Tika dong ikwano maber Wi Lubele ma kibedo ka goyone cokcok-ki? Nen kong ka wi po i kom lapeny magi:

Kit bal mene ma Yecu onongo tye ka lok iye i kare ma omiyo tira ma i Matayo 18:15-17?

En onongo tye ka lok i kom peko ma kitwero cobone i kin jo ma lok meno makogi keken. Ento balle nongo dit ma ka pe kicobo ci myero kiryem ngat meno woko ki i kacokke. Me labolle, bal meno romo bedo balo nying ngat moni nyo kwalo kwo.​—w16.05, pot 12.

Itwero nongo adwogi maber nining ki i kwanni me Baibul?

Itwero timo magi: Kwan ki wic ma mito niang maber, yeny pwony ma itwero ketone i tic; penye kekeni ki lapeny calo ‘Atwero tic kwede me konyo jo mukene nining?’; dok ti ki jami me kwedo lok ma gitye me yenyo ngec mapol i kom gin ma ikwano.​—w16.05, pot 29-31.

Mono rac ki Lakricitayo me kumo kadi bed ni tye ki niye i kom nicer?

Bedo ki niye pe twero kwanyo arem cwiny malit ma Lakricitayo mo romo bedo kwede. Abraim okumu pi to pa Cara. (Acak. 23:2) I nge kare mo, arem cwiny twero kwer.​—wp16.3, pot 4.

Laco ma tye ki gin me coc i lakngete ma kiloko i kome i Ejekiel-li, ki co abicel ma gumako jami lwenygi me nek i cinggi-ni gicung pi angagi?

Waniang ni Gicung pi mony me polo ma kitiyo kwedgi i kare me jwero Jerucalem, dok kibitic kwedgi bene me jwero lobo pa Catan i lweny me Armagedon. Cobbe pa lok man i kare-ni tye ni, Laco ma tye ki gin me coc i lakngete-ni cung pi Yecu Kricito, dok en aye ma biketo lanyut i tur nyim jo ma gibibwot.​—w16.06, pot 16-17.

Baibul obwot ki i kom ngo?

Obwot, (1) pien jami ma kitiyo kwede calo kolo ki lar pe guballe woko; (2) ki i cing lutela me wibye ki lutela dini ma gutemme me balone woko; ki dok (3) ki i tute pa dano me loko kwena ma iye.​—wp16.07, pot 4-7.

Lakricitayo twero dwoko rwom me kwone lapiny nining?

Nge jami ma gimitte, ci igik wilo jami ma pe gimitte. Go pulan mupore. Mi jami ma pe itiyo kwede bot jo mukene, dok icul banya ducu ma itye kwede. Dwok piny wel cawa ma icwalo i dog ticci, dok iket yub me medo cawani i ticwa me pwony.​—w16.07, pot 12.

Ngo ma Baibul nyuto ni en aye tye me wel makato kidi jabu nyo ryal?

Yubu 28:12, 15 nyuto ni ryeko mua ki bot Lubanga tye me wel kato jabu nyo ryal. Ka itye ka yenyone, temme me bedo ngat ma mwol ki dok ma tye ki niye matek.​—w16.08, pot 18-19.

Tika pore ki omege i kare-ni me gwoko ye tik?

I tekwaro mogo, gineno ni ye tik ma kikoyo maber pe obedo gin marac dok bene pe twero wiro tam pa dano ki i kom kwena maber me Ker. Kadi bed kumeno, omege mogo giromo moko tamgi pe me bedo ki ye tik. (1 Kor. 8:9) I tekwaro nyo kabedo mukene, dano pe giweko ye tikgi dok gineno calo pe obedo gin mupore pi Lukricitayo.​—w16.09, pot 21.

Pingo watwero bedo ki gen i kom lok ma kicoyo i Baibul i kom Daudi gin ki Goliac?

Goliac onongo borre kato futi abongwen dok onongo bor kato ngat mabor loyo ki i lobo i kare-ni. Daudi okwo ada, dok coc mo macon bene oloko i kom ot pa Daudi ki dok lok ma Yecu oloko bene moko lok meno. Coc macon moko lok ada man ma wangeyo-ni.​—wp16.5 pot. 13.

Apokapoka ango ma tye i kin ngec, niango, ki ryeko?

Ngat ma tye ki ngec nongo tye ki lok mapol i wiye. Ngat ma tye ki niango twero neno kit ma lok moni kubbe kwede ki mukene. Ento ngat ma tye ki ryeko twero ribo ngec ki niango ci tiyo kwede i yo ma konyo.​—w16.10, pot 18.