1-2. Pingo omyero Lukricitayo ducu gubed ki miti i kom nicer me cito i polo?

POL pa dano ma gitiyo pi Jehovah i kare-ni gitye ki gen me kwo pi naka i lobo kany. Ento udong jo ma kiwirogi gitye ki gen ni kibicerogi me kwo i polo. Jo ma kiwirogi magi gitye ki miti madit adada me ngeyo kit ma kwogi bibedo kwede i polo, ento jo ma gitye ki gen me kwo i lobo kono? Kit ma wabineno kwede, cer me cito i polo bikelo mot bot jo ma gitye ki gen me kwo i wi lobo pi naka bene. Pi meno, kadi bed watye ki gen me cito i polo nyo me bedo i wi lobo, omyero wabed ki miti i kom nicer me cito i polo.

² Lubanga otiro lupwonnye pa Yecu mogo i cencwari me acel me coyo lok i kom nicer me cito i polo. Lakwena Jon otito ni: “Kombeddi dong wan litino pa Lubanga; kit ma wabibedo kwede peya onen, ento wangeyo ni ka en binen, wan bene wabinen calo en.” (1 Jon 3:2) Pi meno, Lukricitayo ma kiwirogi pe gingeyo kit ma gibibedo kwede ka kicerogi me kwo i polo macalo cwec me cwiny. Ento gibineno Jehovah ki wanggi ka kiminigi motgi. Baibul pe tito jami ducu madok i kom cer me cito i polo, ento lakwena Paulo omiyo ngec mo manok iye. Jo ma kiwirogi gibibedo kacel ki Kricito i kare ma en “turo kit loc ki twero ki tek ducu me cwiny.” Ma meno bene kwako ‘lakwor me agikki, to.’ Ki dong me agikkine, Yecu ki luloc luwote gibimine kacel ki  cwec mukene-ni ducu i loc pa Jehovah. (1 Kor. 15:24-28) Meno pud dong bibedo kare me yomcwiny adada! *

3. Kit ma kinyuto kwede i 1 Jo Korint 15:30-32, niye pa Paulo i kom nicer okonye me timo gin ango?

³ Niye pa Paulo i kom nicer okonye me kanyo pekki mapatpat. (Kwan 1 Jo Korint 15:30-32.) En otito ki jo Korint ni: “An mera ato nino ducu.” Paulo ocoyo bene ni: “Alwenyo ki lee mager i Epeco.” Nen calo en obedo ka lok i kom lweny ki lee mapatpat i bar mo i boma me Epeco. (2 Kor. 1:8; 4:10; 11:23) Nyo bene onongo tye ka lok i kom Lujudaya ki jo mukene mager calo “lee.” (Tic 19:26-34; 1 Kor. 16:9) Paulo okato ki i jami ma oketo kwone ka mading. Kadi bed kit meno, en pud omedde ki bedo ki niye matek ni ebibedo ki anyim maber.​—2 Kor. 4:16-18.

4. I yo ma nining ma gen me nicer tye ka jingo Lukricitayo i kare-ni? (Nen cal ma i pok ngeye.)

⁴ Watye ka kwo i kare marac adada. Utmegiwa mapol kitimo tim aranyi i komgi. Mogo gitye ka kwo i kabedo ma lweny tye iye dok kwogi bedo ka mading cawa ducu. Mukene doki gitiyo pi Jehovah i lobe ma kiketo kigeng i kom ticwa me tito kwena, kadi bed ni man twero weko girwenyo kwogi nyo kitweyogi i buc. Kadi bed kit meno, omege ki lumege magi pud gimedde ki woro Jehovah dok giweko lanen maber piwa. Gitye ki gen matek ni kadi bed girweny kwogi i kare-ni, Jehovah tye ki gin mo maber adada pigi i anyim.

5. Tam marac ango ma twero weko niyewa i kom nicer doko goro?

⁵ Paulo otito ki utmege ni omyero gugwokke adada ki tam marac ma jo mogo onongo gitye kwede ni: “Ka cero jo muto pe, ci ber dong ‘wacamu, wamatu, pien diki wabito woko.’” Tam ma kit meno onongo dong tye con ma peya Paulo ocoyo lok meno. Twero bedo ni Paulo onongo tye ka lok i kom Icaya 22:13, ma tito cwiny ma Luicrael onongo gitye kwede. Me ka nyiko cok ki Lubanga, gin onongo giyenyo kwo me yomcwiny. I yo mayot, Luicrael magi onongo gitamo ni “omyero wacam kwo tin pien diki gwok wabito woko,” dok man aye kit ma dano mapol gitamo kwede i kare-ni. Ento adwogi marac ma rok me Icrael onongo tye kicoyo ka maleng i Baibul.​—2 Tekwaro 36:15-20.

6. Gen me nicer myero ogud kodi lurem ma wayero nining?

⁶ Nen ka maleng ni, ngeyo ni Jehovah twero cero jo muto myero ogud kodi lurem ango ma wamako. Onongo mitte ni utmege ma i Korint gugwokke ki ribbe kacel ki jo ma gikwero nicer. Meno miniwa pwony ma pire tek i kare-ni: Ka watero kare malac adada ki lurem ma pe giparo pi jami ma bitimme i anyim dok giparo pi yomcwiny keken ci meno bigudowa i yo marac adada. Bedo ki jo ma kit magi twero balo tam pa Lakricitayo kacel ki kite. Jo ma kit meno gitwero weko Lakricitayo timo jami ma Lubanga dagi. Pi meno, Paulo ociko ni: “Wudwog cen i tam ma atir ma pe me mero, ci wugik bal woko cut.”​—1 Kor. 15:33, 34.

7. Lapeny ango ma jo mogo gwok gupenyo madok i kom nicer kit ma kinyuto kwede i 1 Jo Korint 15:35-38?

⁷ Kwan 1 Jo Korint 15:35-38. Ngat mo ma mito ni jo mukene gubed ki akalakala i kom nicer onongo twero penyo ni: “Jo muto gicerogi nining?” Bedo ber ka wanyamo lagam ma Paulo omiyo pien dano mapol gitye ki tam mapatpat i kom kwo i nge to. Ento ngo ma Baibul pwonyo?

8. Lapor mene ma twero konyowa me niang i kom nicer me cito i polo?

⁸ Ka ngat moni oto, kome top woko. Ento ngat ma ocweyo polo ki lobo twero cero ngat meno kun mine kom ma opore. (Acak. 1:1; 2:7) Paulo otiyo ki lapor me nyuto ni pe mitte ni Lubanga ocer kom acel mutop woko-ni. Tam kong i kom “kodi” nyo “ginapita.” Kodi ma kipito i ngom twi ci doko ginapita manyen. Ginapita manyen man pat adada ki kodi ma kipito. Paulo otiyo ki lapor man me nyuto ni Lacwecwa twero cweyo ‘kom kit macalo yam en oyero.’

9. Gin ango ma 1 Jo Korint 15:39-41 tito madok i kom apokapoka ma tye i kin kwai kom mapatpat?

⁹ Kwan 1 Jo Korint 15:39-41. Paulo otito ni Lubanga pe ocweyo jami ducu ki kom marom. Me labolle, ringo kom dyang, ringo winyo, ki ringo rec gin ducu patpat. En otito ni, i polo, waneno apokapoka in kin ceng ki dwe. Dok en owaco ni “lakalatwe bene kitgi patpat, omiyo deyo ma gitye kwede bene tye patpat.” Man tye ada kadi bed pe watwero neno apokapoka magi ki wangwa, lucayan giwaco ni tye lakalatwe mapatpat, mogo dongo mogo tino, mukene tar mukene yelo calo ceng. Paulo bene owaco ni “tye kom me polo ki kom me lobo.” En onongo tye ka lok i kom gin ango? I lobo kany, watye  ki kom ma tye ki ringo ki remo, ento i polo gitye ki kom me cwiny, calo pa lumalaika.

10. Kodi kom ango ma jo ma kibicerogi me kwo i polo gibibedo kwede?

¹⁰ Nen kong gin ma Paulo owaco i nge lok man: “Tye bene kit meno i kom cer pa jo muto. Kodi ma gicoyo-ni en gin ma top; ento ka dong gicero pe dok to.” Ngene kene ni i nge to, kom dano top woko ci doko apwa. (Acak. 3:19) Dong twere nining ni “ka dong gicero pe dok to”? Paulo onongo pe tye ka lok i kom dano ma kicerogi me kwo i lobo, calo jo ma Elia, Elica, ki Yecu gucero-ni. Paulo onongo tye ka lok i kom ngat ma kicero ki kom me polo, ma en aye “kom me cwiny.”​—1 Kor. 15:42-44.

11-12. Alokaloka ango ma otimme i kom Yecu i kare ma kicere, dok i yo ma nining ma jo ma kiwirogi gikato ki i alokaloka marom?

¹¹ I kare ma Yecu onongo tye i lobo, en onongo tye ki kom me ringo ki remo. Ento i kare ma kicere, en “odoko cwiny ma miyo kwo” ci odok cen i polo. Kit meno bene, Lukricitayo ma kiwirogi kibicerogi ma gitye cwec me cwiny. Paulo otito ni: “Macalo waruko cal pa dano ma gitiyo ki ngom, kit meno bene wabiruko cal pa dano ma oa ki i polo.”​—1 Kor. 15:45-49.

¹² Paulo onongo dong cok tyeko nyamo lokke i kom nicer. Pire tek ni waniang ni Yecu pe kicero ki kom me lobo-ni. Paulo otito ka maleng ni: “Gin ma tye ki kom ki remo pe twero leyo ker pa Lubanga” i polo. (1 Kor. 15:50) Lukwena ki Lukricitayo ma kiwirogi pe kibicerogi me kwo i polo ki kom ma top ma tye ki ringo ki remo. Kibicerogi awene? Paulo onyuto ni nicer man onongo pud tye i anyim; pe obedo gin ma bitimme cutcut i nge togi. I kare ma Paulo ocoyo 1 Jo Korint, onongo lupwonnye “mogo dong guto woko,” me  labolle lakwena Yakobo. (Tic 12:1, 2) Ento lukwena ki jo mukene ma kiwirogi onongo pud ‘gibito’ i anyim.​—1 Kor. 15:6.

13. Lanyut mene ma onongo binyuto ni kare me “dwogo” pa Yecu oromo?

¹³ Yecu ki Paulo guloko i kom kare mo mapat adada i tekwaro pa dano, ma meno aye kare me dwogo pa Kricito. Lanyut ma onongo binyuto ni kare meno oromo aye jami calo lweny, oyengyeng, two gemo, kacel ki jami maraco ma tye ka timme i twok lobo ducu. Watye ka neno cobbe pa lok pa lanebi meno nicakke i mwaka 1914. Onongo bene tye gin mukene ma bicobbe macalo but lanyut meno. Yecu owaco ni kwena maber me Ker pa Lubanga kibititone “i wi lobo ducu, me bedo caden bot rok ducu; ka dong lacen agikki piny bibino.” (Mat. 24:3, 7-14) Paulo otito ni “nino me dwogo pa Rwot” bibedo bene kare me cero Lukricitayo ma kiwirogi ma ‘guto woko.’​—1 Tec. 4:14-16; 1 Kor. 15:23.

14. Ngo ma timme i kom Lukricitayo ma kiwirogi ma gito i kare me dwogo ma Kricito?

¹⁴ I kare-ni, jo ma kiwirogi ma gityeko kwogi i lobo kicerogi cutcut me kwo i polo. Lok pa Paulo ma tye i 1 Jo Korint 15:51, 52 moko lok man: “Pe wan ducu wabito, ento wan ducu gibilokowa woko, oyotoyot pi kare manok mo keken, macalo wang ma neno piny litubetube, ka buriji me agikki dong bikok.” Lok pa Paulo meno tye ka cobbe i kare-ni! I nge cerogi, omegi Kricito magi, gibibedo ki yomcwiny madwong  adada pien ‘gibibedo kacel ki Rwot nakanaka.’​—1 Tek. 4:17.

15. Tic ango ma tye ka kuro jo ma kibilokogi i “kare manok mo keken, macalo wang ma neno piny litubetube”?

¹⁵ Baibul tittiwa tic ma jo ma kibilokogi i “kare manok mo keken, macalo wang ma neno piny litubetube” gibitimone i polo. Yecu owaco botgi ni: “Abimiye twero me loyo lurok. En biloyogi ki odoo nyonyo, calo ngat ma goyo agulu ngidogi woko matinotino, kit macalo an bene alimo twero ki bot Wora.” (Yabo 2:26, 27) Jo magi gibiribbe ki Latelagi i tic me loyo rok ducu ki odoo nyonyo.​—Yabo 19:11-15.

16. I yo ma nining ma dano mapol gibiloyo to?

¹⁶ Nen ka maleng ni, jo ma kiwirogi gibiloyo to. (1 Kor. 15:54-57) Nicergi biweko gikonyo i kwanyo tim maraco ducu ki i wi lobo i kare me lweny me Armagedon. Lukricitayo milion mapol mukene ma co ki mon, ‘gibikato ki i can madit atika’ dok gibidonyo i lobo manyen. (Yabo 7:14) Jo magi ma gibidonyo i lobo manyen labongo to gibineno ki wanggi kit ma kibiloyo kwede to i kare ma dano bilion mapol ma guto kibicerogi. Go kong yomcwiny ma wabibedo kwede i kare meno ma gin me aura man bitimme iye! (Tic 24:15) Dok jo ducu ma gugwoko gennegi bot Jehovah gibiloyo to ma gulako macalo adwogi me bedo likwayo pa Adam. Gibibedo ki mot me kwo pi naka.

17. Gin ango ma 1 Jo Korint 15:58 cuko cwinywa me timone?

¹⁷ Lukricitayo ducu ma gikwo i kare-ni omyero gubed ki pwoc pi lok me cuko cwiny ma lakwena Paulo ocoyo bot jo Korint i kom nicer. Watye ki tyen lok ducu me nyuto ni wajolo tira pa lakwena Paulo kun watute ki kerowa ducu i “tic pa Rwot.” (Kwan 1 Jo Korint 15:58.) Ka wanywako ki kerowa ducu i tic man, wabibedo ki gen me nongo kwo me yomcwiny adada i kare me anyim. Anyim meno bibedo maber loyo gin mo keken ma watwero goyo i wiwa. Man bimoko ni i Rwot yellewa-ni pe tye me nono.