Tika iketo cwinyi ka kwano Wi Lubele ducu me mwaka-ni? Ka kumeno, nen kong ka itwero gamo lapeny magi:

Lanen ango ma Jehovah oweko ka odok i kom kit me tero mon?

En tero dano ducu labongo apokapoka mo, kadi ibedo laco nyo dako. Lubanga winyo lega pa mon, dok paro pi kit ma giwinyo kwede. Dok en ominigi tic ma pire tek me atima.—w24.01, pot 15-16.

Watwero keto i tic nining lok ma tye i Jo Epeco 5:​7, ma waco ni: “Pe wuribbe kwedgi”?

Lakwena Paulo onongo tye ka cikowa pe me bedo ka ribbe ki jo ma weko doko tek botwa me lubo rwom ma atir pa Lubanga. Jo meno twero bedo dano ma waribbe kwedgi wang ki wang nyo ki i Intanet.—w24.03, pot 22-23.

Lok goba twero o botwa nining?

Omyero wagwokke ki lok ma pe wamoko ka tye ada kadi bed oa ki bot laremwa, email mua ki bot ngat mo ma pe wangeyo, kacel ki bot jo mungak.—w24.04, pot 12.

Gin ango ma wangeyo ki ma pe wageyo ka odok i kom kit ma Jehovah bingolo kwede kop i kom Kabaka Solomon, jo ma guto i Codom ki Gomora, kacel ki jo ma guto i Pii Aluka?

Pe wangeyo labongo akalakala mo ka Jehovah dong ojwerogi woko matwal labongo gen mo me nicer. Ento wangeyo ni Jehovah ngeyo jami ducu mutimme dok en kicane dwong.—w24.05, pot 3-4.

Ka Baibul owaco ni Lubanga obedo “Got,” meno cuko cwinywa nining? (Nwo. 32:4)

Watwero nongo gwok ki bot Jehovah. En genne, dok kare ducu gwoko cikkene. Dok en pe lokke, kite kacel ki cikkene pe lokke.—w24.06, pot 26-28.

Iromo ngi nining ka ikobo i kacokke manyen?

Jenge i kom Jehovah, ci en bikonyi kit ma okonyo kwede luticce i kare mukato angec. Pe ibed ka poro kacokkeni manyen ki macon. Nywak i tic kacel ki kacokkeni manyen, dok itute matek me mako lirem manyen.—w24.07, pot 26-28.

Pwony ango ma nonge i carolok adek ma tye i Matayo cura 25?

Carolok i kom romi ki dyegi pwonyowa ni omyero wabed lugen. Carolok i kom anyira maryek ki anyira ma luming pwonyowa ni omyero wabed ma wayubbe dok ma wangwa twolo. Dok carolok i kom lim pwonyowa ni pire tek ni wati matek dok wacob ticwa kore ki kore.—w24.09, pot 20-24.

Kicika ma i doggola me donyo me ot pa Lubanga ma Solomon ogero, onongo bor lakwene?

Coc mogo me kare macon ma kicoyo ki cing i 2 Tekwaro 3:4 kwanne ni ‘kubit 120,’ ma meno tyen lokke ni borre malo tye mita 53 (futi 175) kulu. Ento coc mukene kwanne ni “kubit 20,” ma meno nyuto ni borre malo tye mita abongwen (futi 30). Lok me aryo-ni rwatte ki kit ma kor ot man onongo kinong kwede.—w24.10, pot 31.

Tyen lokke ngo ka kiwaco ni lakony kor tic ‘myero obed ki dako acel’? (1 Tem. 3:12)

Tyen lokke ni en myero onyom dako acel dok pe obed ka timo tim tarwang. Medo i kom meno, en pe myero obed ka neno mon mukene ki wang me miti.—w24.11, pot 19.

Pingo watwero waco ni lok ma nonge i Jon 6:53 pe tito kit ma omyero kikwer kwede Cam me Otyeno pa Rwotwa?

Jon 6:53 loko i kom kit ma pire tek kwede me camo kom Yecu ki mato remone. Yecu owaco lok meno i mwaka 32 K.M., i Galilaya, bot Lujudaya ma onongo pud mitte ni guket niye i kome. Ki tungcel, Yecu ocako kwer me Cam me Otyeno pa Rwotwa i Jerucalem mwaka acel i nge waco lok meno. Ki i kwer man, Yecu oloko ki lukwenane ma onongo gibiloc kacel kwede i polo.—w24.12, pot 10-11.