1, 2. Pingo Jo Roma cura 8 pire tek tutwal bot Lukricitayo ma kiwirogi?

MA LUBBE ki kwero nipo me to pa Yecu ma timme mwaka ki mwaka, tika dong ikwano Jo Roma 8:15-17? Twero bedo ni dong ikwano. Wang tyeng meno tito kit ma Lukricitayo gingeyo kwede ni kiwirogi​—cwiny maleng moko botgi caden i cwinygi. I acakki me cura meno kiloko i kom “jo ma gibedo i Kricito Yecu.” Ento mono dong Jo Roma cura 8 loko ka i kom jo ma kiwirogi keken? Nyo bene loko i kom Lukricitayo ma gitye ki gen me kwo i lobo kany?

² Lukricitayo ma kiwirogi aye ma kiloko i komgi atir atir i cura man. Ginongo “cwiny” macalo jo ma gitye ka ‘kuro kare me lokogi wek gidok litino me paco, en aye me koko komgi.’ (Rom. 8:23) Ada, gitye ki gen me doko litino pa Lubanga i polo. Meno twere pien gunongo batija me doko Lukricitayo, dok Lubanga omiyo ginkok pigi me timo kica pi balgi kun tucu botgi ni kitgi atir macalo litino pa Lubanga.​—Rom. 3:23-26; 4:25; 8:30.

3. Pingo wamoko ni Jo Roma cura 8 pire tek bene bot jo ma gitye ki gen me kwo i lobo kany?

³ Ento Jo Roma cura 8 bene pire tek bot jo ma gitye ki gen me kwo i lobo kany pien Lubanga bene nenogi ni kitgi atir. Waneno gin ma nyuto meno i waraga ma Paulo ocoyo con. I cura 4,  en oloko i kom Abraim. Laco meno okwo ma peya Jehovah omiyo Cik bot jo Icrael ki bene ma peya Yecu oto pi balwa. Kadi bed kit meno, Jehovah pud oneno niye matek ma Abraim onongo tye kwede dok okwane ni kite atir. (Kwan Jo Roma 4:20-22.) I yo acel-li, Jehovah bene neno Lukricitayo ma lugen ma gitye ki gen me kwo i lobo kany pi naka ni kitgi atir. Ki lok ada, gitwero nongo adwogi maber ki i lubo tira ma tye i Jo Roma cura 8 ma kimiyo bot jo ma kitgi atir.

4. Lapeny mene ma myero Jo Roma 8:21 okel i wiwa?

⁴ I Jo Roma 8:21, wanongo lok ma moko ni lobo manyen bibedo tye ada. Tyeng man miyo cikke ni “gibigonyo ginaketa woko ki i opii me bedo gin ma top, wek gunong kuc ki deyo ma gimiyo ki litino pa Lubanga.” Dong lapeny ma tye aye ni, tika wabibedo tye i lobo meno, nyo tika wabinongo mot meno. In mono igeno ni twere boti? Jo Roma cura 8 miniwa tam ma twero konyowa me nongo mot meno.

5. Gin ango ma pire tek ma Paulo oloko iye i Jo Roma 8:4-13?

⁵ Kwan Jo Roma 8:4-13. Jo Roma cura 8 nyuto apokapoka ma tye i kin jo ma ‘gilubo kit me kom ma ginywalowa kwede’ ki jo ma ‘gilubo yo pa cwiny maleng.’ Jo mogo gitwero cako tamo ni man obedo apokapoka ma tye i kin jo ma gitye i ada ki jo ma gipe iye, i kin jo ma gubedo Lukricitayo ki jo ma gipe Lukricitayo. Ento, Paulo onongo tye ka coyo waraga bot ‘jo ducu ma gitye i Roma ma Lubanga marogi, dok olwongogi me bedo jo maleng.’ (Rom. 1:7) Pi meno, Paulo onongo tye ka poro Lukricitayo ma gilubo kit me kom ki Lukricitayo ma gilubo yo pa cwiny maleng. Apokapoka meno onongo obedo ngo?

6, 7. (a) Ki i Baibul, ka kitye ka lok i kom “kit me kom” nongo kwako gin ango? (b) I Jo Roma 8:4-13, Paulo oloko i kom “kit me kom” i yo ango?

⁶ Mukwongo, nen kong tyen lok me ‘kit me kom.” Ngo ma onongo Paulo tye ka lok iye? Baibul loko i kom “kit me kom” i yo mapol mapatpat. I cawa mukene nongo tye ka lok i komwa ma nen ki woko-ni. (Rom. 2:28; 1 Kor. 15:39, 50) Nyuto bene wat ma tye i kin jo moni. ‘I kit me kom, Yecu yam ginywale i kin likwayo pa Daudi,’ ki dok Paulo bene oneno Lujudaya macalo ‘wadine me kom.’​—Rom. 1:3; 9:3.

 ⁷ Ento kadi bed kit meno, gin ma Paulo ocoyo i cura 7 olo to miniwa ngec mo manok i kom “kit me kom” ma kiloko iye i Jo Roma 8:4-13. En oporo “kwo me anywali” ki “gin maraco me bal” ma ‘onongo tye ka tic i dul komgi mapatpat.’ (Rom. 7:5) Man weko waniang nyig lok ni “jo ma gibedo i kit pa dano [nyo i kit me kom]” ma Paulo owaco ni “giketo tamgi bene i kom gin ma lubo kit pa dano.” En onongo tye ka lok i kom jo ma miti me komgi loyogi nyo giketo tamgi ducu iye ki dok bene gijenge i kom dano adana ma tye ki roc. Ki kany Paulo onongo tye ka lok i kom jo ma gilubo mitigi me kom, kit ma giwinyo kwede ki gin ma gimaro, ma man kwako tim me buto nyo timo gin mo keken.

8. Pingo onongo rwatte me ciko Lukricitayo ma kiwirogi i kom ‘lubo kit me kom’?

⁸ Ento itwero bedo ki ur pingo Paulo ociko jo ma kiwirogi matek i kom adwogi marac ma bino pi ‘lubo kit me kom.’ Tika gin meno bene twero timme i kom Lukricitayo, jo ma Lubanga oye ni gubed lureme dok bene nenogi ni kitgi atir? Ki cwercwiny madit, gin ma kit meno twero timme i kom Lakricitayo mo keken. Me labolle, Paulo ocoyo ni, jo mogo i kin utmege ma i Rome onongo gudoko opii pi “igi [mitigi].” I lokke ni twero bedo ni en onongo tye ka lok i kom tim buto, cam, ki jami mogo me yomcwiny ma onongo pire dong odoko tek tutwal i kwogi. Jo mogo i kingi onongo “giloko lok maber ma winyone mit” me bito jo mukene. (Rom. 16:17, 18; Pil. 3:18, 19; Juda 4, 8, 12) Wi bene opo ni, onongo tye omego mo i Korint ma “omayo ci-wonne ci tye ka bedo kwede macalo dakone.” (1 Kor. 5:1) Man dong weko waniang pingo Lubanga otiyo ki Paulo me ciko Lukricitayo pe me ‘keto tamgi i kom gin ma lubo kit pa dano.’​—Rom. 8:5, 6.

9. Gin ango ma cik ma Paulo omiyo i Jo Roma 8:6 pe kwako?

⁹ Cik meno bene pud pire tek adada i kare-ni. I nge tic pi Lubanga pi kare malac, Lakricitayo twero cako keto tamme nyo cwinye i kom jami me kom. Meno pe kwako Lakricitayo ma i cawa mukene nongo tye ka tam pi cam, tic, galowang, nyo miti me kom. Meno jami ma mitte i kwo pa Lutic pa Lubanga mapol. Yecu ocamo cam, dok bene opito jo mukene. En bene onongo ni galowang pire tek. Paulo bene oloko  i kom nongo mit pa jami magi i yo mupore nyo cobo miti i kin jo munyomme.

10. Ma lubbe ki Jo Roma 8:5, 6, lok ni “giketo tamgi” kwako ngo?

¹⁰ Gin ango kono ma Paulo onongo tye ka wacone i kom “tam ma lubo kit pa dano”? Nyig lok me Grik ma Paulo otiyo kwede-ni niange ni “keto tam nyo cwiny i kom gin moni ki keto keroni ducu i goyo pulan pire wek ocobbe.” Jo ma gikwo ma lubbe ki kit pa dano i cawa ducu giketo cwinygi ducu me cobo mitigi me kom ma lubbe ki kit me bal ma kinywalowa kwede. Laco mo ma okwano matut oloko i kom Jo Roma 8:5 ni: “Giketo tamgi ducu i kom jami ma lubo kit pa dano​—cwinygi ducu bedo iye, gibedo ka lok iye i cawa ducu, dok giketo kwogo bene i kome.”

11. Jami ango ma pigi romo bedo tek loyo i kwowa?

¹¹ Onongo pire tek pi Lukricitayo me Rome me ngiyo ngo ma onongo pire tek loyo i kwo. Tika twero bedo ni kwogi ducu onongo cung i kom “jami me kom”? Meno bene rwatte botwa ka kong wangiyo gin ma kwowa cung iye. Gin ango ma pire tek adada botwa, ki dok lok ma waloko nyuto gin ango? Gin ango ma wabedo ka yenyone kare ducu? Jo mogo gitwero nongo ni i cawa ducu gibedo ka yenyo kongo mapatpat, jami me deyo ot, cital me ruk manyen, jami ma kelo cente, goyo pulan me limo piny, ki jami mukene. Jami magi pe girac; gimite wek wabed ki kwo mayot. Me labolle, Yecu oloko pii odoko kongo, ki Paulo bene owaco ki Temceo ni omat “kongo vino manok.” (1 Tem. 5:23; Jon 2:3-11) Ento tika Yecu gin ki Paulo onongo “i cawa ducu gibedo ka lok i kom kongo ki bene pwoyone i cawa ducu? Tika onongo dong giketo cwinygi iye i cawa ducu? Pe. Wan kono? Gin ango ma pire tek loyo i kwowa?

12, 13. Pingo myero wagwokke ki jami ma waketo tamwa iye?

¹² Ngine kenwa pire tek adada. Pingo? Paulo ocoyo ni: ‘Tam ma lubo kit pa dano kelo to.’ (Rom. 8:6) Meno pire tek adada​—to i yo me cwiny i kare-ni ki dok to me kom i anyim. Ento bene, Paulo onongo pe tye ka waco ni ka ngat moni ocako keto tamme i ‘kom jami me kom’ ci en dong bito woko. Ngat moni twero loko kwone. Tam i kom laco mo i Korint ma lakwele ma onongo obedo ka cobo mitine me “kom” ci kiryemo woko ki i kacokke. Ento onongo twere bote me loko kwone, dok meno aye gin ma otimo. En ogiko timme marac-ci woko ci ocako tic pi Jehovah.​—2 Kor. 2:6-8.

¹³ Ka onongo twere ki ngat meno me loko kite, ci twere bene bot Lakricitayo i kare-ni me lokke, tutwalle pi ngat ma pe nongo owoto mabor calo laco ma i Korint ca. Ki lok ada, tira ma Paulo omiyo i kom adwogi marac ma twero bino ka ngat moni ‘oketo tamme i kom jami me kom’ myero otug cwiny Lukricitayo me timo alokaloka ma mitte!

14, 15. (a) Gin ango ma Paulo owaco ni waket tamwa iye? (b) Te lokke ngo ka kiwacci bedo ki “tam ma lubo kit pa cwiny maleng”?

¹⁴ I ngeye ma lakwena Paulo ocikowa i kom bedo ki “tam ma lubo kit pa dano,” en dok omiyo tira ma cuko cwinywa kun waco ni: “Tam ma lubo kit pa cwiny maleng miyo kwo ki kuc.” Man pud dong obedo adwogi nyo mot maber ya​—kwo kacel ki kuc! Watwero nongo mot meno nining?

¹⁵ “Tam ma lubo kit pa cwiny maleng” pe te lokke ni ngat moni myero okwo kwo mo ma kite dok pat adada. Pe mitte ni i cawa ducu obed ka lok i kom Baibul nyo marre  pi Lubanga ki gen pi anyim keken. Wi kong opo ni Paulo ki jo mukene i cencwari me acel ma gutiyo pi Lubanga bene pud gunongo mit pa kwo i yo ducu. Gucamo cam, gugalo wanggi, gunyomme ki bene gunywalo lutino, ki dong gutiyo matek me gwoko jo me pacogi.​—Mar. 6:3; 1 Tec. 2:9.

16. Kadi bed ni Paulo okwo macalo jo mukene, gin ango ma en oketo cwinye iye loyo?

¹⁶ Ento, lutic pa Lubanga pe guweko camo kwo aye dong odoko gin ma pire tek loyo i kwogi. I nge waco ni Paulo otiyo macalo layub kema, Baibul bene medde ni ticce-ni pe owiro tamme ki i gin ma pire tek loyo: Pol kare en onongo keto cwinye i tito kwena ki ticce me pwony. (Kwan Tic pa Lukwena 18:2-4; 20:20, 21, 34, 35.) Meno aye gin ma en owaco ni utmegine me Rome bene gutim. Ada, kwo pa Paulo onongo cung i kom jami me cwiny ki tic ma kubbe ki tito kwena. Luroma onongo myero gulub lanenne, ki wan bene myero watim kumeno.​—Rom. 15:15, 16.

17. Kit kwo ango ma wabinongo ka waketo ‘tamwa me lubo tam pa cwiny maleng’?

¹⁷ Adwogi maber ango ma wanongo ka waketo tamwa i kom jami me cwiny? Jo Roma 8:6 miyo lagamme ka maleng ni: “Tam ma lubo kit pa cwiny maleng miyo kwo ki kuc.” Man te lokke ni nongo waweko cwiny maleng aye doro tamwa kun bene nongo watimo jami ma lubbe ki tam pa Lubanga. Watwero bedo ki gen ni ka waweko “cwiny maleng” obedo ka telowa, ci wabibedo ki kwo maber dok ma opong ki yomcwiny i kare-ni. Adwogi maber ma loyo ma wabinongo bibedo kwo ma pe tum, i polo nyo i lobo kany.

18. Kuc twero bino nining ka wabedo ki “tam ma lubo kit pa cwiny maleng”?

¹⁸ Gin ango ma Paulo onongo tye ka wacone i kare ma owaco ni “tam ma lubo kit pa cwiny maleng,” twero kelo kuc. Jo mapol gitute me bedo ki wic ma opye mot. Wan watye ka nongo mit pa kuc ma gin pud gitye ka tutte me nongone-ni. Yo acel ma pire tek me bedo ki kuc aye me tute me kelo kuc ki jo me otwa kacel ki jo me kacokke. Myero bene waniang ni wan kacel ki utmegiwa ducu watye ki roc. Pi man, pol kare winye manok bedo tye, ka meno otimme, kipwonyowa me lubo tam ma Yecu omiyo ni: “Kong wumer wuribbe ki omeru.” (Mat. 5:24) Man timone bedo yot ka wiwa po ni wan kacel ki utmegiwa ducu watye ka tic pi “Lubanga won kuc.”​—Rom. 15:33; 16:20.

19. Kit kuc ango ma watwero bedo kwede ka waketo tamwa me lubo kit pa cwiny maleng?

¹⁹ Tye dok gin mukene ma kuc twero kelone ma pud dong ber ma pe wacce. Ka waketo cwinywa me “lubo kit pa cwiny maleng,” ci wabibedo ki kuc ki Lacwecwa. Icaya owaco lok mo ma onongo pire tek i karegi ca ento bene tye ka cobbe i rwom ma lamal i kare-ni ni: “Ngat ma tamme tye i komi, imiyo bedo ki kuc me ada, pien nongo geni.”​—Ic. 26:3; kwan Jo Roma 5:1.

20. Pingo watye ki pwoc i kom tira ma kimiyo i Jo Roma cura 8?

²⁰ Ki lok ada, kadi bed ni watye ki gen me cito i polo nyo me kwo pi naka i lobo kany, pud wan ducu watye ki pwoc madit pi tira ma kicoyo i Jo Roma cura 8. Pud dong watye ki pwoc madit ya pi tira ma cikowa pe me weko kit me “kom” doko gin ma pire tek loyo i kwowa! Ento bene waneno ryeko ma tye i tira man ma kimiyo ma cuko cwinywa ni: “Tam ma lubo kit pa cwiny maleng miyo kwo ki kuc.” Ka walubo tira meno, ci wabinongo kwo ma pe tum, pien Paulo ocoyo ni: “Mucara me bal en to, ento mot ma Lubanga miyowa nono, en aye kwo ma pe tum i Yecu Kricito Rwotwa.”​—Rom. 6:23.