1. Lok i kom kit ma wacako ngeyo kwede “ada” konyowa nining?

 “ICAKO ngeyo ada nining?” Labongo akalakala mo, dong igamo lapeny meno tyen mapol. Pol kare meno aye lapeny mukwongo ma ngat mukene penyowa ka mito ngeyowa maber. Wamaro winyo kit ma omegiwa ki lumegiwa gucako ngeyo ki maro Jehovah dok wamaro tittigi gin mumiyo wamaro ada. (Rom. 1:11) Boko lok ma kit meno poyo wiya kit ma ada pire tek kwede. Meno bene konyowa me moko matek, me ‘medde ki wot i ada’—nyo me medde ki kwo i yo ma weko wanongo mot kacel ki cwak pa Jehovah.—3 Jon 4.

2. Ngo ma wabinyamo i pwony man?

² I pwony man, wabinyamo tyen lok mogo ma omiyo wamaro ada. I nge meno wabinyamo kit ma watwero medde ki nyuto marwa pi mic mamwonya man. Labongo akalakala mo, nyamo lok meno bidongo pwocwa pi gin ma Jehovah otimo me kelowa i ada. (Jon 6:44) Bijingo bene mitiwa me nywako ada ki jo mukene.

3. Tyen lok ma pire tek loyo ma omiyo wamaro ada obedo ngo?

³ Wamaro ada pi tyen lok mapol. Tyen lok ma pire tek loyo aye ni wamaro Jehovah, ma en aye Wang It me ada. Kwano Lokke Baibul oweko wangeye pe macalo Lacwe polo ki lobo keken, ento bene macalo Wonwa me polo ma lamar dok ma paro piwa. (1 Pet. 5:7) Wangeyo ni Lubangawa “lakica dok maro dano, kiniga pe make oyot, marre ma pe lokke dwong, en lagen mada.” (Nia 34:6) Jehovah maro ngolo kop atir. (Ic. 61:8) Cwero cwinye adada ka en neno wadeno can, en tye atera dok ki miti matek—me giko pekki ducu i kare ma en omoko woko. (Jer.  29:11) Meno pud dong lok mamwonya ya! Pe tye me ur ni wamaro Jehovah adada!

4-5. Pingo lakwena Paulo oporo genwa ki lajuk me mel?

⁴ Tyen lok mukene ango ma watye kwede me maro ada? Ada kelo adwogi maber mapol i kwowa. Nen kong lapor man. I kin lok ada ma wapwonyo ki i Baibul tye iye genwa pi anyim. Me nyuto kit ma gen meno pire tek kwede, lakwena Paulo ocoyo ni: ‘Watye ki gen man macalo lajuk me mel, ma cwinywa cung iye matek, ma pe wawirre atata.’ (Ibru 6:19) Kit macalo lajuk me mel gengo mel pe me wirre atata, genwa ma jenge i Baibul-li twero weko wacung matek ka watye ka kato ki i atematema i kwowa.

⁵ I Ginacoya man, Paulo onongo tye ka lok i kom gen me cito i polo ma Lukricitayo ma kiwirogi gitye kwede. Ento bene lokke gudo Lukricitayo ma gitye ki gen me kwo i paradic i lobo kany. (Jon 3:16) Ki lok ada, pwonyo lok i kom gen me kwo pi naka i lobo omiyo kwowa tye ki tyen lok.

6-7. Adwogi maber ango ma Yvonne onongo i kare ma okwano lok ada i kom anyimwa?

⁶ Nen kong gin mutimme i kom laminwa mo ma nyinge Yvonne. En pe odongo i ada, dok i kare ma en pud tidi en onongo lworo to. Wiye po ni ekwano lok mo ma omoko i wiye matwal, ni: “Nino mo kwoni bigik woko matwal.” Yvonne owaco ni: “Lok meno onongo oweko pe anino maber i dyewor kun abedo ka tam i kom anyim. Onongo atamo ni ‘Kwo pe twero gik woko macek kit man. Pingo atye i lobo kany?’ Onongo pe amito to!”

⁷ Lacen i kare ma Yvonne tye mwaka apar ki wiye en orwatte ki Lucaden pa Jehovah. En otito ni: “Acako ye ni atwero bedo ki gen me kwo pi naka i Paradic i lobo kany.” Pwonyo lok ada okonyo laminwa man nining? En omedo ni: “Pe dong abedo ma wanga twolo i dyewor kun nongo aparo pi anyim nyo to.” Ngene kene ni Yvonne maro lok ada me Baibul dok en maro nywako genne pi anyim ki jo mukene.—1 Tem. 4:16.

8-9. (a) I lapor mo ma Yecu omiyo, ngo ma laco mo otimo i nge nongo lonyo? (b) Ada pire tek lakwene boti?

⁸ I kin lok ada ma wapwonyo ki i Baibul tye iye kwena maber me Ker pa Lubanga. Yecu oporo lok ada madok i kom Ker-ri ki lonyo ma kikano. Kit ma kicoyo kwede i Matayo 13:44, Yecu owaco ni: “Ker me polo rom ki lonyo ma gikano i poto, ma dano onongo ci dok oyiko woko. Dong pi yomcwinye omiyo en ocito ocato jami ducu ma onongo en tye kwede, ci owilo poto meno woko.” Ki i lapor man, laco-ni onongo pe tye ka yenyo lonyo man. Ento i kare ma en onongo lonyo-ni, en ojalo jami mapol wek ewil obed mege. Ki lok ada, en ocato jami ducu ma onongo tye kwede. Pingo? En onongo ngeyo kit ma lonyo meno welle dit kwede. Welle onongo dit loyo gin mo keken ma en ojalo.

⁹ Tika meno aye kit ma iwinyo kwede i kom ada? Labongo akalakala mo, iwinyo kit meno! Wangeyo ni pe tye gin mo keken ma lobo-ni twero miniwa ma watwero porone ki yomcwiny ma watye kwede i tic pi Jehovah kombeddi kun bene nongo watye ki gen me kwo pi naka i kare me anyim i te loc me Ker pa Lubanga. Mot ma watye kwede me bedo ki wat  macok ki Jehovah dit loyo gin mo keken ma mitte ni wajal. Yomcwinywa madit loyo bino ki i “yomo cwinye maber.”—Kol. 1:10.

10-11. Ngo ma otugo cwiny Michael me loko kwone?

¹⁰ Jo mapol i kinwa gujalo jami mapol wek ginong cwak pa Jehovah. Jo mogo guweko dog tic madongo i lobo-ni. Jo mukene gujuko yellegi me doko lulonyo woko. Jo mogo doki guloko kwogi i yo ducu i nge pwonyo lok i kom Jehovah. Meno aye gin ma Michael otimo. En pe odongo i ada. I kare ma en tye awobi, en opwonyo tuko karate. En owaco ni: “Onongo pire tek adada bota me gwoko yot koma kun abedo ka pwonnye. I kare mogo, onongo awinyo ni pe tye ngat mo ma twero loya i lweny.” Ento i kare ma en ocako kwano Baibul, Michael opwonyo kit ma Jehovah neno kwede tim gero. (Jab. 11:5) Michael oloko kit man i kom luot ma gukwano Baibul kwede: “Pe tye nino mo keken ma guwacca ni omyero ajuk nongo pwonnye me karate; gin gumedde ameda ki pwonya lok ada me Baibul.”

¹¹ Ma Michael omedde ki pwonyo lok ada i kom Jehovah, mare pi Jehovah bene odongo matek. Cwiny me kica ma Jehovah nyuto pi luticce aye ogudo cwiny Michael adada. I nge kare mo, Michael oniang ni omyero emok tam ma biloko kwone i yo ducu. En owaco ni, “Aniang ni juko tuko me karate obibedo gin matek loyo ma atimo i kwona. Ento bene aniang ni man biyomo cwiny Jehovah, dok onongo angeyo ni tic pire ber loyo gin mo keken ma abijalo.” Michael oniang ni lok ada ma enongo-ni welle dit ada dok meno aye tyen lok ma oweko en obedo atera me loko kwone.—Yak. 1:25.

12-13. I yo ma nining ma lok ada me Baibul okonyo kwede Mayli?

¹² Me nyuto kit ma ada pire tek kwede, Baibul poro ada ki tara ma tye ka menyo piny i dyewor. (Jab. 119:105; Ep. 5:8) Laminwa Mayli, ma a ki i lobo Azerbaijan, tye ki pwoc madit adada pi kony ma en onongo ki i Lok pa Lubanga. En odongo i paco ma lunywalle dinigi patpat. Wonne onongo tye Cilam, dok minne onongo tye i dini pa Lujudaya. En owaco ni: “Kadi bed kare ducu onongo aye ni Lubanga tye, ento onongo tye lapeny mogo ma ocungo wiya woko. Onongo apennye kekena ni, ‘Pingo Lubanga ocweyo dano, dok pingo ngat mo myero oden can i kare me kwone ducu kun bene kibiwange woko i mac me kapiny pi naka?’ Kit macalo dano giwaco ni jami ducu ma timme obedo miti pa Lubanga, onongo apennye ni, ‘Tika Lubanga doro jami ducu ma timme i kwo pa dano ci dok lacen cwinye bedo yom me neno ka gideno can?’”

¹³ Mayli omedde ki yenyo lagam pi lapennye. I nge kare mo, en oye ni kikwan Baibul kwede dok ojolo ada. En owaco ni, “Kit ma Baibul tito kwede jami kakare okonya me doko ngat ma cwinye yom. Kit ma Lok pa Lubanga tito kwede jami i yo ma niange maber okonya me bedo ma wiya opye mot.” Calo Mayli, wan ducu wapako Jehovah, ‘Ngat ma olwongowa nia ki i piny macol wek wadony i lengone me aura.’—1 Pet. 2:9.

14. Watwero jingo marwa pi ada nining? (Nen bene bok ma wiye tye ni “ Lapor Mukene.”)

¹⁴ Magi lapor manok ma nyuto kit ma ada pire tek kwede. Labongo akalakala  mo itwero tam i kom lapor mukene mapol. Pingo pe iket yub me timo kwed i kare me kwan piri keni wek inong tyen lok mukene ma oweko omyero wamar ada? Ka marwa pi ada medde, ci wabinongo yo mapatpat me nyuto marwa pire.

15. Tit kong yo acel ma watwero nyuto kwede marwa pi lok ada.

¹⁵ Watwero nyuto ni wamaro ada ka wakwano Baibul piwa kenwa ki bukkewa ma jenge i kom Baibul. Man pire tek, pien kadi dong wabedo i ada pi mwaki mapol, pud wabibedo i jami manyen me apwonya. Magajin me Wi Lubele ma kikwongo goyone owaco ni: “Ada tye calo ature mo matidi ma okanne, ma doo me lok goba orumo ka ngete dok cok diyone woko. Wek inong, myero ibed ka yelle me yenyone kare ducu. . . . Ka imito nongone, myero ikulle piny ka kwanyone. Pe iyeng woko ka inongo ature acel keken me lok ada. . . . Medde ameda ki cokone dok iyeny mukene.” Kwan i yo matut obedo tic matek, ento adwogine pe poto nono.

16. Yo me kwan mene ma in inongo ni tiyo maber piri? (Carolok 2:4-6)

 ¹⁶ Pe wan ducu wamaro kwan i yo matut. Ento Jehovah cuko cwinywa me medde ki ‘yenyo’ wek waniang ada i yo matut. (Kwan Carolok 2:4-6.) Ka watute matek, wanongo adwogi maber kare ducu. Omego Corey owaco ni ka etye ka kwano Baibul pire kene eketo cwinye i kom tyeng acel acel. En otito ni: “Angiyo lok ma itere piny kacel ki tyeng mukene ducu ma kubbe ki tyeng meno ma atye ka kwano-ni, dok atimo bene kwed mukene. . . . Kwano Baibul i yo ma kit man konya me pwonyo jami mapol adada!” Kadi bed watiyo ki yo meno me kwan nyo mukene, wanyuto ni watye ki pwoc pi ada ka wakwanyo kare dok watute matek me kwan i yo matut.—Jab. 1:1-3.

17. Tyen lokke ngo me lubo ada? (Yakobo 1:25)

¹⁷ Wangeyo ni kwano lok ada keken pe romo. Me nongo adwogi maber omyero walub ada, nyo ni waket i tic gin ma wapwonyo i kwowa. Meno keken aye biweko ada keliwa yomcwiny kikome. (Kwan Yakobo 1:25.) Ngo ma romo konyowa me ngeyo ka watye ka kwo ma lubbe ki ada? Omego mo omiyo tam ni watwero ngine kekenwa wek wanen kabedo mogo ma watye ka timo maber ki ka ma mito ayuba. Lakwena Paulo oloko iye kit man: “Myero wamedde me cung matek i yo ma dong wao iye.”—Pil. 3:16.

18. Pingo watute matek me ‘medde ki wot i ada’?

¹⁸ Tam kong i kom adwogi mabeco ma wanongo ka watute matek me ‘wot i ada’! Kwowa yubbe bedo maber dok bene waweko cwiny Jehovah kacel ki cwiny luye luwotwa bedo yom. (Car. 27:11; 3 Jon 4) Magi aye tyen lok ma pud dong ber loyo piwa me maro lok ada ki me kwo ma lubbe ki ada!