1. Tyen lok ango ma omiyo jo me ot pa Jehovah gitye ma gunotte?

WAMARO bedo jo me ot pa Jehovah. Pingo watye ma wanotte dok ki kuc? Tyen lok acel aye ni wan ducu watute matek me woro yub me twero ma Jehovah oketo. Ki lok ada, ka waniang maber yub me twero man ma Jehovah oketo, ci notewa medde ameda ki dongo.

2. Lapeny mene ma wabigamogi i pwony man?

² I pwony man, wabinyamo anga ma tye ki twero i kacokke. I kin jami mukene ma wabinyamo tye iye lapeny magi: Tic ango ma lumege gitye kwede? Tika tye lok ada ni omege gubedo luwi lumege ducu? Tika twero ma luelda gitye kwede i kom omege ki lumege rom aroma ki twero ma lawi ot tye kwede i kom dakone ki lutinone? Mukwongo, kong wanyamu kit ma omyero wanen kwede lumege.

3. Watwero dongo pwocwa nining pi tic ma lumegiwa gitimo?

³ Watye ki pwoc madwong pi lumegiwa ma gitiyo matek me gwoko jo me odigi, me tito kwena maber, ki me konyo jo mukene i kacokke. Watwero dongo pwocwa pigi ka wanyamo kit ma Jehovah ki Yecu nenogi kwede. Wabinongo bene adwogi maber ki i nyamo kit ma lakwena Paulo onongo tero kwede lumege.

4. I yo ma nining ma Baibul nyuto ni Jehovah tero mon ni pigi tek marom aroma ki co?

 ⁴ Baibul nyuto ni Jehovah tero mon ni pigi tek marom aroma ki co. Me labolle, Baibul nyuto ni i cencwari me acel, Jehovah omiyo cwiny mere maleng bot mon kacel ki co, dok ominigi teko me timo tango, calo loko leb mapatpat. (Tic 2:1-4, 15-18) Mon kacel ki co kiwirogi ki cwiny maleng dok gibiloc kacel ki Kricito i polo. (Gal. 3:26-29) Mon kacel ki co gibinongo mot me kwo pi naka i lobo kany. (Yabo 7:9, 10, 13-15) Dok co kacel ki mon kiminigi tic me tito kwena maber-ri ki pwonyo dano. (Mat. 28:19, 20) Ki lok ada, i buk me Tic pa Lukwena, kiloko i kom tic pa lamego mo ma nyinge Pricikila, ma otiyo kacel ki cware Akwila, dok gukonyo me tito lok ada i yo matut bot laco mo ma nyinge Apolo ma okwano i rwom ma lamal.​—Tic 18:24-26.

5. Gin ango ma Luka 10:38, 39, 42 nyuto madok i kom cwiny ma Yecu onongo tye kwede i kom mon?

⁵ Yecu omiyo woro ki deyo bot mon. En pe olubo tekwaro pa Luparicayo, ma onongo gicayo mon dok pe giloko kwedgi i kin lwak nyo ginywako Ginacoya kwedgi. Me ka meno, Yecu onyamo ginacoya i yo matut ki mon kacel ki co. * (Kwan Luka 10:38, 39, 42.) En bene oye ni mon guwot kacel kwede i kare ma onongo en tye i wotte me tito kwena i kabedo mapatpat. (Luka 8:1-3) Dok Yecu omiyo ki mon mot me tito ki lukwenane ni kicere woko.​—Jon 20:16-18.

6. Lakwena Paulo onyuto nining ni etye ki pwoc pi mon?

⁶ Lakwena Paulo opoyo wi Temceo me miyo deyo ki mon. Paulo owaco ki Temceo ni myero oter “mon madongo macalo mego “ dok “mon matino myero onengi macalo lumegine.” (1 Tem. 5:1, 2) Paulo otiyo matek me konyo Temceo wek odok Lakricitayo mutegi, ento en bene oye ni min Temceo ki dane aye gukwongo pwonyo Temceo “coc maleng.” (2 Tem. 1:5; 3:14, 15) Dok i waragane bot Luroma, Paulo omoto lumege mapol kun coyo nyinggi. En oneno tic ma lumege magi gutimo dok owaco ni etye ki pwoc madit adada pi ticgi.​—Rom. 16:1-4, 6, 12; Pil. 4:3.

7. Lapeny mene ma wabinyamogi kombeddi?

⁷ Kit ma paragraf ma waa ka nyamogi ginyuto kwede, pe tye tyen lok mo keken i Ginacoya me cwako tam man ni lumege rwomgi lapiny ka kiporogi ki omege. Lumegiwa ma gin lumar dok cinggi yot gubedo twon mot madit adada bot kacokke, dok luelda gijenge i kom konygi me dongo kuc ki note i kacokke. Ento watye ki lapeny mogo ma mito agama. Me labolle: Pingo Jehovah mito ni lumege gubo wigi i kare mukene? Kit macalo omege keken aye kicimogi me bedo luelda nyo lukony kor tic, meno mono tyen lokke ni omege ducu gubedo luwi lumege ducu me kacokke?

8. Ma lubbe ki Jo Epeco 5:23, tika omege gubedo luwi lumege ducu? Tit kong.

⁸ Lagamme tye ni pe! Omego pe obedo lawi lumege ducu me kacokke; Kricito aye obedo. (Kwan Jo Epeco 5:23.) I ot, laco tye ki twero i kom dakone. Awobi ma onongo batija pe obedo lawi minne.  (Ep. 6:1, 2) Dok i kacokke, luelda gitye ki twero manok keken i wi lumege ki omege. (1 Tec. 5:12; Ibru 13:17) Lumege ma wigi nono ma pe dong gibedo ki lunyodogi pud gimedde ki woro lunyodogi kacel ki luelda. Ento, calo co me kacokke, gin bene gitye ki lawigi acel, Yecu.

9. Pingo mitte ni i kare mukene lamego myero obo wiye?

⁹ Tye lok ada ni Jehovah ocimo co keken me telo lok madok i kom worowa kacel ki tic me pwony i kacokke, dok en pe omiyo ki mon twero acel meno. (1 Tem. 2:12) Pingo? Pi tyen lok acel ma oweko en ocimo Yecu macalo lawi co​—me wek kacokke obed ma oyubbe maber. Ka ce mitte ni lamego mo otim tic ma pol kare omege aye gitimo, ci Jehovah mito ni lamego meno myero obo wiye woko. * (1 Kor. 11:4-7) Jehovah mito ni gutim meno pe me dwoko rwomgi piny ento wek gunyut woro pi yub me tela ma en oketo i kacokke. I nge niang lok meno, kong dong wanyamu lapeny man: Luwi odi ki luelda gitye ki twero marom mene?

10. Ngo ma twero weko laelda cako moko cik pi jo me kacokke?

¹⁰ Luelda gimaro Kricito, dok gimaro bene ‘romi’ ma Jehovah oketo i te twerogi. (Jon 21:15-17) Pien laelda moni paro pi jo me kacokke, en twero tamo ni etye macalo won jo me kacokke. Pi meno, en twero tamo ni kit macalo lawi ot tye ki twero me moko cik me gwoko jo  me ode, ci en bene etwero moko cik ma en tamo ni bigwoko romi pa Lubanga. Dok omege ki lumege mukene gicuko cwiny luelda me bedo macalo wongi i yo me cwiny kun gipenyo luelda magi ni gin aye gumok tam pigi. Ento tika luelda ma i kacokke kacel ki luwi odi gitye ki twero marom?

11. I yo ma nining ma tic pa luwi odi cal ki tic pa luelda?

¹¹ Lakwena Paulo onyuto ni i yo mogo tic pa lawi ot ki tic pa laelda gical. (1 Tem. 3:4, 5) Me labolle, Jehovah mito ni dako ki lutino guwiny lawi ot. (Kol. 3:20) Dok en mito ni jo ma i kacokke gubed luwiny bot luelda. Jehovah mito ni luwi odi kacel ki luelda gupwony jo ma tye i te twerogi me maro Lubanga. Luelda ki luwi odi gitute matek me neno ni jo ma gitye i te twerogi giwinyo ni kimarogi. Dok macalo luwi odi ma lumar, luelda bene gitute me neno ni jo me kacokke gunongo kony ka gitye ki peko. (Yak. 2:15-17) Medo i kom meno, Jehovah mito ni luelda ki luwi odi gukony jo mukene me lubo cikke. En bene mito ni gin ‘gubed kun gilubo gin ma yam gicoyo’ i Baibul.​—1 Kor. 4:6.

12-13. Kit ma kinyuto kwede i Jo Roma 7:2, i yo ma nining ma tic pa luwi odi pat ki tic pa luelda?

 ¹² Ento apokapoka madongo tye i kin tic pa luelda ki tic pa luwi odi. Me labolle, Jehovah ocimo luelda me tic macalo lungolkop, dok en ominigi tic me kwanyo lubalo ma gukwero ngut woko ki i kacokke.​—1 Kor. 5:11-13.

¹³ Ki tungcel, Jehovah omiyo twero mogo bot luwi odi ma en pe omiyo bot luelda. Me labolle, en omiyo ki lawi ot twero me moko cik pi jo me ode ki me neno ni gulubo cik meno. (Kwan Jo Roma 7:2.) Macalo labolle, lawi ot tye ki twero me moko cawa mene ma lutinone omyero gudwog kwede gang. En bene tye ki twero me miyo pwod ki lutinone ka pe gulubo cikke. (Ep. 6:1) Ngene kene ni lawi ot ma lamar kong nyamo tam ki dakone ma nongo peya en omoko cik pien nongo gin aryo-ni gitye “kom acel.” *​—Mat. 19:6.

14. (a) Ma lubbe ki gin ma kitito i Marako 10:45, pingo pore ni Jehovah ocimo Yecu macalo lawi kacokke? (b) Tic madit ango ma Lukiko Madit tye kwede? (Nen bok ma wiye tye ni “ Tic pa Lukiko Madit.”)

¹⁴ Jehovah otiyo ki ginkok me wilo kwo pa jo ducu me kacokke kacel ki ngat mo keken ma oketo niyene i kom Yecu. (Kwan Marako 10:45; Tic 20:28; 1 Kor. 15:21, 22) Pi meno, rwatte ni en ocimo Yecu, ma omiyo kwone macalo ginkok-ki, me bedo lawi kacokke. Macalo lawiwa,  Yecu tye ki twero me moko cik ma doro kwo pa ngat acel acel, jo me odi, kacel ki kacokke ducu. Dok en tye ki twero me neno ni walubo cik magi. (Gal. 6:2) Ento Yecu pe moko cik keken. En pitowa dok maro wan ducu ki acel acel.​—Ep. 5:29.

15-16. Pwony ango ma inongo ki i lok pa laminwa ma nyinge Marley kacel ki i lok pa omego Benjamin?

¹⁵ Lumege me kacokke ginyuto woro pi Kricito ka gilubo tira ma a ki bot co ma Kricito ocimogi me gwokowa. Laminwa mo ma nyinge Marley, ma bedo i lobo Amerika, otito kit ma lumegiwa mapol giwinyo kwede. En owaco ni: “Atero ticca macalo min ot ki lamego me kacokke calo gin ma pire tek adada bota. Kare ducu abedo ka tute matek me woro twero ma Jehovah omiyo bot cwara ki bot luelda me kacokke. Ento cwara ki omege me kacokke giweko bedo yot bota me timo man pien ginyuta woro dok gipwoyo tic ma atimo.”

¹⁶ Omege ginyuto ni giniang yub me tela ma Jehovah oketo ka giworo dok gimiyo deyo ki lumege. Omego Benjamin, ma bedo i lobo Ulaya owaco ni: “Anongo pwony mapol adada ki i lagam ma lumege gimiyo i cokke kacel ki tam mabeco ma gimiya i kom kit me kwan pira kena ki me cobo ticca me pwony maber. Atamo ni tic ma lumege gitimo pire tek adada.”

17. Pingo omyero wawor yub me tela ma Jehovah oketo?

¹⁷ Ka co, mon, luwi odi, ki luelda ducu me kacokke giniang ni Jehovah omiyo twero bot jo mogo ci kuc bibedo tye i kacokke. Dong ma pire tek loyo ducu, wakelo deyo ki pak bot Wonwa ma lamar, Jehovah.​—Jab. 150:6.