1. Calo Kabaka Daudi, wan bene watwero pennye ki lapeny ango?

WAN ducu wamito kwo ma tye ki kuc labongo ayela mo. Pe tye ngat mo ma mito ni ebed ki par. Kadi bed kit meno, i kare mogo wayelle ki par. Ki lok ada, lutic pa Jehovah mukene giromo penyo lapeny acel ma Kabaka Daudi openyo ki Jehovah ni: “Myero abed ki arem i cwinya pi kare ma rom mene, dok bene myero abed ki cwercwiny dyeceng ki dyewor benebene?”​—Jab. 13:2.

2. Gin ango ma wabinyamo i pwony man?

² Kadi bed pe watwero kwanyo par ducu ki i kwowa, tye jami mogo ma watwero timone me dwoko par piny. I pwony man, wabicako ki nyamo jami mogo ma romo keliwa par. I nge meno, wabinyamo jami abicel ma twero konyowa me bedo ma wiwa opye mot ka watye ka kato ki i peko.

3. Jami mene ma twero keliwa par, dok tika watwero gengo jami magi?

³ Jami mapol twero keliwa par. Dok pe watwero gengo pol pa jami magi ki timme. Me labolle, pe watwero gengo wel cam, bongi, ki wel odi ki medde mwaka ki mwaka; pe bene waromo gengo lutic luwotwa nyo lutino kwan luwotwa ki bitowa me timo jami ma pe atir nyo donyo i tim tarwang. Dok pe waromo gengo tim bwami i kabedowa.  Wakato ki i pekki magi pien watye ka kwo i lobo ma pol pa danone pe gitamo ma lubbe ki cik me Baibul. Medo i kom meno, Catan, ma en aye obedo lubanga me lobo man, ngeyo ni jo mogo gibiye ni “paro lok me lobo man” ogenggi woko ki tic pi Jehovah. (Mat. 13:22; 1 Jon 5:19) Dong pe watye ki ur ni lobo man opong ki jami ma kelo par!

4. Ngo ma romo timme ka wabedo ki par mukato kare woko?

⁴ Par twero bwoyowa matek adada ma weko pe dong watamo pi gin mo mukene mapat. Me labolle, watwero bedo ki par ni pe wabitiyo cente muromo me wilo jami ma mitte pi kwowa nyo ni komwa bibedo lit ma biweko wabikeng tic nyo bene warwenyo ticwa woko. Watwero bene bedo ki par ni wabituro cik pa Lubanga ka kibitowa. Cokcok-ki, Catan bitic ki jo ma gicwake me monyo jo pa Lubanga. Pi meno watwero bedo ki par i kom kit ma wabidok kwede i kom lwenygi meno. Waromo bedo ka pennye kekenwa ni, ‘Tika rac me paro pi jami ma kit meno?’

5. Yecu onongo tye ka lok i kom ngo i kare ma owaco ni: “Pe wubed ki tam mapol”?

⁵ Wangeyo ni Yecu owaco bot lulub kore ni: “Pe wubed ki tam mapol.” (Mat. 6:25) Tika man tyen lokke ni Yecu onongo tye ka waco ni pe wabed ki par mo keken? Pe tye kit meno! Ki lok ada, i kare mukato lutic pa Jehovah mukene bene gulwenyo ki par, ento pe gurwenyo cwakke. * (1 Luker 19:4; Jab. 6:3) Yecu onongo tye ka cuko cwinywa. En onongo pe mito ni wabed ki par mukato kare woko i kom nongo jami ma mitte pi kwo ma weko tic pi Jehovah pe bedo gin ma pire tek i kwowa. Dong, ngo ma waromo timone ka watye ki par?​—Nen bok ma wiye tye ni “ Kit me Timone.”

6. Ma lubbe ki Jo Pilipi 4:6, 7, gin ango ma twero konyowa me dwoko parwa piny?

⁶ (1) Leg kare ducu. Lukricitayo ma gitye i lyeto gitwero bedo ki wic ma opye mot ka gulego bot Jehovah ki cwinygi ducu. (1 Pet. 5:7) Jehovah twero gamo legani ki mini “kuc pa Lubanga ma kato ngec pa jo ducu.” (Kwan Jo Pilipi 4:6, 7.) Jehovah dwoko parwa piny kun tiyo ki cwiny mere maleng.​—Gal. 5:22.

7. Gin ango ma myero wiwa opo iye ka watye ka lega bot Lubanga?

⁷ Ka itye ka lega bot Jehovah, tite kit ma iwinyo kwede kikome. Tite pekoni kikome, ki kit ma peko meno weko iwinyo kwede. Ka twere me cobo peko meno, lege wek omini ryeko me ngeyo gin me atima kacel ki kero me timone. Ka pe tye gin mo ma itwero timone me cobo peko meno, leg Jehovah wek okonyi pe me bedo ki par mukato kare woko. Ka itito pekoni kikome i lega, ci ibineno kit ma Jehovah bigamone kwede ka kare woto ki kato. Ka pe kigamo legani cutcut i nge lega, pe iil cingi woko. Jehovah pe mito ni ititte kit ma iwinyo kwede kikome keken, ento bene mito ni idi cwinyi i lega.​—Luka 11:8-10.

8. Jami ango ma omyero watit i legawa?

⁸ Ka itye ka bolo parri bot Jehovah i lega, bedo ber ka ipwoye bene. Ber bene  me tam i kom jami mabeco ducu ma watye kwede, kadi bed watye ki pekki mapol. Ento ngo ma myero itim ka pe itwero nongo lok mupore me tito ki Jehovah kit ma iwinyo kwede? Wi opo ni Jehovah bigamo legani kadi bed gin ma itwero wacone keken aye ni ‘Konya ba!’​—2 Tekwaro 18:31; Rom. 8:26.

9. Watwero nongo kuc me ada nining?

⁹ (2) Jenge i kom ryeko pa Jehovah, ento pe megi. I kare pa lanebi Icaya, Lujudaya onongo gitye ki lworo ni jo Aciria bilweny i komgi. Kit macalo Lujudaya onongo pe gimito ni gibed i te loc pa jo Aciria, gin gupenyo kony ki bot Ejipt. (Ic. 30:1, 2) Jehovah ocikogi ni geno Ejipt bikelo peko keken. (Ic. 30:7, 12, 13) Jehovah otiyo ki lanebi Icaya me tito ki Lujudaya kit ma gitwero nongo kwede kuc me ada. En owaco ni: ‘Ka wubedo mot kun wugeno Jehovah, wubinongo teko.’​—Ic. 30:15b.

10. I kare mene ma watwero nyuto genwa i kom Jehovah?

¹⁰ Watwero nyuto genwa i kom Jehovah nining? Nen kong labol mogo. Ket kong ni kimini tic mo ma culle tye lamal ento ma biweko itiyo pi cawa malac dok bigengi ki tic pi Jehovah kit ma itye ka timone i kare-ni. Nyo go kong ni ngat mo i ka ticci ocako nyuto miti i komi, ento ngat meno pe tye latic pa Jehovah ma onongo batija. Nyo go kong ni watti mo macok owaco ni ebikweri woko ka pe ijuko tic pi Jehovah. Jami magi ducu biweko ibedo ki tam matek adada me amoka, ento i gin ducu ki acel acel, Jehovah bimini tira ma imito. (Mat. 6:33; 10:37; 1 Kor. 7:39) Lapeny dong tye ni, Tika ibigeno Jehovah ci ilubo tirane?

11. Labol mene me Baibul ma waromo kwanone wek okonywa me bedo ma wiwa opye mot ka watye ka kato ki i aunauna?

¹¹ (3) Nong pwony ki i lanen mabeco ki maraco. Baibul tye ki lanen mapol ma nyuto ni pire tek ni omyero wabed ma wiwa opye mot kun wageno Jehovah. Ka iwoto ki kwano labol magi, tam i kom gin ma oweko lutic pa Lubanga gubedo ma wigi opye mot kadi bed gukemme ki aunauna matek. Me labolle, i kare ma Lukiko pa Lujudaya omiyo rukca ni lukwena myero gujuk tito kwena, man pe omyelo komgi. Me ka meno, ki tekcwiny gin gutito ni: “Myero wawiny Lubanga makato dano.” (Tic 5:29) Kadiwa i ngeye ma kigoyogi, lukwena komgi pe omyel. Pingo? Pien onongo gingeyo ni Jehovah tye kwedgi. Cwinye onongo yom i komgi. Pi meno, gumedde ki tito kwena maber-ri. (Tic 5:40-42) I yo acel-lu, i kare ma kicok neko Citefano, en obedo ki kuc madwong adada mumiyo wange onongo nen “calo wang lamalaika.” (Tic 6:12-15) Pingo? Pien en onongo ngeyo ni etye ki cwak pa Jehovah.

12. Ma lubbe ki 1 Petero 3:14 ki 4:14, pingo watwero bedo ki yomcwiny ka kitye ka unowa?

¹² Lukwena onongo gitye ki lanyut ma nyuto ka maleng ni gitye ki cwak pa Jehovah. En onongo ominigi teko me timo tango. (Tic 5:12-16; 6:8) Ento pe tye kit meno i kare-ni. Kadi bed kit meno, ki mar, Jehovah otiyo ki Lokke me tittiwa ni ka waneno can pi lubo kit ma atir, cwinye bedo yom i komwa dok cwiny mere maleng bedo kwedwa. (Kwan 1 Petero 3:14; 4:14.) Pi meno, me ka bedo ka paro kit ma wabidok kwede i kom aunauna, omyero waket cwinywa i kom gin ma watwero timo kombeddi me dongo  tekcwiny i kom kero pa Jehovah me konyowa ki larowa. Kit ma lukwena gutimo kwede, wan bene myero wagen cikke pa Yecu ni: “Abimiyowu twero me dok ki ryeko, ma ngat mo i kin lukworwu pe bitwero ette i kome, kadi pyem kwede.” Yecu bene ocikke botwa ni: “Ka wudiyo cwinywu, ci wubilaro kwowu.” (Luka 21:12-19) Dok wi pe owil ni Jehovah gwoko i tamme jami ducu madok i kom luticce ma gugwoko gennegi wa i to. En bitic ki ngec meno me cerogi.

13. Adwogi maber ango ma waromo nongone ka wakwano labol pa jo ma komgi omyel dok pe gugeno Jehovah?

¹³ Waromo nongo pwony bene ki i lanen pa jo ma komgi omyel dok pe gugeno Jehovah. Kwano labol maraco magi bikonyowa pe me timo bal acel ma gutimo-ni. Me labolle, i kare ma Aca odoko kabaka me Juda dok mony madit adada obino ka monnye, en ojenge i kom Jehovah dok Jehovah ogoyo laane i kome kun konye me loyo lweny. (2 Tekwaro 14:9-12) Lacen, Kabaka Baaca me Icrael obino ka lweny i kome ki mony manok. Ento i wang-ngi Aca pe ojenge i kom Jehovah me larre kit ma onongo otimo con. Me ka meno, en oculo jo Ciria me konye. (2 Tekwaro 16:1-3) Dok i agikki me kwone, ma onongo kome lit adada, en pe ojenge i kom Jehovah wek okonye.​—2 Tekwaro 16:12.

14. Gin ango ma wapwonyo ki i tam marac ma Aca omoko?

¹⁴ I acakkine, Aca oyenyo kony ki bot Jehovah i kare ma okemme ki peko. Ento lacen en pe ojenge i kom Lubangane pi kony. Me ka meno, en otute me cobo pekone kene. I acakkine, pulan pa Aca me nongo kony ki bot jo Ciria me lweny i kom jo Icrael onongo twero nen calo obedo tam maber. Ento kuc meno pe orii pi kare malac. Jehovah otiyo ki lanebi me tite ni: “Pien in dong igeno kabaka me Ciria, pe igeno Rwot [Jehovah] Lubangani, omiyo mony pa kabaka me Ciria guringo woko ki boti.” (2 Tekwaro 16:7) Omyero wagwokke adada ki tam ni watwero cobo pekowa piwa kenwa labongo yenyo kony ki bot Jehovah kun watiyo ki Lokke. Kadi bed mitte ni wamok tam moni oyotoyot, omyero wabed ki wic ma opye mot kun wageno Jehovah, ci en bikonyowa me moko tam ma atir.

15. Ngo ma watwero timone ka watye ka kwano Baibul?

¹⁵ (4) Mak i wi tyeng mogo me Baibul. Ka inongo tyeng mogo ma nyuto kit ma pire tek kwede me bedo ma wi opye mot kun igeno Jehovah, tem makogi i wi. Me po i komgi, twero bedo me kony ka ikwanogi ki dwan malongo nyo icoyogi piny dok ibedo ka kwanogi kare ducu. Jehovah otito ki Yocwa ni obed ka kwano buk me Cik kare ducu ki dwan ma winye wek en omok tam me ryeko. Jami ma en okwano i Cik onongo bene bikonye pe me bedo ki lworo ento me bedo ki tekcwiny me telo jo pa Lubanga. (Yoc. 1:8, 9) Tyeng mapol i Lok pa Lubanga twero konyi me bedo ma wi opye mot ka itye ka kato ki i jami ma twero keli par mapol nyo lworo.​—Jab. 27:1-3; Car. 3:25, 26.

16. Jehovah tiyo ki kacokke nining me konyowa me bedo ma wiwa opye kun wagene?

¹⁶ (5) Ribbe kacel ki jo pa Lubanga. Jehovah tiyo ki omegiwa ki lumegiwa me konyowa me bedo ma wiwa opye mot kun wagene. I cokkewa, wanongo adwogi maber ki i pwony ma kimiyo ki i wi abam, lagam ma dano miyo, ki bene  boko lok me cuko cwiny ki omege ki lumege. (Ibru 10:24, 25) Wanongo bene cuko cwiny ka wanywako kit ma wawinyo kwede ki luremwa ma wagenogi i kacokke. “Lok maber me kica” ma oa ki bot laremwa twero konyowa adada me dwoko parwa piny.​—Car. 12:25.

17. Ma lubbe ki Jo Ibru 6:19, gen ma watye kwede i kom Ker-ri twero konyowa nining ka watye ka kato ki i peko?

¹⁷ (6) Gwok genni obed matek. Genwa i kom Ker-ri tye “macalo lajuk me mel, ma cwinywa cung iye matek,” dok konyowa me bedo ma wiwa opye mot ka watye ka kato ki i peko. (Kwan Jo Ibru 6:19.) Lwod lok i kom anyim ma Jehovah ocikke pire. I kare meno, ngat mo pe bibedo ki gin mo ma kele par. (Ic. 65:17) Go kong ni itye i lobo manyen, ka ma jami ma kelo par bibedo pe iye. (Mika 4:4) Genni bene jing ka iwoto ki nywakone ki jo mukene. Tute ki tekoni ducu i tic me tito kwena ki loko dano. Ka itimo kit meno, ci ‘gin ma iketo iye genni-ni bicobbe kakare.’​—Ibru 6:11.

18. Ariya ango ma watwero geno ni wabikato ki iye i kare me anyim, dok waromo loyogi nining?

¹⁸ Ka lobo man woto ki nyikke cok ki agikkine, wabimedde ki kato ki i jami ma keliwa par. Ginacoyawa me mwaka 2021 twero konyowa me kato ki i pekki magi kun wabedo ma wiwa opye mot, pe pi tekowa, ento pi gen ma watye kwede i kom Jehovah. I mwaka-ni, wanyutu ki i ticwa ni watye ki niye i kom cikke pa Jehovah ni: “Ka wubedo mot ki gen, wubinongo teko.”​—Ic. 30:15.