1. Lutit kwena mogo giwinyo nining ka odok i lok me nywako kwena maber-ri ki jo mukene? (Nen bene cal.)

 MACALO Lucaden pa Jehovah, watito kwena bot jo mukene pien wamaro Wonwa me polo dok wamito konyo jo mukene me ngeyo en. Lutit kwena mapol ginongo tito kwena mit adada. Ento lutit kwena mukene pe ginongo mit pa tito kwena. Pingo? Jo mukene twero bedo ni gin lulewic dok giwinyo calo pe gibedo lupwonye mucwiny. Omege ki lumege mukene ginongo ni tek me cito i gang pa ngat mo ka pe kilwongogi. Mukene gibedo ki lworo ni rwod ot cwinye pe bibedo yom i komgi. Jo mogo gudongo ma kipwonyogi ni omyero gugwokke ki cwero cwiny dano. Kadi bed gimaro Jehovah matek, omege ki lumege magi pud ginongo ni tek me tito kwena bot jo ma pe gingeyo. Ento kadi bed kit meno, giniang ni tito kwena obedo tic ma pire tek, dok kare ki kare ginywako i tic man. Jehovah cwinye pud dong bedo yom i komgi ya!

2. Ka itye ka tute me nongo yomcwiny i tic me pwony, pingo omyero cwinyi pe otur?

² Tika kare mogo inongo ni tek me bedo ki yomcwiny i tic me pwony pi tyen lok magi? Ka tye kit meno, ci pe iwek cwinyi otur. Lworo ma itye kwede twero nyuto ni ibedo ngat mamwol dok pe imito ywayo tam pa dano i komi. Nyuto bene ni pe imito bedo ka tele ki jo mukene. Dok pe tye ngat mo ma mito ni kikwere, tutwalle ka en tye ka tute me timo gin maber bot jo mukene. Woru me polo niang maber adada kit ma iwinyo kwede dok en mito mini kony ma imito. (Ic. 41:13) I pwony man, wabinyamo tam  abic mapatpat i kom kit me lweny ki lworo ma kit meno kacel ki kit me nongo yomcwiny i tic me pwony.

NONG TEKO KI I LOK PA LUBANGA

3. Gin ango ma okonyo lanebi Jeremia me tito kwena bot jo mukene?

³ Kadi wa i kare mukato angec, Lok pa Lubanga omiyo teko ki luticce i kare ma gukemme ki tic matek. Nen kong labol pa lanebi Jeremia. En obedo ki lworo i kare ma Jehovah omine tic me tito kwena. Jeremia owaco ni: “An pe angeyo lok, pien an pud latin mamwa.” (Jer. 1:6) Gin ango ma okonye me bedo ki tekcwiny i tic me tito kwena? Gin ma Jehovah owaco bote omine tekcwiny. Jeremia owaco ni: “I cwinya kuca nongo tye iye gin mo ma wang calo mac, ma tye okanne woko i cogona, dong aol woko ki juko doga wek pe aloki.” (Jer. 20:​8, 9) Kadi bed tito kwena onongo pe yot i wang tic meno, kwena ma kimiyo ki Jeremia me atita omine teko ma mitte me timo tic meno.

4. Gin ango ma timme ka wakwano Lok pa Lubanga dok walwodo? (Jo Kolocai 1:​9, 10)

⁴ Lukricitayo ginongo teko ma mitte ki i lok pa Jehovah, ma en aye Baibul. I kare ma lakwena Paulo ocoyo waraga bot kacokke ma i Kolocai, en owaco ni nongo ngec ma atir bitugo cwiny utmegine me ‘kwo i yo ma yomo cwiny Jehovah’ kun gimedde ki ‘tiyo tic mabeco ma miyo kwogi nyako nyig madwong.’ (Kwan Jo Kolocai 1:​9, 10.) Tic mabeco magi kwako tito kwena maber-ri. Dong ka wakwano Lok pa Lubanga dok walwodo, niyewa i kom Jehovah jing matek dok konyowa me niang pingo pire tek adada me tito kwena me Ker-ri.

5. Itwero nongo adwogi maber ki i kwanni me Baibul nining?

⁵ Me nongo adwogi maber loyo ki i kwanwa me Baibul, omyero pe warune ka watye ka kwan ki lwodo lok. Ter kare muromo. Ka inongo ginacoya mo ma niang iye tek i cawa me kwanni, pe ica woko. Me ka meno, ti ki Buk ma Konyo Lucaden pa Jehovah me Kwedo Lok nyo jami me kwedo lok mukene me konyi wek iniang tyen lok me ginacoya meno. Ka itero kare muromo i cawa me kwanni, ci ibijingo genni ni Lok pa Lubanga obedo lok ada. (1 Tec. 5:21) Ka genni ojing matek, ci ibibedo bene ki miti matek me nywako lok meno ki jo mukene.

 YUBBE MABER PI TIC ME PWONY

6. Pingo omyero wayubbe maber pi tic me pwony?

⁶ Ka iyubbe maber pi tic me pwony, ci pe ibibedo ki lworo madwong ka itye ka lok ki dano. Yecu okonyo lulub kore me yubbe maber ma peya en ocwalogi ka tito kwena. (Luka 10:​1-11) Pien lupwonnye pa Yecu gulubo tira ma en ominigi, gubedo ki kare me timo jami mabeco mapol, dok meno okelligi yomcwiny madwong adada.—Luka 10:17.

7. Watwero yubbe maber nining pi tic me pwony? (Nen bene cal.)

⁷ Watwero yubbe maber nining pi tic me pwony? Omyero watam matut i kom lok ada ma wamito nywakone ki dano, ci wati ki nyig lok ma mewa dok wawek obed calo watye ka boko lok. Bedo ber ka watamo i kom lok aryo nyo adek mo ma dano maro wacone me ngolo dogwa ci watam i kom kit me dok iye. Dong ka watye ka lok ki dano, myero watute me bedo ma komwa opye mot kun wabwunyo kwedgi dok wanyuto cwiny me lirem.

8. I yo ma nining ma Lukricitayo gitye calo atabo ma kicweyo ki lobo?

⁸ Lakwena Paulo otito ki omegine ki lumegine ni: “Watye ki lonyo man i atabo ma gicweyo ki lobo.” (2 Kor. 4:7) Lonyo man obedo gin ango? Obedo tic me tito kwena maber me Ker-ri ma bilaro kwo pa dano. (2 Kor. 4:1) Atabo ma kicweyo ki lobo cung pi gin ango? Cung pi lutic pa Lubanga, ma gitero kwena maber me Ker-ri bot jo mukene. I kare pa lakwena Paulogi, lucatwil onongo gitiyo ki atabo nyo abino ma kicweyo ki lobo me tingo jami ma welgi tek calo cam, kongo vino, ki cente. I yo acel-lu, Jehovah omiyo botwa kwena me Ker pa Lubanga ma pire tek adada. Ki kony pa Jehovah, watwero nongo teko ma wamito me medde ki tito kwena man.

LEG PI TEKCWINY

9. Watwero loyo lworo ma watye kwede i kom dano nining? (Nen bene cal.)

⁹ I kare mogo, watwero bedo ki lworo i kom dano ma myero watit kwena botgi. Watwero loyo ariya meno nining? Nen kong lega pa lukwena i kare ma kiminigi rukca ni omyero pe gutit kwena. Me ka bedo ki lworo, gin gulego Jehovah ni okonygi wek ‘gumedde ki tito lokke  ki tekcwiny labongo lworo mo.’ Jehovah ogamo legagi cutcut. (Tic 4:​18, 29, 31) Ka ce lworo dano weko pe wanongo mit pa tito kwena, wan bene omyero waleg pi kony pa Jehovah. Kwa Jehovah wek okonyi me dongo marri pi dano wek pe ibed ki lworo me tito botgi kwena maber-ri.

10. Jehovah konyowa nining me cobo ticwa macalo Lucadenne? (Icaya 43:​10-12)

¹⁰ Jehovah aye ocimowa me bedo Lucadenne, dok en ocikke ni ebikonyowa me bedo ki tekcwiny. (Kwan Icaya 43:​10-12.) Nen kong yo angwen ma Jehovah konyowa kwede me timo meno. Mukwongo, Yecu ocikke me bedo kwedwa kare ducu ka watito kwena. (Mat. 28:​18-20) Me aryo, Jehovah ominiwa kony pa lumalaika. (Yabo 14:6) Me adek, Jehovah ominiwa cwiny mere maleng me konyowa wek wiwa opo i kom jami ma wapwonyo. (Jon 14:​25, 26) Me angwen, Jehovah omiyo botwa omege ki lumege ma giwoto kacel kwedwa i tic me pwony. Ki kony pa Jehovah kacel ki utmegiwa, watye ki jami ducu ma wamito me bedo ki tekcwiny ki me medde ki tito kwena.

BED ATERA ME TIMO ALOKALOKA KUN IBEDO KI NENO MUPORE

11. Ka itye i tic me pwony, itwero nongo dano mapol nining? (Nen bene cal.)

¹¹ Tika cwinyi tur ka inongo dano pe gang? Itwero pennye kekeni ni: ‘Dano me wang ticwa gucito kwene i cawa-ni?’ (Tic 16:13) ‘Tika gucito i tic nyo ka wil?’ Ka tye kit meno, ci tika itwero nongo dano mapol ka icito ka miyo caden i dye lwak? Omego mo ma nyinge Joshua owaco ni, “Anongo kare me tito kwena i ka cat madongo ki kabedo mukene ma guro wi lwak.” En kacel ki dakone, Bridget, bene ginongo dano gang ka gucito i wang ticgi otyeno nyo i Ceng Cabit i dyeceng.—Ep. 5:​15, 16.

12. Ngo ma itwero timone ka jo ma itito kwena botgi gitye ki miti manok?

¹² Ka jo ma itito kwena botgi gitye ki miti manok, ci tem niang gin ma giye iye nyo par ma gitye kwede. Joshua ki dakone Bridget gitiyo ki lapeny ma nonge i nyim trakwa me cako lok ki dano. Me labolle, ka gitye ka tic ki trak ma wiye tye ni In Mono Itamo Ningo i Kom Baibul? giwaco  ni: “Jo mogo gineno Baibul macalo buk ma oa ki bot Lubanga, ento jo mukene gitye ki tam mapat. In itamo ningo?” Man pol kare yabbigi yo me boko lok ki dano.

13. Pingo watwero waco ni wacobo ticwa maber kadi bed dano gukwero winyo lokwa? (Carolok 27:11)

¹³ Kadi bed dano pe giye winyo lokwa, nongo pud wacobo yubwa. Pingo? Pien nongo watimo gin ma Jehovah kacel ki Wode gimito ni watim—ma en aye miyo caden. (Tic 10:42) Kadi bed pe wanongo ngat mo keken ma watwero lok kwede, nyo ka gukwero kwenawa, pud watwero bedo ki yomcwiny pien wangeyo ni watye ka yomo cwiny Wonwa me polo.—Kwan Carolok 27:11.

14. Pingo watwero bedo ki yomcwiny ka latit kwena mukene onongo ngat mo ma tye ki miti i wang ticwa?

¹⁴ Watwero bene bedo ki yomcwiny ka latit kwena mukene onongo ngat ma onyuto miti i wang ticwa. Wi Lubele mo oporo ticwa me tito kwena ki yenyo latin mo murwenyo. Jo mapol gitiyo kacel me yenyo latin meno kun gipokke giwoto i kabedo mapatpat. Ka kinongo latin meno, ci jo ducu gibedo ki yomcwiny, ento pe ngat ma onongo latin-ni keken. I yo acel-lu, jo ducu ma i kacokke gikonyo me loko ngat moni me doko lalub kor Kricito. Wamito kony pa jo ducu ma i kacokkewa me tyeko wang ticwa maber, dok jo ducu cwinygi bedo yom ka ngat mo manyen ocako bino i cokke.

KET CWINYI I KOM MARRI PI JEHOVAH KI DANO

15. Watwero medo mit komwa i tic me pwony nining? (Matayo 22:​37-39) (Nen bene cal ma tye i .)

¹⁵ Watwero dongo mitiwa me tito kwena ka kare ducu wiwa po ni tito kwena obedo yo maber loyo me nyuto marwa pi Jehovah ki dano luwotwa. (Kwan Matayo 22:​37-39.) Go kong kit ma cwiny Jehovah bedo yom kwede ka onenowa ka tito kwena, ki dong yomcwiny ma dano bedo kwede ka ocako kwano Baibul! Wi bene myero opo ni, jo ma giwinyo kwenawa ci gimoko tamgi me tic pi Jehovah gibedo ki gen me kwo pi naka.—Jon 6:40; 1 Tem. 4:16.

16. Watwero nongo yomcwiny i ticwa me pwony nining kadi bed watye ki peko ma gengowa a ki gang? Mi labol.

 ¹⁶ Tika itye ki peko ma weko pe itwero a ki gang? Ka tye kit meno, ket cwinyi i kom gin ma itwero timo me nyuto marri pi Jehovah ki dano luwoti. I kare me two Korona, Omego Samuel ki dakone Dania onongo pe gitwero a ki gang. I kare meno ma kwo onongo tek-ki, gin gubedo ka tito kwena kun gitiyo ki cim, coyo waraga, kacel ki kwano Baibul ki lutino kwangi ki Zoom. I kare ma Samuel obedo ka wire i ot yat me nongo yat pi two kanca, en obedo ka tito kwena bot jo ma en onongogi kunnu. En owaco ni: “Ka watye ka kato ki i peko, watwero bedo ki par, waol matek dok man twero temo niyewa. Dong mitte ni wanong yomcwiny i ticwa pi Jehovah.” I kare me peko magi ducu, Dania opoto ci onongo awano dok onongo pe twero a ki i kabuto pi dwe adek. I ngeye, onongo mitte ni en oti ki lela pa lungolo pi dwe abicel. Dania owaco ni: “Atute ki kerona ducu me timo gin ma atwero. Abedo ki kare me tito kwena bot nac mo ma olima, dok bene aloko ki dano ma onongo gikelo jami i pacowa. Abedo bene ki kare me nywako lok me kwena maber i cim ki dako mo ma tiyo pi kampuni ma cato jami ma kitiyo kwede i ot yat.” Kadi bed Samuel ki Dania onongo pe gitwero tito kwena kit macon, gin gutimo gin ma gitwero dok gunongo yomcwiny iye.

17. Itwero nongo adwogi maber loyo ki i tam ma kimiyogi i pwony man nining?

¹⁷ Tute matek me keto i tic tam abic ducu ma kiminiwa i pwony man. Tam acel acel bedo calo jami mapatpat ma kiketo i dek moni. Ka jami magi ducu kiribogi kacel, ci dek man bibedo mamit adada. I yo acel-lu, ka waketo i tic tam ma kimiyogi-ni ducu, wabibedo ki kero me lweny ki lworo dok wabibedo ki yomcwiny madwong i tic me pwony.