1, 2. (a) Mar kubbe ki niye nining? (b) Lapeny mene ma wanyamogi?

WAMARO Jehovah “pien en okwongo marowa.” (1 Jon 4:19) Me nyuto marre, Jehovah okwongo miyo mot bot luticce ma lugen. Ka wamedde ki maro Lubangawa, ci niyewa bene bijing matek, pe ni en tye keken ento bene pe wabibedo ki akalakala ni en miyo mot bot jo ma marre.​—Kwan Jo Ibru 11:6.

² Jehovah maro miyo mot adada dok obedo gin ma en timo kare ki kare. Ka watye ki kalakala ka ada Lubanga bimiyo mot bot jo ducu ma giyenye, ci nongo niyewa tye nucu nucu pien “niye aye ma moko gin ma dano geno.” (Ibru 11:1) Ada, niye kwako bedo labongo akalakala i kom mot ma Lubanga ocikke me miyone i anyim. Bedo ki gen me nongo mot i anyim konyowa nining? Jehovah omiyo mot bot luticce i kare macon ki i kare-ni nining? Kong dong wanenu.

3. Gin ango ma Jehovah ocikke pire i Malaki 3:10?

³ Lubanga Jehovah ocikke me miyo mot ki luticce ma lugen, pi meno en mito ni watute matek wek wanong motte.  Wakwano ni: “‘Wutema, ka pe abiyabo botwu wang dirica me polo, wek aony gum ma opong madwong i komwu’ man lok ma Rwot me mony owaco.” (Mal. 3:10) Wanyuto ni watye ki pwoc madit ka waye mot pa Jehovah man.

4. Pingo pe myero wabed ki akalakala i kom lok pa Yecu ma kicoyo i Matayo 6:33?

⁴ Yecu ociko lupwonnyene ni ka guketo pi Ker-ri obedo mukwongo i kwogi, ci Lubanga bigwokogi. (Kwan Matayo 6:33.) Lok pa Yecu-ni ocung i kom kit ma Jehovah obedo ngat ma lagen kwede. Yecu onongo pe ki akalakala mo keken i kom cikke pa Lubanga. (Ic. 55:11) Wan bene kitungcel, ka wabedo ki niye i kom Jehovah, ci en bene bicobo cikkene ni: “Pe abiboli, pe abibwoti ata.” (Ibru 13:5) Watwero poro lok meno ki gin ma Yecu owaco i kom keto pi Ker-ri mukwongo kacel ki kit matir pa Lubanga.

5. Pingo kit ma Yecu ogamo kwede ki lok pa Petero jingo niyewa tutwal?

⁵ Lakwena Petero bene openyo Yecu ni: “Nen, wan waweko jamiwa ducu ci walubi. Wabinongo iye gin ango?” (Mat. 19:27) Maka daa i wi Petero pi lapeny meno, Yeco otito ki lupwonnye ni kibiminigi mot pi jallegi. Lukwenane kacel ki jo mukene ma gubedo lugen gibiloc kacel ki Yecu i polo. Ento kombeddi-ni bene mot tye. Yecu owaco ni: “Dano acel acel ma yam oweko odi, nyo omege, nyo nyimege, nyo wonne, nyo minne, nyo litino, nyo pottine, pi nyinga, binongo jami makato magi tyen miya, ci en binongo kwo ma pe tum.” (Mat. 19:29) Lupwonnyene gibinongo mot ma  lapore pe pi jami ducu ma gujalo. Wegigi, megigi, omegigi, lumegigi ki bene lutinogi pe pigi tek botgi makato gin mo keken ma gujalo pi Ker-ri?

6. Pingo Jehovah ocikke me miyo bakacic bot jo ma giwore?

⁶ Jehovah konyo luticce me gwoko gennegi pien en ocikke me minigi bakacic. Makato nongo adwogi maber i kare-ni, lutic ma lugen pa Lubanga Jehovah gitye ka kuro mot ma tye anyim ki miti madit. (1 Tem. 4:8) Ada, ka wamoko labongo akalakala ni Jehovah “miyo bakacic bot jo ma yenye” man biweko wabedo ki niye matek.​—Ibru 11:6.

7. Genwa tye macalo lajuk mel nining?

⁷ I pwonye me Wi Got, Yecu owaco ni: “Wupwo, cwinywu obed yom atika, pien bakacic ma gibimiyowu me pwoc dit, tye i polo, pien lunebi ma yam gukwongo nyimwu dano guketo ayelayela i komgi kit meno.” (Mat. 5:12) Mapat ki jo ma gitye ki gen me nongo mot i polo, gen me kwo i paradic i lobo kany pi naka bene obedo tyen lok ma weko ‘cwinywa bedo yom atika.’ (Jab. 37:11; Luka 18:30) Kadi bed ni genwa tye me cito i polo nyo kwo i lobo kany, gen ma watye kwede-ni tye “macalo lajuk me mel, ma cwinywa cung iye matek, ma pe wawirre atata.” (Ibru 6:17-20) Kit macalo lajuk mel weko yamo pe bayo mel, gen ma watye kwede bene twero weko wacung matek i kwo me kare-ni ki bene i yo me cwiny. Twero konyowa me ciro kwo matek ma warwatte kwedgi.

8. Gen tye ki teko me jwiko par nining?

⁸ Jami ma wageno ma kicoyo pigi i Baibul twero konyowa me jwiko par mogo ma watye kwedgi. Lok pa Lubanga tye macalo moo ma kweyo cwinywa i yo me cwiny. Pud dong tye me kwe cwiny ya me ngeyo ni Jehovah mito ni ‘wakel pekowa ducu bote’ ki bene me niang ni ‘en bikonyowa!’ (Jab. 55:22) Watye ki gen ni Lubanga twero timo jami “madwong twatwal ma kato gin ma watwero lego pire nyo keto i tamwa.” (Ep. 3:20) Go kong​—pe madwong keken ento makato “madwong twatwal.”

9. Watwero bedo ki gen nining ni Jehovah biminiwa mot i anyim?

⁹ Wek wabed ki kare me nongo mot meno, myero wabed ki niye muromo i kom Jehovah dok walub tirane. Moses owaco bot Luicrael ni: “Rwot [Jehovah] bimiyowu gum i lobo ma Rwot Lubangawu bimiyowu wucam me aleyowu matwal, ka ce wubiworo dog Rwot Lubangawu kun wugwokke wek wulub cikke ducu ma acikowu kwede tin Rwot Lubangawu bimiyowu gum kit ma yam ocikke kwede botwu-ni.” (Nwo. 15:4-6) Tika itye ki gen ni Jehovah bimini mot ka imedde ki bedo lagen i ticci pire? Itye ki tyen lok ma atir me bedo ki gen meno.

10, 11. Jehovah omiyo bot Yucepu mot ango?

¹⁰ Kicoyo Baibul piwa. Baibul tye ki labol mapol ma loko i kom kit ma Lubanga omiyo ki mot bot luticce mapol ma gin lugen. (Rom. 15:4) Yucepu obedo ngat acel i kingi. Kitweye i buc i Ejipt macalo adwogi me ororo ma obedo i kin en ki omegine ki dok lacen tim pa dako pa laditte. Tika onongo kipoke woko ki Lubangane? Pe wacel! “Rwot [Jehovah] onongo tye ki Yucepu, ci onyutte mar mere ma pe lokke, . . . onongo Rwot [Jehovah]  tye kwede; gin ducu ma en tiyo, Rwot omiyo iye gum.” (Acak. 39:21-23) I jami magi maraco ducu ma Yucepu okato ki iye-ni, en odiyo cwinye kun kuro Lubanga.

¹¹ Mwaki mogo anyim, Parao ogonyo Yucepu ki i buc ci okete me bedo lalub kore. (Acak. 41:1, 37-43) I kare ma Yucepu onywalo lutinone aryo, “Yucepu ocako nying latin kayone ni Manace, kun wacci, ‘Pien Lubanga dong omiyo wiya owil woko ki i kom aromana ducu ki i kom jo ducu me ot pa wora.’ Nying latin me aryone ocako ni Epraim, ni, ‘Pien Lubanga omiya anywal i lobo ma abedo iye ki aroma.’” (Acak. 41:51, 52) Pien Yucepu obedo lagen bot Lubanga, kimine mot mapol ma okonyo me gwoko kwo pa Luicrael kacel ki Luejipt. Lok ma pire tek ki kany tye ni, Yucepu oniang ni Jehovah aye ma omine mot magi ducu.​—Acak. 45:5-9.

12. Yecu ogwoko gennene nining i kare ma tye ka wok ki i atematema?

¹² Yecu Kricito bene ogwoko genne bot Lubanga i kare ma tye ka kato ki i atematema mapatpat pi niyene, dok bene kimine mot. Gin ango ma okonye me cung matek? Lok pa Lubanga tito ni: ‘Pi yomcwiny ma giketo i nyime en yam ociro yat, kun ocayo lewic ma giketo i kome.’ (Ibru 12:2) Labongo akalakala, Yecu onongo yomcwiny i tutene me lonyo nying Lubanga. Medo i kom meno, en onongo cwak pa Wonne kacel ki mot mukene mapol. Baibul waco ni en “kombeddi dong obedo piny i kabedo me deyo yo tung acuc me komker pa Lubanga.” Ka mukene bene wakwano ni: “Lubanga omiye dit ma malo twatwal, dok bene omiye nying ma tye malo makato nying mukene ducu.”​—Pil. 2:9.

13, 14. Jehovah winyo nining pi jami mabeco ma watimo pire?

¹³ Watwero bedo ki gen ni Jehovah pwoyo tutewa me tic pire. En niang kace watye ki akalakala mo keken. En paro piwa kace watye i peko me can lim, nyo ka yot komwa nyo par ma watye kwede weko pe watiyo bote kit ma myero watim kwede. Dok watwero bedo ki gen ni Jehovah neno tute pa luticce ducu me gwoko gennegi bote.​—Kwan Jo Ibru 6:10, 11.

¹⁴ Myero wii opo bene ni watwero lega bot Ngat ma ‘gamo lega-gu ducu’ kun wabedo ki gen ni en biwinyowa. (Jab. 65:2) “Won ma lakica, Lubanga ma kweyo cwiny dano ducu” bikweyo cwinywa kun bene miniwa kony ma mitte i yo me cwiny, gwok nyo bene en romo tic ki luye luwotwa. (2 Kor. 1:3) Gudo cwiny Jehovah adada ka waparo pi jo mukene. “Ngat ma kica mako i kom lucan omiyo banya bot Rwot [Jehovah]; pi meno Rwot bicule pi gin ma en otiyo.” (Car. 19:17; Mat. 6:3, 4) Pi meno, ka wajalle me konyo jo ma gitye i peko, Jehovah neno calo obedo banya ki tung bote. Dok en ocikke ni ebiculo ka wange.

15. Itye ka kuro mot ango? (Nen cal me i pot karatac 24.)

¹⁵ Lukricitayo ma kiwirogi gicung matek pien gitye ki gen me nongo ‘mot me kit atir, ma Rwot ma ngolo kop atir bimiyo i Nino maca.’ (2 Tem. 4:7, 8) Ento pe myero itam ni nongo kiteri marac ka dok itye ki gen mapat. “Romi mukene”  pa Yecu ma gitye milion mapol bene gitye ka kuro ki miti madit motgi me kwo i paradic pi naka. Dok “gibibedo ki yomcwiny pi lonyo madwong ma gibilimo.”​—Jon 10:16; Jab. 37:11.

16. Lok me kwe cwiny ango ma wanongo i 1 Jon 3:19, 20?

¹⁶ I kare mogo, wabwono tic ma watye ka timone pi Jehovah, nyo wabedo ki akalakala ka ada cwiny Jehovah yom pi tic ma watiyo bote. Nyo bene wabedo ki akalakala ka wapore me nongo mot mo keken. Wiwa myero pe owil ni “Lubanga dit kato cwinywa woko, dok ngeyo lok ducu.” (Kwan 1 Jon 3:19, 20.) En miyo mot pi tic mo keken ma watiyo pire ki cwinywa ducu pi niye kacel ki mar, kadi bed ni waneno ni ticce lam adada.​—Mar 12:41-44.

17. Mot ango ma watye ka nongone i kare-ni?

¹⁷ Kadi wa i kare man me col piny i lobo marac pa catan-ni, Jehovah pud tye ka goyo laane i kom jone. En neno ni meno jo ma giwore ki cwiny me ada gibedo ki kuc kacel ki cam me cwiny muromo. (Ic. 54:13) Kit ma Yecu ocikke kwede, Jehovah miniwa mot i kare-ni kun weko wabedo i kin jo me ot ma gitye ki mar i kingi, utmege ma gunotte i twok lobo-ni lung. (Mar. 10:29, 30) Medo i kom meno, jo me giyenyo Lubanga ki cwinygi ducu gibibedo ki wic ma opye mot, ma giyeng ki jami me gitye kwede dok ki yomcwiny.​—Pil. 4:4-7.

18, 19. Lutic pa Jehovah giwinyo nining i kom mot ma ginongo i kare-ni?

¹⁸ Lutic pa Jehovah i twok lobo-ni lung gitwero tito pi mot mamwonya ma ginongo ki bote. Me labolle, Bianca lamego mo ma a ki i Germany owaco ni: “Pe atwero tito kit ma myero apwo kwede Jehovah pi konya i kare ma atye ki par mapol ki me bedo cok kweda nino ducu. Lobo tye ma onywene adada dok nen calo gen mo dong pe. Ento ka atye ka tic kacel ki Jehovah, abedo ma cwinya opye mot calo atye i kore. Ka ajalo gin mo keken pire, en culo wange wang miya mapol.”

¹⁹ Nen kong labol pa Paula lamego mo ma tye ki mwaka 70 i Canada ma tye ki two spina bifida. En owaco ni: “Kadi bed ni tek bota me wot, man pe nyuto ni bene nongo genga ki timo ticwa me pwony. Atiyo ki yo mukene calo tic ki cim kacel ki tito kwena ma pe ayubbe iye. Atye ki buk mo ma acoyo iye ginacoya ki tam mogo ma anongo ki i bukkewa dok akwano kare ducu ka amito cuko cwiny. Alwongo buk meno ni ‘Bukka ma Konya me Kwo.’ Par pe bwoyowa pi naka ka waketo cwinywa i kom cikke pa Jehovah. I kwo mo keken ma watye ka wok ki iye Jehovah kare ducu nongo tye atera me miniwa kony.” Gin ma itye ka kato ki iye twero bedo pat ki pa Bianca nyo pa Paula. Ento, itwero tam i kom kit ma Jehovah omiyo boti kacel ki bot jo mukene mot. Pud dong bedo ber ya ka itamo i kom kit ma Jehovah tye ka mini mot i kare-ni, ki dong kit ma bimini mot i anyim!

20. Gin ango ma watye ki gen nongone ka wamedde ki tic pi Jehovah ki cwinywa ducu?

²⁰ Wii myero pe owil ni ibinongo “bakacic madit” ka ilego bot Lubanga ki cwinyi ducu dok ma nongo itye agonya. Itwero bedo labongo akalakala mo ni ka ‘itimo gin ma Lubanga mito, ci ibinongo gin ma yam en ocikke pire.’ (Ibru 10:35, 36) Pi meno, wamedde wunu ki jingo niyewa kun watiyo bot Jehovah ki cwinywa ducu. Dok wabed ki gen ni Jehovah biminiwa mot.​—Kwan Jo Kolocai 3:23, 24.