1. Pwony ma kimiyo i gure mo madit i mwaka 1935 ogudo awobi mo nining?

ONONGO tye jo me ot mo ma gin Lutino Kwan me Baibul, ma meno aye nying ma onongo kilwongo kwede Lucaden pa Jehovah i kare mukato angec. Lunyodo man onongo gitye ki awobe adek ki anyira aryo, dok gupwonyo lutinogi magi me maro Jehovah ki lubo lanen pa Yecu. Wodgi acel onongo tye ki mwaka 18 i kare ma onongo batija i mwaka 1926. Calo Lutino Kwan me Baibul ducu i kare meno, awobi man ma lagen-ni onongo camo mugati dok mato vino i Nipo mwaka ki mwaka. Ento, genne pi anyim olokke woko i kare ma en owinyo pwony ma pire tek ma wiye tye ni “Lwak Dano Mapol Ata-ni.” Omego J. F. Rutherford aye omiyo pwony meno i mwaka 1935 i gure madit mo ma obedo i boma me Washington, D.C., i lobo Amerika. Gin ango ma Lutino Kwan me Baibul gupwonyo i gure meno?

2. Lok ada manyen mene ma Omego Rutherford otito i pwonye?

² I pwony meno, Omego Rutherford otito angagi ma gubedo “lwak dano mapol ata” ma kiloko i komgi i Niyabo 7:9. Nio wa i kare meno, Lutino Kwan me Baibul onongo gitamo ni gurup man bene gibicito ka kwo i polo ento pe gibiloc kacel ki Yecu pien pe gubedo lugen tutwal. Omego Rutherford otiyo ki Ginacoya me tito ni lwak dano mapol ata-ni pe kiyerogi me cito ka kwo i polo, ento gubedo romi mukene * pa Kricito ma gibikato ki i twon “can madit  atika” dok gibikwo pi naka i lobo. (Yabo 7:14) Yecu ocikke ni: “Atye ki romi mukene bene, ma pe me dwol man; myero akelgi bene, gibiwinyo dwana. Kit meno bibedo lwak acel ki lakwat acel.” (Jon 10:16) ‘Romi mukene-ni’ gubedo Lucaden pa Jehovah ma lugen ma gitye ki gen me kwo pi naka i paradic i lobo kany. (Mat. 25:31-33, 46) Kong dong wanenu kit ma niango manyen man madok i kom ada me Baibul oloko kwede kwo pa jo pa Jehovah mapol, kadiwa omego-ca ma onongo tye ki mwaka 18 i kare meno.​—Jab. 97:11; Car. 4:18.

3-4. I gure madit ma obedo i mwaka 1935, gin ango ma dano alip mapol guniang iye madok i kom gengi, dok pingo?

³ Kare me yomcwiny adada i gure man obedo i cawa ma lalok olego lwak ni: “Jo ducu ma gitye ki gen me kwo pi naka i lobo kong dong gua malo!” Omego mo ma obedo tye i gure meno owaco ni eneno ni nucu pa dano ma gubedo i gure man gua malo. Ci Omego Rutherford owaco ni: “Wunen! Lwak dano mapol ata-ni!” I nge lokke meno, dano ducu ma gitye i gure gudongo cinggi matek adada. Jo ma gucung malo-ni guniang ni pe kiyerogi me kwo i polo. Onongo bene gingeyo ni pe kiwirogi ki cwiny maleng pa Lubanga. Orwone i gure man, dano 840 gunongo batija macalo Lucaden, ma polgi onongo gubedo romi mukene-ni.

⁴ I nge pwony meno, omego matidi ma kiloko i kome con-ni kacel ki dano alip mapol mukene gujuko camo mugati ki mato vino i Cam me Otyeno pa Rwotwa. Polgi onongo bene giwinyo kit ma omego mo mamwol owaco kwede ni: “Nipo me mwaka 1935 obedo tyen me agikki ma acamo kwede mugati dok amato vino. Aniang ni Jehovah pe otiyo ki cwiny mere maleng me mina gen me kwo i polo; me ka meno, onongo atye ki gen me kwo i lobo ki me konyo me lokone wek odok paradic.” (Rom. 8:16, 17; 2 Kor. 1:21, 22) Cakke i kare meno, lwak dano mapol ata-ni welgi tye ka medde adada dok gitye ka tic kacel ki udong * jo ma kiwirogi.

5. Jehovah neno jo ma gugiko camo mugati ki mato vino i Nipo nining?

⁵ Jehovah neno jo ma gugiko camo mugati ki mato vino i Nipo i nge mwaka 1935 nining? Dok i kare-ni Jehovah tamo nining i kom Lacaden ma onongo batija ma tamo ni myero ecam mugati dok emat vino i Nipo ento lacen oniang ni pe kiwire ki cwiny maleng? (1 Kor. 11:28) Jo mogo gubedo ka camo mugati ki mato vino pien onongo pe guniang gengi. Ento ka guye balgi ci gugiko camo ki mato dok gumedde ki tic pi Jehovah, ngene kene ni en bijologi i kin romi mukene-ni. Kadi bed pe gicamo mugati dok pe gimato vino, pud gimedde ki bedo tye i Nipo pien gitye ki pwoc madit adada pi gin ma Jehovah ki Yecu otimo pigi.

6. Gin ango ma Yecu ociko lumalaika ni gutim?

⁶ Kit macalo twon can madit atika-ni bicakke cokcok-ki, bibedo me cuko cwiny adada ka wanyamo gin ma Niyabo cura 7 waco i kom Lukricitayo ma kiwirogi kacel ki lwak dano mapol ata-ni. Yecu  ociko lumalaika ni omyero gumedde ki mako yamo me balo piny. Myero pe guwek yamo man ocak kodo i wi lobo wang ma kityeko keto lanyut i tur nyim Lukricitayo ma kiwirogi. Lanyut meno tyen lokke ni Jehovah omoko ni gugwoko gennegi. (Yabo 7:1-4) Macalo mot pi bedo lugen, omegi Kricito ma kiwirogi gibidoko luker ki lulamdog kacel kwede i polo. (Yabo 20:6) Jehovah, Yecu, kacel ki lumalaika gibibedo ki yomcwiny madit adada me neno ka dano 144,000 ginongo motgi me kwo i polo.

7. Kit ma kinyuto kwede i Niyabo 7:9, 10, angagi ma Jon onenogi i ginanyuta, dok onongo gitye ka timo gin ango? (Nen cal ma i pok ngeye.)

⁷ I nge lok i kom luker ki lulamdog 144,000 magi, Jon oneno gin mo ma oyomo cwinye matek. En oneno “lwak dano mapol ata” ma gibikato ki i Armagedon. Gurup aryo magi gipat pien “lwak dano mapol ata” welgi dit kato dano 144,000, dok pe wangeyo welgi kikome. (Kwan Niyabo 7:9, 10.) “Gurukke ki jor matar” ma nyuto ni gubedo ka ‘gwokke i kom bal’ ma i lobo pa Catan dok gugwoko gennegi bot Lubanga ki Kricito. (Yak. 1:27) Gidange ni kilarogi pi gin ma Jehovah ki Yecu, ma en aye Latin romo pa Lubanga gutimo. Medo i kom meno, gumako jang otit, ma nyuto ni gin gujolo Yecu macalo Kabaka ma Jehovah ocimo.​—Por ki Jon 12:12, 13.

8. Gin ango ma Niyabo 7:11, 12 tittiwa madok i kom Jehovah, Yecu, lumalaika, ki dong Lukricitayo ma kiwirogi ma dong gucer woko?

⁸ Kwan Niyabo 7:11, 12. Ngo mutimme i kare ma jo ma i polo guneno lwak dano mapol ata-ni? Jon oneno ni jo ducu ma i polo cwinygi obedo yom dok gupako Lubanga i kare ma guneno lwak dano mapol ata-ni. Jo ma i ot pa Jehovah i polo cwinygi bibedo yom me neno ka ginanyuta man cobbe i kare ma nongo lwak dano mapol ata-ni gikato ki i Armagedon makwo.

9. Ma lubbe ki Niyabo 7:13-15, gin ango ma lwak dano mapol ata-ni gitye ka timone i kare-ni?

⁹ Kwan Niyabo 7:13-15. Jon ocoyo ni lwak dano mapol ata-ni “dong gutyeko lwoko jorgi i remo pa Latin romo odoko matar adada.” Man tyen lokke ni cwinygi leng dok Jehovah cwinye yom i komgi. (Ic. 1:18) Gin gubedo Lukricitayo ma gudyere dok gunongo batija, dok gitye ki niye matek i kom ginkok pa Yecu kacel ki wat maber ki Jehovah. (Jon 3:36; 1 Pet. 3:21) Pi meno, gupore me cung i nyim komker pa Lubanga kun “gitiyo bote i ode dyeceng ki dyewor” i wi lobo kany. I kare-ni, komgi mit dok gitiyo pol pa tic me tito kwena me Ker-ri ki loko dano, pien Ker pa Lubanga aye obedo gin ma pire tek loyo botgi.​—Mat. 6:33; 24:14; 28:19, 20.

10. Gin ango ma lwak dano mapol ata-ni gitye ki gen iye, dok cikke mene ma gibineno cobbene?

¹⁰ Lwak dano mapol ata-ni ma gibikato ki i Armagedon gingeyo ni Lubanga bimedde ki gwokogi pien Baibul waco ni “ngat ma obedo i wi komker bigwokogi i te locce.” Cikke ma romi mukene-ni gubedo ka kurone pi kare malac bicobbe i kare meno: “[Lubanga] bijwayo pig wanggi woko ducu. To bene dong bibedo pe, kadi kumo nyo koko, nyo arem, pien gin macon dong ducu gurwenyo woko matwal.”​—Yabo 21:3, 4.

11-12. (a) Mot ango ma Niyabo 7:16, 17 waco ni lwak dano mapol ata-ni gibinongo i anyim? (b) Gin ango ma romi mukene-ni gitwero timone i kwer me Nipo, dok ngo ma tugo cwinygi me timo meno?

¹¹ Kwan Niyabo 7:16, 17. I kare-ni, jo  pa Jehovah mukene gibuto kec pien pe gitye ki cente muromo me wilo cam ma mitte nyo bene macalo adwogi me kukukuku nyo lweny. Jo mukene kitweyogi i buc pi niyegi. Kadi bed kit meno, lwak dano mapol ata-ni cwinygi yom pien gingeyo ni ka gubwot ki i jwero lobo man marac-ci, gibibedo ki cam muromo kacel ki tira ma a ki bot Jehovah. I kare me jwero lobo pa Catan-ni, Jehovah bineno ni egwoko lwak dano mapol ata-ni ki i akemone, ma kiporo ki “lyeto.” Ka kare me twon can madit atika-ni dong otum, Yecu bitelo jo ma gubwot-ti “terogi i wang it me pii me kwo” nyo ni bikonyogi me nongo kwo ma pe tum. Tam kong: Lwak dano mapol ata-ni gitye ki gen mo mamwonya adada. I kin dano bilion mapol ata ma gukwo i lobo-ni, gin keken aye gitwero kwo matwal labongo bilo to!​—Jon 11:26.

¹² Romi mukene-ni gitye ki gen mamwonya adada mumiyo gipwoyo Jehovah ki Yecu! Kadi bed ni Jehovah pe oyerogi me kwo i polo, en marogi marom aroma ki kit ma maro kwede jo ma kiwirogi. Jo ma kiwirogi kacel ki romi mukene-ni gitwero pako Lubanga ki Kricito. Yo acel ma gitimo kwede meno aye ki bedo tye i Cam me Otyeno pa Rwotwa.

13-14. Pingo jo ducu omyero gubed tye i kwer me Nipo me to pa Kricito?

¹³ I mwaki mogo macok cok-ki, dano acel keken i kin dano 1,000 ma gibedo tye i Nipo aye camo mugati dok mato vino. Pol pa kacokke ma i wi lobo pe gitye ki ngat mo ma camo mugati dok mato vino i Nipo. Pol pa jo ma gibedo tye i kwer me Nipo gitye ki gen me kwo i lobo. Dong pingo gibedo tye i Cam me Otyeno pa Rwotwa? Gibedo tye pi tyen lok acel mumiyo dano gibedo tye i nyom pa laremgi. Gicito i nyom man pien nongo gimito nyuto mar ki cwakgi pi lunyom-mi. I yo acel-lu, romi mukene-ni gibedo tye i kwer me Nipo pien gimito nyuto margi ki cwakgi pi Kricito kacel ki jo ma kiwirogi. Romi mukene-ni bene gibedo tye i Nipo me nyuto pwocgi pi ginkok pa Yecu. Ginkok man biweko twere botgi me kwo pi naka i lobo kany.

 ¹⁴ Tyen lok mukene ma pire tek mumiyo romi mukene-ni gibedo tye i Nipo aye pien gitye luwiny i kom cik ma Yecu omiyo. I kare ma Yecu okwero Cam me Otyeno pa Rwot mukwongo kacel ki lukwenane ma lugen, en owaccigi ni: “Wutim kuman me po pira.” (1 Kor. 11:23-26) Pi meno, romi mukene-ni gibimedde ki kwero Cam me Otyeno pa Rwot ka jo ma kiwirogi mogo pud gitye kwo i lobo kany. Ki lok ada, romi mukene-ni gilwongo jo mukene bene me bedo tye i kwer me Nipo kacel kwedgi.

15. Gin ango ma watwero timo me pako Lubanga ki Kricto i kwer me Nipo?

¹⁵ I kwer me Nipo, wabedo ki kare me pako Lubanga ki Kricito i wer ki lega. Wi pwony ma kibimiyo i mwaka-ni tye ni, “Bed ki Pwoc pi Gin ma Lubanga Gin ki Kricito Gutimo Piri!” Pwony man bidongo pwocwa pi Jehovah ki Kricito. Pi meno, ka kitye ka kato i kin dano ki mugati ki vino, wabibedo ki kare me lwodo gin ma gicung pire​—ma meno aye kom Yecu ki remone. Dok wabitamo i kom mar ma Jehovah onyuto piwa i kare ma en oye ni Wode oto piwa wek wanong kwo ma pe tum. (Mat. 20:28) Jo ducu ma gimaro Wonwa me polo ki Wode gibibedo ki miti me bedo tye i Nipo.

16. I yo ma nining ma jo ma kiwirogi ki romi mukene-ni gical?

¹⁶ I yo mogo, jo ma kiwirogi ki romi mukene-ni gical. Jehovah pe maro gurup acel loyo mukene-ni. Jo ma kiwirogi ki romi mukene-ni pigi tek bot Lubanga. Marre pi gurup aryo-ni tye marom. Wangeyo man pien wel ma en oculo me wilo jo ma kiwirogi ki romi mukene-ni dit adada, ma man obedo kwo pa Wode me amara. Apokapoka ma tye i kin gurup aryo-ni aye ni gitye ki gen mapatpat. Ento gurup aryo magi ducu myero gubed lugen bot Lubanga ki Kricito. (Jab. 31:23) Dok wi opo ni, Jehovah miyo cwiny mere maleng bot ngat acel acel ma lubbe ki gin ma ngat meno mito labongo paro ka en obedo ngat ma kiwirogi nyo tye i kin romi mukene-ni.

17. Jo ma kiwirogi gitye ka kuro mot ango?

¹⁷ Lukricitayo ma kiwirogi pe kinywalogi ki gen me cito i polo. Lubanga aye myero oket i cwinygi. Gitamo i kom gengi, gilego pire, dok gitye ki miti madwong me nongo motgi me kwo i polo. Pe gingeyo kit ma komgi bibedo kwede ka gitye i polo. (Pil. 3:20, 21; 1 Jon 3:2) Kadi bed kit meno, gitye ka kuro rwatte ki Jehovah,  Yecu, lumalaika, kacel ki jo mukene ma kiwirogi. Gitye bene ki miti madwong me bedo kacel kwedgi i Ker me polo.

18. Gin ango ma romi mukene-ni gitye ka kurone?

¹⁸ Romi mukene-ni gitye ka kuro kwo pi naka i lobo kany. Man obedo miti ma dano ducu gitye kwede. (Latit. 3:11) Gitye ka kuro kare ma gibikonyo me loko lobo ducu me doko paradic. Gitye ka kuro kare ma gibigero odigi, pito potigi, ki pito lutinogi labongo two mo keken. (Ic. 65:21-23) Gitye ka kuro limo kabedo mapatpat i lobo kany​—neno godi, bunga, nam madongo​—ki ngiyo matut cwec pa Jehovah ducu. Ento gin ma dong yomo cwinygi ma loyo ducu aye me ngeyo ni watgi ki Jehovah bimedde ameda ki doko matek.

19. Kwer me Nipo miyo botwa ki acel acel kare me timo ngo, dok kibikwero Nipo awene i mwaka-ni?

¹⁹ Jehovah omiyo ki laticce acel acel ma odyere gen mamwonya adada pi anyim. (Jer. 29:11) Kwer me Nipo me to pa Kricito miyo bot wan ducu kare me pako Lubanga kacel ki Kricito pi gin ma gutimo piwa wek wanong kwo ma pe tum. Kwer me Nipo obedo cokke ma pire tek loyo ma Lukricitayo me ada gibedo kwede mwaka ki mwaka. I mwaka-ni kwer man bibedo i otyeno i Ceng Abicel, nino dwe 27 me Marci, 2021. I mwaka-ni, pol pa dano gibibedo agonya me bedo tye i kwer man ma pire tek-ki. Jo mogo gibibedo tye kadi bed gitye ka kato ki i aunauna. Jo mukene gibikwero Nipo i buc. Labongo paro pi kwo ma watye iye, wan ducu omyero wiwa opo ni Jehovah, Yecu, lumalaika, ki dong Lukricitayo ma kiwirogi ma gitye i polo gitye ka nenowa. Walego ni kacokke ducu, gurup, ki ngat acel acel obed ki kwer me Nipo mamwonya adada!