Lakwena Paulo ocoyo bot laelda lawote Temceo ni: “Aciki i nyim Lubanga ki Kricito Yecu ki lumalaika ma giyero, gwok cik magi ma pe ijenge i kom wat nyo larem.”—1 Tem. 5:21.

Mukwongo, kong wanenu angagi ma pe gubedo lumalaika ma giyerogi-ni. Nen ka maleng ni, pe gubedo jo 144,000. I kare ma Paulo ocoyo lok man bot Temceo, onongo pe tye ngat mo keken i kin jo ma kiwirogi ma kicero me cito i polo. Lukwena kacel ki jo mukene ma kiwirogi onongo peya gudoko cwec me cwiny, pi meno onongo pe gitwero bedo “lumalaika ma giyero.”—1 Kor. 15:​50-54; 1 Tec. 4:​13-17; 1 Jon 3:2.

Medo i kom meno, “lumalaika ma giyero” onongo pe gitwero bedo lumalaika ma yam gujemo i kare me Pii Aluka. Lumalaika magi gulubo kor Catan ci gudoko jogi, dok gubedo lumone pa Yecu. (Acak. 6:2; Luka 8:​30, 31; 2 Pet. 2:4) I anyim, Yecu bibologi i bur ma tere pe gik, ka ma gibibedo iye pi mwaki 1,000. I nge meno, kibijwerogi kacel ki Catan.—Juda 6; Yabo 20:​1-3, 10.

“Lumalaika ma giyero” ma Paulo oloko i komgi nen calo gubedo lumalaika ma gitye i polo ma gicwako “Lubanga ki Kricito Yecu,” ma bene kiloko i komgi i tyeng acel meno.

Tye lumalaika ma lugen alip mapol adada. (Ibru 12:​22, 23) Pe omyero watam ni gin ducu gitimo tic acel keken. (Yabo 14:​17, 18) Me labolle, Jehovah ocwalo lamalaika acel keken me neko mony me Aciria ma welgi romo 185,000. (2 Luker 19:35) Ento nen calo kimiyo ki lumalaika mapol tic me coko “ki i te kerre [Yecu] gin ducu ma miyo dano gipoto i bal, kacel ki jo ducu ma gin lutim maraco.” (Mat. 13:​39-41) Lumalaika mukene kiromo tic kwedgi me ‘coko jone ma en oyero’ me terogi i polo. (Mat. 24:31) Dok mukene kimiyogi tic me ‘gwokowa ka ma wawoto iye ducu.’—Jab. 91:11; Mat. 18:10; por ki Matayo 4:11; Luka 22:43.

“Lumalaika ma giyero” ma kiloko i komgi i 1 Temceo 5:21 oromo bedo ni gubedo lumalaika ma kiminigi tic me konyo gwoko kacokke. I lok ma orumo tyeng man, Paulo omiyo tira bot luelda i kom kit me cobo ticgi, dok ni jo me kacokke myero gunyut woro bot luelda. Luelda myero gucob ticgi ‘labongo dworo kor wat nyo larem’ dok omyero pe gurune ka moko tam labongo kong lwodone matut. I nge meno, Paulo ominigi tyen lok ma pire tek me lubo tirane meno. En owaco ni luelda gitye ka tic “i nyim Lubanga ki Kricito Yecu ki lumalaika ma giyero.” Meno tyen lokke ni Jehovah, Yecu, ki lumalaika gitye ka neno kit ma luelda gicobo kwede ticgi me gwoko kacokke. Dong, nen ka maleng ni tye lumalaika mukene ma kiminigi tic me konyo kacokke. I kin ticgi, tye iye gwoko lutic pa Lubanga, doro tic me pwony, ki miyo ripot bot Jehovah i kom jami ma gineno.—Mat. 18:10; Yabo 14:6.