1. Itwero dongo lirem macok ki ngat moni nining?

POL KARE gin mukwongo ma watimo me dongo lirem ki ngat moni aye kwanyo kare me bedo kwede. Ka wuwoto ki nywako tam i kinwu ci wat i kinwu bene dongo. Ento ka odok i kom dongo wat macok ki Yecu, watye ki ariya mogo. Ariya magi gubedo ngo?

2. Ariya mukwongo ango ma watye kwede?

² Ariya mukwongo aye ni peya warwatte ki Yecu wang ki wang. Lukricitayo mapol i cencwari me acel bene gukato ki i ariya man. Kadi bed kit meno, lakwena Petero owaco ni: “Kadi pud pe wunene, dong wumare. Dok bene kombeddi kadi pe wunene, wuye en.” (1 Pet. 1:8) Pi meno, twere me bedo ki wat macok ki Yecu kadi bed pe wanene wang ki wang.

3. Ariya me aryo mene ma wakemme kwede?

³ Ariya me aryone aye ni pe watwero lok ki Yecu. Ka walego, waloko bot Jehovah. Tye lok ada ni, ka walego, walego i nying Yecu, ento nongo pe watye ka lega bot Yecu. Yecu bene kikome pe mito ni waleg bote. Pingo pe mito? Pien lega obedo worowa, dok Jehovah keken aye myero wawor. (Mat. 4:10) Kadi bed kit meno, pud watwero nyutu marwa pi Yecu.

4. Ariya me adek mene ma wakemme kwede, dok gin ango ma wabinyamo i pwony man?

 ⁴ Ariya me adek aye ni Yecu bedo i polo, dong pe watwero bedo kacel kwede. Ento pud watwero ngeyo jami mapol madok i kom Yecu kadi bed pe wabedo kacel kwede. Wabinyamo jami angwen ma watwero timo me jingo liremwa kwede. Me acel, kong dong wanenu pingo pire tek me dongo lirem macok ki Kricito.

5. Pingo omyero wabed lurem Yecu? (Nen bene bok ma wiye ni “ Bedo Larem Yecu Konyowa me Mako Lirem ki Jehovah” ki “ Bed ki Neno Mupore i kom Tic pa Yecu.”)

⁵ Myero wabed lurem Yecu ka wamito ni wabed ki wat maber ki Jehovah. Pingo meno tye lok ada? Nen kong tyen lok aryo magi. Me acel, Yecu otito ki lupwonnyene ni: “Won kikome marowu, pien wun wumara.” (Jon 16:27) En bene owaco ni: “Pe tye ngat mo ma bino bot Won, kono ki i an keken.” (Jon 14:6) Tute me bedo larem Jehovah labongo dongo wat macok ki Yecu bedo calo temme me donyo i ot labongo tic ki doggola. Yecu otiyo ki lapor macal ki man i kare ma owaco ni ebedo “doggola me romi.” (Jon 10:7) Tyen lok me aryo aye ni Yecu oporo kit Wonne macok adada. En owaco ki lupwonnyene ni: “Ngat ma oneno an dong oneno Won.” (Jon 14:9) Pi meno, yo acel ma pire tek ma watwero ngeyo kwede Jehovah aye obedo ka wapwonyo jami ma otimme i kwo pa Yecu. Ka wawoto ki pwonyo lok i kom Yecu, marwa pire bene dongo. Dok bene ka wat i kinwa ki Yecu woto ki dongo, marwa i kom Wonne bene dongo medde.

6. Tyen lok mukene ango ma oweko myero wabed ki wat macok ki Yecu? Tit kong.

 ⁶ Omyero wabed ki wat macok ki Yecu wek Lubanga ogam legawa. Man tyen lokke ni omyero watim gin mo makato mere waco ni “i nying Yecu” i nge legawa. Myero waniang yo ma Jehovah tiyo kwede ki Yecu me gamo legawa. Yecu owaco ki lupwonnyene ni: “Gin ducu ma wubilego i nyinga, abitiyone.” (Jon 14:13) Kadi bed ni Jehovah aye winyo dok gamo legawa, en omiyo ki Yecu twero me cobo Tamme. (Mat. 28:18) Pi meno, ma peya Lubanga ogamo legawa, en kong neno ka ce walubo tira ma Yecu omiyo. Me labolle, Yecu owaco ni: “Ka wutimo kica bot dano pi balgi, ci Wonwu ma tye i polo bene bitimowu kica; ento ka pe wutimo kica bot dano pi balgi, ci Wonwu ma tye i polo bene pe bitimowu kica pi balwu.” (Mat. 6:14, 15) Pud dong pire tek ya, ni water jo mukene kit ma Jehovah kacel ki Yecu giterowa kwede!

7. Anga ma binongo adwogi maber ki i ginkok pa Yecu?

⁷ Jo ma gitye ki wat macok ki Yecu aye gibinongo adwogi maber ki i ginkokke. Wangeyo man nining? Yecu owaco ni ‘emiyo kwone pi lureme.’ (Jon 15:13) Bimitte ni jo ma lugen ma gutiyo pi Jehovah ma peya Yecu obino i lobo gupwony lok i kom Yecu dok gumarre. Co ki mon calo Abraim, Cara, Moses, ki Rakab kibicerogi, ento kadi wa lutic pa Jehovah magi ma kitgi atir-ri bimitte ni gudong wat macok ki Yecu wek gunong kwo ma pe tum.​—Jon 17:3; Tic 24:15; Ibru 11:8-12, 24-26, 31.

8-9. Kit ma kitito kwede i Jon 15:4, 5, liremwa ki Yecu konyowa me timo gin ango, dok pingo man pire tek?

⁸ Watye ki yomcwiny me tic kacel ki Yecu i tic me tito kwena ki pwonyo dano kwena maber me Ker pa Lubanga. I kare ma Yecu tye i lobo, en onongo obedo lapwony. Dok i kare ma Yecu odok cen i polo, macalo lawi kacokke, en pud tye ka medde ki doro ticwa me tito kwena ki pwonyo dano. Yecu neno dok tye ki pwoc pi tuteni me konyo jo mapol kit ma itwero me ngeyo en kacel ki Wonne. Lok ada tye ni, watwero cobo tic man ki kony pa Yecu ki Jehovah keken.​—Kwan Jon 15:4, 5.

⁹ Lok pa Lubanga pwonyo ka maleng ni myero wamar Yecu dok wadong wat macok kwede ka wamito yomo cwiny Jehovah. Pi meno, kong dong wanenu jami angwen ma watwero timone wek wadok lurem Yecu.

10. Gin ango mukwongo ma omyero watim wek wadong lirem ki Yecu?

¹⁰ (1) Tute me ngeyo Yecu. Watwero timo man ki kwano bukke magi: Matayo, Marako, Luka, ki Jon. Ka wawoto ki lwodo gin ma wakwano i Baibul i kom Yecu, ci wadongo mar ki woro matut i kom Yecu pi kit ma en otero kwede ki jo mukene i yo me kica. Me labolle, kadi bed en onongo tye Ladit pa lupwonnyene, en pe oterogi macalo opii. Me ka meno, en otittigi lok ma i cwinye kacel ki kit ma en winyo kwede. (Jon 15:15) I kare ma cwinygi ocwer, Yecu bene okok kacel kwedgi. (Jon 11:32-36) Kadiwa lumonene bene guniang ni Yecu onongo  tye lurem jo ma giwinyo lokke. (Mat. 11:19) Ka walubo lanen pa Yecu i kit ma en otero kwede lupwonnyene, ci watwa ki jo mukene yubbe, wabedo ki yomcwiny, dok pwocwa pi Kricito bene dongo.

11. Yo me aryo mene ma watwero doko kwede lurem Yecu, dok pingo man pire tek?

¹¹ (2) Tam dok itim jami calo Yecu. Ka wawoto ki dongo niangowa dok watamo calo Yecu, ci liremwa kwede bene dongo bedo matek. (1 Kor. 2:16) Watwero lubo lanen pa Yecu nining? Nen kong labol acel. Yecu onongo pol kare tamo pi kit ma ebikonyo kwede jo mukene makato yomo cwinye kekene. (Mat. 20:28; Rom. 15:1-3) Pien en onongo tamo kit meno, en obedo ngat ma jalle dok timo kica ki dano. En onongo pe keco oyotoyot pi kit ma dano onongo loko kwede i kome. (Jon 1:46, 47) En onongo pe oye ni bal ma ngat mo otimo i kare mukato angec ogud kit ma en neno kwede ngat meno. (1 Tem. 1:12-14) Yecu owaco ni: “Dano ducu bingeyo ni wun lupwonnyena, ka mer tye i kinwu.” (Jon 13:35) Pingo pe ipennye kekeni ni, “Tika atye ka lubo lanen pa Yecu kun atimo jami ducu ma atwero me bedo ki wat maber ki omege ki lumegina?”

12. Yo me adek mene ma watwero doko kwede lurem Yecu, dok watwero timo man nining?

¹² (3) Mi cwak bot omegi Kricito. Yecu neno jami ma watimo pi omegine ma kiwirogi calo watye ka cwako kor en kikome. (Mat. 25:34-40) Yo ma pire tek loyo ma wamiyo kwede cwak bot jo ma kiwirogi aye ki nywako i tic me tito kwena me Ker-ri ma Yecu omiyo bot lulub kore. (Mat. 28:19, 20; Tic 10:42) Omegi Kricito gitwero cobo tic me tito kwena i rwom ma lamal kit ma tye ka cobbe kwede i wi lobo i kare-ni ki kony pa “romi mukene” keken. (Jon 10:16) Ka itye i kin romi mukene-ni, kare ducu ma inywako i tic man, nongo itye ka nyuto marri pi omegi Kricito kacel ki Yecu bene.

13. Watwero keto i tic nining tira ma Yecu omiyo i Luka 16:9?

¹³ Wamako wat ki Jehovah kacel ki Yecu ka watiyo ki centewa me cwako tic ma gitye ka dorone. (Kwan Luka 16:9.) Me labolle, watwero miyo mot me cwako tic ma kwako wi lobo-ni ducu, dok cente meno kitiyo kwede me konyo tic me tito kwena wa i bor piny, gero ki roco odi ma kitiyo kwede pi worowa, ki miyo kony bot jo ma can opoto atura i kabedogi. Watwero bene konyo jo me kacokkewa ma wangeyo ni gitye ki peko me can lim. (Car. 19:17) Magi aye yo ma watwero miyo kwede cwak bot omegi Kricito.

14. Kit ma kinyuto kwede i Jo Epeco 4:15, 16, yo me angwen mene ma watwero doko kwede lurem Yecu?

¹⁴ (4) Mi cwak pi yub ma dul pa Jehovah keto. Macalo lawi kacokke, wat i kinwa ki Yecu dongo ka walubo tira ma omege ma kicimogi me gwoko kacokke giminiwa. (Kwan Jo Epeco 4:15, 16.) Me labolle, i kare-ni watye ka keto tek me neno ni Odi me Ker ducu kitiyo kwedgi ma nongo gupong maber. Pi meno, kacokke mogo kiribogi ki kacokke mukene dok kiloko wang ticgi woko. Yub man tye ka konyo dulwa me gwoko cente madwong. Ento ki tungcel, pi yub man, mitte ni lutit kwena mogo gukat ki i alokaloka. Twero bedo ni utmegiwa magi gubedo i kacokke moni pi mwaki mapol  dok gudongo wat macok ki omege ki lumege. Ento i kare-ni kitye ka waccigi ni gudak i kacokke mapat. Yecu bedo ki yomcwiny madwong adada ka neno kit ma utmegiwa ma lugen magi gitye ka lubo kwede yub manyen man!

15. I anyim, wat i kinwa ki Yecu bidongo medde ameda nining?

¹⁵ Jo ma kiwirogi ki cwiny maleng gitye ki gen me kwo kacel ki Yecu i polo pi naka, kun giloyo loc kacel kwede i Ker pa Lubanga. Ki lok ada gibibedo kacel ki Kricito​—gibineno en wang ki wang, kun giloko kwede. (Jon 14:2, 3) Jo ma gitye ki gen me bedo i lobo bene gibinongo mar pa Yecu kun nongo en keto cwinye i komgi. Kadi bed pe gibineno Yecu wang ki wang, wat i kingi bidongo medde ameda kun ginongo mit pa kwo ma Jehovah kacel ki Yecu guweko twere pigi.​—Ic. 9:6, 7.

16. Mot ango ma wanongo ki i bedo lurem Yecu?

¹⁶ Ka wajolo lwongo pa Yecu me doko lureme, wanongo mot mapol adada. Me labolle, wanongo adwogi maber ki i mar mere kacel ki cwakke i kare-ni. Wabedo ki gen me kwo pi naka. Ki dong ma pire tek loyo ducu, wat i kinwa ki Yecu biweko wanongo lonyo ma lapore pe​—wat macok ki Jehovah ma en aye Won Yecu. Pud dong obedo twon mot madit ya ni kilwongowa ni lurem Yecu!