LOK MA I POK NGEYE | PINGO MYERO WATIM GIN MATIR?
Tika Pud Konyo me Timo Gin Matir i Kareni?
Hitoshi tiyo i kampuni mo acel i opic ma loyo lok i kom lim i lobo Japan. I kare ma gitye ka ngiyo te buk me lim ki ladit ticce , kiwaco ki Hitoshi ni meno pe myero omi ripot matir. Hitoshi owaco botgi ni cwiny ma ngolle kop pe biweko etimo gin ma kit meno. Macalo adwogine ladit tic pa Hitoshi omiyo bura i kome ni ebiryeme woko ki i tic dok bene en orwenyo ticce woko.
I nge dwe mogo ma kiryemo Hitoshi ki i tic, cwinye otur adada. I kare ma kitye ka penyo Hitoshi pi tic mo acel, en owaco ni pe ebimiyo ripot mo keken me goba. Ngat ma onongo tye ka penye-ni ogamo ni: “Tammi dok pat adada ki pa jo mukene ba!” Lupaco kacel lurem Hitoshi gucuko cwinye me medde ki bedo ngat ma genne, ento en ocako bedo ki cwiny me akalakala. Me labolle, en owaco ni, “Abedo ki akalakala mada ka bedo ngat ma timo gin matir ma lubbe ki niyena tye tam maber.”
Gin ma otimme i kom Hitoshi-ni obedo gin ma nyuto ni pe dano ducu tero timo gin matir calo gin ma pire tek. Ki lok ada, ka odok i lok me cato wil, jo mukene gineno calo gengogi ki bedo lulonyo. Dako mo ma tiyo i lobo South Africa owaco ni meno, “I cawa ducu atye kacel ki jo ma pe gitimo jami ma pe atir dok man weko abedo ki atematema madit me timo jami ma gitimo-ni.”
Loko lok goba obedo tim mo marac ma dong onya loyo i kareni. Mwaki mogo angec, lapwony Robert S. Feldman me univaciti me Massachusetts Amherst omoko ni pacen 60 pa dano madito giwaco lok goba i lokgi i nge dakika apar ducu. Feldman owaco ni, “man pud dong obedo kwed mo ma omako wiya adada. Pe onongo wangeyo ni loko lok goba bidoko kit me kwo pa dano i kareni.” Tye me ur adada ni dano mapol pe gimito ni kibwolgi ento inongo ni jo manok keken aye ma giloko lok ada.
Pingo lok goba, kwalo kwo, ki jami mukene ma nyuto ni ngat moni pe timo gin matir onya adada i kareni? Timo gin ma pe atir twero gudo jo mukene nining? Ma dong pire tek loyo, watwero gwokke nining ki i timo kodi jami magi?
