KINYWALA i 1926 i caro me Crooksville, Ohio, i lobo Amerika. Babana ki Mamana onongo pe gubedo ludini, ento onongo giwaco ki wan lutinogi aboro ni meno myero wawot ka lega. Abedo ka cito i kanica pa Methodist. I kare ma atye ki mwaka 14, lapwony dini omiya mot pien pe akeng wot i lega i Ceng Cabit ducu pi mwaka acel kulu.

I kine me kare meno, jiraniwa mo ma nyinge Margaret Walker, ma tye Lacaden pa Jehovah ocako limo Mamana kun nywako lok kwede i kom Baibul. I nino mo acel amoko tamma me bedo tye i kwangi. Mamana otamo ni abibalo kwangi woko, pi meno en owacca ni akat woko. Ento atute matek me winyo lokgi. I nge lim mogo pa Margaret, en openya ni, “Tika ingeyo nying Lubanga?” Awacce ni, “Dano ducu ngeyo ni meno nyinge Lubanga.” En owacca ni, “Cit ikel Baibul-li ci i yab Jabuli 83:18.” Akwano, ci anongo ni nying Lubanga obedo Jehovah. Angweco woko bot lurema ci awaco botgi ni, “Tin ka wudok gang, wukwan Jabuli 83:18 ki i Baibulwu ci wubinongo nying Lubanga iye.” Itwero waco ni meno dong acako tito kwena i cawa meno cutcut.

 Akwano Baibul ci anongo batija i 1941. Cutcut i ngeye, kiweko acako doro cokke me kwano Baibul. Acuko cwiny Mamana kacel ki omegina ki lumegina bene me bino, ci gucako bino i cokke ma onongo an aye adoro. Cwiny Babana onongo pe iye wacel.

Kimiya tic mogo mukene i kacokke, dok bene onongo agwoko bukkewa mapol. I nino mo acel, Babana ocimo bukke ma agwoko-ni ci owaco ni: “Ineno jami magi ma gudure-ni? Amito ni kikwanygi woko ki i ot kany, dok iromo bene cito kwedgi.” Aa ki gang ci akobo i rum mo acel macok ki caro me Zanesville, Ohio, ento pol kare onongo alimo lupacowa me cuko cwinygi.

Babana otemme me gengo Mamana ki bino i cokke. I kare mogo ka Mamana tye ka bino i cokke, Babana ryemo kore ci ywaye dwoke cen i ot. Ento en onongo pud ngweco kato woko ki i doggola mukene ci bino i cokke. Awaco ki Mamana ni, “Pe ipar, en biol woko ki lubo kori.” Ki lok ada, i nge kare mo, Babana oweko lubo kore woko, dok man oweko en onongo dong tye agonya me bino i cokke.

I 1943 kacokkewa ocako bedo ki cukul me Tiokraci, ki bene acako miyo pwony i cukul meno. Tira ma anongo i nge miyo pwony i cukul meno okonya me dongo dirona me lok ki dano i yo maber.

I kare meno, lobbe onongo gitye i Lweny me II me Wi Lobo. I 1944, gilwonga me donyo i mony. Acito i Fort Hayes i lobo Columbus, Ohio, ki kunu gingiyo ka koma yot, dok apongo fom mogo ma kimiya. Awaco ki ladit mony ni pe abidoko lamony. Kiweka i nino meno. Lacen dok ladit acel obino i doggolana ci owacca ni: “Corwin Robison, atye ki waraga me maki.”

I nge cabit aryo, kitera i nyim kot, langol kop owacca ni: “ka onongo twerone tye i wiya, onongo abitweyi i buc pi kwoni ducu. Tika itye ki gin mo ma itwero wacone?” Agamo lokke ni: “Ladit, onongo myero kiwacci ni meno abedo latit kwena. Dong acung i nyim doggola pa dano ducu, dok bene atito kwena maber me Ker bot dano mapol adada.” Langolkop owaco ki jo ma onongo gibikonyo me ngolo kop i koma ni: “Pe wutye wunu kany me ngolo kop ka ce awobi man tye latit kwena nyo pe. Ento wutye kany me ngolo kop i kome ka ce obino ocone me donyo i mony nyo pe.” Ma pe otero cawa acel, jo ma onongo gitye ka konyo me ngolo kop gumoko tamgi—ki ngolo kop i wiya ni an labal. Langol kop omoko ni omyero kitweya pi mwaki abic i buc i boma me Ashland , Kentucky.

Acwalo cabit aryo i mabuc ma tye i Columbus, Ohio, dok i nino me acel, pe akato woko ki i ot buc. Alego bot Jehovah ni: “Pe atwero bedo i ot buc pi mwaki abic, pe angeyo gin me atima.”

I nino me aryone, lagwok mabuc oweka akato woko ki i ot buc. Awoto acito bot Iamabuc mo mabor ma kore lac adada, ci wacung kacel ka neno piny ki i wang ot. En openya ni, “Pingo  itye kany?” Agamo ni, “An abedo Lacaden pa Jehovah.” En owaco ni, “Ada? Ci pingo itye kany?” Awacce ni, “Lucaden pa Jehovah pe gicito i lweny dok pe gineko dano.” En owaco ni, “Gitweyi i buc pien ikwero neko dano. Kun gitweyo jo mukene pienni guneko dano. Meno tika nyuto ryeko?” Awacce ni, “Pe nyuto.”

En dok owacci, “Pi mwaki 15 abedo i mabuc mukene, ka ma akwano iye bukkewu mogo.” Alego bot Jehovah ni, “konya wek abed ki wat maber ki laco-ni.” Cutcut i cawa meno, Paul—meno aye onongo nyinge—owaco ni: “Ka ngat acel i kin jo magi ogudi, ci dange ilwonga. Abipwonyogi.” Kit ma jami olokke kwede, pe abedo ki peko mo keken ki lumabuc 50 ma onongo gitye kacel kwedwa.

I kare ma ludito me mabuc gukoba i Ashland, anongo ni omege ma guteggi mapol dong gitye kunnu. Bedo kacel kwedgi okonyo an kacel ki jo mukene me cung matek i yo me cwiny. Onongo giminiwa wang Baibul me akwana pi cabit ki cabit, dok bene wayubo lapeny ki lagam pi cokke ma onongo kilwongo ni Bible Bees. Onongo bene tye omego ma kicimo macalo lakony kor yub me wang ticwa. Onongo watye i ot mo malac adada ma kitanda kiryeyogi weng i lain cok ki kom ot. Lakony kor yub me wang ticwa onongo wacca ni: “Robison, wang ticci tye i kom kitanda magi ki magi. Ngat mo keken ma kicimo me buto i wi kitanda meno nongo tye i wang ticci. Dok omyero inen ni meno itito kwena bote ma peya en oa nyo okobo ki kenyo.” Meno aye obedo kit ma onongo wayubbe kwede me tito kwena i yo maber.

Lweny me II me Wi Lobo ogik i 1945, ento i nge meno pud amedde ki bedo mabuc pi kare mo manok. Onongo atye ki par i kom jo me pacowa pien Babana owacca ni, “Ka onongo aromo timo gin mo me juko ticci-ni, ci gengo jo mukene-ni bibedo yot.” I nge a ki i buc, abedo ki yomcwiny madit adada. Kadi bedi ni aunauna ma a ki bot Babana onongo tye magwar adada, dano abiro me gangwa onongo gicito i cokke ki dok lamera acel bene onongo batija.

I kare ma lweny me lobo Korea ocakke i 1950, kilwonga me donyo i mony tyen me aryo, dok acito i Fort Hayes. I nge pim me ngiyo ryeko ki kerona, ladit mo acel owacca ni, “In aye ma iloyo ki i gurup ma kiketi iye.” Awacce ni, “Meno pe rac, ento pe abidonyo i mony.” Atitte gin ma tye i 2 Temceo 2:3, dok awacce ni,  “An dong atye lamony pa Yecu Kricito.” En kong oling pi kare mo, ci owaco ni, “Itwero cito.”

I nge meno, abedo i cokke pa utmege ma gimito cito i Betel i gure madit ma obedo i Cincinnati, Ohio. Omego Milton Henschel owacciwa ni, ka omego mo mito tic matek pi Ker, dul pa Jehovah twero tic kwede i Betel. Apongo fom me tic i Betel, kigama, ci acito i Betel ma tye i Brooklyn i Agucito 1954. Nicakke i kare meno pud atye i Betel.

Pe tye nino mo ma abedo labongo tic mo me atima i Betel. Pi mwaki mapol, abedo ka tic i kom macin me lyeto pii ma bedo i opic ki ka ma kigoyo iye bukke, ki dong ka tweyo nati ma nongo gitye ka gony. Atiyo bene i Odi me Gure i New York City.

Amaro yub me cwiny ma tye i Betel, ma i kine tye iye kwano ginacoya me nino ducu i woro me odiko, nyamo Wi Lubele ki dong nywako i ticwa me pwony kacel ki jo me kacokke. Ka itamo i kom jami magi, ci ibiniang ni jo me ot ducu ma Lucaden pa Jehovah myero gubed ki yub magi. Ka lunyodo ginyamo Ginacoya me nino ducu kacel ki lutinogi, gibedo ki Woro me Otyeno pi jo me ot kare ki kare, kun bene ginywako ki mit kom i yub me cokke ki tito kwena maber-ri, ci dano ducu me paco meno gibibedo jo muteggi i yo me cwiny.

Atye ki lurem mapol i Betel ki bene i kacokke. Mogo i kingi gubedo jo ma kiwirogi dok bene dong gutyeko nongo motgi me cito i polo. Mukene onongo gitye ki mot me bedo i lobo. Ento lutic pa Jehovah ducu—kadi wa Lubetel bene—gitye ki roc. Ka peko mo tye i kin an ki omego mo, atute me yubo wat i kinwa wek wabed ki kuc. Alwodo lok i kom Matayo 5:23, 24, ki bene kit ma myero wacob ki lok mogo ka tye. Kwayo kica pe yot, ento tyen manok keken ma aneno peko ka medde i kinwa i nge kwayo kica.

Pi mwakana, oweko dong pe yot bota me wot ka tito kwena i ot ki ot, ento pe ailo cinga woko. Apwonyo leb Mandarin Chinese dok amaro nywako lok ki jo ma loko leb Chinese ma arwatte kwedgi i dog gudo. I kine mukene i odiko, amiyo magajin 30 nyo 40 bot jo ma gitye ki miti me kwanone.

 Dok bene dong adok cen ka lim wa i China! I nino mo acel, latin anyaka mo ma tye ka poko karatac cato wil ma loko i kom nyig yen, okato ki i ka ngeta kun bwunyo kweda. An bene abwunyo kwede dok amine The Watchtower ki Awake i leb Chinese. En ogamo ci owacca ni nyinge Katie. I nge meno, kare ducu ka Katie onena, bino ka lok kweda. Onongo apwonye ki nying nyig yat ki pot dek mogo i leb Munu, ci en nwoyo gin ma awacce. Anywako bene wang Baibul kwede, ci oye buk me Baibul Mono Ada Ango. I nge cabit mogo, en orweny woko.

I nge dwe mogo, anyaka mukene ma onongo tye ka poko karatac me cato wil dok oye gamo magajin ki bota. I cabit mukene, en okela cimme, ci owacca ni, “Kong ilok ki China.” Awacce ni, “Pe angeyo ngat mo ki i China.” En obedo ka diya ni aloki, ci agamo cim awacci, “Hello, man Robison.” Dwan ngat ma tye ka lok ki i China-ni owacci, “Robby, man Katie. Dong adwogo cen i China.” Awacci, “China?” Katie ogamo ni, “Ee, Robby, tika ingeyo latin ma omini cim-ni? Meno lamera matidi. Ipwonya ki jami mabeco mapol. Tim ber bene ipwonye kit ma ipwonya kwede-ni.” Awacci, “Katie, abitutte me timo gin ducu ma atwero. Apwoyo titta ka ma itye iye.” I nge kare mo manok, aloko ki lamin Katie-ni me agikki. Alego ni anyira aryo-ni gumedde ki pwonyo jami mapol i kom Jehovah ka mo keken ma gitye iye.

Dong atiyo tic pa Jehovah pi mwaki 73. Cwinya yom ni meno en okonya me cung labongo cwako tung ka mo i kare me lweny ki dok me gwoko gennena i mabuc. Omegina kacel ki lumegina bene guwacca ni i kare ma acung matek i nge aunauna ma Babawa oketo i koma-ni, okonyogi bene me cung matek. Mamana kacel omegina 3 ki lumegina 3 bene dong gunongo batija. Babana bene cwinye gire olokke motmot, ci obedo ka bino i cokke mogo ma peya en oto.

Ka obedo miti pa Lubanga, jo me gangwa kacel ki luwota ma guto gibicer i lobo manyen. Go kong kit ma bibedo mit kwede me woro Jehovah kacel ki jo ma wamaro i anyim! *