1-2. Pingo Jehovah oyabo yo piwa me doko jo me ode dok otimo man nining?

JEHOVAH olwongowa me bedo i kin jo me ode ma giwore. Man pud dong lwongo mamwonya ya! I kin jo me ode, tye iye jo ma gudyero kwogi bot Lubanga dok giketo niyegi i kom ginkok pa Wode. Watye jo me ot ma cwinygi yom. Watye ki tyen lok me kwo kombeddi, dok cwinywa yom pien watye ki gen me kwo pi naka​—kadi bed i polo nyo i Paradic i lobo kany.

² Jehovah oyabo yo piwa me doko jo me ode pien en marowa matek. Ento me timo meno, Jehovah ojalo gin mo ma pire tek adada. (Jon 3:16) ‘Giwilowa awila ki wel.’ (1 Kor. 6:20) Jehovah oweko twere botwa me bedo ki wat macok kwede kun tiyo ki ginkok. Watye ki mot me lwongo Ngat ma pire tek loyo i polo ki lobo ni Wonwa. Dok, kit ma waneno kwede i pwony mukato-ni, Jehovah aye Wego maber loyo.

3. Lapeny ango ma watwero penyone? (Nen bene bok ma wiye tye ni “Tika Jehovah Keto Cwinye i Koma?”)

³ Calo laco Baibul acel, wan bene watwero pennye kekenwa ni: “Abimiyo gin ango bot Rwot [Jehovah] pi gin maber ducu ma en otiyo pira?” (Jab. 116:12) Lagamme tye ni pe tye gin mo ma watwero timo me culo Wonwa me polo. Kadi bed kit meno, marre piwa tugo cwinywa me mare bene. Lakwena Jon ocoyo ni: “Gin mumiyo wabedo ki mar, pien en okwongo marowa.” (1 Jon 4:19) I yo  mapatpat ango ma waromo nyuto bot Wonwa me polo ni wamare?

4. Ma lubbe ki Yakobo 4:8, pingo omyero watute me nyiko cok ki Jehovah?

⁴ Jehovah mito ni wanyikke cok kwede dok wabed ka lok kwede. (Kwan Yakobo 4:8.) En cuko cwinywa ni omyero ‘wamine kenwa i lega ki cwinywa ducu,’ dok en tye atera me winyo legawa kare ducu. (Rom. 12:12) Tic mapol ma en tye kwede pe genge winyo legawa. Ki tungcel, wawinye ka wakwano Lokke kacel ki bukke mukene ma konyowa me niang Baibul. Wawinye bene ka waketo cwinywa ka winyo lok i cokkewa. Kit macalo lok kare ki kare i kin lutino ki lunyodogi weko kingi bedo cok, kubbe ki Jehovah kare ki kare bene konyowa me bedo cok kwede.

5. Watwero weko legawa bedo ma yomo cwiny Jehovah nining?

⁵ Tam kong i kom kit ma legani bot Lubanga tye kwede. Jehovah mito ni wayab cwinywa bote i lega. (Jab. 62:8) Bedo ber ka wapennye ki lapeny man: ‘Tika legana tye calo kwena mo ma kibedo ka rudone i printa kare ducu, nyo calo waraga ma acoyo ki cinga kun lokke a ki i cwinya?’ Labongo akalakala mo in imaro Jehovah, dok imito ni igwok watti kwede wek obed matek. Me timo meno, mitte ni ibed ka lok kwede kare ki kare. Tite gin ma tye i cwinyi. Nywak kwede gin ma yomo cwinyi ki par ma itye kwede. Bed ki gen ni itwero penyo pi kony ki bote.

6. Ngo ma omyero watim wek wabed cok ki Wonwa me polo?

⁶ Wek wabed cok ki Wonwa me polo, myero wabed ki cwiny me pwoc kare ducu. Waye lok pa laco jabuli ma ocoyo ni: “Ai Rwot Lubangana, itiyo tic madito me aura mapol, dok iyubo lwak tam mapol pi konyowa; pe tye ngat mo macalo in! Ka onongo nene atuc dok atit pigi, onongo gibedo pol makato ma pe gitwero kwano welgi.” (Jab. 40:5) Pe wawinyo pwoc man ki i cwinywa keken; ento bene wanyuto i lokwa kacel ki ticwa. Man weko wabedo pat ki jo mapol me kare-ni. Wakwo i lobo ma pol pa danone pe gipwoyo gin mo keken ma Lubanga timo pigi. Ki lok ada, gin acel ma nyuto ni watye ka kwo “i kare me agikki” aye ni dano pe gimiyo pwoc mo. (2 Tem. 3:1, 2) Pe omyero wadong kodi cwiny meno!

7. Gin ango ma Jehovah mito ni watim, dok pingo?

⁷ Lunyodo pe gimito ni lutinogi gubed ka daa i kingi ento gubed lurem. I yo acel-lu, Jehovah bene mito ni lutinone ducu gubed lurem. Ki lok ada, mar ma watye kwede i kinwa aye nyuto ni wabedo Lukricitayo me ada. (Jon 13:35) Waye lok pa laco jabuli ma ocoyo ni: “Nen kit macalo bedo ber ki me yomcwiny ka omego gibedo kacel ki mer i kingi!” (Jab. 133:1) Ka wamaro omegiwa ki lumegiwa, wanyuto bot Jehovah ni wamare. (1 Jon 4:20) Watye ki yomcwiny me bedo i kin omege ki lumege ma gin ‘lukica dok gitye ki cwiny maber!’​—Ep. 4:32.

8. Ma lubbe ki 1 Jon 5:3, tyen lok ma pire tek loyo ma omiyo wawinyo Jehovah obedo ngo?

⁸ Jehovah mito ni lutino guwiny lunyodogi, dok en mito ni wawinye. (Ep. 6:1) Pore ni omyero wabed luwiny bote pien en Lacwecwa, Lagwok kwowa, dok wego maryek loyo ducu. Ento, tyen lok  ma pire tek loyo mumiyo wawinyo Jehovah aye pien wamare. (Kwan 1 Jon 5:3.) Kadi bed watye ki tyen lok mapol ma oweko omyero wawiny Jehovah, ento en pe diyowa me winye. Jehovah ominiwa mot me bedo agonya, dok cwinye bedo yom ka wayero me winye pien wamare.

9-10. Pingo pire tek me ngeyo cik pa Lubanga dok me kwo ma lubbe kwede?

⁹ Lunyodo gimito ni lutinogi pe gunong awano i yo mo. Meno aye tyen lok mumiyo giketo cik ma gwoko lutinogi. Ka lutino lubo cik magi, ginyuto ni gigeno lunywalgi dok giworogi. Dong pire tek loyo ni wange cik pa Wonwa me polo dok walubgi. Ka watimo meno, wanyuto bot Jehovah ni wamare dok wawore dok wan kikomwa bene wanongo adwogi maber. (Ic. 48:17, 18) Ki tungcel, jo ma gikwero Jehovah ki cikke gikelo awano i komgi kekengi.​—Gal. 6:7, 8.

¹⁰ Ka wakwo i yo ma yomo cwiny Jehovah, man gwokowa ki i kom jami ma twero wano komwa nyo balo watwa kwede. Jehovah ngeyo gin maber loyo piwa. Laminwa Aurora, ma bedo i lobo Amerika, owaco ni, “Angeyo ni winyo Jehovah kare ducu kelo kwo maber loyo.” Meno tye ada pi wan ducu. Adwogi maber ango ma in dong inongo ki i winyo Jehovah?

11. Lega konyowa nining?

¹¹ Lega konyowa me bedo luwiny, kadi wa i kare ma timo meno nongo tek.  I kare mukene, wanongo ni tek me winyo Jehovah pien wan ducu watye ki roc, ento omyero watute matek pe me turo cikke. Laco jabuli olego Lubanga ni: “Miya cwiny me lubo cikki wek acung matek.” (Jab. 51:12) Laminwa Denise, ma tye painia marii, owaco ni, “Ka anongo ni tek me lubo cik pa Jehovah mo, alego pi teko me timo gin ma atir.” Watwero bedo ki gen ni Jehovah bigamo lega ma kit meno.​—Luka 11:9-13.

12. Ma lubbe ki Jo Epeco 5:1, gin ango ma omyero watim?

¹² Kwan Jo Epeco 5:1. Macalo ‘lutino pa Jehovah ma en maro,’ watute matek me lubo kite. Walubo kite ka wan lukica, wanyuto mar dok watimo kica ki jo mukene. Ka jo ma pe gingeyo Lubanga guneno kitwa maber-ri, ci man twero tugo cwinygi me pwonyo lok i kome. (1 Pet. 2:12) Lunyodo ma Lukricitayo gitye ki tyen lok maber me lubo lanen pa Jehovah i kit ma gitero kwede lutinogi. Ka gutimo meno, lutinogi bibedo ki miti me mako larem ki Wonwa me polo ma lamar-ri.

13. Ngo ma omyero watim wek wadok jo ma cwinygi tek?

¹³ Latin matidi bedo ki awaka pi wonne dok cwinye bedo yom me lok i kome. Kit meno, wan bene watye ki awaka pi Wonwa me polo, Jehovah, dok wamito  ni jo mukene gunge en. Ki i cwinywa, wan ducu wawinyo calo Kabaka Daudi ma ocoyo ni: “Abiwakke pi Jehovah.” (Jab. 34:2; NW) Ento, ka wabedo jo ma lwor kono? Watwero dongo tekcwiny nining? Wadongo tekcwiny ka watamo i kom kit ma cwiny Jehovah bibedo yom kwede ka waloko i kome, ki kit ma jo mukene gibinongo kwede adwogi maber ki i pwonyo lok i kome. Jehovah biminiwa tekcwiny ma wamito. En okonyo Lukricitayo me cencwari me acel me dongo tekcwiny, dok en bikonyowa bene.​—1 Tec. 2:2.

14. Pingo pire tek me nywako i tic me loko dano wek gudok lulub kor Kricito?

¹⁴ Jehovah pe poko kin dano, dok cwinye bedo yom me neno ka wanyuto mar bot jo mukene labongo paro pi ka ma gia ki iye. (Tic 10:34, 35) Yo acel maber adada ma wanyuto kwede mar bot jo mukene aye ki nywako kwena maber-ri kwedgi. (Mat. 28:19, 20) Ngo ma tic man cobo? Jo ma giwinyo lokwa gitwero nongo adwogi maber i kare-ni dok gibedo ki gen me nongo kwo ma pe tum i anyim.​—1 Tem. 4:16.

15-16. Tyen lok ango ma watye kwede me bedo ki yomcwiny?

¹⁵ Jehovah obedo lanyodo ma lamar, pi meno en mito ni jo me ode gubed ma cwinygi yom. (Ic. 65:14) Watye ki tyen lok mapol me bedo ki yomcwiny i kare-ni, kadi bed watye ka kato ki i kwo matek. Me labolle, watye ki gen ni Wonwa me polo marowa matek. Watye ki ngec matir ma wanongo ki i Baibul. (Jer. 15:16) Dok watye i kin jo me ot ma gimaro Jehovah, gimaro rwomme me kit matir, dok gimaro luwotgi.​—Jab. 106:4, 5.

¹⁶ Watwero bedo ki yomcwiny i kare ducu pien wangeyo labongo akalakala mo ni kwo bibedo ber loyo i anyim. Wangeyo ni cokcok-ki Jehovah bijwero jo maraco ducu dok i te loc me Kerre kibiroco lobo doko Paradic. Watye bene ki gen ni jo ma guto kibicerogi dok gibiribbe ki jogi me amara odoco. (Jon 5:28, 29) Meno pud dong bibedo kare me yomcwiny ya! Dong ma pire tek loyo, watye ki gen ni cokcok-ki jo ducu ma gitye i polo ki lobo gibimiyo ki Wonwa me polo ma lamar-ri pak ki deyo ki woro ducu ma en opore me nongone.