Jehovah otito ki Luicrael ni omyero gubed jo maleng. Me konyogi timo meno, en owaccigi ni: “Pe ibed ka wirre i kin lutuwu ka kwoto nyinggi, pe ikel lok mo ma kelo to i kom lawoti; an a Rwot [Jehovah].”—Levi 19:2, 16.

I leb Ibru, lok man ni “pe ikel lok mo ma kelo to i kom lawoti” atir atir kwanne ni “pe icung i kom remo pa lawoti.” Lok man ni “cung i kom” tyen lokke ngo? Buk mo pa Lujudaya ma loko i kom buk pa Lulevi owaco ni: “But tyeng man . . . niang iye pe yot pien tek adada me niang kit ma lok man ni ‘cung i kom, nyo i wi, nyo i ka nget’ i leb Ibru gonye kwede.”

Ludiro mogo gitamo ni lok man kubbe ki tyeng me 15 ma waco ni: “Pe wungol kop alenga; pe idwor kor lacan, pe idwor dano madit, ento ngol kop atir i kom lawoti.” (Levi 19:15) Ka tye kit meno, ci cik ma nonge i tyeng me 16 ma waco ni pe omyero ‘icung i kom remo’ pa ngat mo, tyen lokke tye ni jo pa Lubanga onongo myero pe gukel lok goba i kom lawotgi mo i lok me kot, i biacara, nyo i lok me ot. Dok Laicrael onongo myero pe otim gin mo keken ma pe nyuto gen me wek en onong adwogi maber pire kene. Tye lok ada ni, omyero pe watimu jami magi, ento tye yo mayot me niang lok ma tye i tyeng me 16.

Nen kong acakki me tyeng me 16. Tye lok ada ni ka ngat mo okwoto nying ngat mukene, ci man twero kelo peko. Ento ka ngat mo obalo nying ngat mukene, ci meno rac ma loyo. (Car. 10:19; Latit. 10:12-14; 1 Tem. 5:11-15; Yak. 3:6) Labal nying pol kare waco lok ma en ngeyo ni tye lok goba akaka me balo nying ngat mukene. Labal nying man twero miyo caden me goba i kot i kom ngat mukene kadi bed timo meno twero keto kwo pa ngat meno ka mading. Wi opo ni co ma lubal nying gumiyo caden goba i kom Nabot, dok man oweko kicele ki got wa i to labongo bal mo. (1 Luker 21:8-13) Dong kit ma kitito kwede i bute me aryo me Lulevi 19:16, labal nying onongo twero cung i kom remo pa lawote ki timo gin ma kelo to pa ngat meno.

Medo i kom meno, ngat mo onongo twero balo nying ngat mukene pien en dag ngat meno. I 1 Jon 3:15, wakwano ni: “Ngat ma dag ominne meno lanek, dok bene wungeyo ni, pe tye lanek mo ma kwo ma pe tum bedo i iye.” Dok bene, i nge Lubanga waco ni, “Pe ikel lok mo ma kelo to i kom lawoti,” en omedo ni: “Pe ikwer omeru ki i cwinyi.”—Levi 19:17.

Dong cik man ma kite dok pat ma tye i Lulevi 19:16 miyo tira magwar bot Lukricitayo. Omyero wakwer tam maraco ducu dok pe wabal nying ngat mo. Ka “wacung i kom remo” pa ngat mo, ma meno tyen lokke ni wabalo nyinge pien pe wamare, nyo nyeko omakowa i kome, ci man nyuto ka maleng ni wadage. Lukricitayo omyero gugwokke ki dago ngat mo keken.—Mat. 12:36, 37.