1. Jami mabeco ango ma jo matino mapol dong gucobo?

 MWAKA ki mwaka, bulu alip mapol ata ginongo batija. Tika in dong inongo batija? Ka inongo, ci bed ki ngec ni omegini ki lumegini me kacokke cwinygi yom adada piri, dok Jehovah bene cwinye yom! (Car. 27:11) Tam kong i kom jami mabeco mapol ma dong ityeko cobogi. Me labolle, ikwano Baibul ki mit kom, gwok nyo pi mwaki mapol. Kwanni me Baibul oweko imoko ni Baibul obedo Lok pa Lubanga. Ento makato meno, ibedo ki kare me ngeyo ki maro Ngat ma oweko kicoyo Baibul. Marri pi Jehovah odongo matek ma oweko imoko tammi me dyero kwoni bot Jehovah dok inongo batija. Imoko tam ma pud dong ber adada!

2. Ngo ma wabinyamo i pwony man?

 ² Ma onongo peya inongo batija, ngene kene ni ikemme ki pekki mogo ma oweko obedo tek me bedo lagen bot Jehovah. Ento ka iwoto ki dongo, ibikemme ki ariya manyen. Catan bitute me juki ki maro Jehovah kacel ki tic Pire. (Ep. 4:14) Pe myero iwek gin ma kit meno otimme. Ngo ma twero konyi me bedo lagen bot Jehovah kun igwoko cikkeni me tic pire? Myero imedde ki tic matek me doko Lakricitayo mucwiny—‘medde anyim ki pwony pa jo muteggi.’ (Ibru 6:1) Ento itwero timo meno nining? Meno aye gin ma wabinyamo i pwony man.

3. Ngo ma mitte ni Lukricitayo ducu gutim i nge nongo batija?

³ I nge nongo batija, mitte ni wan ducu walub tira ma lakwena Paulo omiyo bot Lukricitayo me Epeco. En ocuko  cwinygi me doko Lukricitayo “mucwiny.” (Ep. 4:13) Meno te lokke ni omyero ‘gumedde ki dongo i yo me cwiny.’ Lakwena Paulo oporo dongowa macalo Lukricitayo ki kit ma latin dongo kwede. Lunywal pa latin ma pud kinywalo nyen nongo gimare matek dok gitye ki awaka i kome. Ento latin-ni pe myero ogak latin matwal. I nge kare mo, bimitte ni en owek “kit me tino woko.” (1 Kor. 13:11) Tye marom aroma pi Lukricitayo bene. I nge batija, mitte ni wamedde ki dongo i yo me cwiny. Kong dong wanyamu tam mogo ma twero konyowa me timo meno.

4. Kit maber mene ma twero konyi me dongo i yo me cwiny? Tit kong. (Jo Pilipi 1:9)

⁴ Medde ki dongo marri pi Jehovah. Ngene kene ni imaro Jehovah matek. Ento marri pire twero medde ki dongo matek. I yo ma nining? Lakwena Paulo oloko i kom yo acel, ma kicoyo i Jo Pilipi 1:9. (Kwan.) Paulo olego ni mar pa Lukricitayo me Pilipi “myero odong omedde ameda.” Dong watwero dongo marwa pi Jehovah. Watwero timo man nining? Watimo man ki nongo “ngec kikome ki niang matut.” Ka wamedde ki ngeyo Jehovah maber, ci marwa pire bidongo dok wabibedo ki pwoc pi kite mamwonya kacel ki yo ma en timo kwede ki jami. Mitiwa me yomo cwinye dongo matek dok nongo pe wamito timo gin mo ma cwero cwinye. Watute matek me niang gin ma en mito ki botwa ki dok kit ma omyero wacob kwede.

5-6. Watwero dongo marwa pi Jehovah nining? Tit kong.

⁵ Yecu onongo lubo kit pa Jehovah kore ki kore. Pi meno ka wangeyo Yecu maber, ci marwa pi Jehovah bene bidongo matek. (Ibru 1:3) Yo maber loyo me ngeyo Yecu aye ki kwano Jiri angwen-ni. Ka peya idongo kit mamwonya me kwano Baibul nino ducu, itwero cakone kombeddi ki kwano lok madok i kom Yecu. Ka iwoto ki kwano pwony madok i kom Yecu, ket cwinyi i kom kite. En onongo obedo dano ma lok kwede yot; ki mar en otingo lutino i kore. (Mar. 10:13-16) Yecu onongo obedo lakica ki larem, dok lupwonnyene pe gubedo ki lworo me tite kit ma giwinyo kwede. (Mat. 16:22) Wangeyo ni Yecu onongo tye calo Wonne, pi meno wapwonyo ni Jehovah bene lok kwede yot adada. Watwero lega bote. Ka watye ka lega, waromo tite kit ma watamo nyo wawinyo kwede. Watye ki gen ni en pe bingolo kop i wiwa. En marowa; dok en paro piwa.—1 Pet. 5:7.

⁶ Yecu onongo kica make i kom dano. Lakwena Matayo ocoyo ni: “Ka oneno lwak ci kica omake i komgi mada, pien onongo gitye ka unogi matek, dong gudoko goro, calo romi ma lakwatgi pe.” (Mat. 9:36) Jehovah kono winyo nining? Yecu owaco ni: “Wora ma tye i polo bene pe mito ni ngat mo acel i kin jo magi matino myero oto.” (Mat. 18:14) Lok meno yomo cwinywa pien nyuto ni Jehovah marowa matek! Ka wamedde ki ngeyo Jehovah maber, marwa pi Jehovah bene bidongo.

7. Bedo kacel ki Lukricitayo ma guteggi i yo me cwiny twero konyi nining?

⁷ Itwero bene pwonnye me nyuto mar pi Jehovah kun idoko Lakricitayo muteggi ka ikwanyo kare me ngeyo omege ki lumege me kacokkewu ma guteggi i yo me cwiny. Nen kit ma cwinygi yom kwede. Pe gikoko ange pi tam ma  gumoko me tic pi Jehovah. Penygi wek gutitti jami mogo ma gukato ki iye i tic pi Jehovah. Ka ce itye ki tam ma pire tek me amoka, penygi wek gukonyi ki tam. Wi opo ni, “bedo ki jo mapol ma gin lumi-tam kelo kuc ki bedo maber.”—Car. 11:14.

8. Ngo ma itwero timo ka ce itye ki akalakala i kom gin ma Baibul pwonyo?

⁸ Lweny ki akalakala ma itye kwede. Kit ma kitito kwede i  paragraf me 2, Catan bitute matek me gengi ki dongo niye matek kacel ki nyikke cok bot Jehovah. Yo acel ma en twero timo kwede meno aye ki weko in ibedo ki akalakala i kom pwony mogo me Baibul. Me labolle, jo mogo giromo biti me ye ni Lubanga pe ocweyowa ento kwo ocakke pire kene. Oromo bedo ni, i kare ma onongo pud itidi, pe itamo i kom lok man kulu, ento twero bedo ni kombeddi dong kitye ka pwonyi kwede i cukul. Gin ma lupwonyeni giwaco me cwako pwony man ni kwo ocakke pire kene twero nen calo gin me ryeko adada. Ento, twero bedo ni gin kikomgi peya gutemo niang ka ce Lacwec tye. Wi opo i kom cik ma iye lac ma nonge i Carolok 18:17: “Dano ma kwongo tito lok i lukiko nen calo lokke tye atir, nio ka lawote ma gipido kwede openye ki peny madwong.” Me ka ye mere jami ducu latowang ma kipwonyo i cukul, myero ikwan Lok pa Lubanga i yo matut. Tim kwed i bukkewa. Lok ki omege ki lumege ma onongo yam giye ni kwo ocakke pire kene. Penygi pingo gin dong giye ni Lacwec ma marowa tye. Boko lok ma kit meno twero konyi me ngiyo tyen lok ma moko ni Lacwec tye.

9. Ngo ma ipwonyo ki i gin mutimme i kom Melissa?

⁹ Laminwa mo ma nyinge Melissa onongo adwogi maber ki i kwed mo ma en otimo madok i kom cwec. * En owaco ni: “I cukul, lupwonye gitito pwony man ni kwo ocakke pire kene i yo ma weko nen calo tye ada. I acakkine, onongo pe amito timo kwed pien onongo atye ki lworo ni abinongo ni pwony meno tye ada. Ento abedo ka tam ni Jehovah pe mito ni wamiye mere woro latowang. Man oweko  acako timo kwed. Akwano buk me Is There a Creator Who Cares About You? ki brocuwa me Was Life Created? ki dok The Origin of Life—Five Questions Worth Asking. Meno aye onongo gin ma amito kikome. Abedo ka paro ni kono onongo atimo meno con.”

10-11. Ngo ma twero konyi me loyo atematema me timo tim macilo? (Kwan 1 Jo Tecalonika 4:3, 4, NWT)

¹⁰ Kwer tim macilo. I kare ma itye ki mwaka apar ki wiye, miti me buto twero bedo matek adada, dok iromo bene nongo lyeto ki bot jo mukene me donyo i tim tarwang. Meno aye gin ma Catan mito ni itim. Ngo ma twero konyi me loyo atematema meno? (Kwan 1 Jo Tecalonika 4:3, 4, NWT) * I legani piri keni, tit ki Jehovah kit ma iwinyo kwede dok ikwaye ni omini teko. (Mat. 6:13) Wi myero opo ni Jehovah mito konyi, ento pe me ngoli kop. (Jab. 103:13, 14) Itwero bene nongo kony ki i Lok pa Lubanga. Melissa, ma kiloko i kome con-ni, otute matek me lweny ki tam macilo. En owaco ni: “Kwano Baibul nino ducu okonya me medde ki lweny ki tam macilo. Opoyo wiya ni an abedo dano pa Jehovah dok ni amito tic pire.”—Jab. 119:9.

¹¹ Pe iyelle me cobo pekoni keni. Lok ki lunyodoni i kom yelleni. Ngene kene ni pe yot me lok ki lunywali i kom jami ma kit meno, ento pire tek ni itim. Melissa owaco ni: “Alego pi tekcwiny ci aloko ki babana i kom pekona. I nge timo meno, awinyo ni atye agonya mada. Aniang ni Jehovah tye ki awaka i koma.”

12. Ngo ma twero konyi me moko tam mabeco?

¹² Wek cik ma igi lac me Baibul otiri. Ka iwoto ki dongo, lunywali gibiye ni imok tam mogo piri keni. Kadi bed kit meno, pud tye jami mapol ma pe ingeyo. Itwero gwokke nining ki timo gin ma bibalo watti ki Jehovah? (Car. 22:3) Laminwa mo ma nyinge Kari otito gin ma okonye me moko tam mabeco. En oniang ni ka itye Lakricitayo muteggi, pe mitte ni ibed ki cik pi jami ducu i kwoni. En owaco ni: “Onongo mitte ni aniang kit ma Jehovah neno kwede jami ento pe alub mere cik keken.” Ka itye ka kwano Baibul, pennye kekeni ni: ‘Gin ma atye ka kwano-ni tita ngo madok i kom tam pa Jehovah? Tika tye ki cik ma igi lac ma twero konya me timo gin ma atir? Ka tye kit meno, ci adwogi maber ango ma abinongo ka aketogi i tic?’ (Jab. 19:7; Ic. 48:17, 18) Ka ikwano Baibul kun ilwodo lok i kom gin ma ikwano, ibinongo ni yot me moko tam ma yomo cwiny Jehovah. Ka imedde ki dongo i yo me cwiny, ibineno ni pe mitte ni ibed ki cik pi jami ducu pien ibiniang kit ma Jehovah tamo kwede.

13. Lurem mabeco gitwero konyi nining? (Carolok 13:20)

¹³ Yer lurem ma gimaro Jehovah. Kit ma kitito kwede i paragraf me 7, lurem ma iyerogi gibigudo dongoni macalo Lakricitayo. (Kwan Carolok 13:20.) Laminwa mo ma nyinge Sara onongo tye ka rwenyo yomcwinye. Ento gin mo otimme ma okonye me loko nenone. Sara otito ni: “Anongo lurem mabeco i kare ma onongo amitogi kikome. Onongo arwatte ki lamego mo matidi cabit ducu me yubo Wi Lubele me anyama i kacokke. Larem mukene okonya me cako miyo  lagam i cokke. Pi kony pa lurema, acako tero kwan pira kena kacel ki lega calo gin ma pire tek. Acako dongo wat macok ki Jehovah, dok acako nongo yomcwiny odoco.”

14. John onongo lurem mabeco nining?

¹⁴ Itwero mako lirem ma giromo konyi me bedo maber nining? John, ma kombeddi tiyo macalo laelda owaco ni: “I kare ma onongo pud atidi, onongo amako lirem mabeco ki jo ma watye ka tito kwena kacel kwedgi. Lurem magi onongo komgi mit, dok gukonya me nongo mit pa ticwa me pwony. Acako keto yub me bedo painia marii. Aniang bene ni tyen lok mumiyo onongo ape ki lurem mapol aye ni pien ayenyo lurem i kin yalwakka keken. Lacen amako lurem mabeco ki jo ma atiyo kacel kwedgi i Betel. Lanengi okonya adada me yero galowang maber, dok man onyika cok ki Jehovah.”

15. Gin ango ma Paulo ociko Temceo iye madok i kom mako lurem? (2 Temceo 2:20-22)

¹⁵ Ngo ma omyero itim ka ce iniang ni bedo macok ki ngat mo ma i kacokke twero balo watti ki Jehovah woko? Lakwena Paulo ongeyo ni jo mogo ma i kacokke me cencwari me acel onongo pe gitamo nyo gikwo calo Lukricitayo, pi meno en ociko Temceo ni ogwokke kwedgi. (Kwan 2 Temceo 2:20-22.) Watwa ki Jehovah pire tek adada. Watiyo matek adada me nyikke cok ki Jehovah, dong pe myero wamak lurem ki jo ma bibalo wat meno woko.—Jab. 26:4.

16. Itwero keto yub macalo mene?

¹⁶ Ket yub ma twero konyi. Yer yub ma bijingo niyeni dok bikonyi me doko Lakricitayo muteggi. (Ep. 3:16) Me labolle, itwero keto yub me kwan piri keni ki me kwano Baibul nino ducu. (Jab. 1:2, 3) Nyo itwero kwanyo kare me lega kare ki kare kun ilego ki i cwinyi. Gwok nyo mitte ni ipwonnye me jukke keni ka odok i kom galowang ma iyero nyo kit ma itiyo kwede ki cawani. (Ep. 5:15, 16) Ka Jehovah oneno kit ma itye ka yelle kwede me dongo i yo me cwiny, man biyomo cwinye matek.

17. Adwogi maber ango ma ibinongo ka ikonyo jo mukene?

 ¹⁷ Ibidoko Lakricitayo muteggi ka ce itute me konyo jo mukene. Yecu owaco ni: “Miyo mot kelo gum [yomcwiny] makato gamo agama.” (Tic 20:35) Ibinongo yomcwiny madit adada ka ce itiyo ki cawani kacel ki tekoni me konyo jo mukene. Me labolle, itwero keto macalo yub ma megi me konyo jo muteggi nyo jo ma tye ki goro i kacokkewu. Gwok nyo itwero konyogi ki wilo jami ma mitte ki i cuk nyo pwonyogi kit me tic ki tet manyen calo cim nyo tabulet. Ka itye omego, ket yub me doko lakony kor tic wek ibed ki kare me konyo omegini ki lumegini maber. (Pil. 2:4) Itwero bene nyuto mar bot jo ma gipe i ada ki nywako kwena maber me Ker-ri kwedgi. (Mat. 9:36, 37) Ka ce twere boti, ket yub me tic pi Jehovah pi kare malac.

18. Tic pi kare malac twero konyi nining me nyikke cok ki Jehovah?

¹⁸ Tic pi kare malac twero yabbi doggola me nyiko cok bot Jehovah. Tic macalo painia twero yabbi doggola me cito i Cukul pi Lutit Kwena me Ker-ri. Itwero bedo ki kare me tic i Betel nyo nywako i gero odi me worowa. Laminwa mo matidi ma nyinge Kaitlyn ma tiyo macalo painia owaco ni: “Bedo i tic me pwony kacel ki omege ki lumege ma guteggi okonya me nyiko cok bot Jehovah i nge nongo batija. Lanengi okonya me kwano Baibul i yo matut ki dok me dongo dirona me pwony.”

19. Mot mene ma ibinongone ka ce imedde ki dongo i yo me cwiny?

¹⁹ Ka imedde ki dongo i yo me cwiny, ibinongo mot mapol adada. Pe ibibalo keroni ka cobo yub ma konygi pe. (1 Jon 2:17) Ibibwot ki i arem ma bino pi moko tam maraco. Me ka meno, ibinongo yomcwiny me ada ki mot mapol. (Car. 16:3) Lanenni maber bicuko cwiny luye luwoti ducu, jo matino wa ki jo madongo. (1 Tem. 4:12) Ki dong ma pire tek loyo, ibinongo kuc ki yengo ma bino macalo adwogi me yomo cwiny Jehovah kacel ki bedo ki wat macok kwede.—Car. 23:15, 16.