1-2. Ma lubbe ki Matayo 5:11, omyero wanen atematema nining?

YECU owaco bot lulub kore ni gibibedo ki yomcwiny me ada ento bene ocikogi ni gibikato ki i atematema. (Mat. 10:22, 23; Luka 6:20-23) Cwinywa yom me bedo lupwonnye pa Kricito. Ento wawinyo nining ka lupacowa gutemo jukowa ki tic pi Jehovah, ka gamente tye ka unowa nyo ka lutic luwotwa nyo lutino kwan luwotwa gidiyowa me timo gin marac? Labongo akalakala mo, ka watamo i kom jami magi watwero bedo ki par mo.

² Dano pol kare pe gineno aunauna calo gin ma twero keligi yomcwiny. Ento, meno aye gin ma Lok pa Lubanga wacciwa ni omyero watim. Me labolle, lapwonnye Yakobo ocoyo ni, me ka weko par bwoyowa, omyero wabed ki yomcwiny ka watye ka kato ki i atematema. (Yak. 1:2, 12) Dok Yecu owaco ni omyero wabed ki yomcwiny ka kitye ka unowa. (Kwan Matayo 5:11.) Waromo bedo ki yomcwiny nining kadi bed watye ka kato ki i atematema? Watwero nongo pwony mapol ki i waraga pa Yakobo bot Lukricitayo me cencwari me acel. Mukwongo, kong wanenu ariya mogo ma Lukricitayo magi gukato ki iye.

3. Gin ango mutimme cutcut ma Yakobo odoko lapwonnye pa Yecu?

³ Cutcut ma Yakobo omin Yecu odoko lapwonnye, aunauna otugge magwar i kom Lukricitayo ma i Jerucalem. (Tic 1:14; 5:17, 18) Dok i kare ma kineko Citefano, Lukricitayo mapol guringo woko ki i boma man dok “guket woko ata i lobo ducu me Judaya ki Camaria,” lacen gucito  wa ka mabor calo Caiprac ki Antiokia. (Tic 7:58–8:1; 11:19) Watwero goyo i wiwa kwo matek ma lupwonnye magi gukato ki iye. Kadi bed kit meno, pud gumedde ki tito kwena maber-ri ka mo keken ma gucito iye dok gucako kacokke i kabedo mapol ma tye i te loc me Roma. (1 Pet. 1:1) Ento i nge meno pud dok gumedde ki kato ki i pekki mapol adada.

4. Pekki ango ma Lukricitayo me cencwari me acel gukato ki iye?

⁴ Lukricitayo me cencwari me acel gukato ki i atematema mapol. Me labolle, i kine ka mwaka 50 K.M., Laloc me Roma ma nyinge Kalaudio omiyo rukca ni Lujudaya ducu gua woko ki i Roma. Pi meno, Lujudaya ma onongo gudoko Lukricitayo guweko gangigi ci gukobo i kabedo mukene. (Tic 18:1-3) I kine ka mwaka 61 K.M., lakwena Paulo ocoyo ni dano guyeto utmegine i nyim lwak, kibologi i buc, dok kiyako jamigi bene. (Ibru 10:32-34) Dok calo jo mukene-ni, Lukricitayo bene gukanyo can kacel ki two.​—Rom. 15:26; Pil. 2:25-27.

5. Lapeny mene ma wabinyamogi i pwony man?

⁵ I kare ma Yakobo ocoyo waragane ma mwaka 62 K.M. peya oromo, en onongo ngeyo maber adada atematema ma utmegine gitye ka kato ki iye. Jehovah otiro Yakobo me coyo waraga man bot Lukricitayo magi wek ominigi tam ma onongo bikonyogi me bedo ki yomcwiny kadi bed gitye ka kato ki i pekki mapol. Kong dong wanyamu kacel waraga pa Yakobo dok wagam lapeny magi: Yomcwiny ango ma Yakobo ocoyo pire? Ngo ma twero weko Lakricitayo rwenyo yomcwiny man woko? Dok ryeko, niye, kacel ki tekcwiny twero konyowa nining  me gwoko yomcwinywa kadi bed watye ka kato ki i peko mo keken?

6. Ma lubbe ki Luka 6:22, 23, pingo Lakricitayo twero bedo ki yomcwiny ka tye ka kato ki i atematema?

⁶ Pol pa dano gitamo ni, wek gibed ki yomcwiny omyero gubed ma komgi yot, dok ki cente madwong, nyo kwo me ot maber. Ento yomcwiny ma Yakobo ocoyo pire-ni obedo but nyig ma nyak pi cwiny maleng dok pe jenge i kom kit kwo ma ngat moni tye kwede. (Gal. 5:22) Lakricitayo twero bedo ki yomcwiny man ka en ngeyo ni etye ka yomo cwiny Jehovah dok elubo lanen pa Yecu. (Kwan Luka 6:22, 23; Kol. 1:10, 11) Calo mac ma tye ka lyel i tara ma nongo kigengo woko ki i kom yamo nyo kot, wan bene watwero medde ki bedo ki yomcwiny kadi bed watye ka kato ki i kwo matek. Pe wabirwenyo yomcwinywa kadi komwa odoko lit nyo wape ki cente nyo kadi dano gingalowa nyo jo gangwa gidagwa. Yomcwinywa bimedde ameda ka jo mukene gitute me kwanyone woko. Atematema ma wakato ki iye pi niyewa moko ni wan lupwonnye pa Kricito. (Mat. 10:22; 24:9; Jon 15:20) Meno aye oweko Yakobo onongo twero coyo ni: “Utmegina, wubed ki yomcwiny madwong ka gitemowu i yo mapatpat.”​—Yak. 1:2.

7-8. Pingo niyewa jing doko matek ka wakato ki i atematema?

⁷ Yakobo dok otito tyen lok mukene ma oweko Lakricitayo tye atera me kato kadi ki i atematema matego. En owaco ni: “Temo niyewu miyo wudiyo cwinywu.” (Yak. 1:3) Kitwero poro atematema ki mac ma kitiyo kwede ka kitye ka teto pala. Ka kiwango leb pala man i mac malyet ci dok kiluto i pii mangic, nyonyone doko matek adada. I yo acel-lu, ka wakanyo atematema, niyewa jing doko matek. Meno aye oweko Yakobo ocoyo ni: “Wek diyo cwiny ocob ticce kakare, wek wubed jo muteggi, ma roc mo pe i komwu.” (Yak. 1:4) Ka waniang ni atematema ma wakato ki iye weko niyewa jing doko matek, ci watwero kanyogi ki yomcwiny.

⁸ I waragane, Yakobo bene onyuto ariya mogo ma twero weko warwenyo yomcwinywa woko. Ariya magi gubedo ngo, dok watwero loyogi nining?

9. Pingo wamito ryeko?

⁹ Ariya: Ka pe wangeyo gin ma myero watim. Ka watye ka kato ki i atematema, wamito ni wanong kony ki bot Jehovah  wek wamok tam ma yomo cwinye, ma kelo adwogi maber bot utmege, dok ma konyowa me gwoko gennewa bot Jehovah. (Jer. 10:23) Mitte ni wabed ki ryeko me ngeyo gin ma myero watim ki gin ma omyero wawac bot jo ma giunowa. Cwinywa twero tur pien pe wangeyo gin ma omyero watim, dok man romo rwenyo yomcwinywa woko oyotoyot.

10. Wek wabed ki ryeko, Yakobo 1:5 wacciwa ni omyero watim gin ango?

¹⁰ Kit me loyone: Leg Jehovah pi ryeko. Ka wamito kanyo atematema ki yomcwiny, ci omyero kong wapeny Jehovah i lega wek ominiwa ryeko ma wamito me moko tam mabeco. (Kwan Yakobo 1:5.) Myero wadok iye nining ka wawinyo calo Jehovah pe ogamo legawa cutcut? Yakobo owaco ni omyero ‘wamedde ki lego’ Lubanga. Jehovah iye pe wang ka wabedo ka lege pi ryeko. Ka walego pi ryeko me kanyo pekkiwa, Wonwa me polo ‘miyo botwa ki yomcwiny.’ (Jab. 25:12, 13) En neno pekki ma wakato ki iye, winyo marac ka wadeno can dok tye atera me konyowa. Adada, man obedo tyen lok me bedo ki yomcwiny! Ento, Jehovah miniwa ryeko nining?

11. Ngo mukene ma omyero watim wek wanong ryeko?

¹¹ Jehovah miniwa ryeko kun tiyo ki Lokke. (Car. 2:6) Wek wanong ryeko man, mitte ni wakwan Baibul kacel ki bukke ma jenge i kom Baibul piwa kenwa. Ento omyero watim makato kwano Baibul keken. Myero waket ryeko pa Lubanga i tic i kwowa ki lubo tamme. Yakobo ocoyo ni: “Wubed jo ma keto gin ma giloko i tic, pe wubed jo ma winyo awinya keken.” (Yak. 1:22) Ka waketo tira pa Lubanga i tic, wadoko jo ma maro kuc, jo ma niang dok jo ma lukica. (Yak. 3:17) Kit magi  gikonyowa me kato ki i atematema labongo rwenyo yomcwinywa.

12. Pingo pire tek ni wange Baibul maber?

¹² Lok pa Lubanga tye calo kiyo. Konyowa me neno ka ma myero wayubbi ki dong me yubone. (Yak. 1:23-25) Me labolle, i nge kwano Baibul, watwero neno ni omyero wapwonnye me diyo kinigawa. Ki kony pa Jehovah, watwero pwonnye me bedo mwol ka jo mukene nyo pekki mogo oweko akemo omakowa. Pien wabedo jo mamwol, waromo dok iye ki mwolo ka watye i lyeto. Waromo tam maber dok wamoko tam mabeco. (Yak. 3:13) Pud dong pire tek ya ni wange Baibul maber!

13. Pingo omyero wakwan labol pa jo mogo ma kicoyo lok i komgi i Baibul?

¹³ I kare mogo, waniang gin ma omyero pe watim i nge timo bal. Ento meno obedo yo matek adada me pwonnye. Yo maber loyo me bedo ki ryeko aye me nongo pwony ki i gin ma jo mukene gutimo maber ki marac. Meno aye oweko Yakobo ocuko cwinywa me kwano labol pa jo mogo ma i Baibul calo Abraim, Rakab, Yubu, ki Elia. (Yak. 2:21-26; 5:10, 11, 17, 18) Lutic pa Jehovah magi ma lugen-ni gukato ki i atematema ma onongo twero rwenyo yomcwinygi woko. Lanengi me ciro can nyuto ni ki kony pa Jehovah wan bene watwero timo kit meno.

14-15. Pingo omyero pe waca akalakala ma watye kwede acaya?

¹⁴ Ariya: Akalakala. Kare ki kare, waromo nongo ni tek me niang jami mogo ki i Baibul. Nyo twero bedo ni Jehovah pe ogamo legawa kit ma onongo wamito kwede. Man twero kelo akalakala i cwinywa. Ka wacayo akalakala magi, ci man biweko niyewa doko goro, dok balo watwa ki Jehovah. (Yak. 1:7, 8) Dok gitwero weko warwenyo genwa woko pi anyim.

¹⁵ Lakwena Paulo oporo genwa pi anyim ki lajuk me meli. (Ibru 6:19) Lajuk meli weko meli cung mot ka kot tye ka cwer ki yamo magwar dok weko pe mol yokke ki godi. Ento lajuk meli twero bedo me kony keken ka nyor ma kubo ki meli pe ocot woko. Kit macalo nyor man doko goro ka nyal ocamo, niyewa bene doko goro ka watye ki akalakala. Dong ka aunauna ocakke, ngat ma tye ki akalakala birwenyo niyene woko ni Jehovah bicobo cikkene. Ka warwenyo niyewa, warwenyo genwa bene. Kit macalo Yakobo owaco kwede, ngat ma tye ki akalakala “rom ki pii me nam ma twagge, ma yamo coro tagge atata.” (Yak. 1:6) Ngat ma winyo kit man pe bibedo ki yomcwiny mo wacel!

16. Gin ango ma omyero watim ka watye ki akalakala?

¹⁶ Kit me loyone: Lweny ki akalakala; dok ijing niyeni. Pe ibed ngat ma galle agala ki moko tam. I kare pa lanebi Elia, jo pa Jehovah onongo gitye ki akalakala i kom niyegi. Elia owaccigi ni: “Wun mono wubicabbe atata i cwinywu nio kwede wa awene? Ka ce Rwot [Jehovah] aye Lubanga, ci wulub en keken; ento ka Baal, ci wutugi lubo en cut.” (1 Luker 18:21) Man bene tye ada i kare-ni. Mitte ni watim kwed wek wamok piwa kenwa ni Jehovah aye obedo Lubanga me ada, ni Baibul obedo Lokke dok ni Lucaden pa Jehovah gubedo jone. (1 Tec. 5:21) Timo meno bikwanyo akalakala ma watye kwede woko dok bijingo niyewa. Ka wamito kwanyo akalakala ma watye kwede, waromo penyo luelda pi kony. Myero wamok tamwa oyotoyot ka wamito gwoko yomcwinywa i tic pa Jehovah!

17. Ngo ma bitimme ka warwenyo tekcwiny woko?

 ¹⁷ Ariya: Turcwiny. Lok pa Lubanga waco botwa ni: “Ka ce cwinyi otur i kare me ayelayela, tekoni doko nok adada.” (Car. 24:10) Nyig lok me leb Ibru ma kigonyo ni “cwinyi otur” twero gonye atir atir ni “rwenyo tekcwiny.” Ka irwenyo tekcwiny, ci yomcwinyi bene birweny woko oyotoyot.

18. Tyen lokke ngo me ciro can?

¹⁸ Kit me loyone: Jenge i kom Jehovah wek omini tekcwiny me ciro can. Wamito tekcwiny wek wacir can. (Yak. 5:11) Nyig lok ma Yakobo otiyo kwede ma kigonyo ki ‘ciro can’ weko watamo i kom ngat mo ma ocung matek i kabedone. Waromo tamo i kom lamony ma ocung i kakare ki tekcwiny dok pe ringo woko ka lamone ocako lweny i kome.

19. Ngo ma waromo pwonyo ki i lanen pa lakwena Paulo?

¹⁹ Lakwena Paulo owekiwa lanen maber adada me tekcwiny ki ciro can. I kare mogo, en owinyo ni egoro adada. Ento en obedo ki kero me ciro can pien ojenge i kom Jehovah me mine teko ma onongo en mito. (2 Kor. 12:8-10; Pil. 4:13) Wan bene watwero bedo ki kero kacel ki tekcwiny ma kit meno ka waniang ni wamito kony ki bot Jehovah.​—Yak. 4:10.

20-21. Gin ango ma watwero bedo ki gen iye?

²⁰ Watwero bedo ki gen ni pekki ma wakato ki iye pe obedo pwod ma oa ki bot Jehovah. Yakobo ocuko cwinywa ni: “Ka gibito ngat mo, en pe myero owacci, ‘Lubanga aye ma bita,’ pien Lubanga pe gibito ki tiyo gin marac, en bene pe bito ngat mo.” (Yak. 1:13) Ka waye lok ada meno, wanyikke cok ki Wonwa me polo ma lamar-ri.​—Yak. 4:8.

²¹ Jehovah “pe tye ki alokaloka mo.” (Yak. 1:17) En okonyo Lukricitayo me cencwari me acel i kare ma gitye ka kato ki i atematema, dok en bikonyo wan ducu ki acel acel i kare-ni. Leg Jehovah wek okonyi me nongo ryeko, niye, kacel ki tekcwiny. En bigamo legani. Man biweko ibedo ki gen ni en cwinye yom me konyi ka itye ka kanyo atematema!