1, 2. (a) Wangeyo nining ni twere me ruko kit pa dano manyen? (b) Kit mene pa dano manyen ma wapwonyo ki i Jo Kolocai 3:10-14?

I BAIBUL me New World Translation of the Holy Scriptures, wanongo lok man ni “kit pa dano manyen” tyen aryo kulu. (Jo Epeco 4:24; Jo Kolocai 3:10) Man loko i kom kit pa dano ma “giketo i cal pa Lubanga kikome.” Tika twere me dongo kit pa dano manyen? Twere. Jehovah ocweyo dano i calle, pi meno watwero dongo kit mabeco ma en tye kwede.—Acakki 1:26, 27; Jo Epeco 5:1.

² Tye lok ada ni pien wan ducu walako roc, wabedo bene ki miti marac i cawa mukene. Jami murumowa bene gudowa i yo marac. Ento ki kony pa Jehovah, watwero bedo kodi dano ma en mito ni wabedi. Wek wamok tamwa me timo meno, kong dong wanyamu kit mogo ma tye i kin kit pa dano manyen. (Kwan Jo Kolocai 3:10-14.) Ci dok wabineno kit ma watwero nyuto kwede kit magi i ticwa me pwony.

3. Kit mene mukene ma tye i kin kit pa dano manyen?

³ Paulo otito ni bedo labongo apokopoka tye i kin kit ma pire tek pa dano manyen. En owaco ni: ‘Apokapoka pe i kin Lugrik ki Lujudaya, ngat ma giliro ki ngat ma pe giliro, larok ma kwiya piny mere ata ma pe ngeyo leb, rok ma pud gudong cen i kit me wi lobo, opii, ki ngat ma dong lone kene.’ Ngat mo ki i kacokke pe myero otam ni en dok pire tek loyo jo mukene pi rangi del kome, lobo ma en a iye, nyo pi rwom ma en tye kwede. Pingo? Pien lulub kor Kricito ducu ‘dong girom.’—Jo Kolocai 3:11; Jo Galatia 3:28.

4. (a) Lutic pa Jehovah myero guter luwotgi nining? (b) Gin ango ma twero balo note ma i kin Lukricitayo?

⁴ Ka waruko kit pa dano manyen, watero jo ducu ki woro, kun pe waketo tamwa i kom rangi del komgi nyo ka ma gia iye. (Jo Roma 2:11) I kabedo mukene i lobo-ni, meno twero bedo tek adada. Me labolle, i kare mukato angec i South Africa, gamente onongo oketo ni dano myero gubed i kabedo mapatpat ma lubbe ki rangi del komgi. Jo mapol i lobo meno, kadi wa Lucaden bene pud gibedo i kabedo meno wa i kare-ni. Lukiko Madit onongo mito cuko cwiny utmegiwa ni ‘guyab cwinygi malac.’ Pi meno, i Oktoba 2013, kiketo yub mo ma kite dok pat me konyo utmege me rangi del kom mapatpat me ngeyo luwotgi maber.—2 Jo Korint 6:13.

5, 6. (a) Yub ango ma kiketo i lobo mo me konyo jo pa Lubanga me note i kingi (Nen cal ma tye i pot karatac 21.) (b) Adwogi me yub man obedo nining?

⁵ Utmege guketo yub wek i tum cabit mogo, Lucaden ma i kacokke aryo ma giloko leb mapatpat nyo me rangi del kom mapatpat gutim jami mogo kacel. Omege ki lumege me kacokke meno gunywako i tito kwena ki cokke kacel, dok bene gulimo luwotgi ki gang. Kacokke miya mapol gunywako i yub man, dok jang gang kal onongo ripot mapol mabeco. Man bene ogudo wa cwiny jo ma pe gubedo Lucaden. Me labolle, lapwony dini mo acel owaco ni: “An pe abedo Lacaden, ento abiwaco ni wutito kwena i yo maber adada, dok wupe ki apokapoka pi rangi del kom.” Omege ki lumege guwinyo nining pi yub man?

⁶ I acakkine, laminwa mo ma loko leb Xhosa, ma nyinge Noma, onongo lworo lwongo Lucaden ma gia ki i kacokke me leb munu i gange matidi-ni. Ento i kare ma en otiyo kacel ki Lucaden ma muni i ticwa me pwony dok olimogi ganggi, en ocako winyo agonya. En owaco ni: “Gin bene gibedo calo wan!” Dong ma omege ki lumege ma i kacokke me leb munu gubino ka nywako i tito kwena kacel ki jo ma i kacokke me  leb Xhosa, Noma olwongo jo mogo i kingi ni gubin gange ka cam. Ogudo cwinye adada i kare ma en oneno ni ngat acel i kin wele magi, laelda ma munu, onongo cwinye yom me bedo i wi crate cupa. Pi yub man ma pud tye ka wot anyim-mi, omege ki lumege mapol gunongo lirem manyen dok gitye ka medde ki ngeyo jo ma gia ki i kabedo mapatpat.

7. Pingo myero wapar pi jo mukene?

⁷ Jo pa Jehovah gibiwok ki i atematema nio wang ma kijwero lobo pa Catan-ni. Wan ducu wabikemme ki can tic, two malit, aunauna, pekki ma poto atura, rwenyo pa jami pi turo cik, nyo pekki mogo mukene. Ka waparo pi luwotwa, ci wabikonye kekenwa i kare me atematema. Wabitero jo mukene i yo me kica ka waparo pigi. (Jo Epeco 4:32) Kit magi gubedo i kin kit pa dano manyen. Gibikonyowa me lubo lanen pa Lubanga ki me kweyo cwiny jo mukene.—2 Jo Korint 1:3, 4.

8. Gin ango maber ma romo timme ka waparo dok wanyuto cwiny me kica bot jo ducu me kacokke? Mi labol.

⁸ I yo ango ma watwero nyuto kica bot jo ma i kacokkewa ma gia ki i lobo mukene, nyo ma gilupeko? Myero wajolgi, wamak lirem kwedgi, dok wakonygi me neno ni wamitogi i kacokke. (1 Jo Korint 12:22, 25) Me labolle, Dannykarl oa ki Philippines ci odak i Japan. Ki i gang ticce, onongo pe kitere marom ki lutic luwote pien ni en larok. I nino mo en ocito i kacokke pa Lucaden pa Jehovah. Dannykarl owaco ni: “Cokcok dano ducu ma gubedo i cokke onongo gia ki i Japan, ento gujola maber adada calo onongo gingeya con.” Kica ma utmege gunyuto omedde ki konye me nyikke cok bot Jehovah. I nge kare mo, Dannykarl onongo batija, dok i kare-ni, en tiyo macalo laelda. Luelda luwote gitye ki yomcwiny ni en kacel ki dakone, Jennifer, gitye i kacokkegi dok guwaco ni: “Gikwo kwo ma rwomme lapiny macalo painia dok ginyuto lanen maber i kom keto pi Ker-ri mukwongo.”—Luka 12:31.

9, 10. Mi labol mogo ma nyuto adwogi maber ma bino ka waparo pi dano ma warwatte kwedgi i ticwa me pwony.

⁹ Watye ki kare me timo “gin maber bot dano ducu” ka watito lok me kwena maber me Ker-ri. (Jo Galatia 6:10) Kica mako lucaden mapol i kom jo ma gia ki i lobo mukene ma oweko gitemme me pwonyo lebgi. (1 Jo Korint 9:23) Tutegi okelo adwogi maber. Me labolle, lapainia mo i lobo Australia ma nyinge Tiffany opwonyo leb Swahili wek emi kony i kacokke mo me Swahili i boma me Brisbane. Kadi bed ni pe obedo yot me pwonyo leb meno, en dok tye ki yom cwiny makato kit macon. Tiffany owaco ni: “Ka imito nongo yomcwiny i ticwa me pwony, ci myero iti i kacokke ma bedo i leb pa jo ma gia ki i lobo mukene. Bedo calo itye ka wot labongo a ki i loboni. Ibinongo mit pa note ma tye i kin utmege ma i twok lobo ducu kun ineno tango man ki wangi.”

¹⁰ Jo me ot mo i Japan bene gutimo  gin ma kit meno. Anyakagi ma nyinge Sakiko owaco ni: “Pol kare onongo warwatte ki jo ma gia ki Brazil ka watye i ticwa me pwony. Ka wanyutigi ginacoya mo ki i Baibulgi ma tye i leb Portuguese, calo Niyabo 21:3, 4 nyo Jabuli 37:10, 11, 29, giketo cwinygi iye adada dok i kine mogo gikok ki pig wang.” Jo me ot man kica omakogi i kom lubedo magi adada dok onongo gimito konyogi me pwonyo ada, pi meno, gucako pwonyo leb Portuguese kacel macalo jo me ot. Lacen, jo me ot man gukonyo me cako kacokke me leb Portuguese. Pi mwaki mapol dong, gin gukonyo lubedo mapol me doko lutic pa Jehovah. Sakiko owaco ni: “Wayelle matek me pwonyo Portuguese, ento mot ma wanongo pe pore ki yele magi ducu. Watye ki pwoc madit adada bot Jehovah.”—Kwan Tic pa Lukwena 10:34, 35.

11, 12. (a) Pingo myero wabed ki tyen lok matir me ruko kit pa dano manyen? (b) Gin ango ma bikonyowa me bedo jo ma mwol?

¹¹ Tyen lok mumiyo waruko kit pa dano manyen aye me keto deyo i kom Jehovah, ento pe me nongo pak ki bot jo mukene. Wi myero opo ni kadi wa malaika ma pe ki roc bene odongo cwiny me awaka ci opoto i bal. (Por ki Ejekiel 28:17.) Wan watye ki roc, pi meno, tek adada botwa me gwokke ki cwiny me awaka. Ento waromo dongo cwiny me mwolo. Gin ango ma twero konyowa me timo meno?

¹² Gin acel ma bikonyowa me bedo jo ma mwol aye kwano Lok pa Lubanga nino ducu, ki lwodo lok i kom gin ma wakwano. (Nwoyo Cik 17:18-20) Mitte ni myero walwod lok i kom gin ma Yecu opwonyowa ki bene lanen maber ma en onyuto me mwolo. (Matayo 20:28) Yecu onongo mwol adada ma oweko en olwoko tyen lukwenane. (Jon 13:12-17) Gin mukene ma waromo timone aye lega bot Jehovah pi cwiny maleng. Cwiny maleng twero konyowa me lweny ki tam ni wan dok waber nyo piwa tek loyo jo mukene.—Jo Galatia 6:3, 4; Jo Pilipi 2:3.

13. Mot ango ma bino ka wamwol?

¹³ Kwan Carolok 22:4. Jehovah  mito ni wabed jo ma mwol. Mwolo kelo mot mapol. Ka wamwol, kacokke bibedo ki kuc dok ma danone ginotte i kingi. Dok Jehovah binyutiwa kicane ma pe wapore pire. Lakwena Petero owaco ni: “Wun ducu wurukke ki mwolo, ngat acel acel i nyim lawote, pien ‘Lubanga pyem ki jo ma wakke ento miyo kica bot jo mamwol.’”—1 Petero 5:5.

14. Anga ma wor dok diyo cwinye loyo ducu?

¹⁴ I kare-ni, ka ngat moni wor dok diyo cwinye, ci jo mukene gitamo ni en goro. Ento meno pe ada. Kit magi mamwonya-ni a ki bot Jehovah, Ngat matek loyo ducu. En wor dok diyo cwinye ma loyo ngat mo keken. (2 Petero 3:9) Me labolle, tam kong i kom kit ma Jehovah odiyo kwede cwinye i kare ma en ogamo lok pa Abraim gin ki Lot kun tiyo ki Lumalaikane. (Acakki 18:22-33; 19:18-21) Tam bene i kom kit ma Jehovah odiyo kwede cwinye i kom Luicrael ma wigi otang-ngi pi mwaki makato 1,500 kulu.—Ejekiel 33:11.

15. Lanen ango ma Yecu onyuto madok i kom bedo ngat ma wor dok ma diyo cwiny?

¹⁵ Yecu onongo ‘wor.’ (Matayo 11:29) En odiyo cwinye adada i kom goro pa lupwonnyene. I kare ma en tye i lobo, dano onongo pol kare gimoro koko gobagoba i kome. Ento en omedde ki bedo ngat ma wor dok ma diyo cwinye nio wa i to. I kare ma Yecu tye i arem malit adada i kom yat, en okwayo Wonne ni otim kica i kom jo ma guneke. En owaco ni: “Pe gingeyo gin ma gitye ka tiyone.” (Luka 23:34) Kadi wa i kare ma Yecu tye ki par mapol nyo i arem, en omedde ki bedo ngat ma wor kun diyo cwinye.—Kwan 1 Petero 2:21-23. 

16. Watwero nyuto ni wawor dok wadiyo cwinywa nining?

¹⁶ Paulo oloko i kom yo acel ma watwero nyuto woro ki diyo cwiny i kare ma en ocoyo ni: “Wudi cwinywu kekenwu, ngat acel acel odi cwinye i kom lawote, kun wutimo kica ki luwotwu i kinwu kekenwu pi balwu. Ka ngat mo i kinwu tye ki lok mo i kom lawote, timo kica pi bal myero obed tye macalo Rwot bene ceng otimowu kica.” (Jo Kolocai 3:13) Wek wabed jo ma timo kica bot luwotgi, myero wabed jo ma wor dok ma gidiyo cwinygi. Man kelo dok gwoko note ma tye i kacokke.

17. Pingo woro ki diyo cwiny pire tek adada?

¹⁷ Jehovah mito ni wawor dok wadi cwinywa i kom jo mukene. Kit magi pigi tek adada ka wamito ni wabed i lobo manyen. (Matayo 5:5; Yakobo 1:21) Ka wawor dok wadiyo cwinywa, ci waketo deyo i kom Jehovah dok wakonyo jo mukene me timo meno bene.—Jo Galatia 6:1; 2 Temceo 2:24, 25.  

18. Mar kubbe ki bedo labongo apokapoka nining?

¹⁸ Kit ma wanyamogi-ni ducu kubbe ki mar. Me labolle, onongo mitte ni lakwena Yakobo omi tira bot omegine pien ni gitero lulonyo maber loyo lucan. En otito ni meno onongo pe rwatte ki cik ma Lubanga omiyo ni myero ‘imar lawoti macalo imarre keni.’ Ci en dok omedde ni: “Ka ce wupoko kin dano, nongo wutimo rac.” (Yakobo 2:8, 9) Ka wamaro jo mukene, pe wabipoko kin dano ma lubbe ki rwom me kwangi, rangi del komgi, nyo rwom ma gitye kwede i kabedo moni. Pe watwero porone apora ni wan pe wapoko kin dano. Myero obed kitwa kikome.

19. Pingo pire tek ni waruk kit me mar?

¹⁹ Mar bene ‘diyo cwinye, lakica’ dok “pe wakke.” (1 Jo Korint 13:4) Myero wabed jo ma diyo cwinygi, ma lukica, dok ma gimwol wek wamedde ki nywako lok me kwena maber bot jo mukene. (Matayo 28:19) Kit magi bene weko bedo yot me bedo ki wat maber ki omegiwa kacel ki lumegiwa ducu me kacokke. Ka wan ducu wanyuto mar, kacokkewa bibedo ma onote dok man kelo deyo bot Jehovah. Jo mukene bene gibineno kit ma wanote kwede dok man biywayogi i woro me ada. Pore mada ni Baibul giko ki tito lok i kom kit pa dano manyen ni: “Makato magi ducu, myero wubed kun wupong ki mar. Pien mar keken aye tweyo jami ducu, ribogi kacel ma cobo bene maber licwic.”—Jo Kolocai 3:14.

20. (a) Lapeny mene ma myero wapenye kwede, dok pingo? (b) Anyim mamwonya ango ma watye ka kurone?

²⁰ Myero wapenye ni, ‘Ka kwene i kwona ma mitte ni aloki wek abwot kit kwona macon kwicikwici?’ Myero waleg bot Jehovah kun wakwaye ni okonywa. Myero watute matek me jwayo tam ki tim marac wek ‘ker pa Lubanga obed megwa.’ (Jo Galatia 5:19-21) Myero bene wapenye kekenwa ni, ‘An tika pud atye ka medde ki loko kit ma atamo kwede wek ayom cwiny Jehovah?’ (Jo Epeco 4:23, 24) Wan watye ki roc, pi meno myero wamedde ki tute matek wek waruk dok wagwok kit pa dano manyen. Man obedo gin ma woto ki timme motmot. Kwo bibedo mamit adada ka jo ducu dong gitye ki kit pa dano manyen dok giporo kit ma mwonya pa Jehovah labongo roc mo keken!