Pe tye kit meno, pien pe tye ka mo keken i Baibul nyo i coc macon ma nyuto ni Lukricitayo onongo ginongo batija pi jo muto.

Kit ma tyeng man kigonyo kwede i Baibul mapol weko jo mukene gitamo ni onongo kibatija dano pi jo muto i kare macon. Me labolle: “Ka jo muto pe gibicer, ci dong jo ma gibatija pi jo muto-ni gibibedo nining?”​—Acholi Baibul.

Ento, nen kong lok pa jo aryo ma gukwano Baibul i yo matut. Lakwan me Baibul acel ma nyinge Dr. Gregory Lockwood owaco ni pe tye gin mo keken ki i Baibul nyo coc macon ma moko ni ngat mukene onongo nongo batija pi dano muto. Lakwan mukene me Baibul ma nyinge Professor Gordon D. Fee ocoyo ni: “Pe tye labol mo i Baibul nyo i coc macon ma moko kodi batija man. En owaco ni pe kiloko i kome matwal i Cik Manyen dok ni pe tye gin mo ma moko ni kodi batija man otimme i kin Lukricitayo macon nyo i kanica mukene-ni ma kicakogi i nge to pa lukwena.

Baibul tittiwa ni lulub kor Yecu onongo myero ‘guciti gulok jo me rok ducu gudok jo ma lube, kun gibatijagi, gupwonygi me gwoko gin ducu ma dong en otyeko cikogi kwede.’ (Mat. 28:19, 20) Ma peya ngat moni odoko lapwonnye pa Yecu ma onongo batija, mitte ni en opwony lok i kom Jehovah kacel ki Wode, oyegi, dok obed lawiny botgi. Ngat ma onongo dong oto dok kiyiko woko pe twero timo meno; dok pe tye Lakricitayo mo makwo ma twero timo meno pire.​—Latit. 9:5, 10; Jon 4:1; 1 Kor. 1:14-16.

Gin ango dong ma onongo Paulo tye ka lok iye?

Jo mogo i Korint onongo gikwero woko ni nicer pe bitimme. (1 Kor. 15:12) Paulo onyutigi ni tamgi meno onongo pe tye ada. En otimo meno nining? En owaco ni ‘ekemme ki to nino ducu.’ Ngene kene ni, en onongo gire pud tye kwo. En otito ni onongo ekemme ki jami ma keto kwone ka mading nino ducu ento ni etye ki gen matek ni i nge to onongo kibicere me kwo i polo macalo cwec me cwiny, kit macalo Yecu bene kicere.​—1 Kor. 15:30-32, 42-44.

Onongo mitte ni jo ma i Korint guniang ni bedo Lukricitayo ma kiwirogi tyen lokke ni nino ducu gibikemme ki atematema dok onongo gibito ma peya kicerogi. Pi meno, i kare ma ‘gityeko batijagi me donyo i Kricito’ onongo dong ‘gibatijagi me donyo i tone.’ (Rom. 6:3) Man tyen lokke ni, calo Yecu onongo gibikato ki i pekki mapol dok gibito wek kicergi me kwo i polo.

Mwaki makato aryo i nge batija pa Yecu i pii, en otito bot lukwenane aryo ni: “Kit batija ma an abibatija kwede-ni, wun bene gibibatijawu kwede.” (Mar. 10:38, 39) Kany Yecu onongo pe tye ka lok i kom batija i pii. Me ka meno, en onongo tye ka lok i kom batija ‘me donyo i to.’ Yecu onongo tye ka tito ni gwoko gennene onongo biweko eto. Paulo ocoyo ni Lukricitayo ma kiwirogi onongo ‘gibiciro can kacel kwede, wek bene gilim deyo kacel kwede.’ (Rom. 8:16, 17; 2 Kor. 4:17) Pi meno, onongo myero gugwok gennegi wa i to wek kicergi me kwo i polo.

Pi meno, lok pa Paulo-ni onongo kitwero gonyone ni: “Ka jo muto pe gibicer, ci dong jo ma gibatijagi pi to gibibedo nining? Ka ce cero jo muto pe tye kadi ki acel, pingo kono dok kitye ka batijagi kit meno?”