1. I cencwari me acel, jo pa Jehovah onongo gitye ma guyubbe nining?

 KARE ducu ka Jehovah omiyo tic mo bot jone, en nongo mito ni gutim kore ki kore. (1 Kor. 14:33) Me labolle, yub pa Lubanga tye ni omyero kitit kwena maber-ri i wi lobo ducu. (Mat. 24:14) Jehovah ocimo Yecu me doro tic meno. Dok Yecu tye ka neno ni wacobo tic man kore ki kore. I Jerucalem i cencwari me acel, lukiko madit ma onongo tye iye lukwena ki luelda mukene, onongo gimoko tam ma kacokke ducu myero gulubi. (Tic 15:2; 16:4) I kare ma kicako kacokke i kabedo mapatpat, luelda ma i kacokke acel acel onongo gimiyo tira mua ki bot lukiko madit bot omege ki lumege. (Tic 14:23) Pien omege ki lumege gulubo tira ma gunongo-ni, “lwak muye Kricito i kabedo acel acel gumoko matek i niye, gubedo ka medde mapol nino ducu.”—Tic 16:5.

2. Nicakke i mwaka 1919, Jehovah tye ka miyo tira kacel ki cam me cwiny nining?

² Jehovah pud tye ka medde ki yubo jone macalo dul nio wa i kare-ni. Nicakke i mwaka 1919, i te tela pa Jehovah, Yecu tye ka tic ki gurup matidi pa co ma kiwirogi me doro tic me tito kwena kacel ki miyo cam me cwiny bot lulub kore. a (Luka 12:42) Nen ka maleng ni Jehovah tye ka goyo laane i kom ticgi.—Ic. 60:22; 65:​13, 14.

3-4. (a) Mi labol ma nyuto adwogi maber ma wanongo ka watye ma wayubbe. (b) Gin ango ma wabinyamo i pwony man?

 ³ Ka onongo pe watye ma wayubbe, onongo pe wabitwero cobo tic ma Yecu ominiwa. (Mat. 28:​19, 20) Me labolle, ket kong ni onongo pe kipoko wang tic me tito kwena pi kacokkewa, ci latit kwena mo keken tye angonya me tito kwena ka mo keken ma iye mito. Ka tye kit meno, ci watwero tito kwena i wang tic mogo teretere, kun mukene pe wao iye kulu. Tika itwero tamo pi adwogi mukene mabeco ma wanongo ka watye ma wayubbe maber?

⁴ Kit macalo Yecu oyubo kwede lulub kore i kare ma en tye i lobo, en pud medde ki yubo jo pa Lubanga i kare-ni. I pwony man, wabinyamo labol ma Yecu owekiwa ki kit ma dulwa lubo kwede labol meno. Wabinyamo bene kit ma watwero nyuto kwede ni wageno dul pa Jehovah.

DULWA LUBO LANEN PA YECU

5. Tit kong yo acel ma dulwa lubo kwede lanen pa Yecu. (Jon 8:28)

⁵ Yecu opwonyo gin me atima ki kit me lok ki bot Wonne. Dul pa Jehovah lubo lanen pa Yecu kun gitiyo ki Lok pa Lubanga me konyowa ngeyo gin ma atir ki gin marac ki me miniwa tira. (Kwan Jon 8:28; 2 Tem. 3:​16, 17) Kare ki kare kipoyo wiwa me kwano Lok pa Lubanga kacel ki keto tirane i tic. Adwogi maber ango ma wanongo ki i lubo tira man?

6. Adwogi maber ango ma wanongo ka wakwano Baibul kun watimo kwed i bukkewa?

⁶ Wanongo adwogi maber adada ka wakwano Baibul kun watimo kwed i bukkewa. Me labolle, watwero pwonyo gin ma Baibul waco ki i tira ma wanongo ki bot dulwa kun wok ki i bukkewa. Ka waneno kit ma tira ma wanongo ki i dulwa jenge kwede i kom Baibul, genwa i kom dulwa medde ki dongo.—Rom. 12:2.

7. Kwena ango ma Yecu otito, dok dul pa Jehovah lubo lanenne nining?

⁷ Yecu otito “lok me kwena maber me ker pa Lubanga.” (Luka 4:​43, 44) Dok bene, Yecu ociko lulub kore me tito kwena maber me Ker-ri. (Luka 9:​1, 2; 10:​8, 9) I kare-ni, jo ducu ma giribbe ki dul pa Jehovah gitito kwena me Ker-ri labongo paro pi ka ma gibedo iye nyo tic ma gitye kwede i dulwa.

8. Deyo ango ma watye kwede?

⁸ Obedo twon deyo madit adada me tito bot jo mukene lok i kom Ker pa Lubanga! Meno pe obedo mot me tic ma kimiyo bot jo ducu. Me labolle, i kare ma Yecu onongo tye i lobo, en pe oye ni cen maraco gutit lok i kome. (Luka 4:41) I kare-ni, ma peya ngat mo ocako tito kwena kacel ki Lucaden pa Jehovah, myero en kong obed ngat ma tye ka kwo i yo ma yomo cwiny Jehovah. Wanyuto pwocwa pi mot ma kiminiwa me tito kwena ka watito kwena i kabedo mo keken ki cawa mo keken ma watwero. Calo Yecu, yubwa tye me pito kodi me ada i cwiny dano ki onyo iye pii.—Mat. 13:​3, 23; 1 Kor. 3:6.

9. I yo ma nining ma dulwa miyo nying Lubanga ngene?

⁹ Yecu omiyo nying Lubanga ongene. I lega bot Wonne, Yecu owaco ni: “Amiyo nyingi ongene.” (Jon 17:26) Dul pa Jehovah lubo lanen pa Yecu ki timo jami ducu ma twere me konyo jo mukene me ngeyo nying Lubanga. Yo acel ma dulwa  otimo kwede man aye ki tic ki Baibulwa me New World Translation of the Holy Scriptures. Baibul man odwoko nying Lubanga cen i kabedo ducu ma onongo tye iye con i leb ma kikwongo coyo iye Baibul. Baibul man dong tye nonge olu nyo bute mogo i leb makato 270 kulu. Ka ikwano Lamed Ngec me A4 ki A5 ma i Baibul man, ci ibinongo ngec matut ma tito pingo kidwoko nying Lubanga cen kakare ki kit ma kitimo kwede. Lamed Ngec me C, ma nonge i Study Bible, miyo lok ma konyowa me moko ni nying Lubanga myero obed tye i Ginacoya me leb Grik tyen 237.

10. Gin ango ma wapwonyo ki i lok pa mego mo ma bedo i lobo Myanmar?

¹⁰ Calo Yecu, wamito konyo jo mapol kit ma watwero wek gunge nying Lubanga. I kare ma dako mo ma tye ki mwaka 67 ma bedo i lobo Myanmar opwonyo ni Lubanga tye ki nyinge, en ocako koko ci owaco ki lapwonye me Baibul ni: “Man aye tyen mukwongo i kwona ma awinyo ni Jehovah obedo nying Lubanga. . . . Ipwonya gin ma pud dong pire tek loyo i kwona.” Kit ma gin mutimme man nyuto kwede, ka dano gupwonyo nying Lubanga, man twero loko kwogi.

MEDDE KI NYUTO PWOC PI DULWA

11. Luelda gitwero nyuto pwoc nining pi dul pa Jehovah? (Nen bene cal.)

¹¹ I yo mene ma luelda gitwero nyuto kwede pwocgi pi dul pa Jehovah? Ka dulwa omiyo tira bot luelda, mitte ni gukwan tira man ki diro adada dok gutute me ketone i tic. Me labolle, pe ginongo tira i kom kit me doro cokke ki kit me lega i nyim kacokke keken, ento bene i kom kit me gwoko romi pa Kricito. Ka luelda gilubo tira ducu ma ginongo ki bot dulwa, omege ki lumege gibiwinyo ni Jehovah marogi dok tye ka gwokogi.

12. (a) Pingo omyero wati kacel ki luelda? (Jo Ibru 13:​7, 17) (b) Pingo omyero waket cwinywa i kom kit mabeco pa luelda?

¹² Ka wanongo tira ki bot luelda, bedo ber ka walubo labongo nguru. Ka watimo meno, ci waweko bedo yot botgi me timo ticgi. Baibul cuko cwinywa me bedo luwiny bot jo ma gitelowa kun wamine i te twerogi. (Kwan Jo Ibru 13:​7, 17.) I kare mogo timo man pe bedo yot. Pingo? Pien co magi gubedo jo ma gitye ki roc. Ento, ka waketo tamwa i kom gorogi me ka neno kitgi mabeco, nongo watye ka konyo lumonewa. I yo ma nining? Lumonewa gimito ni wabed ki gung cwiny ka ce Lubanga tye ka tic ki dulwa me tirowa. Pi man, ka wacako bedo ki tam maraco i kom luelda, ci wabibedo ki tam marac i kom dulwa dok wabirwenyo genwa woko i kome. Dong gin ango ma watwero timo wek waniang goba ma a ki bot lumonewa ci wakwer woko?

PE IWEK JO MUKENE GUMI IRWENY GENNI I KOM DUL PA JEHOVAH

13. I yo ma nining ma lumone pa Lubanga gitute wek dano gunen ni dulwa rac?

¹³ Lumone pa Lubanga gitute me weko jami mabeco madok i kom dul pa Jehovah onen calo jami maraco. Me labolle, wapwonyo ki i Ginacoya ni Jehovah mito ni wabed ma komwa leng, kitwa leng dok wawore i yo ma en mito. En owaco ni ngat mo keken ma medde ki timo bal kun kwero ngut woko myero pe omedde ki bedo i kacokke. (1 Kor. 5:​11-13; 6:​9, 10) Walubo tira meno. Ento pien walubo cik meno, lumonewa gikok i  komwa ni wabedo lugingi, wangolo kop marac i kom dano, dok pe wamaro dano.

14. Anga ma tye i nge goba ma kitito i kom dulwa?

¹⁴ Niang maber anga ma tye ka lweny i komwa. Catan Larac-ci aye tye i nge goba ma kitito i kom dulwa. En aye “won goba.” (Jon 8:44; Acak. 3:​1-5) Dong omyero wange ni Catan bitic ki jo ma cwake me tito lok goba i kom dul pa Jehovah. Man aye gin mutimme i kom Yecu kacel ki Lukricitayo me kare macon.

15. Gin ango ma lupwonye dini gutimo i kom Yecu kacel ki lulub kore?

¹⁵ Kadi bed Wod pa Lubanga onongo pe ki roc dok otimo tango me aura, Catan otiyo ki jo mogo me nyayo goba mapol i kome. Me labolle, lupwonye dini guwaco ki dano ni teko pa Yecu me timo tango oa ki bot “ladit pa cen.” (Mar. 3:22) I kare ma kitye ka pido i kom Yecu, lupwonye dini gumoro adot i kome ni oyeto Lubanga dok gubito lwak ni gupeny wek kinek Yecu woko. (Mat. 27:20) Lacen, i kare ma lulub kor Yecu gubedo ka tito kwena, lumonegi “gutugo Lurok kun gumiyo cwinygi odoko kec” wek giket aunauna i kom Lukricitayo. (Tic 14:​2, 19) Madok i kom Tic pa Lukwena 14:​2, Wi Lubele me Decemba 1, 1998, otito ni lupwonye dini pa Lujudaya gukwero kwena ma Lukricitayo gutito dok bene guloko lok goba i komgi wek Lurok bene pe guwiny kwenagi dok gukwergi woko.

16. Gin ango ma myero wiwa opo iye ka wawinyo lok goba mo i kom dulwa?

¹⁶ Catan pe ogik ki bwolo dano i cencwari me acel. I kare-ni, en pud tye “labwol dano ma i wi lobo ducu.” (Yabo 12:9) Ka iwinyo lok maraco madok i kom dulwa nyo i kom omege ma gitye ka telo  wiwa, wi opo kit ma lumone pa Lubanga gutero kwede Yecu kacel ki Lukricitayo me cencwari me acel. I kare-ni, kitye ka uno jo pa Jehovah dok kitye ka waco lok goba i komgi, kit ma Yecu owaco ni bitimme kwede kikome. (Mat. 5:​11, 12) Pe wabiye lok goba magi ka waniang anga ma tye i ngegi dok watimo gin mo cutcut me gwokke. Watwero gwokke nining?

17. Watwero gwokke nining wek lok goba pe owanwa? (2 Temceo 1:13) (Nen bene bok ma wiye tye ni “ Gin ma Myero Itim ka Iwinyo Lok Goba”)

¹⁷ Kwer lok goba woko. Lakwena Paulo omiyo tira ma nyuto ka maleng gin ma myero watim ka wawinyo lok goba mo. En otito ki Temceo ni ‘ocik jo mogo wek pe guket cwinygi i kom lok me ododo’ dok ‘gukwer lok mogo me mingo ma tere pe.’ (1 Tem. 1:​3, 4; 4:7) Kadi bed latin ma mulo twero kwanyo gin mo macilo ki i ngom ci keto i doge, ento ngat madit pe twero timo meno pien en niang ni meno bimiyo enongo two. I yo acel-lu, wakwero lok goba pien waniang anga ma tye i nge ngec ma kit meno. Me ka meno, wawinyo “lok me ada” keken.—Kwan 2 Temceo 1:13.

18. Watwero nyuto nining ni watye ki pwoc pi dul pa Jehovah?

¹⁸ Wanyamo yo adek keken ki i kin yo mapol ma dul pa Jehovah lubo kwede lanen pa Yecu. Ka iwoto ki kwano Baibul, yeny yo mukene ma dulwa lubo kwede lanen pa Yecu. Kony jo mukene me kacokkewu me dongo gengi i kom dulwa. Dok imedde ki nyuto pwocci ki tic pi Jehovah ki gen kun ibedo cok ki dul ma en tye ka tic kwede me cobo yubbe. (Jab. 37:28) Dong walego ni wan ducu wamedde ki bedo ki pwoc pi deyo ma watye kwede me bedo i kin jo me ot pa Jehovah ma gilugen dok lumar adada.