PWONY ME ANYAMA ME 33
Jehovah Paro pi Jone
“Rwot [Jehovah] neno jo ma giwore.”—JAB. 33:18.
WER 4 ‘Jehovah Aye Lakwatta’
GIN MA WABINYAMO *
1. Pingo Yecu olego Jehovah ni ogwok lulub kore?
I DYEWOR ma peya en oto, Yecu olego lega ma pire tek bot Wonne me polo. En olego Jehovah ni ogwok lulub kore. (Jon 17:15, 20) Ngene kene ni Jehovah kare ducu gwoko dok paro pi Jone. Kadi bed kit meno, Yecu onongo ngeyo ni lulub kore gibikato ki i aunauna matek ma a ki bot Catan. Yecu bene onongo ngeyo ni gibimito kony ki bot Jehovah wek okonygi me loyo aunauna magi.
2. Ma lubbe ki Jabuli 33:18-20, pingo pe omyero wabed ki lworo ka watye ka kato ki i pekki?
2 Lobo man ma tye i te loc pa Larac-ci, tye ka kelo pekki mapol adada i kom Lukricitayo me ada i kare-ni. Wakato ki i pekki ma twero turo cwinywa dok bene temo gennewa bot Jehovah. Ento i pwony man, wabineno gin ma myero watim wek pe wabed ki lworo. Jehovah nenowa ki acel acel. Meno tyen lokke ni en neno pekki ma watye kwede dok en mito konyowa. Kong dong wanyamu labol aryo me Baibul ma nyuto ni Jehovah “neno jo ma giwore.”—Kwan Jabuli 33:18-20.
JEHOVAH KONYOWA KA WAWINYO NI WATYE KENWA
3. I kare mene ma watwero winyo ni watye kenwa?
3 Kadi bed watye ki omege ki lumege mapol i kacokke, kare mogo watwero winyo calo watye kenwa. Me labolle, jo matino gitwero winyo calo gitye kengi ka gitye ka tito pi niyegi i nyim lutino kwan luwotgi i cukul, nyo ka pud gukobo i kacokke manyen. Jo mogo i kinwa cwinygi twero cwer nyo cwinygi tur kun nongo gitamo ni ngat mo pe ma twero konyogi. Watwero bedo ma nongo waling alinga pien nongo watye ki lworo ni dano pe gibiniang pekkiwa. Dok, i cawa mukene watwero bedo ki akalakala ka ce tye ngat mo ma paro piwa. Labongo paro pi tyen lok ma omiyo wawinyo calo watye kenwa, i kare mogo wan ducu bene wabedo ki par. Jehovah pe mito ni wawiny kit man. Pingo wawaco kit meno?
4. Pingo lanebi Elia owaco ni: “An aye dong adong kena”?
4 Nen kong labol pa laco ma lagen ma nyinge Elia. Jejebel onongo okwonge ni ebineko Elia woko, dong en obedo ka ngwec me laro kwone pi nino ma romo 40 kulu. (1 Luker 19:1-9) Lacen, i kare ma tye kene i boro got, en okok bot Jehovah: “An aye dong adong kena [macalo lanebi].” (1 Luker 19:10) Ki lok ada, onongo pud tye lunebi mapol i lobo meno. Me labolle, Obadia onongo olaro lunebi 100, dok Jejebel pe onekogi. (1 Luker 18:7, 13) Ento pingo Elia pud owinyo calo etye kene? Tika en obedo ka tamo ni lunebi ma Obadia olarogi onongo dong guto woko liweng? Tika en otamo ni etye kene pien pe tye ngat mo ma ocako tic pi Jehovah kacel kwede i nge Jehovah moko bote ni En ebedo Lubanga me ada i wi Got Karmel? Nyo mono en otamo ni pe tye ngat mo ma ngeyo kit ma kwone tye ka mading kwede, nyo ni pe tye ngat mo ma paro pire? Lok ma i Baibul pe tittiwa kore ki kore kit ma Elia obedo ka winyo kwede. Ento labongo akalakala mo wangeyo ni Jehovah oniang pingo Elia obedo ka winyo ni etye kene, dok En bene onongo ngeyo kit me konye.
Ka wawinyo ni watye kenwa, ngo ma watwero pwonyo ki i kit ma Jehovah okonyo kwede Elia? (Nen paragraf 5-6)
5. Jehovah ocuko cwiny Elia nining ni en pe tye kene?
5 Jehovah okonyo Elia i yo mapol mapatpat. En ocuko cwiny Elia me lok. Tyen aryo kulu En openyo Elia ni: “Itimo gin ango kany?” (1 Luker 19:9, 13) Tyen aryo magi ducu, Jehovah owinyo lok pa Elia i kare ma en otito kit ma en winyo kwede. Jehovah odok i lok pa Elia ki nyutte ni Etye kenyo dok Etye ki teko madwong. En bene ocuko cwiny Elia ni pud tye Luicrael mapol ma Giwore. (1 Luker 19:11, 12, 18) Labongo akalakala mo, Elia onongo cuko cwiny i nge tito kit ma ewinyo kwede bot Jehovah ki winyo kit ma Jehovah ogamo kwede legane. Jehovah omiyo ki Elia tic mapatpat ma pigi tego. En owacce ni owir Kajael wek odok kabaka me Ciria, Yeko me doko kabaka me Icrael, ka dong Elica me doko lanebi. (1 Luker 19:15, 16) I kare ma Jehovah omiyo tic magi ki i Elia, man okonye me keto cwinye i jami mabeco. Lubanga bene omine larem macok, ma nyinge Elica. Itwero nongo kony ki bot Jehovah nining ka iwinyo ni itye keni?
6. Ngo ma itwero lega pire ka itye ka winyo ni itye keni? (Jabuli 62:8)
6 Jehovah mito ni ileg bote. En neno pekki ma itye ka kato ki iye, dok en cuko cwinyi ni ebiwinyo legani i cawa mo keken. (1 Tec. 5:17) En nongo yomcwiny madwong ka winyo lega pa jo ma giwore. (Car. 15:8) Ngo ma itwero lega pire ka iwinyo ni itye keni? Tit ki Jehovah kit ma iwinyo kwede kikome, kit macalo Elia otimo. (Kwan Jabuli 62:8.) Tite par ma itye kwede ki kit ma par magi oweko itye ka winyo kwede. Leg Jehovah wek okonyi inge ngo ma omyero itim ka iwinyo ni itye keni. Me labolle, ka iwinyo ni itye keni dok lworo maki ka lutino kwan luwoti gupenyi lok kom niyeni, leg Jehovah wek omini tekcwiny ma imito wek ilok kwedgi. Itwero bene lega pi ryeko me tito pi niyeni ki diro. (Luka 21:14, 15) Ka cwinyi otur nyo itye ka lweny ki tam maraco, leg Jehovah wek okonyi ilok ki Lakricitayo mo ma otegi i yo me cwiny. Iromo bene penyo Jehovah wek okony ngat meno ma ibiloko kwede wek owiny lokki dok oniang kit ma iwinyo kwede. Tit ki Jehovah kit ma iwinyo kwede, nen kit ma en bigamo kwede legani, dok ijol kony ki bot jo mukene. Ka itimo kit meno, ci pe ibiwinyo calo itye keni.
Tika iyenyo yo me medo cawani i tic me pwony kun bene inywako iye kacel ki jo mukene? (Nen paragraf 7)
7. Gin ango ma ipwonyo ki i lanen pa Mauricio?
7 Jehovah omiyo ki wan ducu tic ma pire tek adada me atima. Itwero bedo ki gen ni en neno dok tye ki pwoc pi jami ducu ma itimo pire i kacokke ki i tic me pwony. (Jab. 110:3) Bedo ma komi mit i tic man twero konyi nining wek pe iwiny calo itye keni? Nen kong labol pa omego mo matidi ma nyinge Mauricio. * Ma pe orii i nge nongo batija, larem Mauricio mo macok adada ocako weko ada woko mot mot. Mauricio owaco ni, “I kare ma aneno en tye ka weko Jehovah, arwenyo gen woko i koma kekena. Abedo ki akalakala ka ce abicobo cikkena me tic pi Jehovah dok ka ce abimedde ki bedo i kin Jo pa Jehovah. Awinyo ni atye kena dok ni pe tye ngat mo ma biniang kit ma winyo kwede.” Gin ango ma okonyo Mauricio? En owaco ni, “Amedo cawana i tic me tito kwena. Man okonya pe me keto tamma i koma kekena ki kit ma awinyo kwede. Onongo abedo ki yomcwiny dok awinyo ni a pe kena ka atye ka tito kwena ki jo mukene.” Ki lok ada, kadi wa i kare man ma pe watwero tic kacel wang ki wang, pud wanongo cukocwiny ka wanywako i tito kwena kun wacoyo waraga nyo ki goyo cim i tic me pwony. Gin ango mukene ma okonyo Mauricio? En owaco ni: “Amedo bene ticca i kacokke. Aketo bene cwinya ka yubo kacel ki miyo pwony pa lutino kwan i cokke me dye cabit. Timo man oweko awinyo ni pira tek adada bot Jehovah kacel ki jo mukene.”
JEHOVAH KONYOWA KA WAWINYO NI PEKKI ONUROWA WOKO
8. I yo ma nining ma pekki ma wakato ki iye gudowa?
8 Wangeyo ni wang ma wakato ki i pekki i kare man me agikki-ni. (2 Tem. 3:1) Ento waromo tamo ni tye pekki mogo ma pe wabikato ki iye, pi man ka wakemme ki pekki magi wabedo ki ur madit. Watwero kato ki i can cente atura, daktar twero wacciwa ni watye ki two mo ma twero nekowa woko, nyo ngat mo ma wamaro twero to bene. I kare ma kit meno, cwinywa twero tur dok wabedo ki par madwong, tutwalle ka wakemme ki pekki magi kare ki kare nyo bene lawang acel. Kadi bed kit meno, wi myero opo ni Jehovah paro piwa, dok ki kony ma mege, watwero kanyo ariya mo keken ki gen.
9. Tit kong pekki mogo ma Yubu okato ki iye.
9 Tam kong i kom kit ma Jehovah okonyo kwede laco ma lagen ma nyinge Yubu. En okato ki i kwo matek adada dok man ducu otimme i nge kare manok keken. I nino acel keken, kiwaco ki Yubu ni leyi ma mege kityeko kwalone dok luticce ki lutinone guto woko. (Yubu 1:13-19) Ma pe orii, i kare ma en pud tye ka kumu, two malit dok me lewic omake. (Yubu 2:7) Kwone onongo tye ka matek adada ma oweko en owaco ni, “Adag bedo kit man; pe amito kwo nakanaka.”—Yubu 7:16.
Jehovah otito ki Yubu kit ma En gwoko kwede cwecce ducu wek Yubu oye ni En marre dok bigwokke (Nen paragraf 10)
10. Jehovah omiyo ki Yubu kony ma mitte me kanyo pekkine nining? (Nen cal ma tye i pok ngeye.)
10 Jehovah onongo tye ka neno pekki ma Yubu tye ka kato ki iye. Pien Jehovah onongo maro Yubu, En omine jami ma mitte me kanyo ki loyo pekkine. Jehovah oloko ki Yubu kun poyo wiye i kom Ryekone ma pe gik ki kit ma En gwoko kwede cwecce i yo me mar. En oloko i kom leyi mamwonya mapatpat. (Yubu 38:1, 2; 39:9, 13, 19, 27; 40:15; 41:1, 2) Jehovah bene otiyo ki laco mo matidi ma lagen ma nyinge Eliu me jingo ki cuko cwiny Yubu. Eliu otito ki Yubu ni Jehovah kare ducu miyo bakacic ki jo ma Giwore kun gikanyo pekki. Ento Jehovah bene otugo cwiny Eliu me miyo tira i yo me mar bot Yubu. Eliu okonyo Yubu pe me bedo ka tam i kome kekene tutwal, kun poyo wiye ni wan macalo dano watino adada ka kiporowa ki Jehovah, Lacwe polo ki lobo. (Yubu 37:14) Jehovah bene omiyo tic ki Yubu. Jehovah owacce ni oleg pi lureme adek ma onongo gubalo-ni. (Yubu 42:8-10) Jehovah konyowa nining i kare-ni ka watye ka kato ki i pekki?
11. Baibul twero konyowa nining ka watye ka kato ki i pekki?
11 Jehovah pe loko kwedwa atir atir, kit ma oloko ki Yubu, ento En loko kwedwa kun tiyo ki lokke ma Baibul. (Rom. 15:4) En cuko cwinywa kun miniwa gen pi anyim mamwonya. Nen kong tam mogo ma tye i Baibul ma twero cuko cwinywa ka watye ka kato ki i pekki. Ki i Ginacoya, Jehovah cuko cwinywa ni pe tye gin mo—kadi wa peko madit—ma “bibedo ki twero mo me pokowa woko ki i kom mar pa Lubanga.” (Rom. 8:38, 39) En bene cuko cwinywa ni etye “cok bot jo ducu ma kok bote” i lega. (Jab. 145:18) Jehovah wacciwa ni ka wajenge i kome, wabibedo ki kero me kanyo pekki kun wabedo ki yomcwiny. (1 Kor. 10:13; Yak. 1:2, 12) Lok pa Lubanga bene poyo wiwa ni pekkiwa ducu tye pi tutunu dok gitino adada ka kiporo ki mot ma birii pi naka ma en biminiwa. (2 Kor. 4:16-18) Jehovah ominiwa gen ma kome ni ebijwero ngat ma tye ka kelo pekkiwa, ma en aye Catan Larac-ci kacel ki jo maraco calo en. (Jab. 37:10) Tika dong imako tyeng mogo ma i Baibul ma twero cuko cwinyi i anyim ka itye ka kato ki i pekki?
12. Gin ango ma Jehovah mito ni watim ka wamito nongo adwogi maber ki i Lokke?
12 Jehovah mito ni waket cawa me kwano Baibul piwa kenwa kare ki kare kun walwodo gin ma watye ka kwanone. Ka waketo i tic jami ma watye ka pwonyone, niyewa dongo matek dok wanyiko cok ki Wonwa me polo. Man weko wabedo ki kero me kanyo pekki. Jehovah bene miyo cwiny mere maleng bot jo ma gijenge i kom Lokke. Dok cwiny meno miniwa ‘teko madwong’ me kanyo pekki.—2 Kor. 4:7-10.
13. Cam me cwiny ma “lagwok ot ma lagen dok maryek” miyo konyowa nining me kanyo pekki?
13 Ki kony pa Jehovah, “lagwok ot ma lagen dok maryek” tye ka yubo pwony mapol, vidio, kacel ki wer ma twero konyowa me dongo niye matek kun wabedo cok ki Jehovah. (Mat. 24:45) Mitte ni wati ki jami magi ducu ma Jehovah miniwa. Laminwa mo ma bedo i lobo Amerika macok cok-ki owaco ni etye ki pwoc madit adada pi cam me cwiny magi. En owaco ni: “Pi mwaki 40 ma dong atiyo pi Jehovah, pekki mapol obedo ka temo genena kare ki kare.” Laminwa-ni okato ki i pekki mapol —ladwo mutoka mo ma omer oneko kwarone ma onywalo mine, lunyodone guto woko ki two mo malit, dok en bene olwenyo ki two kanca dong tyen aryo kulu. Ngo ma okonye me ciro pekki magi? En otito ni: “Jehovah kare ducu ogwoka. Cam me cwiny ma en miyo kun tiyo ki lagwok ot ma lagen dok maryek okonya me kanyo pekki. Pi man, atwero lok calo Yubu ma owaco ni: ‘Nio wang ma ato, pe abituro genena!’”—Yubu 27:5, NWT.
Watwero konyo jo mukene me kacokke nining? (Nen paragraf 14)
14. Jehovah tiyo nining ki omege ki lumege me konyowa i kare me pekki? (1 Jo Tecalonika 4:9)
14 Jehovah pwonyo jone me maro ki cuko cwiny luwotgi kekengi i kare me peko. (2 Kor. 1:3, 4; kwan 1 Jo Tecalonika 4:9.) Kit ma Eliu otimo kwede, omegiwa ki lumegiwa kare ducu gibedo atera me konyowa wek pe watur gennewa ka watye i peko. (Tic 14:22) Me labolle, nen kong kit ma kacokke pa laminwa mo ma nyinge Diane gukonye dok gucuko cwinye me medde ki bedo cok ki Jehovah i kare ma two mo malit omako cware. En owaco ni: “Onongo tek adada. Ento waneno cing Jehovah kacel ki marre piwa i kare meno ma onongo kwo tek-ki. Kacokkewa otimo jami mapol me konyowa. Lim ma gulimowa, cim ma gugoniwa, kacel ki kit ma omege ki lumege gugwako kwede korwa okonyowa me kanyo. Kit macalo pe angeyo dwoyo mutoka-ni, omege ki lumege guketo yub wek abed tye i cokke kacel ki cito i tic me pwony ka onongo atwero.” Pud dong wabedo ki yomcwiny madit adada pien watye ki omege ki lumege ma lumar kit man i kacokke!
WATYE KI PWOC PI GWOK PA JEHOVAH
15. Pingo watye ki gen ni watwero kanyo pekki?
15 Wan ducu wang ma wakato ki i peko mo olo. Kadi bed kit meno, wapwonyo ni pe nongo watye kenwa ka watye ka kato ki i pekki magi. Calo wego ma lamar, Jehovah kare ducu gwokowa. En tye cok kwedwa, dok tye atera me winyo legawa ki konyowa. (Ic. 43:2) Watye ki gen ni watwero kanyo peko mo keken pien en ominiwa jami ducu ma mitte me kanyo pekkiwa. En ominiwa mot me lega bote, Baibul, cam me cwiny madwong, kacel ki utmege ma gimarowa me konyowa i kare me peko.
16. Watwero medde ki bedo i te gwok pa Jehovah nining?
16 Watye ki pwoc madit adada me bedo ki Wonwa me polo ma gwokowa! “Wabedo ki yomcwiny pi en.” (Jab. 33:21) Watwero nyuto ki Jehovah ni watye ki pwoc pi kit ma en gwokowa kwede i yo me mar ka watiyo ki jami ducu ma en ominiwa me konyowa. Mitte bene ni watim tic ma mewa wek wamedde ki bedo i te gwok pa Lubanga. I yo macek, ka wamedde ki tute matek me winyo lok pa Jehovah kun bene watimo jami ma atir i wange, ci en bigwokowa matwal!—1 Pet. 3:12.
WER 30 Wora, Lubangana, ki Larema