene, dok ngat ma kipwoyo-ni bene winyo maber. Pingo miyo pwoc kelo adwogi maber botwa ki bot jo mukene? Tam kong i kom labol man: Ka iniang ni jo mukene gitye atera me timo gin mo piri, meno nyuto ni gitamo ni piri tek oweko giyelle piri. Nyuto ni giparo piri. Ka ineno meno, ci weko iwinyo maber. Nen calo meno aye gin mutimme i kom Ruth. Boaj onyuto yot cinge bot Ruth. Labongo akalakala mo, man oweko Ruth obedo ki yomcwiny me niang ni kara ngat mo tye ma paro pire.​—Ruth 2:10-13.

Pire tek adada ni wami pwoc bot Lubanga. Labongo akalakala mo, i kare mogo itamo i kom mot mapol me cwiny ki jami me kom ma en omiyo dok pud tye ka medde ki miyone. (Nwo. 8:17, 18; Tic 14:17) Ento me ka tamo mere manok keken i kom ber pa Lubanga, pingo pe ikwany kare me lwodo lok i kom mot mapol ma Lubanga omini ki joni me amara? Lwodo lok i kom yot cing Lacwec bimedo pwocci pire dok bikonyi me moko ni en mari dok neno ni piri tek.​—1 Jon 4:9.

Ento pe igik ki tamo pi yot cinge ki mot ma en miyo keken; mi pwoc bot Jehovah pi berre. (Jab. 100:4, 5) Buk mo acel owaco ni, “nyuto pwoc kelo yomcwiny bot dano.”

Tyen lok mukene mumiyo miyo pwoc pire tek piwa aye ni jingo wat i kinwa ki jo mukene. Wan ducu wamito ni omyero kipwowa. Ka imiyo pwoc ma a ki i cwinyi pi gin maber ma ngat mo otimo piri, wun aryo-ni wat i kinwu doko cok. (Rom. 16:3, 4) Medo i kom meno, jo ma miyo pwoc aye pol kare gikonyo jo mukene. Gineno kica ma dano mukene nyuto botgi dok man tugo cwinygi me bedo lukica. Ada, konyo jo mukene weko wabedo ki yomcwiny. Tye kit ma Yecu otito kwede ni: “Miyo mot kelo gum [yomcwiny] makato gamo agama.”​—Tic 20:35.

Robert Emmons, ma obedo ka loyo wi kwed mo pa University of California i kom pwoc, otito ni: “Me bedo ki pwoc, omyero waniang ni wan ducu wajenge i kom jo mukene i yo mo olo. I kare mogo wamiyo, i kare mukene wagamo.” Kwowa jenge i kom jo mukene i yo mapol. Me labolle, gitwero miniwa cam nyo gikonyowa ka komwa lit. (1 Kor. 12:21) Ngat ma tye ki pwoc i cwinye pwoyo gin ma jo mukene gitimo pire. Pi meno, tika dong iweko odoko kiti me pwoyo jo mukene ka gutimo jami piri?

Tyen lok mukene mumiyo pire tek me dongo cwiny me pwoc aye ni konyi me keto tammi i kom jami mabeco ento pe maraco keken. Adammi tiyo calo keyikeyi. Konyi me keto cwinyi i kom jami mogo ma timme i ka ngeti kun kiyo mukene woko. Pol kare, ineno jami mabeco ento pe iketo cwinyi i kom jami maraco. Ka itye ki pwoc, ci ibineno jami mabeco i kwo, dok man bidongo pwocci medo ameda. Neno kwo ki cwiny me pwoc bikonyi me timo gin ma lakwena Paulo owaco ni: “Wubed ki yomcwiny i Rwot kare ducu.”​—Pil. 4:4.

Ibinongo ni bedo ki pwoc konyi me lweny ki tam maraco. Tek adada me bedo ki pwoc kun ki tungcel nongo itye ki nyeko, cwercwiny, nyo akemo. Jo ma gitye ki pwoc bene pe gibedo ki miti mukato kare woko pi jami me kom. Gitye ki pwoc pi jami ma gitye kwede dok pe giketo cwinygi i kom coko jami mapol.​—Pil. 4:12.

Macalo Lakricitayo, ingeyo ni Catan mito ni ibed ma cwinyi cwer dok ma keroni nok pi pekki ma itye ka kato ki iye i kare man me agikki-ni. Cwinye bedo yom ka idongo cwiny marac me nguru pi jami ducu. Cwiny ma kit meno weko pe inyako nyig macalo latit lok me kwena maber. Ki lok ada, pwoc woto kacel ki nyig ma nyak pi cwiny pa Lubanga, ma tye iye yomcwiny pi jami mabeco ma Lubanga omini ki niye i kom cikkene pi anyim.​—Gal. 5:22, 23.

Kit ma in itye dano pa Jehovah, nongo iye lok ma kiwaco i pwony man i kom pwoc. Kadi bed kit meno, ingeyo ni pe yot me bedo ki cwiny me pwoc kacel ki neno matir kare ducu. Ento pe iwek meno obal cwinyi. Itwero dongo ki gwoko cwiny me pwoc. I yo ango? Kwany kare nino ducu me tam i kom jami mogo i kwoni ma itwero miyo pwoc pire. Ka imedde ki timo meno, ci cwiny me nyuto pwoc bidoko kiti. Man biweko ibedo ki yomcwiny madwong loyo jo ma giketo cwinygi i kom pekki ma tye i kwogi. Ket tammi i kom jami mabeco ma Lubanga ki jo mukene gitimo me cuko cwinyi, dok ma keli yomcwiny. Gwok nyo itwero cako coyogi piny. Iromo coyo jami aryo nyo adek ma itye ki pwoc pire i nino meno.

Lukwed mogo ma gukwano lok i kom nyuto pwoc giwaco ni “bedo ka miyo pwoc bot jo mukene kare ki kare loko kit ma adamwa tiyo kwede, weko wawinyo maber i kwowa.” Ngat ma miyo pwoc bedo ma cwinye yom. Pi meno, tam i kom jami mabeco ducu ma inongo, nong mit pa jami mabeco ma timme i kwoni, dok iwek miyo pwoc odok kiti! Me ka cayo jami mabeco ma timme i kwoni, omyero “imi pwoc bot Rwot [Jehovah], pien en ber.” Ada, ‘mi pwoc pi jami ducu.’​—1 Tekwaro 16:34; 1 Tec. 5:18.