1. Gin ango ma twero gudo kit ma laco tero kwede dakone ki lutinone?

ITAMO ni tyen lokke ngo me bedo ki twero, me labolle twero macalo lawi ot? Co mukene giweko tekwarogi nyo kit ma gudongo kwede aye moko kit ma gitero kwede mongi ki lutinogi. Nen kong gin ma laminwa ma nyinge Yanita ma bedo i lobo Ulaya owaco, “Ka ma abedo iye, pol pa dano gitamo ni mon rwomgi lapiny dok omyero kitergi macalo lutic.” Dok omego mo ma nyinge Luke ma bedo i lobo Amerika owaco ni, “Wege mogo gipwonyo awobegi ni mon omyero kinengi ento pe kiwiny dwangi, dok ni tamgi pire pe tek.” Ento, Jehovah pe mito ni co guter mongi kit meno. (Por ki Marako 7:13.) Dong, laco twero pwonnye me bedo lawi ot maber nining?

2. Ngo ma myero lawi ot onge, dok pingo?

² Wek laco obed lawi ot maber, en myero kong onge gin ma Jehovah mito ki bote. Mitte bene ni en onge pingo Jehovah omiyo twero bot jo mogo, tutwalle kit ma en romo lubo kwede lanen pa Jehovah ki Yecu. Pingo pire tek ni laco myero onge jami magi? Pien Jehovah omiyo ki luwi odi twero, dok en mito ni guti kwede i yo maber.​—Luka 12:48b.

3. Ngo ma wapwonyo madok i kom bedo ki twero ki i lok ma kicoyo i 1 Jo Korint 11:3?

³ Kwan 1 Jo Korint 11:3. Tyeng man nyuto kit ma Jehovah oyubo kwede jo me ode i polo ki i lobo. Kit macalo en aye lawi jone, en tye ki twero ducu. En tiyo ki yub man me miyo twero bot jo mukene, ento myero gudok iye bote pi kit ma gitiyo kwede ki twerogi. (Rom. 14:10; Ep.  3:14, 15) Jehovah omiyo ki Yecu twero i wi kacokke, ento Yecu myero odok iye bot Jehovah pi kit ma en terowa kwede. (1 Kor. 15:27) Jehovah bene omiyo ki laco twero i wi dakone ki lutinone, ento laco myero odok iye bot Jehovah ki Yecu pi kit ma en tero kwede jo me ode.​—1 Pet. 3:7.

4. Twero ango ma Jehovah ki Yecu gitye kwede?

⁴ Macalo Lawi jo me ode i polo ki lobo, Jehovah tye ki twero me moko cik madok i kom kit ma lutinone myero gukwo kwede, ki neno ni gulubo cik magi. (Ic. 33:22) Yecu macalo lawi kacokke pa Lukricitayo bene tye ki twero me moko cik ki neno ni kilubo.​—Gal. 6:2; Kol. 1:18-20.

5. Twero ango ma lawi ot ma Lakricitayo tye kwede, dok wang coone tye kwene?

⁵ Calo Jehovah gin ki Yecu, lawi ot bene tye ki twero me moko tam pi jo me ode. (Rom. 7:2; Ep. 6:4) Ento, twerone tye ki wang coone. Me labolle, cikke myero ojenge i kom cik ma igi lac ma nonge i Lok pa Lubanga. (Car. 3:5, 6) Dok lawi ot pe tye ki twero me moko cik pi jo ma pe gitye i ode. (Rom. 14:4) Medo i kom meno, ka awobene ki anyirane gudongo dok gua woko ki gang, gimedde ki mine woro, ento nongo dong pe gitye i te twerone.​—Mat. 19:5.

6. Pingo Jehovah oketo yub ni jo mukene gubed ki twero?

⁶ Jehovah oketo yub me bedo ki twero pien en maro jo me ode. Man obedo mic ma oa ki bote. Yub me bedo ki twero weko jo me ot pa Jehovah gibedo ki kuc dok gitimo jami ducu kore ki kore. (1 Kor. 14:33, 40) Ka onongo pe kingeyo anga ma tye ki twero, jo me ot pa Jehovah onongo gibibedo ma gunywene ata dok labongo yomcwiny. Me labolle, pe tye ngat mo ma onongo bingeyo anga ma myero omok tam ki anga ma myero oket tam magi i tic.

7. Ma lubbe ki Jo Epeco 5:25, 28, tika Jehovah onongo mito ni co gulo mon ki tek?

⁷ Ka ber pi co me bedo ki twero i pacigi, ci pingo mon mapol giwinyo calo coggi terogi marac dok kiunogi? Tye kit man pien co mapol gicayo rwom me kit matir ma Jehovah oketo pi jo me odi dok giyero me lubo tekwarogi. Dok giromo tero mongi i yo marac wek giwiny maber. Me labolle, laco twero loyo dakone ki tek wek ewiny maber nyo me nyuto bot jo mukene ni en aye “laco kikome.” En romo tamo ni pe etwero diyo dakone me mare, ento etwero weko dakone lwore. Dok en romo tic ki lworo meno me loyo dakone. * Co ma gitamo kit meno dok gitimo jami magi nongo pe gimiyo ki mon woro ki deyo ma gupore me nongone, dok man obedo olungtuke me gin ma Jehovah mito.​—Kwan Jo Epeco 5:25, 28.

8. Laco twero pwonnye me bedo lawi ot maber nining?

⁸ Laco twero pwonnye me bedo lawi ot maber ka olubo lanen pa Jehovah ki Yecu i kit ma gitiyo kwede ki twerogi. Nen kong kit aryo ma Jehovah ki Yecu gunyuto dok inen kit ma lawi ot twero  nyuto kwede kit magi i yo ma en tero kwede dakone ki lutinone.

9. Jehovah nyuto mwolo nining?

⁹ Mwolo. Jehovah aye obedo Ngat maryek loyo i polo ki lobo. Kadi bed kit meno, en winyo tam pa luticce. (Acak. 18:23, 24, 32) En oye ni jo ma gitye i te twerone gumi tamgi. (1 Luker 22:19-22) Jehovah pe ki roc mo, ento en pe keto gingi ni omyero wabed labongo roc. Me ka meno, en konyo jo ma gitye ki roc me cobo ticgi pire. (Jab. 113:6, 7) Ki lok ada, Baibul lwongo Jehovah ni “lakony.” (Jab. 27:9; Ibru 13:6) Kabaka Daudi oye ni ebedo ki kero me cobo tic madongo pien Jehovah obedo ngat mamwol dok okonye.​—2 Cam. 22:36.

10. Yecu onyuto mwolo nining?

¹⁰ Nen kong labol pa Yecu. Kadi bed en obedo Rwot ki Lapwony pa lukwenane, en olwoko tyengi. Tyen lok ango mumiyo Jehovah oweko kicoyo lok meno piwa i Baibul? Labongo akalakala mo, en otimo man me weko lanen me aluba pi luwi odi kacel ki jo mukene. Yecu kikome owaco ni: “Anyuttiwu lanen, wek wun bene wutim gin ma an atimo i komwu.” (Jon 13:12-17) Kadi bed en onongo tye ki twero madwong, Yecu onongo pe mito ni jo mukene guti pire. Me ka meno, en otiyo pigi.​—Mat. 20:28.

11. Pwony ma pire tek ango ma lawi ot twero nongo ki i lanen me mwolo pa Jehovah ki Yecu?

¹¹ Pwony ma wanongo. Lawi ot twero nyuto mwolo i yo mapol. Me labolle, en pe keto gingi ni dakone ki lutinone gutim jami labongo roc mo. En winyo tam pa jo me ode, kadi bed tamgi pe rwatte ki mege. Laminwa mo ma nyinge Marley ma bedo i lobo Amerika owaco ni: “I kare mukene, wan ki cwara tamwa bedo pat. Ento awinyo calo pira tek bote dok en wora pien en penyo pi tamma dok lwodo ma peya omoko tam mo keken.” Medo i kom meno, laco mamwol tye atera me tiyo tic ma gang, kadi bed jo me kabedogi tamo ni tic magi obedo tic pa mon. Man twero bedo tek adada. Pingo? Laminwa mo ma nyinge Rachel owaco ni, “Ka ma an aa ki iye, ka laco okonyo dakone  me lwoko jami nyo dunyo ot, jiranigi ki wadigi gitwero tamo ni en pe ‘laco kikome.’ Gibitamo ni en pe twero doro dakone maber.” Ka dano mapol gitamo kit meno i kabedo ma ikwo iye, wi opo ni Yecu olwoko tyen lupwonnyene, kadi bed man onongo kineno ni tic pa opii. Lawi ot maber pe paro ka jo mukene ginene ni pire pe tek nyo rwomme lapiny. Mitine tye me neno ni dakone ki lutinone cwinygi yom. Medo i kom mwolo, kit mukene ango ma pire tek pi laco wek en obed lawi ot maber?

12. Mar tugo cwiny Jehovah ki Yecu me timo gin ango?

¹² Mar. Mar aye tugo cwiny Jehovah me timo jami ducu. (1 Jon 4:7, 8) Ki mar, en konyowa me cobo mitiwa pi cam me cwiny kun tiyo ki Lokke Baibul kacel ki dulle. En weko wawinyo ni watye ki gwokke kun tittiwa ni emarowa. Ka odok i kom jami me kom kono? Jehovah “miyowa jami ducu mabup ma yomo cwinywa.” (1 Tem. 6:17) Ka watimo bal, en tirowa, ento en pe juko marowa woko. Ki mar, Jehovah omiyo ginkok piwa. Ki tung bot Yecu, en omarowa adada ma oweko omiyo kwone piwa. (Jon 3:16; 15:13) Pe tye gin mo keken ma twero gengo Jehovah ki Yecu ki maro jo ma lugen botgi.​—Jon 13:1; Rom. 8:35, 38, 39.

13. Pingo pire tek ni lawi ot onyut mar pi jo me ode? (Nen bene bok ma wiye tye ni “ Ngo ma Laco ma Pud Onyomme Nyen Myero Otim Wek Dakone Owore?”)

¹³ Pwony ma wanongo. Mar aye myero otug cwiny lawi ot me timo jami ducu ma en timo. Pingo man pire tek adada? Lakwena Jon ogamo ni: “Ngat ma pe maro ominne [nyo jo me ode] ma en oneno kome, pe twero maro Lubanga ma pe oneno kome.” (1 Jon 4:11, 20) Laco ma maro jo me ode dok mito lubo lanen pa Jehovah ki Yecu, bikonyo jo me ode me bedo ki wat maber ki Jehovah,  biweko giwinyo ni emarogi, dok biminigi jami me kom ma mitte. (1 Tem. 5:8) En bipwonyo lutinone kun bene miyo botgi tira. En bene bimedde ki pwonnye kekene me moko tam ma kelo deyo bot Jehovah kacel ki adwogi maber bot jo gange. Kong dong wanyamu jami magi ki acel acel dok wanen kit ma lawi ot twero lubo kwede lanen pa Jehovah ki Yecu.

14. Lawi ot twero konyo jo me ode me bedo ki wat maber ki Jehovah nining?

¹⁴ Myero okony jo me ode me bedo ki wat maber ki Jehovah. Yecu onyuto ni etye calo Wonne pien onongo mito konyo lulub kore me bedo ki niye matek. (Mat. 5:3, 6; Mar. 6:34) I yo acel-lu, gin ma pire tek loyo bot lawi ot aye me konyo jo me ode me nyiko cok ki Jehovah. (Nwo. 6:6-9) En timo man ki neno ni en kacel ki jo me ode gikwano Lok pa Lubanga, gicito i cokke, gitito kwena maber, dok gimedde ki bedo lurem Jehovah.

15. Lawi ot twero konyo jo me ode nining me winyo ni emarogi?

¹⁵ Okony jo me ode me winyo ni emarogi. Jehovah otito ka maleng i nyim jo mukene ni emaro Yecu. (Mat. 3:17) Yecu bene onyuto ka maleng ni emaro lulub kore, ki i lokke kacel ki jami ma otimo. I yo acel-lu, gin bene gutitte ni gimare. (Jon 15:9, 12, 13; 21:16) Lawi ot romo nyuto bot dakone ki lutinone ni emarogi ki i gin ma en timo, me labolle, ki kwano Baibul kwedgi. En bene myero owaccigi ni emarogi dok etye ki pwoc pigi, dok ka twere, opwogi i nyim jo mukene.​—Car. 31:28, 29.

16. Gin ango mukene ma lawi ot myero otim, dok ngo ma myero en ogwokke kwede?

¹⁶ Omi jami me kom pi jo me ode. Jehovah oneno ni Luicrael gitye ki jami me kom ma mitte kadi wa i kare ma kitye ka miyogi pwod pi kwero bedo luwiny. (Nwo. 2:7; 29:5) En bene miniwa jami me kom ma mitte piwa i kare-ni. (Mat. 6:31-33; 7:11) I yo acel-lu, Yecu bene opito lulub kore. (Mat. 14:17-20) En bene ocango jo mapol ma komgi lit. (Mat. 4:24) Wek lawi ot oyom cwiny Jehovah, en myero omi jami me kom ma mitte pi lupacone. Kadi bed kit meno, en myero obed ki neno mupore. En pe myero oter kare malac tutwal i dog ticce ma weko pe bedo ki kare me konyo jo me ode me bedo ki wat macok ki Jehovah.

17. Jehovah ki Yecu gipwonyowa dok giminiwa tira nining?

¹⁷ Omi pwony. Jehovah pwonyowa dok miyowa tira pien en mito konyowa. (Ibru 12:7-9) Calo Wonne, Yecu bene pwonyo jo ma gitye i te twerone i yo me mar.  (Jon 15:14, 15) En miyo tira ento bene nyuto kica. (Mat. 20:24-28) En ngeyo bene ni watye ki roc dok pol kare watimo bal.​—Mat. 26:41.

18. Lawi ot maber wiye po i kom ngo?

¹⁸ Lawi ot ma lubo lanen pa Jehovah ki Yecu wiye po ni dakone ki lutinone gitye ki roc. En pe tero dakone ki lutinone ki “gero.” (Kol. 3:19) Me ka meno, en lubo cik ma iye lac ma nonge i Jo Galatia 6:1 dok tute me tirogi “ki cwiny me mwolo,” kun wiye po ni en bene etimo bal. Calo Yecu, en wiye po ni yo maber loyo me pwonyo jo mukene aye ki weko lanen maber.​—1 Pet. 2:21.

19-20. Ka odok i kom moko tam, lawi ot twero lubo lanen pa Jehovah ki Yecu nining?

¹⁹ Mok tam maber pi jo mukene. Jehovah moko tam maber pi jo mukene. Me labolle, en omoko tamme me cweyo jami ma kwo, pe me kelo adwogi maber bote ento wek wanong mit pa kwo. Pe tye ngat mo ma onongo twero diye me miyo Wode pi balwa. En otimo meno pien onongo mito konyowa. Yecu bene omoko tam ma onongo konyo tutwalle jo mukene. (Rom. 15:3) Me labolle, i kare ma en onongo ool adada, en omoko tamme me pwonyo jo mukene me ka nongo yweyo.​—Mar. 6:31-34.

²⁰ Lawi ot maber ngeyo ni gin acel matek adada ma myero etim aye me moko tam mabeco pi jo me ode, dok tic man pire tek adada bote. En gwokke ki moko tam ma pe ki tyen lok ma atir nyo tam ma lubbe ki kit ma en winyo kwede i cawa meno. Me ka meno, en ye ni Jehovah opwonye kit me moko tam mabeco. * (Car. 2:6, 7) I yo man, en bipwonnye me moko tam ma konyo jo mukene ento pe tam ma cobo mitine keken.​—Pil. 2:4.

21. Gin ango ma wabinyamo i pwony ma lubo man?

²¹ Jehovah omiyo bot luwi odi tic matek adada. En mito ni gucob ticgi maber. Ento ka laco tute me lubo lanen pa Jehovah ki Yecu, ci en bibedo lawi ot maber. Dok ka dakone bene cobo ticce i ot, ci nyomgi bibedo ki yomcwiny. Dako myero onen tic pa cware macalo lawi ot nining dok ariya ango ma en twero kemme kwede? Pwony ma lubo man bigamo lapeny magi.