1-2. I yo ma nining ma lunyodo myero gudok kwede iye ka latingi openyo lapeny?

 JO MAPOL giye ni gwoko ki pwonyo lutino obedo tic matek adada. Ka ce ibedo lanyodo, ci labongo akalakala mo itye ka tute matek me konyo latinni me dongo niye matek, dok man yomo cwiny Jehovah. (Nwo. 6:​6, 7) Ka latinni woto ki dongo, ci en twero cako bedo ki lapeny mogo ma pigi tego madok i kom niyewa. Me labolle, lapeny calo pingo Jehovah pe ye ni watim jami mogo.

² Itwero tamo ni latinni tye ka penyo lapeny magi pien pe tye ki niye matek i kom Lubanga ki Baibul. (1 Kor. 13:11) Ka meno otimme, pe omyero ibed ki lworo. Ka latinni openyo lapeny, ci itwero tic ki kare meno me konye me pwonyo kit me tam matut wek ojing niyene i kom Lubanga ki Baibul.

3. Gin ango ma wabinyamo i pwony man?

³ I pwony man, wabinyamo kit ma lunyodo gitwero konyo kwede latingi nyo lutinogi me dongo niye matek i kom Lubanga ki Baibul, me niang pingo lubo gin ma Baibul waco ni tye atir nyo rac ber pigi, ki dong kit me tito pi niyegi bot jo mukene.

KONY LATINNI ME DONGO NIYE MATEK I KOM LUBANGA KI BAIBUL

4. Lapeny mene ma latinni romo bedo kwede, dok pingo?

⁴ Latinni pe bibedo ki niye i kom Lubanga pien ni in lanyodone itye ki niye matek i kom Lubanga. In bene pe kinywali ma itye ki niye i kom Jehovah. Dok kadi wa latinni bene tye  kit meno. Dong, en twero cako penyi ki lapeny mogo calo: ‘Atwero ngeyo nining ni Lubanga tye ada? Tika atwero ye i kom gin ma Baibul waco?’ Ki lok ada, Baibul cuko cwinywa me tic ki “kerowa me tam” dok ni omyero wabed ki “wang mabit me neno jami ducu.” (Rom. 12:​1, NWT; 1 Tec. 5:21) Dong, itwero konyo latinni me dongo niye matek nining?

5. Gin ango ma lunyodo gitwero timo me konyo lutinogi dongo niye i kom Baibul? (Jo Roma 12:2)

⁵ Cuk cwiny latinni me timo kwed wek okonye me niang lok me Baibul. (Kwan Jo Roma 12:2.) Ka latinni openyo lapeny, ci ti ki kare meno me nyutte kit me nongo lagam kun tiyo ki jami me kwedo lok, calo Watch Tower Publications Index kacel ki Buk ma Konyo Lucaden pa Jehovah me Kwedo Lok. I jami me kwedo lok me aryo-ni, i te wi lok ma waco ni “Baibul,” latinni twero neno bute ma wiye tye ni “Lubanga Aye Omiyo Kicoyo” me konye nongo jami ma moko ni Baibul pe obedo mere buk maber ma dano aye ocoyo. Me ka meno, Baibul obedo “lok pa Lubanga.” (1 Tec. 2:13) Me labolle, latinni bene twero timo kwed i bukkewa me pwonyo lok mapol madok i kom boma macon me Nineve pa jo Acira. I kare mukato, lukwan mogo onongo giwaco ni boma me Nineve yam pe obedo tye. Ento i kine ka mwaka 1850, lugol jami ma i te ngom gunongo boma me Nineve i te ngom, ma meno onyuto ka maleng ni Baibul tye kakare. (Jep. 2:​13-15) Pi ngec mukene i kom kit ma jwero boma me Nineve ocobo kwede lok pa lunebi me Baibul, latinni twero neno pwony ma wiye tye ni “Tika Onongo Ingeyo?” i Wi Lubele me Novemba 2021. Cuk cwiny latinni me poro gin ma bukkewa waco ki gin ma bukke mukene me kwedo lok ma gigenne waco. Man bikonyo latinni me ye ni lok me Baibul tye kakare.

6. Lunyodo giromo konyo lutinogi nining me nongo lanyut ma moko ni Baibul tye kakare? Mi labol. (Nen bene cal.)

⁶ Kony latinni me neno lanyut ma moko ni Baibul tye kakare. Yeny kare me lok ki latinni i kom Baibul nyo niye i kom Lubanga. Wuromo nongo kare ma kit meno ka wucito ka limo ka ma kigwoko iye jami mogo me kare macon, ka namo ma tye ki ginapita mapatpat, nyo jang gang kal mo pa Lucaden pa Jehovah. Me labolle, ka wucito ka limo ka ma kigwoko iye jami mogo me kare macon, nyo wutye ka neno ki i Intanet nyo ki i bukkewa, itwero nyuto ki latinni kit ma gin mo nyo jami mutimme i kare mukato kubbe kwede ki Baibul. Gwok nyo itwero pwonyo latinni lok i kom Kidi me  Moab. Kidi man dong orii pi mwaki ma romo 3,000 dok nying Jehovah tye iye. Kidi man tye nonge i ka gwoko jami me kare macon ma kilwongo ni Louvre Museum i boma me Paris, i lobo France. Medo i kom meno, kopi me Kidi me Moab tye nonge i ka gwoko jami macon ma kilwongo ni “Baibul ki Nying Lubanga” i gang kalwa madit i Warwick, New York. Kidi me Moab waco ni Kabaka Meca me Moab ojemo woko i kom Icrael. Meno rwatte ki gin ma Baibul waco. (2 Luker 3:​4, 5) Ka latinni oneno ki wange lanyut ma moko ni lok me Baibul tye kakare, ci niyene bijing bedo matek.—Por ki 2 Tekwaro 9:6.

7-8. (a) Pwony ango ma waromo nongone ki i jami me aura ma waneno ki i cwec? Mi labol mogo. (Nen bene cal.) (b) Lapeny mene ma twero konyo latinni me jingo niyene i kom Lacwec?

⁷ Cuk cwiny latinni me tam matut i kom cwec me aura pa Jehovah. Ka wutye ka wot i caro nyo ka tic i poto, kony latinni me neno kit ma jami ma i kom cwec mogo kicanogi kwede kun bedo ka nwone kore ki kore. Kit ma jami magi onwone kwede nyuto ni Lacwec maryek adada aye oyubogi. Me labolle, tye jami mapol i cwec ma ka gitye ka dongo, gicako ki lwore matidi ci giwoto ki yare doko madit. Pi mwaki mapol, lucayan gukwano lok matut i kom cwec ma gidongo lwore alwora. Lacayan mo ma nyinge Nicola Fameli, otito ni ka ikwano wel lain ma lwore i kom cwec moni, ci ibinongo ni bedo ka nwoyo namba mogo ma gilubbe aluba. Namba magi kilwongogi ni Fibonacci sequence. Tye jami mapol ma gicanne i lain kun gilwore alwora calo, lakalatwe ma i yogo, pok okoro, pot yadi mogo, ki wi canpulowa. a

⁸ I gang kwan, latinni oromo pwonyo lok i kom cwec mukene ma gicanne kun gibedo ka nwone teretere. Me labolle, tam kong i kom kit ma pol pa yadi gidongo kwede. Tyen yat madit pokke doko jange mapatpat, ci jange karre doko jange matinotino, ci bedo ka medde kit meno. Kit ma gin moni bedo ka nwone teretere kilwongo ni, fractal pattern. Tye cwec mapol ma dul komgi bedo ka nwone teretere kit meno. Ento anga ma oyubo jami i yo mamwonya kit meno? Ka latinni otamo matut i kom jami me aura ma Jehovah ocweyo, ci man twero konye me dongo niye matek. (Ibru 3:4) Ka latinni woto ki teggi, mitte ni ikonye me niang pingo pire tek me lubo cik pa Lubanga. Me timo meno, iromo penye ni, “Ka Lubanga aye ma ocweyowa, tika itamo ni en ngeyo yo me kwo maber loyo piwa wek wabed ki yomcwiny?” Ci itwero tite ni Lubanga ominiwa Baibul me nyutiwa kit me bedo ki yomcwiny.

 KONY LATINNI ME DONGO PWOC PI RWOM ME KIT MA ATIR ME BAIBUL

9. Pingo latinni twero penyo lapeny i kom jami mogo ma Baibul waco ni rac?

⁹ I kare mogo, latinni twero penyo lapeny i kom jami mogo ma Baibul waco ni rac. Tute me niang pingo latinni tye ka penyo lapeny magi. Tika en pe ye gin ma Baibul waco ni tye ada? Nyo mono en pe ngeyo kit me tito pi niyene bot jo mukene? Pire tek ni ikony latinni me niang pingo lubo cik pa Jehovah ber pire. Me timo meno, itwero kwano kwede buk me Bed ki Kwo Maber Nakanaka! b

10. Iromo konyo latinni nining me tam i kom watte ki Jehovah?

¹⁰ Kony latinni me bedo ki miti me nyiko cok bot Jehovah. Ka iwoto ki kwano Baibul ki latinni, ti ki lapeny ma golo tam kacel ki lapor ma kitiyo kwedgi i buk me Bed ki Kwo Maber Nakanaka! me niang kit ma en winyo kwede i kom jami mapatpat. (Car. 20:5) Me labolle, pwony me 8 poro Jehovah ki larem ma lamar ma poyo wiwa i kom jami ma twero gwokowa dok keliwa adwogi maber. I nge nyamo 1 Jon 5:​3, itwero penyo latinni ni, “Kit macalo wangeyo ni Jehovah obedo Larem maber, omyero wawiny nining i kom jami ma en mito ni watim?” Meno twero nen calo lapeny mayot ento romo konyo latinni me neno cik pa Lubanga macalo lanyut me Marre.—Ic. 48:​17, 18.

11. Iromo konyo latinni nining me bedo ki miti me lubo gin ma Baibul pwonyo? (Carolok 2:​10, 11)

¹¹ Wunyam kacel adwogi mabeco ma wanongo ka waketo i tic gin ma Baibul pwonyo. Ka wutye ka kwano Baibul nyo ginacoya me nino moni kacel, wunyam kit ma cik ma igi lac me Baibul okonyo kwede lupacowu. Me labolle, itwero tic ki kare meno me neno ber pa bedo ngat ma latic matek dok ma loko lok ada i kare ducu. (Ibru 13:18) Itwero bene tito kit ma lubo tam ma Baibul miyo konyowa me bedo ma komwa yot dok ma cwinywa yom. (Car. 14:​29, 30) Nyamo lok ma kit meno bikonyo latinni me bedo ki miti me keto i tic gin ma Baibul pwonyo.—Kwan Carolok 2:​10, 11.

12. Omego Steve kacel ki dakone gikonyo latingi nining me niang adwogi mabeco ma bino pi lubo cik ma igi lac me Baibul?

¹² Wego mo ma bedo i lobo France ma nyinge Steve, tye ki wode ma nyinge Ethan ma tye ki mwaka 16. Steve otito kit ma en ki dakone gitute kwede me konyo Ethan me niang ni Jehovah ominiwa cik pien en marowa. Steve owaco ni: “Wapenye ki lapeny calo magi, ‘Pingo Jehovah mito ni walub cik man? Man nyuto nining ni en marowa? Ngo ma twero timme ka wakwero lubo cik ma iye lac man?’” Nyamo lok ma kit meno okonyo Ethan me dongo niye matek ni gin ma Jehovah waco tye atir. Steve omedo ni: “Yubwa tye me konyo Ethan me neno ni Baibul tye ki ryeko ma lamal loyo ryeko pa dano.”

13. Lunywal gitwero pwonyo lutinogi me keto tira me Baibul i tic nining? Mi labol.

¹³ Pwony latinni me keto cik ma igi lac me Baibul i tic. Me labolle, ket kong ni lapwony omiyo ki latinni buk mo ma myero en okwan ci olok iye i kilaci. Twero bedo ni jo ma kiloko i komgi i buk man gitimo jami ma Jehovah waco ni rac, calo tim gero ki tim tarwang. Dok kicoyo buk man i yo ma nyuto ni jami magi pe rac. Itwero penyo latinni me tam i kom kit ma Jehovah winyo kwede i kom jo ma timo tim magi. (Car. 22:​24, 25; 1 Kor. 15:33; Pil. 4:8) Man romo konyo latinni me neno pingo nyuto  ryeko me bedo lawiny bot Jehovah. Dok ka lapwony nyo lutino kwan gupenyo tamme i kom buk man, en bibedo atera me nywako niyene.

PWONY LATINNI KIT ME TITO PI NIYENE BOT JO MUKENE

14. Pwony mene ma twero bedo tek adada pi ngat matidi me nywakone ki jo mukene, dok pingo?

¹⁴ Lukricitayo matino i kare mukene gibedo ki lworo me tito pi niyegi bot jo mukene. Me labolle, ka kitye ka lok i kom pwony ni kwo ocakke pire kene, giromo bedo ki lworo me tito ni pe giye i kom pwony man. Pingo? Pien lupwonyegi giwaco ni pwony man tye ada. Ka in lanyodo, itwero konyo latinni nining me bedo ki tekcwiny me tito pi niyene?

15. Gin ango ma twero konyo Lakricitayo matidi me bedo ki tekcwiny i kom niyene?

¹⁵ Kony latinni me bedo ki tekcwiny i kom jami ma en ye iye. Pe mitte ni lewic omak latinni pien en ye ni Lacwec tye. (2 Tem. 1:8) Kadi wa lucayan mapol bene giye ni jami makwo pe gucako bedo kwo pigi kengi. Lucayan magi gineno lanyut ma moko ni Ngat mo maryek aye ocweyo jami makwo ducu. Macalo adwogine, pe giye pwony ni kwo ocakke pire kene ma kipwonyo i pol pa cukul ma i wi lobo-ni. Gin acel ma romo konyo latinni me jingo niyene kacel ki tekcwinye, aye me niang tyen lok mumiyo omege ki lumege mukene gumoko ni kwo kicweyo acweya. c

16. Lunyodo giromo konyo latingi nining me tito pi niyene i kom Lacwec? (1 Petero 3:15) (Nen bene cal.)

¹⁶ Pwony latinni kit me tito pi niyene i kom Lacwec. (Kwan 1 Petero 3:15.) Itwero nongo ni tye me kony me nyamo kacel pwony mogo. Me labolle, yeny ki i jw.org pwony ma lubbe aluba ma wiye tye ni “Lapeny pa Jo Matino—Kwo Ocakke Pire Kene nyo Kicweyo Acweya?” Ci latinni romo yero yo me nyamo lok ma en tamo ni bikonyo jo mukene me niang ni Lacwec tye. Wek latinni opor kit me titone kacel kwedi. Po wiye ni pe mitte ni en olar lok ki lutino kwan luwote. Cuk cwinye me tito lok i yo ma niang iye yot ka ngat mo tye ki miti me nyamo lok man. Me labolle, latin kwan lawote romo waco ni: “An aye i kom jami ma aneno ki wanga keken, dok peya aneno Lubanga.”  Lakricitayo matidi twero dok iye ni: “Go kong ni itye ka wot i dye bunga mo ma tye ka mabor ata ki taun mo keken ci inongo ot mo maleng iye. Tam ango ma ibibedo kwede? Ngene kene ni ngat mo ogero ot meno. Meno tye ada ka odok i kom lobowa kacel ki jami makwo ducu bene. Ngat mo aye ma ocweyogi!”

17. Lunyodo giromo cuko cwiny lutinogi nining me yenyo kare me pwonyo jo mukene lok i kom Baibul. Mi labol.

¹⁷ Cuk cwiny latinni me yenyo kare me nywako ki jo mukene lok me Baibul. (Rom. 10:10) Iromo poro nywako ki jo mukene lok me Baibul ki pwonyo kit me goyo adungu. I acakkine, ngat ma tye ka pwonyo goyo adungu-ni cako ki pwonyo goyo wer mayot. Ka kare woto ki kato, goyo adungu doko gin mayot bote. I yo acel-lu, Lakricitayo ma pud tidi twero cako ki tito kwena i yo mayot. Me labolle, en twero penyo latin kwan lawote ni: “Tika onongo ingeyo ni lucayan pol kare giyubo jami kun giporo gin ma guneno ki i kom cwec? Wek kong anyutti vidio mo mamit.” I nge nyutte vidio mo ki i kin vidio ma katti kare ki kare ma wiye tye ni Kiyubo Mono Ayuba? en twero waco ni: “Ka lucayan ginongo pwoc pi poro jami ma tye i cwec, ci dong anga ma omyero wapwo pi yubo cwec magi?” Nywako lok ma kit man twero tugo cwiny latin kwan lawote me cako pwonyo lok mapol i kom Jehovah.

MEDDE KI KONYO LATINNI ME JINGO NIYENE

18. Lunyodo gitwero medde ki konyo lutinogi me jingo niyegi i kom Lubanga nining?

¹⁸ Wakwo i lobo ma opong ki jo ma gipe ki niye i kom Jehovah. (2 Pet. 3:3) Pi meno, wun lunyodo, ka wuwoto ki kwano Baibul ki lutinowu, wucuk cwinygi me kwano pwony mogo ma bikonyogi me dongo pwoc pi Lok pa Lubanga kacel ki rwomme me kit ma atir. Kony latinni me tam matut ki me jingo niyene i kom Jehovah kun nongo wuloko i kom cwec pa Jehovah kacel. Konye me niang lok pa lunebi mogo me Baibul ma dong otyeko cobbe woko. Ma dong pire tek loyo ducu, leg kacel ki latinni dok ileg pire bene. Ka itimo meno, ci itwero bedo ki gen ni Jehovah bigoyo laane i kom tuteni me konyo latinni wek ojing niyene.—2 Tekwaro 15:7.