JEHOVAH oweko lakwena Paulo ocoyo lok i kom kit ma romo abongwen ma cwiny maleng konyowa me dongogi. (Jo Galatia 5:22, 23) Kit magi kilwongogi ni “nyig ma nyak pi cwiny maleng.” * (Nen lok ma tye i tere piny.) Nyig magi bene gubedo but ‘kit pa dano manyen’ ma Lukricitayo myero guruki. (Jo Kolocai 3:10) Kit macalo yat nyako nyige ka pii tye muromo, ngat moni bene bidongo kit magi mamwonya-ni ka cwiny maleng tye ka tic i kwone.—Jabuli 1:1-3.

Kit me acel ma Paulo oloko i kome obedo mar. Kit man mono pire tek lakwene? Paulo owaco ni labongo mar, en ‘epe gin mo.’ (1 Jo Korint 13:2) Mar obedo ngo, dok watwero dongo ki nyutone nining i kwowa me nino ducu?

Kadi bed tek adada me tito gin ango kikome ma mar obedo, Baibul tito kit ma ngat ma lamar tamo dok kwo kwede. Me labolle, ngat ma lamar “diyo cwinye, dok lakica” ki “cwinye bedo yom i lok ada.” Ka ngat moni tye ki mar, ci en “diyo cwinye i kom jami ducu, ye lok ducu, dok bedo ki gen i kare ducu, keto tek bene me ciro jami ducu.” En bedo ki miti matut i kom jo mukene, paro adada pigi, dok bedo larem ma genne. Ento ka ngat moni pe ki mar, ci en bedo lanyeko, lawaka, kwo i yo ma pe rwatte, tamo pi mitine keken, dok bedo ngat ma pe timo kica. Ma ka nyuto kit maraco magi, wamito ni wabed ki mar me ada pi jo mukene, kodi mar ma “pe yenyo gin mukemo en kene.”—1 Jo Korint 13:4-8.

“Lubanga aye mar.” (1 Jon 4:8) Ticce ducu moko meno. Yo madit loyo ma En onyuto kwede mar pi dano aye obedo cwalo Yecu me bino i lobo wek oden can ki dok oto piwa. Lakwena Jon owaco ni: “Gin ma yam onyuto marre botwa en ene, Lubanga ocwalo Wode acel keken i lobo wek omi wabed kwo pire. Man en aye mar, pe ni wan wamaro Lubanga, ento en aye omarowa, ci ocwalo Wode me bedo gin me kwanyo bal woko ki i komwa.” (1 Jon 4:9, 10) Pi mar ma Lubanga tye kwede, dong kitwero timo kica pi balwa dok watwero bedo ki gen ki kwo.

Yecu onyuto ni emaro dano kun dyero kwone me timo miti pa Lubanga. Lakwena Paulo owacciwa ni: “Dong pi mitine meno, omiyo gilonyowa wadoko leng pi Yecu Kricito mumiyo kome ma ka gitum kicel keken ma otyeko lok woko ducu.” (Jo Ibru 10:9, 10) Pe tye ngat mo ma twero nyuto mar madit makato meno. Yecu owaco ni: “Pe tye ngat mo ma tye ki mar madit makato man, ni dano miyo kwone pi lureme.” (Jon 15:13) Tika dano ma tye ki roc-ci gitwero lubo lanen me  mar ma Jehovah gin ki Yecu gunyuto? Twere! Kong dong wanen kit ma watwero timo meno.

Paulo ocuko cwinywa ni: “Wulub kit pa Lubanga, pien wun litinone ma en maro. Wubed kun wulubo yo me mar, macalo Kricito ceng omarowa, ci omine kene piwa.” (Jo Epeco 5:1, 2) Te lokke ngo ka kiwacci “wubed kun wulubo yo me mar”? Te lokke ni myero wanyut mar kare ducu. Pe wawaco awaca keken ni wamaro jo mukene. Wanyuto ki gin ma watimo. Jon ocoyo ni: “Litinona, pe wabedu ki mar i lok ma waloko ki dogwa keken, ento wamar dano ki mar me ada ma nen i tic.” (1 Jon 3:18) Me labolle, watito “lok man me kwena maber me ker pa Lubanga” pien wamaro Jehovah kacel ki luwotwa. (Matayo 24:14; Luka 10:27) ‘Walubo yo me mar’ bene ka wadiyo cwinywa, watye lukica, dok bene watimo kica ki luwotwa. Walubo tira me Baibul man ni: “Timo kica pi bal myero obed tye macalo Rwot [Jehovah] bene ceng otimowu kica.”—Jo Kolocai 3:13.

Ento ka wamiyo tam nyo tira bot jo mukene, nongo pe te lokke ni wape ki mar. Me labolle, me gengo latin ki koko, lunyodo mukene gitimo gin mo keken ma latin mito. Ento lanyodo ma tye ki mar me ada pi latinne i kine mukene pe timo jami ducu ma latinne mito. I yo acel-li, kadi bed ni Lubanga aye mar, en “pwonyo jo ma en maro.” (Jo Ibru 12:6) Pi meno, obedo me mar me miyo tira mupore ka mitte. (Carolok 3:11, 12) Ento wi myero opo ni, wan ducu watimo bal dok i cawa mukene pe wanyuto mar. Pi meno wan ducu watwero dongo marwa. Watwero timo meno nining? Wanen kong yo adek.

Me acel, leg Lubanga wek omini cwiny maleng, ma en aye konyowa me dongo mar. Yecu owaco ni Jehovah “bimiyo cwiny maleng makato bot jo ma lege.” (Luka 11:13) Pi meno, watwero bedo ki gen ni ka walego pi cwiny maleng kun waye ni okonywa, wabibedo jo ma lumar ma loyo kit macon. (Jo Galatia 5:16) Me labolle, ka itye laelda, itwero lega pi cwiny maleng wek okonyi me nyuto mar ka itye ka miyo bot jo mukene tira ma jenge i Baibul. Nyo ka itye lanyodo, itwero lega pi cwiny maleng wek okonyi me miyo tira ki lutinoni, pe ki kiniga ento i yo me mar.

Me aryo, tam matut i kom kit ma Yecu onyuto kwede mar kadi bed ni jo mukene gutere i yo marac. (1 Petero 2:21, 23) Ka ngat mo ocwero cwinyi nyo kiteri i yo ma pe oporre, penye kekeni ni, ‘Ngo ma onongo Yecu bitimone?’ Lamego mo ma nyinge Leigh onongo ni penye kekene kumeno okonye me tam ma peya etimo gin mo. En owaco ni: “I kare mo latic lawota ocwalo ki e-mail lok marac i koma ki ticca bot lutic luwota mukene. Cwinya ocwer adada. Ento apenye kekena ni, ‘Atwero lubo lanen pa Yecu nining i kit ma myero ater ngat man?’ I nge tam i kom gin ma Yecu onongo bitimo, amoko tamma me giko lokke kumeno ki dok pe me tero lokke calo gin madit tutwal. Lacen, aniang ni ngat meno onongo tye ki peko me yot kom, dok onongo tye ki par mapol. Aniang ni lok ma en ocwalo i e-mail pe nyuto kit ma en winyo kwede ki i cwinye. Tamo kit ma Yecu onyuto kwede mar kadi bed kicwero cwinye okonya me nyuto mar bene bot latic lawota meno.” Ka walubo lanen pa Yecu, ci wan bene wabinyuto mar bot jo mukene.

Me adek, pwonye me nyuto cwiny me jalle ken. Man obedo mar ma nyuto lulub kor Kricito me ada. (Jon 13:34, 35) Yecu bene onyuto kit mar man, dok ominiwa lanen maber adada me aluba. I yo ma nining? En oweko polo, ci “okwanyo kit me opii” piwa “nio bene wa i to.” (Jo Pilipi 2:5-8) Ka walubo lanen pa Yecu me jalle ken, tamwa ki kit ma wawinyo kwede bidoko calo mege, ci wabiketo miti pa jo mukene mukwongo ma ka megwa.

Adwogi maber mapol bino pi nyuto mar. Kong wanen labol aryo:

• NOTE MA BEDO I KIN UTMEGE ME TWOK LOBO DUCU: Pi mar ma watye kwede pi luwotwa, wangeyo ni omege ki lumegiwa ma gitye i kacokke mo keken ma walimo i twok lobo ducu gibijolowa maber adada. Obedo mot madit adada me ngeyone ni ‘utmegini ma gitye i lobo ducu’ gimari adada! (1 Petero 5:9) Wanongo kodi mar ma kit meno i kin jo pa Lubanga keken.

• KUC: Ka “ngat acel acel diyo cwinye i kom lawote ki mar,” ci wabibedo “acel i twec me kuc.” (Jo Epeco 4:2, 3) Wabedo ki kuc man i cokkewa, i gurewa me nino acel ki dong gurewa madito. Tika in bene pe iye ni bedo ki kuc ma kit meno dok tye me ur adada i lobo me kare-ni ma danone pe giribbe-ni? (Jabuli 119:165; Icaya 54:13) Ka wayenyo kuc, ci wanyuto ni wamaro luwotwa, dok man yomo cwiny Wonwa me polo.—Jabuli 133:1-3; Matayo 5:9.

Paulo ocoyo ni: “Mar medo tek bot dano.” (1 Jo Korint 8:1) Man te lokke ngo? I 1 Jo Korint cura 13, ma jo mukene lwongo ni “Wer me Mar,” Paulo otito kit ma mar medo tek bot dano. Mar tamo pi ber bedo pa jo mukene. Mar tamo pi miti pa jo mukene. (1 Jo Korint 10:24; 13:5) Dok pien tamo dok paro pi jo mukene, diyo cwinye, dok lakica, mar weko wat i kin jo me ot bedo matek ki jo me kacokke bene gibedo ma ginote i kingi.—Jo Kolocai 3:14.

Tye yo mapol ma wanyuto mar bot jo mukene, ento marwa pi Lubanga aye pire tek loyo ducu dok weko wat i kinwa bedo matek. Pingo? Pien marwa pi Lubanga weko wabedo ma wanote i kinwa! Dano ma gia ki i kwo mapatpat, ma rangi del komgi patpat, dok lebgi bene patpat gitye ka woro Jehovah kacel, kun gitiyo bote “ki cwiny acel.” (Jepania 3:9) Wamoko wunu tamwa me nyuto kit man ma nyak pi cwiny maleng-gi nino ducu.