Tika Onongo Ingeyo?
Pingo co ma onongo pe gubedo Luicrael gutiyo macalo lumony pa Kabaka Daudi?
I KIN lumony pa Kabaka Daudi onongo tye iye co mogo ma onongo pe gubedo Luicrael, me labolle, Jelek ma jo Ammon, Uria ma jo Kit, ki Itima ma jo Moab. a (1 Tekwaro 11:39, 41, 46) I kin lumony pa Daudi onongo tye iye bene ‘jo Keret, jo Pelet, kacel ki jo Gat.’ (2 Cam. 15:18) Nen calo jo Keret (Ceret) ki jo Pelet gubedo wadi macok pa jo Piliciti. (Ejek. 25:16) Jo Gat onongo gia ki i boma pa jo Piliciti ma kilwongo ni Gat.—Yoc. 13:2, 3; 1 Cam. 6:17, 18.
Pingo Daudi oye ni co magi guti macalo lumonye? En onongo tye ki gen ni co magi tye lugen bote, dok ma pire tek loyo onongo gitye lugen bot Jehovah. Me labolle, buk mo acel oloko kit man i kom jo Keret ki jo Pelet: “Gin gumedde ki bedo lugen bot Daudi i kare ma kwo tek adada.” I yo ma nining ma gunyuto ni gin lugen? I kare ma “jo Icrael gutwarre” guweko Kabaka Daudi woko me lubo kor “dano mo marac mada ma nyinge Ceba,” jo Keret ki jo Pelet gucung kacel ki Daudi dok gukonye me juko jemo ma Ceba ocako. (2 Cam. 20:1, 2, 7) I kare mukene doki, wod pa Kabaka Daudi ma nyinge Adoniya otemo mayo ker ki bot Daudi wek Solomon pe ole. I kare meno bene, jo Keret ki jo Pelet gumedde ki bedo lugen bot Daudi dok gukonye me keto Solomon macalo kabaka, pien onongo Jehovah oyere me leyo komker pa Daudi.—1 Luker 1:24-27, 38, 39.
Larok mukene ma bene obedo lagen adada bot Daudi en aye Itayi ma jo Gat. Itayi kacel ki monnye ma romo 600 gumiyo cwak ki Kabaka Daudi i kare ma Abcalom ma wod pa Daudi obedo ka ywayo cwiny Luicrael woko ki i kom kabaka. I acakkine, Daudi omiyo tam bot Itayi ni kit ma en tye larok-ki, man pe obedo lweny ma mege. Ento Itayi owacce ni: “Macalo Rwot [Jehovah] tye ma kwo-ni, dok macalo in kabaka itye makwo-ni, kabedo ducu ma ibedo iye, laditta, kadi bed to kadi bed kwo, an bene abibedo kunnu.”—2 Cam. 15:6, 18-21.
Itayi obedo lagen bot Daudi, kabaka ma Jehovah owiro
Kadi bed jo Keret ki jo Pelet kacel ki jo Gat onongo gubedo lurok, onongo gineno Jehovah macalo Lubanga me ada ki Daudi macalo ngat ma Jehovah owiro. Cwiny Daudi nen calo obedo yom adada me bedo kacel ki co magi ma lugen adada i monnye!
a Cik pa Lubanga ma nonge i Nwoyo Cik 23:3-6 onongo pe ye ki jo Ammon kacel ki jo Moab me donyo i kacokke pa Luicrael. Ento, cik man nen calo onongo tye tutwalle pi jo ma gimito bedo ki twero macalo anywalli me Icrael dok cik man onongo pe gengo lurok ki ribbe kacel nyo bedo i kin jo pa Lubanga. Nen buk me Insight on the Scriptures, Volume 1, pot 95.
