1, 2. Gin ango ma omego mo acel oniang iye, dok ngo ma en otimo?

ROBERT onongo batija ma pud tye ki mwaka apar ki wiye, ento lok me ada onongo pe obedo gin ma pire tek i kwone. En owaco ni: “Pe atimo gin mo marac, dok onongo atimo jami ducu ma mitte ento cwinya onongo pe iye. Onongo anen calo ngat matek i yo me cwiny, abedo tye i cokke ducu dok atiyo calo painia pi tutunu i dwe mogo i mwaka. Ento gin mo onongo orem i kwona.”

² Robert pe oniang gin ma onongo orem-mi nio ka en onyomme. Pol kare en ki dakone onongo gipenye ki lapeny madok i kom Baibul ka gitye ka galowangi. Dakone onongo ngeyo Baibul maber dok onongo gamo lapeny labongo galle. Ento lapennye mogo onongo pe yot bot Robert dok man minne lewic. En owaco ni: “Onongo weko anen calo pe angeyo gin mo keken. Atamo kekena ni, ‘Ka abibedo lawi dakona i yo me cwiny ci myero atim gin mo.’” En otimo gin ma mitte. En owacci: “Akwano Baibul, dok akwedo lok matut iye, ci dong acako niang jami mogo ma onongo atye ki ngec manok iye. Ngecca omedde dok ma pire tek loyo, adongo wat macok ki Jehovah.”

3. (a) Ngo ma watwero pwonyone ki i gin ma otimme i kom Robert? (b) Gin ango ma pigi tego ma wabinyamo i pwony man?

 ³ Watwero nongo pwony ma pire tek ki i gin ma otimme i kom Robert. Watwero bedo ki ngec mogo i kom Baibul dok nongo wacito i cokke kare ducu ento man pe weko wabedo jo mucwiny i yo me cwiny. Nyo twero bedo ni dong watimo jami mogo ma mitte wek wabed jo mucwiny i yo me cwiny, ento ka wangine kekenwa motmot pud watwero neno ni tye ka mogo i kwowa ma mitte me ayuba. (Jo Pilipi 3:16) I pwony man, wabigamo lapeny adek ma pigi tego: (1) Ngo ma bikonyowa me ngeyo ka wacwiny i yo me cwiny? (2) Watwero doko jo mucwiny i yo me cwiny nining? (3) Bedo ngat mucwiny i yo me cwiny twero konyowa i kwowa me nino ducu nining?

4. Tira ma kimiyo i Jo Epeco 4:23, 24 tye pi angagi?

⁴ Ma pud wacako tic pi Lubanga acaka, waloko kit me kwowa. Man pe ogik i nge nongo batija. Baibul wacciwa ni: ‘Wuwek Lubanga omedde ki roco tam me cwinywu odok manyen.’ (Jo Epeco 4:23, 24) Myero wamedde ki loko kit ma wakwo kwede pien pud watye ki roc. Pud mitte ni wamedde ki dongo i yo me cwiny kadi bed dong watiyo pi Jehovah pi mwaki mapol.​—Jo Pilipi 3:12, 13.

5. Lapeny mene ma gitwero konyowa me niang ka wacwiny i yo me cwiny?

⁵ Mitte ni wangine kekenwa kadi bed ni wateggi nyo pud watino. Watwero penye kekenwa ni: ‘Tika atye ka dongo i yo me cwiny? Tika kita tye ka doko calo pa Kricito? Kita kacel ki kit ma abedo kwede ka atye i kacokke nyuto gin ango? Lokka nyuto ni mitina tye kwene? Kwanna pira kena, rukka ki dong kit ma adok kwede i tira nyuto ngo? Ngo ma atimo ka gitye ka bita me timo gin marac? Tika dong atye Lakricitayo muteggi?’ (Jo Epeco 4:13) Lapeny magi gitwero konyowa me niang kit ma dong wadongo kwede i yo me cwiny.

6. Ngo mukene ma twero konyowa me niang ka ce watye ka dongo i yo me cwiny?

⁶ I kine mogo wamito ni jo mukene gukonywa me neno ka watero lok me cwiny calo gin ma pire tek. Lakwena Paulo otito ni ngat ma pe lubo tela pa cwiny pa Lubanga pe niang ka ce kit me kwone pe yomo cwiny Lubanga. Ento ngat ma lubo tela pa cwiny pa Lubanga niang kit ma Lubanga neno kwede ki jami ducu. En ngeyo ni Jehovah cwinye pe bedo yom ka ngat moni kwo ma lubbe ki miti me kom. (1 Jo Korint 2:14-16; 3:1-3) Luelda ma gitye ki tam pa Kricito giniang oyotoyot adada ka omego nyo lamego mo ocako lubo miti me kom, dok gitute  matek me konye. Ka luelda gitye ka tute me konyowa, tika wabiye ni gukonywa wek walok kit me kwowa? Ka watimo kit meno, ci wanyuto ni wamito dongo i yo me cwiny.​—Latitlok 7:5, 9.

7. Wangeyo nining ni ngat ma cwiny pa Lubanga aye telo pe bedo mere ki ngec me Baibul keken?

⁷ Ngec ma wanongo ki i Baibul keken pe twero weko wateggi i yo me cwiny. Kabaka Solomon onongo tye ki ngec mapol i kom Jehovah, dok bene lok mogo me ryeko pa Solomon odoko but Ginacoya. Ento lacen watte ki Jehovah odoko goro, dok bene pe ogwoko gennene. (1 Luker 4:29, 30; 11:4-6) Pi meno, ngo mukene ma mitte mapat ki ngec me Baibul? Myero wamedde ki jingo niyewa. (Jo Kolocai 2:6, 7) Watimo man nining?

8, 9. (a) Gin ango ma bikonyowa me jingo niyewa wek obed matek? (b) Miti ango ma myero wabed kwede ka watye ka kwan ki lwodo lok? (Nen cal ma tye i pot karatac 22.)

⁸ I cencwari me acel, Paulo ocuko cwiny Lukricitayo ni ‘gumedde anyim ki pwony pa jo muteggi.’ (Jo Ibru 6:1) Watwero keto tira man i tic nining i kare-ni? Yo acel ma pire tek aye me kwano buk me Wubed i Mar pa Lubanga. Man bikonyi me niang kit me keto cik ma igi lac me Baibul i tic. Ka dong ityeko kwano buk man, ci pud tye buke mukene ma itwero kwanogi wek ijing niyeni. (Jo Kolocai 1:23) Mitte bene ni walwod lok i kom jami ma wakwano dok wapeny Jehovah wek okonywa me ketone i tic.

⁹ Ka wakwano dok walwodo lok i kom gin ma wakwano, ci mitiwa ma pire tek myero obed me yomo cwiny Jehovah ki bedo lawiny bote. (Jabuli 40:8; 119:97) Mitte bene ni wakwer gin mo keken ma twero gengowa me dongo i yo me cwiny.​—Tito 2:11, 12.

10. Gin ango ma jo matino giromo timone me dongo i yo me cwiny?

¹⁰ Ka ce pud itidi, tika itye ki yub i yo me cwiny? Omego mo ma tiyo i Betel pol kare loko ki jo matino ma gicok nongo batija i gure me adwol dok penyo yub ma  gitye kwede i yo me cwiny. En oniang ni jo mapol i kingi nongo gutamo matut i kom kit ma gibitic kwede pi Jehovah. Jo mogo giketo yub me tic pi Jehovah pi kare malac nyo gikobo ka ma can lutit kwena tye iye. Ento jo matino mogo pe gitwero gamo lapenye. Meno mono twero bedo ni pien gitamo ni pe mitte ni giket yub i yo me cwiny? Ka pud itidi, penye ni: ‘Tika acito i cokke ki ticwa me pwony pien lunyodona gimito ni aciti? Nyo tika adongo watta pira kena ki Jehovah?’ Ki lok ada, kadi bed ni wateggi nyo pud watino, mitte ni wan ducu wabed ki yub i yo me cwiny. Yub magi bikonyowa me dongo i yo me cwiny.​—Latitlok 12:1, 13.

11. (a) Gin ango ma myero watim wek wadong i yo me cwiny? (b) Lanen mene ma nonge i Baibul ma watwero lubone?

¹¹ Ka dong waneno ka ma mitte ni wayub, ci myero wacak loko kwowa. Man obedo gin ma pire tek adada pien romo miyo wanongo kwo ma pe tum nyo pe. (Jo Roma 8:6-8) Jehovah ngeyo ni watye ki roc, dok miniwa cwiny mere maleng me konyowa. Ento pud mitte ni watute matek. Omege John Barr, ma onongo obedo lamemba me Lukiko Madit, oloko i kom Luka 13:24 dok owaco ni: “Jo mapol gipoto pien pe gutute matek me dongo i yo me cwiny.” Myero wabed calo Yakobo ma olwenyo ki lamalaika dok pe oilo cinge nio ka lamalaika  ogoyo laa i kome. (Acakki 32:26-28) Kadi bed ni kwano Baibul twero bedo mit, ento pe myero watam ni kwano Baibul bedo calo kwano buk ododo me galo wang. Myero watute me niang lok ada ma bikonyowa.

12, 13. (a) Gin ango ma bikonyowa me keto tira ma tye i Jo Pilipi 2:5 i tic? (b) Lanen pa Petero kacel ki tirane twero konyowa nining? (c) Gin ango ma itwero timone wek idong i yo me cwiny? (Nen bok ma wiye tye ni “ Jami ma Itwero Timone Wek Idong i Yo me Cwiny.”)

¹² Ka watute me dongo i yo me cwiny, ci cwiny maleng bikonyowa me loko kit ma watamo kwede. Motmot wapwonye me tam calo Kricito. (Jo Pilipi 2:5) Cwiny maleng twero konyowa me weko miti maraco ci wacako dongo kit ma yomo cwiny Lubanga. (Jo Galatia 5:16, 22, 23) Ka waniang ni pud watye ka keto cwinywa i jami me kom, nyo i nongo yomcwiny, myero pe wail cingwa woko. Myero wamedde ki kwayo Jehovah pi cwiny maleng wek okonywa me keto tamwa i kom jami matir. (Luka 11:13) Wii myero opo i kom lakwena Petero. En pe obedo ka tam calo Kricito kare ducu. (Matayo 16:22, 23; Luka 22:34, 54-62; Jo Galatia 2:11-14) Ento en pe oilo cinge, dok Jehovah okonye. Motmot Petero opwonye me tam calo Kricito. Dok wan bene watwero.

¹³ Lacen, Petero oloko i kom kit mogo mabeco ma bikonyowa. (Kwan 2 Petero 1:5-8.) Myero watute matek me dongo kit me jukke ken, diyo cwiny, mar me omego, ki dong kit mukene mabeco. Nino ducu watwero penye kekenwa ni, ‘Kit mene ma atwero dongone tin ma twero konya wek ajing i yo me cwiny?’

14. Lubo tela pa cwiny pa Lubanga konyowa nining?

¹⁴ Ka watamo calo Kricito, ci man bigudo kit ma wakwo kwede i ka ticwa, gang kwanwa nyo lok ma waloko, ki dong kit ma wamoko ki tam nino ducu. Tam ma wamoko binyuto ni watye ka tute me lubo lanen pa Kricito. Pe wamito ni gin mo keken obal watwa ki Jehovah pien walubo tela pa cwiny maleng. Ka waye tela pa cwiny pa Lubanga, ci man bikonyowa me cung matek ka kibitowa me timo gin marac. Ma peya wamoko tam mo keken, myero kong wapenye ni, ‘Cik mene ma iye lac me Baibul ma twero konya? Ngo ma Kricito onongo bitimone? Ngo ma biyomo cwiny Jehovah?’ Myero wawek odok kitwa me tam kit meno ma peya wamoko tam. Pi meno, kong dong wanyamo jami mogo ma gitwero timme. Wabineno cik ma iye lac me Baibul ma twero konyowa me moko tam me ryeko.

15, 16. Tam calo Kricito twero konyowa nining me moko tam me ryeko ma lubbe ki (a) yero ngat mupore me anyoma? (b) yero lirem?

¹⁵ Yero ngat mupore me anyoma. Cik ma iye lac ma twero konyowa nonge i 2 Jo Korint 6:14, 15. (Kwan.) Paulo onyuto ka maleng ni jo ma gilubo tela pa cwiny pa Lubanga nenogi pe rom ki pa jo ma pe gilubo tela pa cwiny pa Lubanga nyo ma gimaro jami me kom. Pe gineno jami i yo marom. Cik man ma iye lac-ci twero konyi nining me yero ngat mupore me anyoma?

¹⁶ Yero lirem. Cik ma iye lac ma twero konyowa nonge i 1 Jo Korint 15:33. (Kwan.) Ngat ma lubo tela pa cwiny pa Lubanga pe bimako lirem ki jo ma gitwero  balo watte ki Jehovah. Tam i kom kit ma itwero keto kwede ki cik ma iye lac man i tic i yo mapatpat. Me labolle, cik man twero konyi nining ma lubbe ki kubbe ki jo mukene kun itiyo ki intanet? Twero konyi nining me moko ka ce ibituku tuku me kompiuta ki ngat mo ma pe ingeyo kun ikubbe ki intanet?

17-19. Bedo ngat ma lubo tela pa cwiny pa Lubanga bikonyi nining me (a) gwokke ki i jami mogo ma konygi pe? (b) bedo ki yub mupore pi anyim? (c) cobo winye manok?

¹⁷ Timo jami mogo ma gudo watwa ki Jehovah i yo marac. Wanongo tira mo ma pire tek adada i Jo Ibru 6:1. (Kwan.) ‘Tic ma kwo pe iye’ mene ma myero wagwokke ki iye? Man obedo jami mogo ma pe twero konyowa me dongo i yo me cwiny. Cik man ma lubbe ki tic ducu ma kwo pe iye-ni twero konyowa me gamo lapeny calo: ‘Gin man tika twero konya nyo konye pe wa acel? Tika myero adony i timo biacara man? Pingo pe myero adony i gurup mo ma tye ka temme me kelo alokaloka i lobo?’

¹⁸ Keto yub i yo me cwiny. I Pwonye me Wi Got, Yecu ominiwa tam maber adada ma lubbe ki keto yub pi anyim. (Matayo 6:33) Dano ma keto cwinye i kom jami me cwiny keto pi lok me Ker bedo mukwongo i kwone. Cik ma iye lac man bikonyowa me gamo lapeny calo: ‘Tika myero acit i univaciti me medde ki kwan i rwom ma lamal? Tika myero aye dog tic man?’

¹⁹ Winye manok. Tira ma Paulo omiyo ki Lukricitayo me Roma twero konyowa ka winye manok tye i kinwa ki jo mukene. (Jo Roma 12:18) Watute me ‘bedo ki kuc ki dano ducu’ pien walubo lanen pa Kricito. Ngo ma watimo ka winye manok tye i kinwa ki jo mukene? Tika tek botwa me ye tam pa ngat mukene? Nyo kece kingeyowa calo ngat ma tute me bedo ki kuc ki jo mukene?​—Yakobo 3:18.

20. Pingo myero wamedde ki dongo i yo me cwiny?

²⁰ Labol magi ginyuto kit ma lubo cik ma igi lac me Baibul twero konyowa kwede me moko tam ma nyuto ni walubo tela pa cwiny pa Lubanga. Ka watero jami me cwiny calo gin ma pire tek, ci wabibedo ki yomcwiny dok wayeng ki jami ma watye kwede. Robert, omego ma waloko i kome malo-ni owaco ni: “I kare ma adongo wat macok ki Jehovah, adoko won ot ki wego maber. Onongo ayeng ki jami ma watye kwede dok abedo ki yomcwiny.” Ka watimo jami ducu ma mitte me dongo i yo me cwiny, ci wabinongo adwogi mabeco mapol. Wabibedo ki yomcwiny i kare-ni ki bene i anyim wabinongo “kwo ma en aye kwo kikome.”​—1 Temceo 6:19.